बाढ़, बरबादी में आस बन्हावत एगो हेल्पलाइन

मोबाइल फोन बजते, बीस बरिस के किरीत फटाफट कंप्यूटर के सामने बइठ गइलन, हेडफोन लगवलन आउर कलम हाथ में लेके डायरी खोले लगलन.

बहुते शांत बाकिर मजबूत आवाज में कहलन, “प्रणाम, शिवर हेल्पाइन.”

मोबाइल के दोसर छोर पर महाराष्ट्र के नांदेड़ जिला के एगो गांव से आवे वाली अधेड़ उमिर के मेहरारू किसान, पार्वती रहस.

“हम राउर का मदद कर सकत बानी?” किरीत मराठी में पूछलन. परभणी गांव के रहे वाला किरीत पुणे के कॉलेज में बीए साइकोलॉजी के तेसर बरिस के छात्र बाड़न.

पार्वती दुविधा में बाड़ी. उनकर आवाज कांप रहल बा.

उनकर मुंह से कइसहूं निकलल, “बरखा में हमार पूरा फसल चौपट हो गइल. सोयाबीन, तुअर... इहंवा ले कि बकरियो खतम हो गइली. अब कवनो काम नइखे बचल.” एह परिवार के आधार- खेती-बारी, पसुपालन आ ठेका मजूरी सब पानी में समा गइल. करजा ना चुकल, बाकिर आसो डूब गइल. फोन करे वाला जाने के चाहत रहे कि का आवे वाला रबी मौसम खातिर मूंग के बिया उपरा सकता.

“बिया मिल जाइत, त कम से कम ई गरमी त कट जाइत,” ऊ बुझावत कहली.

हेल्पलाइन में ट्रेनिंग ले रहल किरीत पछिला दू महीना से रोज लगभग एही तरह के किस्सा सुन रहल बाड़न. ऊ सब जरूरी बात ध्यान से नोट करेलन. कॉल करे वाला के परिवार आउर गांव पूछेलन आ बतावेलन कि उनकर बात हेल्पलाइन के प्रमुख ले पहुंचा देवल जाई. ऊ नवंबर 2025 से हेल्पलाइन में बतौर इंटर्न काम करतारन.

“काही तही जरूर होईल, काळजी करू नका (चिंता मत करीं. कोई ना कोई उपाय जरूर निकली),” ऊ तनी मोलायम आवाज में जवाब देलन. फोन करे वाली मेहरारू उनकर बेरे-बेर आभार जतावत बाड़ी, बाकिर फोन रखे से पहिले बिनती करत बाड़ी, “या बहिणीकडे लक्ष ठेवा दादा (ई बहिनी के ध्यान में रखिह भइया).”

ऊ जवाब देवत बाड़न, “काळजी घ्या (आपन ध्यान रखिह),” ऊ उनका कहलन.

दुपहरिया 12 बजे सुरु भइल ई बातचीत दस मिनिट में समाप्त हो गइल. बाकिर दुख दुनो ओरी पसरल रहल.

“हमनी सामने काम करके सीखत बानी,” किरीत कहलन. उनकर आपनो घर के हाल एकरा से अलग नइखे. एहि से ऊ फोन करे वाला के मन:स्थिति अच्छा से भांप सकेलन.

शिवर हेल्पलाइन, शिवर फाउंडेशन के गैर-लाभकारी किसान हेल्पलाइन बा. एकर दू कमरा वाला शांत दफ्तर पुणे के कोथरुड इलाका के एगो बहुते छोट आ भीड़-भाड़ वाला इमारत के चौथा मंजिल पर बा. बाहिर रोड पर ट्रैफिक के हल्ला कम-जादे होत रहता. 8955771115 नंबर पर एगो आउरी कॉल आवता. ओकरा बाद एगो आउर. किरीत एगो आउर पुकार सुने खातिर हेडफोन फेरु पहिर के तइयार बाड़न.

पछिला दू महीना में भइल भारी बरखा चलते शिवर हेल्पलाइन लाचार, परेसान किसानन खातिर अंतिम आस बन गइल बा. इहंवा हेल्पलाइन पर रोज मोटा-मोटी बीस कॉल आवेला. कुछ कॉल त एक घंटा से लंबा चलेला.

महाराष्ट्र के नक्सा, हेल्पलाइन के पोस्टर, जरूरी नोट आ कागज सब शिवर ऑफिस के देवाल पर लगावल बा. ई सब इंटर्न लोग के इयाद दिलावत रहेला कि हर फोन के पाछू केहू लाचार फरियादी बा. एह हेल्पलाइन के संसाधन सीमित, बाकिर संवेदना असीम बा. एकर नंबर सोशल मीडिया आ लोग के मुंहे-मुंहे बहुते दूर ले फइल गइल बा.

सब फोन महाराष्ट्र के बरखा में तबाह भइल गांव-देहात से आवेला. कुछ बाहरो से कइल जाला. छोट किसान, औरत आ बच्चा के कॉल आवेला. सहर में पढ़ रहल गांव के लइका लोग के भी फोन आवेला, जे आपन पुस्तैनी जमीन के करजा से बन्हाइल बा. वइसन मजूरो लोग फोन करेला, जेकर भविष्य अन्हार में बा. फोन करे वाला मोटा-मोटी हर आदमी के एके कहानी बा. करजा, घाटा, जिल्लत, चिंता आ भय. फोन करे वाला जादे करके लोग सरकार आ नेता लोग के दरवाजा खटखटा के थाक चुकल होखेला. हेल्पलाइन के टीम पहिले ओह आदमी के मदद करेला, जेकरा मन में अपना के खतम कर देवे के ख्याल आवेला.

दुपहरिया दू बजत-बजत इंटर्न आ सलाह देवे वाला (काउंसलर) लोग ऑफिस पहुंच जाला आ कंप्यूटर खोल के आपन काम में लाग जाला.

टीम में जादेतर नयका उमिर के इंटर्न लोग बा, जेकरा मिहनताना मिलेला. एकरा में से जादे करके किसान घर से आवे आ मनोविज्ञान पढ़े वाला नौजवान लोग बा. जइसे कि किरीत, चाहे जालना के एगो गांव से आवे वाला उनकर 21 बरिस के दोस्त सुरेस, चाहे गढ़चिरौली के देहात से आवे वाला गिरीस.

कॉल के बीच में किरीत बतियावतो जात बाड़न. उनकर कहनाम बा, “जादे करके लोग मदद मांगे में सकुचाला. सोचेला कि अइसन करे से इज्जत घट जाई. बाकिर जब सब दरवाजा बंद हो जाला, तब जाके ऊ लोग हमनी के फोन करेला.”

अगिला फोन पुणे में पढ़ रहल, नांदेड़ गांव से आवे वाला एगो परेसान जवान लइकी के बा.

“हम पुणे में एगो कमरा में 10 से 12 लोग संगे रहिला आ पढ़िला. किराया देवे, टिफिन कीने खातिर हमरा लगे पइसा नइखे, हमनी में से केहू लगे पइसा नइखे बचल. माई-बाऊजी लगे कुछ नइखे कि ऊ लोग हमनी के भेजो. बरखा सब बरबाद कर देलक.”

ऊ एक महीना के भाड़ा आ खाना खातिर पइसा के मदद चाहत बाड़ी.

उनकर नाम जल्दिए हेल्पलाइन के एगो अलग सूची में लिखा जाई. एह सूची में तवन जवान लइका-लइकी के नाम बा, जे पुणा के बिस्वविद्यालय में पढ़ रहल बा आउर महाराष्ट्र के देहात से आइल बा. एह लोग के भाड़ा, खाना आ आर्थिक मदद के तुरंत दरकार बा.

एगो दोसर कॉलर, धाराशिव के एगो चरवाहा बाड़न. उनकर आमदनी के एकमात्र जरिया, बकरी सब बाढ़ में बह गइल. उनकर हालत पस्त बा, रोजी-रोटी के सहारा खतम हो चुकल बा. ऊ बहुते डेराएल बाड़न.

हेल्पलाइन के 23 सितंबर से 23 अक्टूबर 2025 के रिकॉर्ड देखल जाव, त राउर रोंगटा खड़ा हो जाई. एह बीच कोई दस हजार कॉल आइल, आ सबके सब सुनल गइल. एतना लोग के कॉल संभारे खातिर शिवर से आउर वॉलंटियर बोलावल गइल.

एक दिन त 894 कॉल आइल. ओह में से कम से कम 180 लोग अपना के खतम करे के सोचत रहे.

विनायक हेगन्ना इयाद करत बाड़न, “फोन के बाढ़ आ गइल रहे.” 31 बरिस के विनायक शिवर के फाउंडर आ सीईओ बानी. एगो पढ़ल-लिखल मनोवैज्ञानिक आ समाज सेवक, विनायक गांव-देहात के लोग के संकट बहुत नजदीक से देखले बाड़न.

फोन के बाढ़ से हेगन्ना आ उनकर उत्साही टीम ना हिलल, बाकिर मौसम के बिगड़ल मिजाज, इंसानी गलती आ कमजोर सरकारी संस्थान ओह लोग के जरूर हिला देलक.

“फोन कॉल से महाराष्ट्र भर के लोग के चिंताजनक स्थिति के बारे में पता चलेला,” 2023 के चेवेनिंग फेलो हेगन्ना पारी के हेल्पलाइन ऑफिस में बतइलन. बीच-बीच में ऊ फोन उठावत, बात करत आ आपन टीम के निर्देश देत जात रहस. “ई संकट बड़ा गहिर बा.”

पछिला कोई तीस बरिस से महाराष्ट्र, खास करके विदर्भ आ मराठवाड़ा के इलाका खेती-बारी के गहिर संकट में फंसल बा. नतीजा, किसान लोग लगातार आपन जान दे रहल बा. राष्ट्रीय अपराध रिकॉर्ड ब्यूरो (एनसीआरबी) के सलाना रिपोर्ट एडीएसआई (भारत में अकस्मात मृत्यु आ आत्महत्या) सुरु भइला के बाद से अबले 60,000 से जादे किसान लोग आत्महत्या से जान गंवा चुकल बा. अबकी बरिस तेज बरखा के बाद अचानक आइल बाढ़ से राज्य के कइएक हिस्सा में फसल बरबाद हो गइल. ई स्थिति पहिलहीं से मुस्किल में फंसल किसान लोग खातिर नया चुनौती लेके आइल.

“जलवायु सकंट से खाली आर्थिके ना, बकुल दिमागियो सेहत के खतरा बा.”

मूसलाधार बरखा में 24 सितंबर 2025 के रोज, 42 बरिस के लक्ष्मण गावसाने रासन कीने सहर निकलल रहस, तबे उनकर आपन घरवाली शिवकन्या के अंतिम बेरा फोन पर बात भइल रहे.

ई छोट-मोट किसान, मजूरियो करत रहस आउर जब जवन काम मिल जाए, उहो कर लेत रहस. आपन बेटी वैष्णवी आ बेटा शिवशंकर के पढ़ावे-लिखावे के उनकर सपना रहे. वैष्णवी सोलापुर जिला के बार्शी कस्बा में फार्मेसी डिप्लोमा के आखिरी साल में बाड़ी. शिवशंकर धाराशिव में तकनीकी पढ़ाई में डिप्लोमा कर रहल बाड़न.

ओह दिनवा फोन पर बात भइला के बाद ऊ घर ना लउटलन. अगिला दिन भोर में जब पानी लगातार बरसत रहे, गांव के रोड किनारे एगो खेत में उनकर निष्प्राण देह मिलल. ई सब उनकर पड़ोसी सोमनाथ आंदलकर एह रिपोर्टर के बतवलन. केतारी के घना झाड़ी में उनकर भींजल देह आ रासन से भरल झोरा पड़ल मिलल. ऊ अपना पाछू एगो चिट्ठी छोड़ गइलन. एकरा में स्थानीय नेता लोग से उनकर बच्चा लोग के पढ़ाई पूरा करे में मदद करे के अपील कइल गइल बा.

गावसाने खुद आउर ना उनकर परिवार कबो एह हेल्पलाइन के बारे में सुनले रहे. सुनले रहित, त सायद ऊ आज जिंदा रहतन.

सोलापुर के बार्शी तहसील के दहिताने गांव में मातम छा गइल. बरखा थमे के नाम ना लेवत रहे, बढ़िया फसल के सपना माटी में मिल गइल रहे. गावसाने के खेती पानी पर निर्भर ना रहे, ऊ आपन डेढ़ एकड़ जमीन पर सोयाबीन लगावत रहस. साल सुरु भइल रहे, पाइल्स के ऑपरेशन में उनकर मोटा-मोटी पचास हजार रुपइया स्वाहा हो गइल. ई पइसा दोस्त आ रिस्तेदार से मांगल रहे. ओने शिवकन्यो स्वयं सहायता समूह से कुल मिला के 50,000 के करजा उठइले रहस.

स्थिति बद से बदतर भइल जात रहे. मिहनत-मजूरी करे वाली शिवकन्या हारल आवाज में पारी के सब बतावत रहस. ऊ बीड आ धाराशिव के छोर पर आपन गांव के दू कमरा वाला छोट घर में बइठल रहस.

गावसाने के आपन लइका लोग के होस्टल, खाना आ कॉलेज के फीस देवे खातिर महीना के तेरह हजार रुपइया के जरूरत रहे. बाकिर अबकी लगातार हो रहल बरखा चलते दुनो प्राणी के कहूं काम ना मिल सकल. ना त खेत में ना सहर में. ऊपर से आपनो खेत के फसल चौपट हो गइल. ई इलाका केतारी आ अंगूर खातिर जानल जाला. बाकिर अइसन सूखल पट्टी में, सिंचाई के साधन ना होखला से छोट किसान लोग सोयाबीन, मकई, जवार आ दोसर अनाज सब के खेती करेला. बाकिर इहंवा के जमीन ओतना उपजाऊ नइखे.

“हमनी के दुनिया अन्हार हो गइल,” उनकर घरवाली पस्त आवाज में कहली. बचवा सब के पढ़ावे खातिर मजबूर होके ऊ आपन दुख मने में दबाके काम में लाग गइल बाड़ी.

जवन दिन गवसाने खतम भइलन, इलाका के अखबार में लगे के क्षेत्र से चार आउर लोग के आत्महत्या से मरे के खबर छपल. सोलापुर जिला अगस्त 2025 के आखिर तक भारी बरखा से त्रस्त रहल. 20 से 25 सितंबर के बीच, जिला में 365.8 मिमी बरखा दरज कइल गइल. सरकारी आंकड़ा बतावता कि ई मासिक औसत 30 मिमी से 1,253 प्रतिशत बेसी रहे. अलग-अलग सर्किल में स्थिति बड़ा भयावह आ विनासकारी रहे.

शिवर हेल्पलाइन के ऑफिस में सितंबर के आखिर में आवे वाला फोन के गिनती तेजी से बढ़े लागल. अब साफ हो गइल रहे कि बात खाली फसल, चाहे पइसा के नुकसान के नइखे. अचानक बदलत परिस्थिति के झटका, मौसम के उथल-पुथल से लाग रहल सदमा, सीमित संसाधन खातिर होड़, राहत आ पुनर्वास के मांग, बच्चा सब के पढ़ाई-लिखाई, इहंवा ले कि कपड़ा आ चद्दरो खातिर मदद के गुहार. ई सब चलते गांव के लोग सदमा में रहे.

20 से 28 सितंबर के बीच, आठ दिन बंगाल के खाड़ी से आवे वाला तेज हवा आ मूसलाधार बरखा मराठवाड़ा आ पस्चिमी महाराष्ट्र पर कहर बरपा देलक. जवन नदी-नाला आमतौर पर सूखल रहत रहे, ऊ उफनत नदी बन गइल. आउर वइसन खेत सब के बहावत निकलल, जे देर से आइल मानसून से उबरे के सुरु भइल रहे. एह इलाका के लोग सुखाड़ झेले जानत रहे, बाढ़ ना.

गांव के लोग बेर-बेर बतावत बा कि कइसे हरमेसा शांत रहे वाला नाला विकराल नदी बन गइल, ओह लोग के खेत, घर आ गांव पूरा तरीका से तहस-नहस कर देलक. कि कइसे बरखा थमे के नाम ना लेवत रहे, कि कइसे छोट पोखरा सब छलके लागल, आ झील के पानी उफान मारे लागल.

खाली धराशिव जिला में एक हफ्ता में सामान्य से 376 प्रतिशत जादे पानी बरसल. एकरा से आपदा के विकरालता के अंदाजा लगावल जा सकेला, जेकरा कवनो सरकारी आंकड़ा बयान ना कर सके.

महाराष्ट्र सरकार के अनुमान बा कि मराठवाड़ा के आठ जिला में खड़ीफ फसल के 44 लाख हेक्टर, यानी कुल बोवल जमीन के एक तिहाई भाग, बरबाद हो गइल. राज्य भर में 75.42 लाख हेक्टेयर जमीन पर नुकसान भइल बा. एकरा अलावे, बाढ़ में कोई 3,600 घर तबाह हो गइल, 224 लोग आ 600 जनावर मर गइल.

पर्यावरण, समाज आ मन-मस्तिष्क पर अइसन परिस्थिति के गहरा आ लंबा समय तक असर महसूस कइल जा सकेला. बाढ़ आवेला त नदी किनारे के हरियाली बहा ले जाला, किनारा खराब कर देवेला, आ पिए के पानी के ठिकाना सब गंदा कर देवेला. ई पानी के कुदरती बहाव, जमीन में समाए वाला पानी आ बाहिर निकले वाला धारा के कुदरती रिस्ता बिगाड़ देवेला. एह सब के बीच भूजल के भराई गड़बड़ा जाला. बाढ़ से गांव-देहात के जड़ हिल जाला. खेत उजड़ जाला, मवेसी सब के नुकसान हो जाला आ जरूरी कागज सब नष्ट हो जाला. केतना लोग करजा आ पलायन के चक्की में पिसाए के मजबूर हो जाला. केतना लोग के जिनगी जिए के हौसला आ हिम्मत छूट जाला.

डॉक्टर सुभासिस कहेलन, “विपत्ति में आदमी के मन टूटी कि बची, ई बात ओकर समाज, संस्कृति, राजनीति आ आर्थिक स्थिति पर निर्भर करेला.” डॉक्टर साहब बेंगलुरु के निमहंस (नेशनल इंस्टीच्यूट ऑफ मेंटल हेल्थ एंड न्यूरो-साइंसेज) में आपदा प्रबंधन के मनो-सामाजिक सहायता विभाग के अध्यक्ष आ प्रोफेसर बानी. उहां के बीतल 25 बरिस से देस में तबाही लावे वाला आपदा से जुड़ल शोध आ मानसिक सेहत से जुड़ल काम के अगुआई करत आ रहल बानी.

ऊ चेतावत बाड़न कि मानसिक सेहत के सुधारे खातिर कइल जाए वाला मदद के दोसर कारक सबसे सबसे अलग करके ना देखल जा सके. एही से अइसन दखल आदमी, परिवार आ समाज तीनों स्तर पर होखे के चाहीं, खास करके प्राकृतिक आपदा घरिया.

“अइसन झटका लगला के बाद लोग टूटी कि उबरी, ई आपदा आवे से पहिले कइल गइल तइयारी, आपदा के समय आ बाद मिले वाला सहजोग, पैमाना आ गति पर निर्भर करेला,” ऊ बतइलन.

उनकर कहनाम बा, आपसी जुड़ाव जेतना जादे होई, आपदा से ओतने जल्दी लोग निकली.

लातूर के रहे वाला पत्रकार, लेखक आ जलवायु-परिवर्तन के बारे में जागरूकता फैलावे वाला अतुल देउलगांवकर के कहनाम बा, “15 सितंबर, 2025 के भोर में दू घंटा में बीड जिला के केज गांव में 150 मिमी बरखा भइल. कहर अइसन रहे कि गांव के भूजल भराई वाला टंकी चटक गइल, पानी बह गइल. गाछ सब उखड़ गइल, समूचा गांव पानी में डूब गइल.”

राक्षसवाड़ी गांव में गणेस सोपान गड़ादे के कुंआ गाद से भर गइल. पानी उतरल त देखलन कि उनकर खेत फुटबॉल जेतना बड़-बड़ पत्थर आ ढेला से पट गइल बा. देउलगांवकर कहेलन, “ई सब पत्थर हटाके खेत फेरु से जोते लायक बनावे में दिन ना, महीना लाग जाई.”

देउलगांवकर इहो बतइलन, “लागता किसान के 150 से 200 ट्रैक्टर ट्रॉली भर के पत्थर आ चट्टान सब निकाले के पड़ी. बाकिर ओह लोग लगे ना त मजूर बोलावे आउर ना मसीन मंगवावे के सामर्थ्य बा.”

अक्टूबर 2025 में जारी भइल एगो श्वेत पत्र में जलवायु वैज्ञानिक, कृषि मौसम विज्ञानी आ सिविल सोसायटी समूह बतइलक कि मराठवाड़ा के बाढ़ आ मानसिक स्वास्थ्य के संकट खाली बरसाते चलते ना आइल. बलुक एकरा पाछू सिस्टम के विफलतो रहे. मौसम के गंभीर स्थिति (बहुते बरखा, सुखाड़, आंधी), अस्थिर पर्यावरण, आदमी के खड़ा कइल गइल जल संकट. ई सब एक साथे टकरा गइल. सितंबर में एह इलाका में 305 मिमी बरखा भइल, जे सामान्य से 204 प्रतिशत जादे रहे. बीड, परभणी, लातूर, हिंगोली आ नांदेड़ जइसन केतना जिला अब तक के रिकॉर्ड बरखा देखलक.

बाकिर एक तरह से एह तबाही के सुरुआत बहुत पहिले हो चुकल रहे. जून-जुलाई में पानी पूरा ना बरसे से माटी कमजोर हो गइल रहे. एकरा बाद अगस्त में पानी अइसन धार से बरसल कि तलाब सब त लबालब होइए गइल, जमीनो पानी सोखे के स्थिति में ना रहल. सितंबर बीतत-बीतत नदी सब गाद से भर गइल, पुलिया छोट पड़ गइल, सड़क पानी के रस्ता रोक देलक आ बान्ह से पानी ठीक से ना छोड़ल गइल. ई सब चलते बरसात के पानी बढ़ जइसन आफत बनके टूटल. एकरा टालल जा सकत रहे.

मिल रहल जानकारी के हिसाब से मराठवाड़ा अब खाली सुखाड़ वाला इलाका ना रहल. ई सुखाड़ा आ अचानक मूसलाधार बरखा गिरे वाला, मतलब दुनो के मिलल-जुलल इलाका हो गइल बा.

एह बात के पुष्टि ‘महापुर अहवाल’ (नवंबर 2025) रिपोर्ट से भी होखेला. ई एनएपीएम (नेशनल एलायंस ऑफ पीपल्स मूवमेंट्स) के फील्ड स्टडी बा. देउलगांवकर ओह टीम के हिस्सा रहस. एह रिपोर्ट में लिखल बा कि अब नियमित बरसात के जगह छोट-छोट, बाकिर बहुते तेज, प्रलयकारी बरखा हो रहल बा.

एह रिपोर्ट में बहुते अइसन पुरुष-महिला किसान लोग के गवाही दरज बा, जे खाली आंख से आपन जिनगी भर के बचत, बरिसन के मिहनत आ छोट-छोट सपना टूटत देख रहल बा आ एकरा से समझौता करे के कोसिस कर रहल बा.

सोलापुर के पाथरी गांव के गंगाबाई बांदगर कहेली, “हमनी के छव एकड़ में लगावल प्याज पूरा बरबाद हो गइल.” पानी उनकर खेत आ घर दुनो के घेर लेलक. ऊ पूछेली, “दस हजार रुपइया के सरकारी मदद से एतना बड़ नुकसान के भरपाई कइसे होई? एतना पइसा से का कीनाई? आगे जिनगी कइसे चली?”

ऊ अइसन सैंकड़न पीड़ित परिवार में से बाड़ी.

इलाका के लोग बतावेला कि केतना बस्ती में त अचानक पानी के उफान आइल. लोग के संभले के समये ना मिलल, सब घर आ खेत डूब गइल. रिपोर्ट में एकरा ‘कृत्रिम बाढ़’ कहल गइल बा, काहेकि ई पानी बरसे से ना, बलुक आदमी के गलती चलते आइल. उदाहरण खातिर, आज के बहाव के हिसाब से बहुते छोट नाला, बिना योजना के बनल गांव के सड़क जे तटबंध जेका काम करे लागल. आउर पानी सोखे वाला भींजल जमीन (दलदल) लगभग समाप्त हो गइल. दुनो रिपोर्ट चेतावता कि जल्दिए सुधार ना कइल गइल, त मराठवाड़ा एके मौसम में सुखाड़ आ बाढ़, दुनो के बीच झूलत रही.

मराठवाड़ा आ पस्चिमी महाराष्ट्र में मूसलाधार बरखा आ बाढ़ से तबाही अइला के बाद शिवर हेल्पलाइन में घंटों ना, बलुक कइएक दिन ले फोन बाजत रह गइल.

दसहरा से दीवाली, यानी अक्टूबर बीतला ले, हेगन्ना घर ना जा पइलन.

ऊ इयाद करेलन, “कोई एकइस दिन ले युद्ध जइसन स्थिति रहे.”

ऊ ऑफिस में भुइंया पर सुतस. दिन में एक बेरा खास, आउर केतना बेरा भुखले रह जास. कबो बाहिर निकलस, त आराम से सांस खातिर ताजा हवा लेवे. आजो जब ओह दिन के चरचा चलेला, त उनकर आवाज कमजोर पड़ जाला. “धरती बाढ़ में डूबल रहे, आ लोग आपन मन के भंवर में.” अइसन स्थिति में हेल्पलाइन के काम बढ़ल, फोन चाहे सिस्टम चलते ना, बलुक हेगन्ना के एह सोच चलते कि मानसिक मदद फालतू ना, जरूरी चीज बा.

ऊ बतइलन कि हर फोन करे वाला भीतरी से टूटल रहे, आ अपना के खतम करे के बारे में सोचत रहे. “हम केकरो कॉल के मना ना कर सकत रहीं, काहेकि केकरो भी जान जा सकत रहे.” केतना बेरा उहो तनाव में आ जास, बाकिर कॉल लेवल जरूरी रहे एह से ऊ आगू बढ़त रहलन. “सोचीं कि जदि थकला चलते हम फोन ना उठइनी, आउर केहू आपन जान ले लेलक, त का होई. आउर सांचो स्थिति अइसने रहे. हम जब कॉल उठइनी, हमरा ई सोच के अच्छा लागल कि एगो आउर जान बचल.” एह संघर्ष में खाली उहे ना, हेल्पलाइन के हर आदमी जूझत रहे.

केतना गुमनाम दान करे वाला, आदमी आ शिवर हेल्पलाइन के साथी लोग संसाधन जुटा के बहुते जरूरतमंद परिवार तक मदद पहुंचइलक. आजो ऊ उदार दाता लोग से अपील करेलन कि संकट में फंसल किसान के नकदी, चाहे सामान से सहायता भेजल जाव.

हेगन्ना आ उनकर टोली आपन मन के बोझ हल्का करे खातिर काउंसलिंग के मदद लेवेला. बाकिर ऊ कहेलन, “हमनी के आपन एगो सपोर्ट सिस्टम होखे के चाहीं. एकरा में खरचा आवेला. एही से अबले ई काम ना हो सकल.”

ऊ कहेलन कि अबकी के दीवाली अलग रहल, बाकिर हर साल किसान लोग कोई न कोई संकट में रहेला. काउंसलर हेगन्ना कहेलन, “हमनी पछिला दस बरिस से देवाली नइखी मनइले. अक्टूबर में त एक रात रात दस से भोर के छव बजे ले 47 कॉल आइल. फोन करे वाला हर आदमी अपना के खतम करे के बात कहत रहे.”

एक दिन आधा रात रहे, इंटर्न लोग जा चुकल रहे. हेगन्ना आपन केबिन में बइठल दिन भर के नोट्स देखत-संभारत रहस. तबहिए फोन बाजल. ऊ सोचलन कि अबकी ऊ फोन ना उठइहन. बाकिर ऊ अइसन कर ना सकलन.

लाइन पर दोसरा ओरी सोलापुर के माढा ब्लॉक के एगो नौजवान रहे. ऊ धीरे-धीरे बोलत रहे. ओकर सांस बेर-बेर अटकत रहे. ऊ रात होखे आ परिवार के लोग के गहिर नींद में जाए के इंतजारी ताकत रहे.

“ऊ कहलक, ‘सर, दिमाग में बेर-बेर इहे ख्याल आवता कि केतना अच्छा होखित नींद आ जाइत, आ सेवेरे के मुंह ना देखे पड़ित.”

हेगन्ना बतावेलन, “हमार त थकान आ विचार एक क्षण में उड़ गइल. कुरसी पर सोझ होके बइठ गइनी आ उनका से आपन कहानी बतावे के कहनी.” उनकरो कहानी अलग ना रहे. अचके आइल बाढ़, सोयाबीन के बरबाद फसल, बेमार माई. भोर में करजा वसूले वाला एजेंट, नाकाम होखे से बहुते शरम महसूस होखे लागल.

पैंतीस मिनट ले बातचीत होखत रहल. फोन पर बात भी रहे, चुप्पी भी.

“आखिर में ऊ कहलन, ‘कम से कम रउआ हमार बात त सुननी. रउआ पहिल बानी जे हमरा हिम्मत रखे, मजबूत बने के नसीहत ना देनी’.”

ओह रतिया हेगन्ना अपना से कहलन, एगो आउर जान बच गइल.

“बस बात सुन, उपदेस मत द, भाषण मत द. उनकर हाथ थाम के रख. कॉल अइला पर हर बार हम अपना के इहे कहिला.”

जलवायु बदलाव से मचल हाहाकार में, आपन मन आ भावना के फेरु से मजबूत बनावल सबले जरूरी काम बा.

हेगन्ना कोल्हापुर के एगो छोट गांव में पलल-बढ़ल बाड़न. इहंवा जिनगी के कैलेडर बरखा के चक्र, फसल आ चुपचाप झेलल जा रहल तकलीफ के इर्द-गिर्द घूमेला.

ऊ कॉलेज में खेती-बाड़ी के पढ़ाई कइलन आ बहुत बाद में मनोविज्ञान में प्रशिक्षण लेलन. बाकिर उनकर कहनाम बा कि उनकर असली सीख त बहुत पहिले मिल गइल रहे, जब ऊ किसान लोग के चुप रहत, दरद सहके भी आवाज ना उठावत देखलन.

हेगन्ना कहेलन, “हमहूं, जइसन कि आम चलन बा, राज्य आ लोक संघ सेवा आयोग के तइयारी करे लगनी. गुरु लोग हमरा जिनगी में कुछ सार्थक करे के प्रेरणा देलक.”

सायद गुरुजन उनका में जनता के सेवा करे के लालस देखलन.

एक बरिस ले ऊ नाम-मात्र संसाधन में पूरा राज्य में घूमलन, गांव में रहके आगे का करे के बा, सोचलन आ ओह लोग से सीखत रहलन. उनकर ध्यान गांवे के पढ़ल-लिखल, बेरोजगार आ मौका से वंचित नौजवान लोग पर जादे रहल. हेगन्ना कहेलन कि शिवर हेल्पलाइन अपने आप बनत गइल. ऊ धाराशिव में टिक गइलन, काहेकि उहंवा के परेसान किसान खातिर कवनो सहारा ना लउकत रहे.

सन् 2017 में, शिवर हेल्पलाइन के पहिले 25 गांव में छोट स्तर पर आजमाइश कइल गइल.

सुरुआती दिन बड़ा कठिन रहे. पुरान टेबुल, इकलौता फोन, इलाका के मुट्ठी भर स्वयंसेवक आ एगो नौजवान जे अपने सीखत रहे कि लोग के आपन जिनगी खतम करे से कइसे रोकल जाव. हेल्पलाइन के नाम पर एतने रहे.

धीरे-धीरे कॉल के गिनती बढ़े लागल. करजा चुकता ना कर पाए वाला मरद लोग. आत्महत्या से मरे वाला घरवाला के मेहरारू लोग. आर्थिक तंगी चलते पढ़ाई छोड़ देवे वाला छात्र लोग.

धाराशिव महाराष्ट्र के सबले शुष्क आ कम बरखा वाला जिला में से बा. ई तथाकथित वर्षा-छाया क्षेत्र (कम बरखा वाला इलाका) में आवेला. कोविड 19 महामारी में आउर ओकरा बाद इहंवा के संकट आउर गहिर होखत चल गइल.

ऊ एफडीक्यूआई, माने फार्मर्स डिस्ट्रेस कोटिएंट इंडेक्स बनइलन. एह में फोन करे वाला के कम, साधारण आ भारी जोखिम के हिसाब से बांटल जाला. जादे जोखिम वाला मामला ऊ अपने संभारेलन आ नियम से हाल चाल पूछत रहेलन.

हेगन्ना के कहनाम बा कि हेल्पलाइन सुरु भइला के बाद उनकर टीम महाराष्ट्र के गांव-देहात में लोग के दिमागी तनाव के 27 ठो अलग-अलग कारण के पहचान कइलक. एह सब कारण पर नीति के स्तर पर जादे ध्यान नइखे देवल गइल. ऊ कहेलन, “एकरा में से एगो वजह पड़ोसी किसान संगे खेत तक जाए वाला रस्ता के लेके लगातार होखे वाला झगड़ो बा. एकरा जिला राजस्व अधिकारी लोग आसानी से फरिया सकता.”

तीनों स्थिति में काउंसलिंग के तरीका अलग-अलग होखेला. ऊ कहेलन, “पहिले कॉल करे वाला के तीन अलग-अलग श्रेणी में रखल जाला, ओकरा बाद ओही हिसाब से उपाय अपनावल जाला.” उनका हिसाब से एतना जादे तादाद में आ रहल कॉल बतावेला कि उनकर पहल कारगर हो रहल बा. चूंकि ऊ अबही सीखिए रहल बाड़न, त समय के साथे ई आउर अच्छा होत चल जाई.

हेगन्ना दू स्तर पर काम करे पर जोर देवेलन: पहिला, मानसिक स्वास्थ्य काउंसलिंग. दोसर, गांव के स्तर पर हस्तक्षेप. “हमनी के वइसन कारण सब पर काम करे के होई जे मानसिक तनाव के जनम देवेला.”

एह तरह के तनाव के कारण हर जगह बा. आ जलवायु संकट चलते ई स्थिति आउरो नाजुक हो गइल बा. सैंकड़न गांव पूरा बरसात जे तकलीफ भोगलक, 15 से 25 सितंबर के बीच आउर जादे महसूस भइल.

हेल्पलाइन पहिलका चुनौती के समाधान निकाल रहल बा, माने मानसिक स्वास्थ्य महामारी से. बाकिर लोग जवन कारण से मानसिक संकट के भंवर में फंसेला, ओकरा खातिर दीर्घकालीन उपाय जरूरी बा. एकरा में जमीनी स्तर पर असल हस्तक्षेप से लेके नीतिगत सुधार तक शामिल बा. हेगन्ने के गैर-लाभकारी संस्था, शिवर फाउंडेशन सुरु होखे के मकसद इहे रहे, जे उनका हिसाब से किसान आ नौजवान लोग के एकजुट करके रचनात्मक हस्तक्षेप पर काम करी.

“जइसे कि हमनी धाराशिव में वइसन विधवा लोग के एकजुट कइनी, जेकरा काम के जरूरत बा. हमनी के निजी आ सार्वजनिक क्षेत्र से जुड़के रोजी-रोटी कमाए के साधन खोजे के होई, जेसे ओह लोग के आर्थिक तनाव दूर हो सके.”

उनकर मकसद खेती, मनोविज्ञान आ सामाजिक पहलू वाला (कृषि-मनो-सामाजिक) एगो ढांचा विकसित करे के भी रहल बा, जे शिवर मॉडल कहाई. संगही, ऊ इहो कहेलन, फाउंडेसन किसान लोग खातिर अइसन मानसिक स्वास्थ्य सहायता मॉडल तइयार करे के चाहत बा, जेकरा आसानी से दोहरावल जा सके आउर जेकरा तक सबके पहुंच होखे. कम से कम काउंसल लोग अइसन होखे, जे संकट में फंसल लोग के बात शांति से सुने. ऊ कहेलन, “खेती-बाड़ी पर दबाव बढ़ेला, त समाजिक तनाव बढ़ेला. आउर एकरा से मानसिक सेहत पर भी असर पड़ेला.” फोन लाइन चौबीसो घंटा उपलब्ध रही, त जोखिम वाला परिस्थिति से निपटल जा सकेला.

हेगन्ना जहंवा ले संभव होकेला, संबंधित जिलाधिकारी आ राज्य के लाइन विभाग के अधिकारी लोग से संपर्क में रहेलन आ किसान लोग के सरकारी सहायता से जोड़ेलन. केतना अधिकारी लोग सहजोग करे में पाछू ना रहे. तबो, उनकर कहनाम बा, जवाब संतोषजनक नइखे. “हमनी के एह काम पर जोर देके एकर विस्तार करे के जरूरत बा.”

“एह बरिस सुरु में नांदेड़ में एगो बाप आ बेटा के आत्महत्या हमरा हिला देलक. लागल ई हेल्पलाइन पूरा राज्य में होखे के चाहीं. तब हमनी आपन आधार पुणे ले गइनी.”

पछिला बरिस एगो दयालु दाता के सहजोग से ऊ लोग पूरा सिस्टम पुणे में एक जगह पर व्यवस्थित कइलक, ताकि पूरा महाराष्ट्र में काम बढ़ावल जा सके. सन् 2023 से, जब जलवायु संकट तेज होखे लागल रहे, उनका बुझा गइल रहे कि आवे वाला परेसानी सुखाड़ से जादे जटिल होखी. आउर एकर सामना करे खातिर बड़हन स्तर, नयका तकनीक आ एक जगह से काम करे के होई. सितंबर 2025 उनका सही साबित कइलक.

एह सबके बावजूद, अब तक जलवायु नीति में देमागी आ मन के सेहत के नजरअंदाज कइल गइल बा. हेल्पलाइन पर आवे वाला हजारन कॉल, सैंकड़न बार लोग के जान से टलल खतरा बतावत बा कि मानसिक सेहत पर ध्यान ना देवे से का हो सकता. हेगन्ना के उम्मीद बा कि समाज एकरा के एगो जरूरी नीति के तौर पर देखी.

“खेत के माटी जल्दी ना सुधरी,” ऊ कहेलन, “बाकिर लोग के जिनगी बचावल आ सुधारल जा सकता.”

हेगन्ना खातिर शिवर हेल्पलाइन मौसम बदलाव के सामना करे के तरीका, एगो जरूरी आपदा प्रबंधन बा. अबकी मानसून, भारी बरखा आउर बरखा के बाद ई बात साबितो भइल.

“जब देर सांझ फोन पर बहुत देर ले चुप्पी सुनाई पड़ेला, त समझ में आ जाला कि आदमी मदद आ उम्मीद दुनो के तलाश में बा.”

(सब कार्यकर्ता आ फोन करे वाला के नाम बदलल बा.)

जदि रउआ आत्महत्या के ख्याल आ रहल बा, चाहे कवनो गंभीर मानसिक संकट में बानी त कृपया राष्ट्रीय हेल्पलाइन किरण पर 18005990019 पर कॉल करीं. ई चौबीसो घंटा चले वाला मुफत सेवा बा. रउआ आपन लगे के दोसर हेल्पलाइन सबसे भी संपर्क कर सकत बानी.

जलवायु परिवर्तन आ मानसिक सेहत पर पारी के ई देस भर में चले वाला कड़ी मरिवाला हेल्थ इनिशिएटिव के सहजोग से तइयार कइल गइल बा. एह कड़ी में भारत के गांव-देहात आ शहर में रहे वाला लोग के मानसिक आ समूचा सेहत, रोजी-रोटी पर जलवायु संकट के असर के पड़ताल कइल जाई.

अनुवाद: स्वर्ण कांता