2023: संपादक मन के पसंद के पारी के कुछेक फिलिम

साल 2023 पारी के फिलिम प्रभाग सेती सबले जियादा हासिल करे के रहिस. गाँव-देहात के लोगन मन के ऊपर वीडियो, डाक्युमेंटरी, शार्ट क्लिप अऊ फिलिम ओकर कोठी मं भरिस.

ऑनलाइन जर्नल के रूप मं हमन तऊन फिलिम मन ला प्रोत्साहित करथन जऊन ह हमर तीर-तखार के खबर अऊ घटना मन के ऊपर कड़ा नजर रखथे. बिहार मं मदरसा अज़ीज़िया ऊपर हमर फिलिम  बिहारशरीफ शहर मं 113 बछर जुन्ना लाइब्रेरी ला दंगाई मन के जलाय जाय के बाद ओकर जाँच पड़ताल करिस. जैसलमेर जिला मं पवित्र उपवन- ओरान- मं नवा बिजली कारखाना सेती होवत कब्जा ला लेके बने हमर फिलिम ह सौर अऊ पवन बिलजी कारखाना मन ला देय बर ये झाड़ी वाले जंगल ला ‘बंजर भूईंय्या” मं रखे ला चुनौती देय रहिस.

हमन साल के सुरुवात असम के ब्रह्मपुत्र मं एक आदिवासी भइंसा चरवाहा के मीठ मयारू गीत ले करेन. बछर भर हमन देश के अलग-अलग जगा जइसने पश्चिम बंगाल, छत्तीसगढ़, कर्नाटक, राजस्थान अऊ घलो दीगर जगा ला गीत अऊ नृत्य ला शामिल करत रहेन.

अऊ साल के आखिर मं पारी के ग्राईंडमिल सॉन्ग (जांता गीत) प्रोजेक्ट ऊपर एक ठन फिलिम के संग करत हवन. जऊन ह बछरों-बछर ला चलत आवत ये परंपरा के दस्तावेजीकरन करथे.

ये बछर हमन एक ठन महत्तम फिलिम मोल बनाय हवन जेन ह पुणे मं कचरा संकलेइय्या माइलोगन मन के अवाज ला आगू लाथे, जऊन मन सवाल करथें के, “गर तुमन कचरा करत हव त हमन कचरावाली कइसने अन?” अऊ बदलत मऊसम के असर ला लाके बनेइय्या हमर फिलिम मन मं हमन अल्फांसो आमा ला छापे रहेन, जेकर किसान मन बदलत मऊसम ले हलाकान रहिन.

ये बछर भर मं हमन अपन कोठी मं समाज मन के ऊपर बने फिलिम मन ला संकेल के रखे हवन. मेदिगा समाज के लोगन मन के मेदापुरम मं उगादी तिहार बखत बने ये फिलिम ह नव दलित परंपरा के अवाज अऊ रंग मं परान भर दे हवय. मालाबार इलाका मं कतको अलग-अलग जात अऊ समाज के बनाय तोल्पावकूतु कला ऊपर बने ये लंबा फिलिम छाया कठपुतरी के जरिया ले कतको सांस्कृतिक कहिनी कहिथे. परोसी राज कर्नाटक ले, नादस्वरम बजेइय्या के जिनगी, जेन ह तुलुनाडु मं भूत पूजा के जरूरी हिस्सा आय, बेंच अकन बगरे हवय. लोहा-लक्कड़ ले मूर्ति बनाय के करीबन नंदावत जावत मोम कास्टिंग तरीका - डोकरा - ला पश्चिम बंगाल के ये फिलिम मं बताय गे हवय.

ये फिलिम मन ला जरूर देखव!

गर हमन ला कऊनो फिलिम धन वीडियो भेजे ला चाहत हो त [email protected] मं लिखव

गर हमर काम मं तुमन के रूचि हवय अऊ पारी मं सहयोग करे ला चाहत हव, त किरिपा करके हमन ला [email protected] मं लिखव. हमन अपन संग काम करे बर स्वतंत्र लेखक, पत्रकार, फोटोग्राफर, फिलिम निर्माता, अनुवादक, संपादक, चित्रकार अऊ  शोधकर्ता मन के सुवागत हवय.

पारी गैर-लाभकारी संस्था आय अऊ हमन तऊन लोगन मन के दान के आस करथन जऊन मन हमार बहुभाषी ऑनलाइन पत्रिका अऊ संग्रह ला सराहथें. गर पारी ला सहयोग देय ला चाहत हवव त किरिपा करके दान करे बर इहाँ क्लिक करव.

अनुवाद: निर्मल कुमार साहू