পৰিৱৰ্তনৰ এচমকা পোহৰৰ আশাত কুট্টুলুৰু গাঁও

কুদুৰইমুখা ৰাষ্ট্ৰীয় উদ্যানৰ পাহাৰৰ ঘন অৰণ্যত বহুকেইটা আদিবাসী সম্প্ৰদায়ে ঐতিহাসিক সময়ৰ পৰা জীৱন নিৰ্বাহ কৰি আহিছে৷ তেওঁলোকৰ ওচৰত কিন্তু অত্যাৱশ্যকীয় মৌলিক সা-সুবিধাখিনিও নাই৷ সেই আদিবাসী সম্প্ৰদায়সমূহৰ ভিতৰত অন্যতম হ’ল কুট্টুলুৰু গাঁৱৰ মালেকুড়িয়া সম্প্ৰদায়টো৷ তেওঁলোকৰ ৩০টা পৰিয়াল আজিও বিদ্যুৎ, পানীৰ দৰে মৌলিক সুবিধাখিনিৰ পৰাও বঞ্চিত৷ কৰ্ণাটকৰ দক্ষিণা কান্নাড়া জিলাৰ বেলটাংগেড়ি তালুকাৰ অন্তৰ্গত কুট্টুলুৰু গাঁৱৰ কৃষক শ্ৰীধৰা মালেকুড়িয়াই কয় যে এলেকাটোৰ লোকসমূহে দীৰ্ঘদিন ধৰি বিদ্যুৎ সংযোগৰ বাবে দাবী কৰি আহিছে৷

আঠ বছৰ পূৰ্বে শ্ৰীধৰাই তেওঁৰ ঘৰলৈ বিদ্যুৎ উৎপাদনৰ বাবে এটা পিকো হাইড্ৰো জেনেৰেটৰ ক্ৰয় কৰি আনিছিল৷ জেনেৰেটৰ ক্ৰয় কৰা ১১টা পৰিয়ালৰ ভিতৰত শ্ৰীধৰাৰ নামো অন্তৰ্ভুক্ত হৈছিল৷ ‘‘বাকী পৰিয়ালসমূহত বিদ্যুতো নাছিল, হাইড্ৰো পাৱাৰো নাছিল, নাছিল পানী যোগানৰ সুবিধাও৷’’ এতিয়া গাঁওখনৰ ১৫টা পৰিয়ালে পিকো হাইড্ৰো যন্ত্ৰৰ সহায়ত বিদ্যুৎ উৎপাদন কৰে৷ এই সৰু পানীৰ টাৰ্বাইন জেনেৰেটৰটোৱে ১ কিলোৱাট বিদ্যুৎ উৎপাদন কৰে যি এখন ঘৰৰ কেইবাটাও বাল্ব পোহৰাই তুলিবলৈ পৰ্যাপ্ত৷

বন অধিকাৰ আইন প্ৰণয়ন হোৱাৰ ১৮ বছৰ অতিক্ৰম হোৱাৰ পিছতো কুদুৰইমুখা ৰাষ্ট্ৰীয় উদ্যানত বাস কৰা লোকসকলৰ বাবে পানী, পথ, বিদ্যালয় বা চিকিৎসালয়ৰ দৰে সাধাৰণ আন্তঃগাঁথনিসমূহৰ সুবিধা এতিয়াও সুদূৰ পৰাহত৷ মালেকুড়িয়া সম্প্ৰদায়ৰ অনুসূচীত জনজাতিয়ে সেই মৌলিক সুবিধাসমূহৰ ভিতৰত কেৱল বিদ্যুতৰ সুবিধা পাবলৈকে ইমান দিনে সংগ্ৰাম কৰিবলগীয়া হৈছে৷

পুনশ্চ : এই ভিডিঅ ’ টো ২০১৭ চনত প্ৰস্তুত কৰা হৈছিল৷ কুট্টুলুৰু গাঁৱত আজি পৰ্যন্ত বিদ্যুতৰ সংযোগ উপলব্ধ হোৱা নাই৷

অনুবাদক: মনোৰঞ্জন মজুমদাৰ