एगो डोर में गूथल बा जिनगी संगे जबान

हमार मातृभाषा

शायद, हमरा आ हमार माई
के मुंह में जबान ना रहे
जबान त मरद लोग के होखेला, मिलेला वरदान में
जइसे मन करे चलावे,
गारी गलौज करे,
खिसियाए,
मनमानी करे,
चीखे चिल्लाए,
झूट्ठो के प्रेम के पाती लिखे,
देवाल खड़ा करे,
इतिहास के तोड़े-मरोड़े के
मरदाना बपौती.

मरद के जबान लपेटाइल बा
मोटा जिल्द वाला डिक्शनरी से
एकरा छापे वाला मशीन
तैयार हो चुकल बा.
हमार माई के लिखल
कविता के लाइन के नीचे
छपल बा उनकर नाम.
उनकर जबान में लिखल किताब
झूठ के पुलिंदा बा
बड़हन बड़हन किताबघर में
धूल फांकत बा.
चाहे संसद हो, चाहे रैली
ओहि लोग के आवाज
उठावल गइल
सुनल गइल
दरज भइल
लिखल गइल
समझल गइल
प्रचारित भइल.

हमनी के माई के बोली त अलगे रहे -
असर में
तासीर में
लहजा में
तारीख में
आउर कहन में.

धरती आपन कलम से लिखले बा
प्यार में डूबा के.
लोबान के धुआं में लपेट के
मिहनत के स्याही से भिगा के
पुरान लुगा के तह में लुका के
टीन के बक्सा में संभार के
रखल बा.
मिट्टी के कलम से,
फसल के मौसम में,
खून पसीना के स्याही से
हमनी के हथेली पर लिखल गइल,
आपन मातृभाषा.

जब मेहरारू लोग कलम ना गढ़ सकल
कमरा के बंद दरवाजा के पीछे
फुसफुसाइल,
मलकिनी भी, महरी भी
आपन मातृभाषा में.

आउर जिनकरा लगे कमरा आ बंगला ना रहे
ऊ खेत-खलिहान के सीना पर
मड़ई के भूइंया पर
हंसुआ खुरपी से खोद देली
आपन मातृभाषा.

मेहरारू जिनकर अंगुरी में जादू रहे
अबाये आ लुगा सभे पर काढ़ली
आरी, मुकेश आउर जरी जरदोजी से
आपन मातृभाषा.

आपन मातृभाषा -
कब्र के पत्थर पर खोदल गइल
चिता के लपट से उठल
लाल आसमान पर लिखल गइल
सपना से भरल अंखियन में.
आपन मातृभाषा -
इंकलाब के नारा में
हमनी के दिल के धड़कन में
प्यार के सुर में
आउर छटपटात मन में बा.
आपन मातृभाषा!

सगरे मरदन के जबान एक्के बा
रंग एक्के बा
रूप एक्के बा
सुर एक्के बा
पर हमनी के मातृभाषा से अलगे बा,
जे इंद्रधनुष जेका
सतरंगी बा.

हमनी के मातृभाषा,
बेगम अख्तर के गला से निकलल सुर जेका
फातिमा से सीखल गइल तरीका जेका
प्रेम में चढ़ल परवान जेका बा.

ओह में से सभे के तोड़ के
सगरे शब्दन के जोड़ के
हमनी के आपन रोमांचक, निडर
बतकुच्चन, तलवार के धार जेका,
तेज तर्रार, लमहर,
आपन मातृभाषा के
हमनी फेरु से रचत बानी
एगो नया बिहान.