زرعی قرض کا شکنجہ اور انسانی اعضاء کی اسمگلنگ

’’میں خوش قسمت ہوں،‘‘ روشن سداشیو کولے پاری سے کہتے ہیں۔ خوش قسمت اس لیے کہ وہ زندہ ہیں اور اپنے گھر پر ہیں۔

اس کہانی کی ابتدا پانچ سال قبل اس وقت ہوئی، جب منتھور گاؤں کے اس ۳۴ سالہ چھوٹے کسان کی ۱۲ جرسی گائیں لمپی اسکن (جلد کی گانٹھ) کی بیماری کی زد میں آ گئی تھیں۔ یہ مارچ ۲۰۲۱ کا زمانہ تھا۔ پورے مہاراشٹر میں مویشی دم توڑ رہے تھے اور اسی وقت کووڈ۔۱۹ کی دوسری لہر پورے ملک میں تباہی مچا رہی تھی۔

’’میں نے ان کے علاج پر بہت پیسہ خرچ کیا،‘‘ روشن یاد کرتے ہیں۔ ’’لیکن وہ صحت یاب نہ ہو سکیں۔‘‘

چھ گائیں مر گئیں۔ دودھ کی پیداوار کم ہو گئی۔ ڈیری سے ہونے والی آمدنی بھی رک گئی۔ لیکن اخراجات بدستور جاری رہے۔ چندر پور کی جنگلات سے مالا مال ناگ بھیڑ تحصیل کے اس چھوٹے کسان کے پاس اپنی باقی چھ گایوں کے لیے دوائیں اور ویکسین خریدنے کے لیے پیسے نہیں تھے۔

وبائی مرض کے باعث پیدا ہونے والے نقدی کے بحران میں بینکوں سے قرض حاصل کرنا دشوار ہو گیا تھا۔ بینکنگ نامہ نگار کے طور پر کام کرنے والے ایک دوست کے اصرار پر روشن نے قریب ہی میں واقع برہم پوری قصبہ کے ایک نجی ساہوکار سے ایک لاکھ روپے کے غیر رسمی قرض کے لیے رابطہ کیا۔

انہوں نے سوچا کہ ان کا فوری بحران ٹل گیا ہے۔

’’لیکن اصل مصیبت تو اب شروع ہوئی تھی،‘‘ وہ یاد کرتے ہیں۔

روشن نے مارچ ۲۰۲۱ میں اپنی گایوں کے لیے حیات بخش ادویات خریدنے کی خاطر غیر رجسٹرڈ ساہوکاروں کے شکنجے میں پھنس کر ایک لاکھ روپے کا قرض لیا تھا۔ یہ قرض بڑھتے بڑھتے ۵۰ لاکھ روپے تک جا پہنچا۔ قرض کے اس بوجھ نے اس ڈیری کسان کو انسانی اعضاء کی غیر قانونی اسمگلنگ کے ایک ایسے خوفناک دلدل میں دھکیل دیا، جہاں بالآخر انہیں اپنا ایک گردہ گنوانا پڑا۔ اس کے بعد وہ بین الاقوامی سائبر کرائم کے ایک ریکٹ کے جال میں بھی الجھ کر لاؤس میں جا پھنسے۔

روشن نومبر ۲۰۲۵ میں درج کیے گئے ایک مقدمہ میں شکایت کنندہ اور متاثرہ فریق ہیں۔ اس مقدمہ کی تفتیش کے دوران پولیس اہلکاروں نے پورے ملک کا سفر کیا اور اس خوفناک گھوٹالے کے نیٹ ورک کو بے نقاب کیا۔

پاری نے معاملے کی ایف آئی آر، شواہد اور چارج شیٹ کا تفصیلی جائزہ لیا اور روشن کے اہلِ خانہ کے انٹرویوز بھی کیے۔ ان سب سے ظاہر ہوتا ہے کہ دیہی علاقوں میں سرگرم سود خوری کا یہ مکروہ دھندا کس طرح بلاخوف و خطر پھل پھول رہا ہے اور کس طرح مختلف ریاستوں اور پڑوسی ممالک تک پھیلے انسانی اعضاء کی غیر قانونی تجارت کے ایک منظم نیٹ ورک سے جڑا ہوا ہے، جس میں بچولیے، ہسپتال اور ڈاکٹر سبھی شامل ہیں۔

یہ معاملہ دو حصوں پر مشتمل ہے: پہلا، غیر قانونی سود خوری کا دھندا؛ اور دوسرا، انسانی اعضاء کی غیر قانونی اسمگلنگ کا ایک وسیع نیٹ ورک۔

چندرپور پولیس نے حال ہی میں سیشن کورٹ میں ایک ابتدائی چارج شیٹ داخل کی ہے، جس کے ساتھ ۶۰۰۰ صفحات پر مشتمل دستاویزی شواہد بھی منسلک ہیں۔ ان میں متاثرین کے بیانات، بینک لین دین کے ریکارڈ، سفری معلومات، واٹس ایپ چیٹس، ہسپتال کی دستاویزات، مبینہ جعلی شناختی کاغذات اور ملزمان کے دونوں گروہوں کی جانب سے تیار کی گئی مالیاتی ڈائریوں کے اندراجات شامل ہیں۔

اپریل کے وسط میں چندرپور ضلع پولیس ہیڈکوارٹرز میں اپنا بیان درج کرانے کے لیے منتظر، دو بچوں کے تھکے ماندے اور آبدیدہ باپ نے پاری کو بتایا کہ کس طرح فوری ضرورت کے ایک لمحہ میں لیے گئے صرف ایک قرض نے انہیں اور ان کے اہلِ خانہ کو ایسے دلدل میں دھکیل دیا، جس سے نکلنے کے لیے وہ پانچ سال بعد بھی جدوجہد کر رہے ہیں۔

’’کاش میں نے وہ قرض نہ لیا ہوتا،‘‘ روشن افسوس کا اظہار کرتے ہیں۔

ودربھ کے دیہی علاقوں میں لیے گئے قرضے لوگوں کی کمر توڑ سکتے ہیں، لیکن روشن کے معاملے میں قرض کی ادائیگی کا مطلب اپنے جسم کو رہن رکھنا تھا۔ سال ۲۰۲۴ میں انہوں نے کمبوڈیا میں اپنا ایک گردہ بیچ دیا۔ انہیں ایک خفیہ آل انڈیا نیٹ ورک کے ذریعے ۲۰ سے ۳۲ سال کی عمر کے کم از کم ایک درجن دیگر مقروض افراد کے ساتھ کمبوڈیا لے جایا گیا تھا۔ اگلے سال وہ لاؤس کے دھوکہ دہی کے خطرناک اڈوں تک جا پہنچے، لیکن وہ خوش قسمت تھے کہ انہیں بچا لیا گیا۔

دسمبر ۲۰۲۵ میں جبری وصولی، غیر قانونی حراست اور تشدد کے الزامات کے تحت گرفتار کیے گئے چھ ساہوکار اب ضمانت پر رہا ہو چکے ہیں۔ گردے کی فروخت کے اس ریکٹ میں ملوث نصف درجن ملزمان، جن میں مبینہ سرغنہ بھی شامل ہے، ملک کے مختلف حصوں سے گرفتار کیے جا چکے ہیں اور سبھی عدالتی حراست میں ہیں۔ تمل ناڈو کے ایک بڑے ہسپتال کے مالک سمیت دو دیگر ملزمان مفرور ہیں۔

سال ۲۰۲۱ میں لمپی اسکن بیماری کے بحران سے قبل روشن اور ان کے بیشتر اہل خانہ کی روزی روٹی کا انحصار ڈیری کے کاروبار سے ہونے والی مستقل آمدنی پر تھا۔ اس کے علاوہ، وہ اپنی چار ایکڑ زمین پر دھان اور سبزیاں بھی اگاتے تھے۔ روشن اور ان کے چھوٹے بھائی امول نے اپنی آمدنی میں اضافہ کرنے کے لیے حال ہی میں ڈیری کا کاروبار شروع کیا تھا۔

ان کے والد، سداشیو کولے، قریب ہی واقع ناگ بھیڈ شہر میں ریلوے لوکوموٹیو شیڈ سے بطور مکینک ریٹائر ہوئے تھے اور انہیں معقول پینشن ملتی تھی۔ انہوں نے اپنی بچت سے یہ زمین خریدی اور اپنے تین بچوں – دو بیٹوں اور ایک بیٹی – کی شادیاں بھی کیں۔

کولے گھرانے کی ملکیت میں ۱۲ جرسی گائیں تھیں۔ وہ مقامی بازاروں اور ڈیری کمپنیوں کو دودھ فراہم کر کے ماہانہ تقریباً ۸۰ ہزار روپے کی آمدنی حاصل کرتے تھے۔ روشن اور امول نے ایک سرکاری اسکیم کے تحت بینک سے قرض لے کر مویشیوں کے لیے ایک بڑا شیڈ تعمیر کیا تھا، اور وہ اپنے ڈیری کے کاروبار کو مزید وسعت دینا چاہتے تھے۔

پھر گائیں بیماری کی زد میں آ گئیں اور ایک کے بعد ایک مرنے لگیں۔

پہلے قرض دہندہ منیش گھاٹباندھے – جسے ایف آئی آر اور چارج شیٹ میں ملزم نامزد کیا گیا ہے – نے روشن کو ایک قلیل مدتی قرض دیا تھا۔

روشن کا الزام ہے کہ چند ہی ہفتوں کے اندر قرض کی شرائط سخت کر دی گئیں۔

’’اس نے مجھ سے ۱۵ دن کے اندر رقم واپس کرنے کو کہا،‘‘ روشن بتاتے ہیں۔ ’’جب میں رقم واپس نہ کر سکا تو اس نے کہا کہ مجھے ۲۰ فیصد سود کے ساتھ روزانہ ۵۰۰۰ روپے جرمانہ بھی ادا کرنا ہوگا!‘‘

جب روشن نے اعتراض کیا تو انہیں مارا پیٹا گیا۔ اس واقعہ نے پوری فیملی کو ہلا کر رکھ دیا۔ اس کے بعد جو کچھ ہوا، وہ محض ایک قرض کے بے قابو ہونے کی کہانی نہیں تھی، بلکہ ایک کے بعد ایک متعدد قرضوں کا انبار تھا جو ایک دوسرے پر چڑھتے گئے اور فلک بوس حد تک جا پہنچے۔ پہلے قرض دہندہ کی رقم چکانے کے لیے روشن کو دوسرے قرض دہندہ سے قرض لینے پر مجبور کیا گیا؛ دوسرے نے تیسرے کے پاس بھیج دیا، اور یہ سلسلہ یونہی چلتا رہا۔

ان کے بیان اور چارج شیٹ میں کشور باوَنکولے، لکشمن یوکے (اورکوڑے)، پردیپ باوَنکولے، ستیہ وان بورکر، سنجے بَلّارپورے کے نام بار بار سامنے آتے ہیں۔

’’انہوں نے مجھے کوآپریٹو سوسائٹیوں، مائیکرو فائنانس اداروں اور بینکوں سے قرض لینے پر مجبور کیا۔ یہاں تک کہ میرے نام پر قرض منظور کروانے کے لیے جعلی دستاویزات بھی فراہم کیں، تاکہ میں ان کی رقم واپس کر سکوں،‘‘ روشن نے پانچ ماہ کے دوران پاری کو دیے گئے اپنے متعدد انٹرویوز میں سے ایک میں بتایا۔

رقم کی منتقلی بینک سے کی گئی نقد نکاسیوں اور رشتہ داروں و کوآپریٹو سوسائٹیوں سے لیے گئے قرضوں کے ذریعے کی جاتی تھی۔ حاصل ہونے والی زیادہ تر رقم فوری طور پر پچھلے واجبات چکانے کے لیے منتقل کر دی جاتی تھی، خواہ ادائیگی بینک ٹرانسفر، یو پی آئی یا نقد رقم کے ذریعے کی جاتی۔

رقم کا انتظام بینکوں سے کی گئی نقد نکاسیوں، اور رشتہ داروں اور کوآپریٹو سوسائٹیوں سے لیے گئے قرضوں کے ذریعے ہوتا تھا۔ حاصل ہونے والی زیادہ تر رقم فوری طور پر پچھلے واجبات ادا کرنے کے لیے منتقل کر دی جاتی تھی۔ یہ منتقلی بینک ٹرانسفر، یو پی آئی کے ذریعے یا پھر نقد رقم کی صورت میں کی جاتی تھی۔

روشن نے اپنی ایف آئی آر میں خود سے اینٹھی گئی کل رقم کی تفصیلات پیش کرنے کی کوشش کی ہے۔ یہ اعداد و شمار حیران کن ہیں:

’’میں نے منیش گھاٹباندھے سے ایک لاکھ روپے لیے۔ میں نے اسے ۶ سے ۵ء۶ لاکھ روپے واپس کیے،‘‘ وہ کہتے ہیں۔

’’میں نے کشور باونکولے سے ۵۰ ہزار روپے لیے اور اسے ۵۸ء۶ لاکھ روپے نقد اور آن لائن ٹرانسفر کے ذریعے واپس کیے۔‘‘

’’میں نے لکشمن یوکے سے ۳۵ء۴ لاکھ روپے لیے اور اسے ۱۶ لاکھ روپے واپس کیے۔‘‘

’’میں نے پردیپ سے ۸ء۲ لاکھ روپے لیے تھے، اور اسے ۱۳ لاکھ روپے نقد ادا کیے اور ایک ایکڑ زمین بھی دی۔‘‘

’’میں نے ستیہ وان بورکر اور سنجے بلارپورے سے بھی پیسے لیے تھے، اور انہیں ۵ء۳ لاکھ روپے سے زائد کی رقم واپس کی تھی۔‘‘

تفتیشی افسران کے ذریعہ ضبط کی گئی ڈائریوں، بینک اندراجات اور کھاتوں کی تفصیلات سے جن لین دین کی تصدیق ہوئی ہے، ان سے معلوم ہوتا ہے کہ روشن نے قرض دہندگان کو تقریباً ۵۰ لاکھ روپے ادا کیے تھے۔ جبکہ نقد رقم کی صورت میں کی گئی ادائیگیوں کا کوئی حساب کتاب موجود نہیں ہے۔ روشن کا دعویٰ ہے کہ انہوں نے ۷۲ سے ۷۵ لاکھ روپے ادا کیے ہیں، لیکن ان کے پاس نقد ادائیگیوں کا کوئی ثبوت نہیں ہے۔

’’ہم نے چارج شیٹ میں صرف اسی رقم کا ذکر کیا ہے جس کے ثبوت ہمارے پاس موجود ہیں،‘‘ چندر پور کے سپرنٹنڈنٹ آف پولیس (ایس پی) مُمکّا سدرشن کہتے ہیں۔

رواں سال مئی میں ایک عمومی تبادلے کے تحت سدرشن کا تبادلہ اہلیہ نگر میں ہوا تھا۔ انہوں نے اس معاملے کی تحقیقات کے لیے مقامی کرائم برانچ کے عملہ پر مشتمل ایک خصوصی تحقیقاتی ٹیم (ایس آئی ٹی) تشکیل دی تھی، اور ایڈیشنل سپرنٹنڈنٹ آف پولیس ایشور کاٹکھیڑے کو اس کا انچارج بنایا تھا۔

چارج شیٹ میں ڈرانے دھمکانے، زور زبردستی، غیر قانونی حراست، جسمانی تشدد اور پیسے کی اگاہی کے الزامات بھی درج ہیں۔

’’ایک بار انہوں نے مجھے گیراج میں بند کر دیا تھا،‘‘ روشن الزام لگاتے ہیں، ’’اور مجھے مارا پیٹا؛ وہاں میرا بھائی بھی میرے ساتھ تھا۔‘‘

مہاراشٹر میں نجی ساہوکار اس شرط پر اپنا کاروبار چلا سکتے ہیں کہ وہ رجسٹرڈ ہوں اور قانون کی پاسداری کریں۔ چارج شیٹ کے مطابق، ان چھ ساہوکاروں میں سے کوئی بھی رجسٹرڈ نہیں تھا۔ ریونیو اور کوآپریشن کے محکمہ کے حکام کی ایک علیحدہ تحقیقات سے اس بات کی تصدیق ہوئی کہ ان کی تمام تر سرگرمیاں مکمل طور پر غیر قانونی تھیں۔

کولے فیملی منتھور میں اپنے ایک بڑے ذاتی مکان میں مقیم ہے، جسے سالوں کی بچت سے بنایا گیا تھا۔ آج یہ مکان چار مختلف مالیاتی اداروں کے پاس رہن رکھا ہوا ہے۔ اسی طرح مویشیوں کا وہ شیڈ بھی گروی ہے جو ۲۰۱۸ میں ناگ بھیڈ میں واقع ودربھ کونکن کوآپریٹو بینک کی شاخ سے قرض لے کر بنایا گیا تھا۔ وہ شیڈ اب بالکل خالی پڑا ہے۔

’’ہمیں اپنی ہنگامی اور روزمرہ کی ضروریات کے لیے بھی پیسوں کی ضرورت تھی،‘‘ اپنے گھر پر موجود روشن کہتے ہیں۔ چنانچہ قرضوں اور رہن رکھ کر حاصل شدہ رقم کا کچھ حصہ گھریلو اخراجات اور ان کے والدین کے علاج معالجے پر بھی خرچ ہوا۔

قرضوں کا یہ سلسلہ پورے کنبے میں پھیل گیا۔ روشن کی اہلیہ روہینی، بھائی امول، بھابھی شاردا، والد سداشیو اور والدہ نِرملا کے نام پر بھی قرض لیے گئے۔ اس کے علاوہ روشن کو گاؤں کے اپنے دوستوں اور واقف کاروں، نیز اپنی شادی شدہ بہن رمیشوری راڈکے سے بھی قرض لینا پڑا، جو اسی ضلع کے ایک دور افتادہ گاؤں میں رہتی ہیں۔

’’ہم مختلف کھاتوں میں قرض لیتے رہے،‘‘ روشن کہتے ہیں۔

جب سود میں اضافہ ہوا تو انہوں نے قسطوں میں تقریباً ۱۴ تولہ خاندانی سونا رہن پر رکھ دیا۔

ساہوکاروں نے ان کا سوراج ٹریکٹر ضبط کر لیا۔ دو موٹر سائیکلیں فروخت کرنی پڑیں۔ بالآخر، کولے فیملی کو مجبوری میں کھیتی کی زمین کا وہ چار ایکڑ کا قطعہ اونے پونے داموں فروخت کرنا پڑا، جسے روشن کے والد نے سالوں کی محنت سے خریدا تھا۔ اس زمین پر ایک ساہوکار نے قبضہ کر لیا۔

اس فیملی کو کئی راتیں بھوکے پیٹ سونا پڑا، جبکہ اکثر راتوں میں خوف اور فکر نے انہیں سونے نہیں دیا۔

سال ۲۰۲۳ تک اس گھرانے کے تمام دستیاب اثاثے قرضوں کی ادائیگیوں کی نذر ہو چکے تھے۔ اس کے باوجود، قرض برقرار رہے۔

آج یہ فیملی روشن کی اہلیہ روہینی – جو ایک آنگن واڑی ہیلپر ہیں – کی تنخواہ، ان کے والد کی پینشن، اور ان کے چھوٹے بھائی امول کی یومیہ اجرت پر گزربسر کر رہی ہے۔

روہینی کا کہنا ہے کہ ان کی ۷۵۰۰ روپے کی تنخواہ میں سے ۵۵۰۰ روپے مائکرو فائنانس کے قرضوں کی ادائیگی میں چلے جاتے ہیں۔

’’ماجھا پریوار سُکھی پریوار ہوتا جی [ہماری فیملی ایک خوشحال فیملی تھی]،‘‘ بیساکھیوں کے سہارے آہستہ آہستہ چلتے ہوئے روشن کے والد سداشیو کہتے ہیں۔ ’’یا لوکانی پورا لمبا کرون دیلا امہالے [ان لوگوں نے ہمیں کنگال بنا دیا]۔‘‘

پورے ودربھ میں غیر رسمی سود خوری کا نظام باقاعدہ بینکنگ نظام کے متوازی چلتا ہے۔ ماضی کی متعدد کمیٹیوں نے اسے کسانوں کی خودکشیوں کی ایک بنیادی وجہ قرار دیا ہے۔ سرکاری دستاویزات دیہی قرضوں کی حقیقی معیشت کے صرف چند اجزاء کو ہی ظاہر کر پاتی ہیں۔ ہنگامی حالات، شادی بیاہ، مویشیوں کے علاج، یا دیگر متفرق ضروریات کی خاطر لیے گئے قرضے شاذ و نادر ہی زرعی قرضوں کے ڈیٹا یا زمرے میں نظر آتے ہیں۔ یہ بحران انتہائی ساختی اور اجتماعی نوعیت کا ہونے کے باوجود انفرادی مسئلہ بن کر رہ جاتا ہے۔

اس معاملے میں بھی ملزم ساہوکار دن دہاڑے قرض دینے کا ایک وسیع و عریض دھندا چلا رہے تھے۔ درجنوں کسانوں اور چھوٹے کاروباریوں نے مبینہ طور پر ان سے ایسے قرضے لیے، جن پر مرکب سود کی شرح انتہائی تیزی سے بڑھتی تھی اور شرائط بھی غیر قانونی تھیں۔ پولیس نے اپنی تحقیقات میں پایا کہ ملزمان نے نہایت مختصر عرصے میں ضلع چندرپور میں بڑے پیمانے پر زمینیں اور دیگر جائیدادیں حاصل کر لی تھیں۔

روشن کے معاملے کو مقامی اخبارات اور یوٹیوب ویڈیوز میں نمایاں طور پر اجاگر کیا گیا، جس کے بعد عوامی سطح پر ملزمان کی شدید مذمت کی گئی اور انہیں سخت ترین سزا دینے کا مطالبہ ہونے لگا۔

نومبر ۲۰۲۵ کی صبح روشن کی بیوی روہینی نے خودکشی کی کوشش کی تھی۔

’’میں نے دباؤ محسوس کیا اور سوچا کہ موت ہی فرار کا واحد راستہ ہے،‘‘ وہ کہتی ہیں۔

خوش قسمتی سے روشن اس وقت جاگ گئے جب چھت سے پھندا لگا کر لٹکنے کی کوشش کے دوران روہینی کے نیچے سے کرسی گرنے کی آواز آئی تھی۔ روشن دھیرے سے کہتے ہیں، ’’ہم دونوں اس صبح پھوٹ پھوٹ کر روئے تھے۔‘‘

اگلے دن ایک مشترکہ واقف کار کے ذریعے انہوں نے چندر پور کے ایک مقامی ٹی وی رپورٹر سے رابطہ کیا اور کیمرے کے سامنے اپنی آپ بیتی بیان کی۔ یہ رپورٹ نشر ہوئی۔ ایس پی سدرشن نے اس کا نوٹس لیا اور روشن سے ملاقات کی۔ بالآخر برہم پوری پولیس اسٹیشن میں باقاعدہ ایف آئی آر درج کر لی گئی، جس کے بعد گرفتاریوں کا سلسلہ شروع ہوا۔ روشن کا الزام ہے کہ وہ اس سے پہلے بھی پولیس سے رجوع کر چکے تھے، لیکن ان کی شکایت کو نظر انداز کر دیا گیا تھا۔

لیکن پولیس کی مداخلت سے بہت پہلے، جب نہ گروی رکھنے کے لیے کوئی زمین باقی رہ گئی تھی، نہ رہن رکھنے کے لیے کوئی زیور، اور نہ ہی کوئی ایسا رشتہ دار بچا تھا جس سے ادھار لیا جا سکتا تھا، روشن نے سوچا کہ شاید انہیں ایک نیا راستہ مل گیا ہے۔ منتھور سے باہر، قرض، ادائیگیوں اور وصولی ایجنٹوں کی جانی پہچانی دنیا سے پرے، ایک اور نیٹ ورک ان کا منتظر تھا – ایک ایسا راستہ جو انہیں اپنے تمام مسائل کا حتمی حل معلوم ہوتا تھا۔

ساہوکاروں کے ذریعہ مجبور کیے گئے روشن کو فیس بک پر وہ راستہ مل ہی گیا۔ انہیں بس ’جوائن‘ کے بٹن پر کلک کرنا تھا۔

اگر آپ کے ذہن میں خودکشی کے خیالات آ رہے ہیں یا کوئی دوسرا شدید ذہنی دباؤ کا شکار ہے، تو براہِ کرم قومی ہیلپ لائن کِرن کے نمبر 18005990019 (24/7 ٹول فری) پر یا اپنے کسی بھی قریبی ہیلپ لائن نمبر پر فوری طور پر رابطہ کریں۔

پڑھیں: مِنتھور سیریز: حصہ اول – لالچی ساہوکاروں نے کروایا کسان کے گردے کا سودا