گونڈی الفاظ، گویا مکئی کے چمکتے دانے

شادی کے بعد رینا پرتیتی جب پہلی بار لونادیئی گاؤں میں واقع اپنے سسرال پہنچیں، تو وہ حیران تھیں۔

’’گھر پہ بچے بھی میری مادری زبان، گونڈی میں بات کر رہے تھے،‘‘ وہ یاد کرتی ہیں۔ وہیں، ۳۴ سالہ آدیواسی کسان رینا کے لیے اپنی گونڈ برادری کی زبان سمجھ پانا مشکل تھا، کیوں کہ ’’میرے گاؤں (مویا] میں کوئی بھی گونڈی میں بات نہیں کرتا تھا۔‘‘

لونادیئی کی تقریباً ۸۰ فیصد آبادی گونڈ آدیواسی ہے۔ رینا بتاتی ہیں، ’’جو لوگ گونڈ آدیواسی نہیں ہیں، وہ بھی گونڈی میں بات کر پا رہے تھے۔‘‘

رینا کے شوہر کے بھتیجے اور بھتیجیاں انہیں چڑھاتے تھے، ’’چاچی کو گونڈی بولنے نہیں آتی!‘‘ وہ اسے یاد کرتے ہوئے ہنستی ہیں اور مزید کہتی ہیں، ’’حالانکہ، شروع میں سب کے ساتھ تھوڑا تھوڑا تُتلا کے (لکنت کے ساتھ) بولتے تھے، لیکن پھر اپنی مادری زبان میں ان سے بات کرنے لگے۔‘‘

گونڈی ایک دراوڑی زبان ہے جو کسی زمانہ میں صرف مدھیہ پردیش میں ہی نہیں، بلکہ ہندوستان کے دیگر حصوں میں بھی بڑے پیمانے پر بولی جاتی تھی۔ آج یونیسکو کے ذریعہ اسے امکانی طور پر معدومیت کے خطرہ سے دوچار زبانوں کی فہرست میں شامل کیا گیا ہے۔ گونڈ برادری مدھیہ پردیش کی سب سے بڑی آدیواسی برادریوں میں سے ایک ہے، لیکن ان کی زبان کو خطرہ لاحق ہے۔

گونڈی بولنے والے تمام لوگ شہروں میں تعلیم اور ملازمت کے مواقع تلاش کرنے کی خاطر مہاجرت کرتے وقت اکیلے پڑ جانے کے خوف سے ہندی جیسی رابطہ کی دیگر زبانوں میں بات کرنے لگتے ہیں۔ سماجی کارکن رامناتھ اوئیکے بتاتے ہیں کہ گونڈ آدیواسیوں کی نصف آبادی ہی خواندہ ہے، اور برادری میں اسکول چھوڑنے کی شرح کافی زیادہ ہے۔

پڑھیں: ’گونڈی زبان ہمارا مذہب، ہماری ذات ہے‘

لونادیئی کے تقریباً ۱۰۰۰ دیگر رہائشیوں کی طرح رینا اور ان کے شوہر منت رام بھی کسان ہیں۔ وہ ایک ایکڑ کھیت پر مکئی اُگاتے ہیں، جو ان کے اپنے استعمال کے لیے ہوتا ہے۔ پنڈُھرنا تحصیل کے لونادیئی گاؤں میں واقع ان کا گھر ان کے کھیت سے بس تھوڑے ہی فاصلہ پر ہے۔

جس دن پاری کی ان سے ملاقات ہوئی، اُس دن رینا اور منت رام اپنے کھیت میں کھڑی فصل پر منڈلا رہے بارش کے خطرہ کی وجہ سے فکرمند تھے۔

آسمان میں سیاہ بادل چھائے ہوئے تھے اور گرج کے بعد ہلکی بوندا بوندی تیز بارش میں بدل گئی تھی۔ رینا اور منت رام مکئی کی تقریباً تیار ہو چکی فصل کو دیکھنے کے لیے کھیت کی جانب بھاگے۔

لونادیئی میں رینا پرتیتی چھاتہ لیے مکئی کے کھیت میں کھڑی ہیں اور ایک ایک کر کے مکئی کے ہر حصہ کا نام بتاتی جاتی ہیں، ’’بوچ، چھوئی، چھَور، چارا، ٹوٹا۔‘‘ بوندا باندی ہو رہی ہے، لیکن وہ ایک ایک کر کے سبھی حصوں کے بارے میں گونڈی میں بتاتی رہتی ہیں۔ وہ مکئی کی چھوئی ہٹا کر ریشم جیسے نظر آنے والے بوچ دکھاتی ہیں، جس کے اندر موتی جیسے سفید مکئی کے دانے چمک رہے ہیں۔ رینا بتاتی ہیں کہ بوچ مکئی کے دانوں کے اوپر کے بال ہوتے ہیں، اور چھوئی ان کے ڈھکے ہوئے ہرے پتّے، جسے گونڈ برادری کے لوگ پتوڑ بھی کہتے ہیں۔‘‘ ان کی آواز سے گونڈی الفاظ سے متعلق اپنی معلومات پر فخر کا احساس ملتا ہے۔

منت رام (۴۹) کہتے ہیں، ’’مکئی کے پودے کا کوئی بھی حصہ بیکار نہیں جاتا ہے، ٹوٹا بھی نہیں۔‘‘ وہ مکئی کے دانے نکالنے کے بعد بچے ہوئے ڈنٹھل کی طرف اشارہ کرتے ہیں۔

ٹوٹا (جسے ٹھونٹھ بھی کہتے ہیں) کو ایندھن کے لیے یا سردیوں میں آگ جلا کر ہاتھ تاپنے کے لیے استعمال کیا جاتا ہے۔ بوچ اور چھوئی چارہ کی شکل میں ٹوٹا کے ساتھ گائے اور بکریوں کو دیے جاتے ہیں۔ منت رام ہمیں مزید بتاتے ہیں کہ مکئی کے پھول کو چھَور کہتے ہیں۔

چھندواڑہ، مدھیہ پردیش میں مکئی کے شہر کے طور پر مشہور ہے۔ کرناٹک کے بعد، مکئی پیدا کرنے والی یہ دوسری سب سے بڑی ریاست ہے۔

مکئی (زیا میز) کا پودا گھاس (پوئیسیے ئی) کی ایک قسم ہے۔ یہ ضلع کے کاشت کاروں کے لیے منافع بخش اور مالی اعتبار سے پائیدار فصل ثابت ہوا ہے۔ رینا اور منت رام کی طرح ضلع کے گونڈ آدیواسی ملی جلی فصلیں اُگاتے ہیں، جیسے اڑد، تور جیسی دالیں، بربٹی (پھلی والی سبزی) جیسی سبزیوں کے ساتھ گندم، سویابین، گنّا اور کپاس۔ حالیہ برسوں میں، جوار اور گیہوں کی پیداوار میں کافی کمی آئی ہے۔ منت رام کہتے ہیں، ’’جن کے پاس ٹیوب ویل ہوتا ہے وہی گیہوں بوتے ہیں۔‘‘

فیملی کا ارادہ اس سال سنترے کے پودے لگانے کا بھی ہے۔ رینا کہتی ہیں، ’’سنترے کی فصل سے ایک ساتھ زیادہ پیسے مل جاتے ہیں اور ۴-۵ سالوں تک اچھی فصل بھی ملتی رہتی ہے۔‘‘ گاؤں میں اور لوگ بھی سنترے کی کھیتی کرنے لگے ہیں، اور باہر کی کچھ کمپنیاں باقی فصلوں کے مقابلے ان کی بہتر قیمتیں دیتی ہیں اور کسانوں سے پورا کا پورا سنترہ خرید لیتی ہیں۔

رینا شادی کے بعد جب لونادیئی آئی تھیں، تو یہاں مکئی کی پیداوار کافی کم تھی – سال میں ڈیڑھ کوئنٹل کے آس پاس۔ وہ کہتی ہیں، ’’صحیح مقدار میں گوبر کی کھاد اور یوریا ڈالنے سے پیداوار بڑھ جاتی ہے۔‘‘

پہلے ہر گونڈ گھر کی چھت سے مکئی لٹکتے دکھائی دیتے تھے، جنہیں بارش کے پانی، کیڑوں وغیرہ سے بچائے رکھنے کے لیے سوتی کپڑے سے ڈھانپا جاتا تھا۔ اب زیادہ تر خاندان اس روایتی طریقہ کو نہیں اپناتے، کیوں کہ بازار میں پیکٹوں میں دستیاب بیج مل جاتے ہیں۔

رینا کہتی ہیں، ’’گونڈ لوگ مکئی کی روٹیاں ہی پسند کرتے ہیں۔ ان کا ماننا ہے کہ سخت دانے کھانے سے ان کے جسم سخت اور مضبوط رہتے ہیں۔ اس سے غذائیت بھی زیادہ ملتی ہے۔‘‘ وہ مزید کہتی ہیں، ’’ساون [جون سے ستمبر] کا وقت سب سے مصروف وقت ہوتا ہے، کیوں کہ مکئی کے پودے تیزی سے بڑھتے ہیں اور گھاس پھوس بھی۔‘‘ ندائی (گھاس پھوس نکالنے کے لیے گونڈی لفظ) کا کام زیادہ تر گاؤں کی عورتوں کے ذریعہ کیا جاتا ہے۔

رینا کہتی ہیں، ’’میری ساس مجھے بتاتی ہیں کہ اُن دنوں وہ ندائی گیت گاتی تھیں۔ لیکن مجھے نہیں آتے،‘‘ وہ تھوڑا جھینپتے ہوئے ہنس دیتی ہیں۔ ’’اب تو ندائی نہ کرنی پڑے، اس کے لیے چارہ مار دوا ڈالتے ہیں۔‘‘

جس طرح مکئی کے کھیتوں سے گھاس پھوس ختم کیے گئے، اسی طرح وقت کے ساتھ کھیتی سے متعلق تمام دیگر روایات کی طرح ندائی گیت بھی غائب ہو گئے۔

یہ اسٹوری سب سے پہلے ہندی میں لکھی گئی تھی۔

رپورٹر اس اسٹوری کو لکھنے میں مدد کے لیے پردیپن این جی او کے رامناتھ اوئیکے اور چھندواڑہ کی پرارتھ سمیتی این جی او کی بانی رکن منجری چاندے کا شکریہ ادا کرتی ہیں۔ وہ گونڈی زبان سمجھنے میں مدد کے لیے رینا پرتیتی، کرن اڈماچے اور دیکشا اِنواتی کا بھی تہ دل سے شکریہ ادا کرتی ہیں۔

عظیم پریم جی یونیورسٹی کی مدد سے پاری نے معدومیت کے خطرہ سے دوچار زبانوں کا پروجیکٹ شروع کیا ہے۔ اس پروجیکٹ کا مقصد ہندوستان کی معدومیت کی شکار زبانوں کی، انہیں بولنے والے عوام اور ان کی زندگی کے تجربات کے ذریعہ دستاویز سازی کرنا ہے۔