ഒരിക്കല്‍ ആളുകള്‍ തന്‍റെ കഴിവുകളെ അഭിനന്ദിക്കുമെന്ന പ്രതീക്ഷയില്‍ അദ്ദേഹം തന്‍റെ ഗാനങ്ങള്‍ സാമൂഹ്യ മാദ്ധ്യമങ്ങളില്‍ അപ്‌ലോഡ് ചെയ്തുകൊണ്ടേയിരിക്കുന്നു.
“ഒരിക്കല്‍ എനിക്ക് ഒരു ആല്‍ബം പുറത്തിറക്കണം”, 24-കാരനായ സാന്തൊ താന്തി പറഞ്ഞു. അദ്ദേഹം ആസാമിലെ ജോര്‍ഹാട് ജില്ലയിലെ സായികോട്ട തേയില എസ്റ്റേറ്റിലെ ദെകിയജുലി ഭാഗത്തുനിന്നുള്ള വ്യക്തിയാണ്.
സാന്തൊ മറ്റെല്ലാത്തിലുമുപരിയായി ഒരു ഗായകനാകുന്നത് സ്വപ്നം കണ്ടാണ്‌ വളര്‍ന്നത്. പക്ഷെ അദ്ദേഹത്തിന്‍റെ ലോകത്തിലെ യാഥാര്‍ത്ഥ്യങ്ങള്‍ തികച്ചും വ്യത്യസ്തമായാണ് പരിണമിച്ചത്. അച്ഛന്‍ നടത്തുന്ന ചെറിയൊരു സൈക്കിള്‍ നന്നാക്കല്‍ കടയില്‍ സഹായിയായി നിന്നുകൊണ്ടാണ് അദ്ദേഹം ജീവിതമാര്‍ഗ്ഗം തേടുന്നത്.
സാന്തൊ താന്തി ഒരു ആദിവാസിയാണ്‌ - പക്ഷെ അദ്ദേഹത്തെ നിങ്ങള്‍ക്ക് ആ വിഭാഗത്തിലെ ഏതെങ്കിലുമൊരു പ്രത്യേക ഗോത്രത്തിലേക്ക് ഒതുക്കാന്‍ കഴിയില്ല. ഒരുപക്ഷെ ഒന്നരനൂറ്റാണ്ടായി ഒഡിഷ, പശ്ചിമ ബംഗാള്‍, ബീഹാര്‍, ഝാര്‍ഖണ്ഡ്, തെലങ്കാന, മദ്ധ്യപ്രദേശ്‌, ഛത്തീസ്‌ഗഢ്, ആന്ധ്രാപ്രദേശ് എന്നിവിടങ്ങളില്‍നിന്നും കുടിയേറ്റത്തൊഴിലാളികളായി എത്തിയിട്ടുള്ള ആദിവാസികളാണ് ആസാമിലെ തേയിലത്തോട്ടങ്ങളിലുള്ളത്. ഈ വിഭാങ്ങളുടെ നിരവധി പിന്മുറക്കാര്‍ ആദിവാസി സമൂഹങ്ങളുമായും മറ്റു സാമൂഹ്യ വിഭാഗങ്ങളുമായും കൂടിക്കലര്‍ന്നിരിക്കുന്നു. ഈ സമുദായങ്ങളെ മൊത്തത്തില്‍ചേര്‍ത്ത് ‘തേയില ഗോത്രങ്ങള്‍’ (Tea Tribes) എന്നാണ് പലപ്പോഴും വിളിക്കുക.
അവരില്‍ 6 ദശലക്ഷത്തിലധികം ആളുകള്‍ ആസാമില്‍ ജീവിക്കുന്നു. തങ്ങളുടെ യഥാര്‍ത്ഥ സംസ്ഥാനങ്ങളില്‍ പട്ടിക വര്‍ഗ്ഗങ്ങളായി അംഗീകാരമുള്ള ഇവര്‍ക്ക് ഇവിടെ പ്രസ്തുതപദവി നിഷേധിക്കുന്നു. അവരില്‍ ഏകദേശം 12 ലക്ഷത്തോളം ആളുകള്‍ സംസ്ഥാനത്തെ ആയിരത്തോളം തേയിലത്തോട്ടങ്ങളില്‍ പണിയെടുക്കുന്നു.
ദൈനംദിന ജീവിത വൈഷമ്യങ്ങളും കഠിനമായ തൊഴിലും അവരില്‍ നിരവധിപേരുടെയും അഭിലാഷങ്ങളെ തകര്‍ക്കുന്നതായി കാണുന്നു. പക്ഷെ സാന്തൊയുടെ കാര്യം അങ്ങനല്ല. അദ്ദേഹം തന്‍റെ ചുറ്റുംകാണുന്ന കഷ്ടതകളെ പ്രതിഫലിപ്പിക്കുന്ന ഝുമുര്‍ ഗാനങ്ങള്‍ പാടുന്നു. വെയിലത്തും മഴയത്തും തേയിലത്തോട്ടങ്ങളില്‍ പണിയെടുക്കുന്ന ആളുകളെക്കുറിച്ചും, ഉന്മേഷദായകമായ ഓരോ കപ്പ് ചായയ്ക്കും പിന്നിലുള്ള കഠിനാദ്ധ്വാനത്തേക്കുറിച്ചും അദ്ദേഹം പാടുന്നു.
ഒരു ഗായകനാകുന്നത് സ്വപ്നം കണ്ടാണ്‌ സാന്തൊ വളര്‍ന്നത്. പക്ഷെ അച്ഛന്‍ നടത്തുന്ന ചെറിയൊരു സൈക്കിള്‍ നന്നാക്കല്‍ കടയില്‍ സഹായിയായി നിന്നുകൊണ്ട് അദ്ദേഹത്തിന് ജീവിതമാര്‍ഗ്ഗം തേടേണ്ടി വരുന്നു
ഇവിടുത്തെ ഝുമുര്‍ ഗാനങ്ങള്‍ സാദ്രി ഭാഷയിലാണ് പാടുന്നത്. അവ പലപ്പോഴും കാലങ്ങളായി കൈമാറപ്പെടുന്നവയാണ്. സാന്തൊ പാടുന്ന പാട്ടുകള്‍ ഒന്നുകില്‍ അദ്ദേഹത്തിന്‍റെ അച്ഛനൊ അമ്മാവനൊ എഴുതിയതൊ അല്ലെങ്കില്‍ തലമുറകളായി കൈമാറിവന്നതില്‍നിന്നും അദ്ദേഹം കുട്ടിയായിരുന്നപ്പോള്‍ കേട്ടതൊ ആണ്. രാജ്യത്തിന്‍റെ വിവിധ ഭാഗങ്ങളില്‍ നിന്നും ആസാമിലെ തേയിലത്തോട്ടങ്ങളിലേക്ക് ആദിവാസികള്‍ കുടിയേറിയതുമായി ബന്ധപ്പെട്ട കഥകളാണ് അവ ഉള്‍ക്കൊള്ളുന്നത്. അവ പുതിയ നാട്ടിലേക്കുള്ള യാത്രയെയും പഴയത് മറക്കുന്നതിനെക്കുറിച്ചുമാണ്. ഇടതൂര്‍ന്ന കാടുകള്‍ തെളിച്ചതിനെക്കുറിച്ചും സമതലമല്ലാത്ത ഭൂമി ഇപ്പോഴത്തെ സമൃദ്ധമായ തേയിലത്തോട്ടങ്ങള്‍ ആക്കിയതിനെക്കുറിച്ചുമാണ്.
സംഗീതത്തോടുള്ള കടുത്ത അഭിനിവേശംകാരണം സാന്തൊയെ പലപ്പോഴും അദ്ദേഹത്തിന്‍റെ സഹഗ്രാമീണര്‍ അപമാനിക്കുന്നു. അവര്‍ പറയുന്നത് എന്തൊക്കെ ആഗ്രഹങ്ങള്‍ ഉണ്ടെങ്കിലും ക്രമേണ അദ്ദേഹം തേയിലത്തോട്ടത്തില്‍ കൊളുന്ത് നുള്ളുന്നതില്‍ ചെന്നെത്തുമെന്നാണ്. അത്തരം അഭിപ്രായങ്ങള്‍ ചിലപ്പോള്‍ അദ്ദേഹത്തിന്‍റെ പ്രചോദനങ്ങളെ ബാധിച്ചേക്കാം, പക്ഷെ കുറച്ചുകാലത്തേക്കു മാത്രം. വലിയ കാര്യങ്ങള്‍ സ്വപ്നം കാണുന്നതില്‍നിന്നോ തന്‍റെ പാട്ടുകള്‍ സാമൂഹ്യ മാദ്ധ്യമ വേദികളില്‍ അപ്‌ലോഡ് ചെയ്യുന്നതില്‍ നിന്നോ അവര്‍ അദ്ദേഹത്തെ തടയുന്നുമില്ല.
പരിഭാഷ: റെന്നിമോന്‍ കെ. സി.
