लोकतंत्र के मड़ई

मड़ई

जेती देखबे तेती, अऊ ओखरो ले पार
मनखे के लहरा, मनखे के हिलोरा
ये मड़ई भर नोहे
बरम-सगरी आय
जेमा समोय हे लाखों-करोड़ों
अगास-गंगा
तीनों लोक

ये मड़ई भर नोहे
पुरखा मन के अंगना आय
पुरखौती के माटी
रुख, हवा अउ पानी
हंसी-ठठ्ठा, संगी-हमजोली
पनियर आंखी, असवन-बोली
पुरखा के गीत, पुरखा के तान
तैं कुछुच्च ला नई जानस का मितान
हमरे कथा, हमरे कहिनी
हमरे आस, हमरे विश्वास
भजन-किरतन अउ सुमिरन
हमरे ज्ञान, हमरे विज्ञान
हमरे जोहार, हमरे बंदगी
हमरे सुवांस, हमरे जिनगी
ये मड़ई भर नोहे, इतिहास आय

तैं कुछुच्च ला नई जानस का मितान!
हर कऊनो हवय अचमित,
कहाँ गीस जऊन ला गँवा देन हमन.
हमर हिम्मत, हमर परघनी, हमर उछाह, हमर संकल्प,
गुरु के गियान मं बसे भरोसा,
गुजरे अऊ जिंयत लोगन मन ला कऊन मिला सकथे?
काया अऊ आत्मा ला कऊन बिलग कर सकथे?
गुरु के किरपाच ले अइसने हो सकथे.

ये चमत्कार ला तो देख!
अब तक जिनगी जऊन रहिस बेकार, बेमतलब के,
वो मं भर गे हवय कतको गुन अऊ दिखत हवय सुग्घर,
ये मड़ई भर नोहे,
जऊन मं समाय हवय हमर अतीत, हमर आज अऊ अगम.
ये मं हिंदू, मुस्लिम, बौद्ध, जैन अऊ सिख हवंय.
आँखी के आगू कतको कुछु घटत हवय
कतको कुछु हवय नजर के पार.

ये मड़ई भर नोहे,,
आय लहर, आय तिहार अऊ आय लड़ई.
इहाँ गुस्सा हे, पीरा हे अऊ जूझई,
हवय इहाँ वो सवाल घलो उठाय मुड़ी,
जेन ला इतिहास पूछही तोला भरे गुड़ी.

अऊ तंय कहिथस तोला मालूमेच नइ के कऊन हवय इहाँ!
इहाँ कोनो भीड़ नइ, सुग्घर आत्मा मन जुरे हवंय जिहां.
हवा मं बगरत बोली, भाखा के धरती मं शब्द के कुदारी,
हव, ये यात्रा कस, जुलूस आय, फेर नो हे जलसा तिहारी.

ये आय रद्दा पैडगरी
गुरु मन के चेला मंडली.
‘मंय’ ला पाछू छोड़
‘हमन’ डहर जावत मनखे मन के.
ये मं सदियों के गियान के कतको हवंय पाठ
हवय ये मं सूफी फकीर मन के चौदह ठन बात.

मंय तोला मया-मरम भरे एक ठन कहिनी सुनात हवं
कालि फोन करके कहिस दिल्ली के नोनी,
इहाँ ले जब तुमन लहूट जाहू,
ये जगा पर जाही सुन्ना.
सड़क मं भारी ट्रेफिक होही, फेर नइ होही भाईचारा’
लंगर (भंडारा) देवेइय्या मन के नइ होही कतार.
घर लहूटत चेहरा मन के
उतर जाही पानी.

तब हमन काय करबो?
ये सुनके होगे अंसुवई
कइसने ये मया! आय कइसन मड़ई!
भगवान करे,तुमन जम्मो राजी-खुसी घर लहूटव.
ये लड़ई मं जीत तुहंर सत के होय.
ये धरती मं तुमन लिखव अपन नवा भाग,
लिखव नवा नजरिया, नवा निदान, नवा एहसास,
सिधवा, मया-मितानी के लिखव नवा कहिनी.

भगवान करे दाई अऊ लइका मन के मिलन होवय.
ये मड़ई भर नो हे.
जेती देखबे तेती, अऊ ओखरो ले पार
मनखे के लहरा, मनखे के हिलोरा
ये मड़ई भर नोहे
बरम-सगरी आय
जेमा समोय हे लाखों-करोड़ों
अगास-गंगा
तीनों लोक