ڈھاک اور ڈھاکیوں سے ہی ہے درگا پوجا کی رونق

اندرجیت رشی داس، اگرتلہ کے بھاٹی ابھے نگر علاقے میں اپنے گھر کے پاس کام کے لیے نکل رہے ہیں۔ جب تک پوجا کا پروگرام شروع نہیں ہوتا، کئی ڈھاکی رکشہ چلاتے رہیں گے

درگا پوجا سے تقریباً ۱۰ دن پہلے سے ہی تیاریاں شروع ہو جاتی ہیں۔ ڈھاک کو باہر نکالا جاتا ہے، اس کی رسیوں کی صفائی کی جاتی ہے اور اسے کسا جاتا ہے، تاکہ اس سے ٹھیک آواز نکلے۔ یہ سب جسمانی طور پر تھکا دینے والا کام ہوتا ہے، کیوں کہ اس کی رسیاں جانوروں کے چمڑے سے بنی ہوتی ہیں، جو وقت کے ساتھ سخت ہو جاتی ہیں۔ اس کام میں دو لوگوں کی محنت لگتی ہے۔ اندرجیت رشی داس بتاتے ہیں، ’اس کے لیے بہت دَم چاہیے اور اسے اکیلے کرنا بہت مشکل ہے۔ ویسے یہ کام بہت ضروری ہوتا ہے، کیوں کہ ڈھاک کی آواز کا معیار اسی پر منحصر ہے‘

صفائی کرکے اور آواز کو چیک کرنے کے بعد، ڈھاک کو صاف کپڑے سے ڈھانپ کر کچھ وقت کے لیے پھر سے اندر رکھ دیا جاتا ہے اور پوجا کے دوران ہی اسے باہر نکالا جاتا ہے

ایک طرف شہر میں کئی لوگ پروگرام کی تیاری میں مصروف ہیں، دو ڈھاکیے شہر کے کرنل چومہانی (چوراہے) کے پاس کی ایک دکان سے درگا کی مورتی لانے کے لیے نکلے ہیں اور ڈھاک بجا رہے ہیں۔ پوجا کے دوران کئی موقعوں پر ڈھاک بجایا جاتا ہے، جیسے کہ مورتی لانے کے دوران، اسے پنڈال میں لگاتے وقت، پوجا کرتے ہوئے، اور آخر میں اسے غرقاب کرنے کے دوران ڈھاک بجانے کی روایت ہے

وسط اگرتلہ میں کمان چومہانی جنکشن پر ایک ڈھاکی کام کا انتظار کر رہا ہے۔ ہر سال پاس کے گاؤوں اور شہروں سے ڈھاکی آتے ہیں اور تریپورہ کی راجدھانی کے کچھ خاص علاقوں میں درگا پوجا شروع ہونے سے دو دن پہلے جمع ہو کر سارا دن انتظار کرتے ہیں۔ سال ۲۰۲۰ میں، کورونا وبائی مرض کے سبب بہت کم ڈھاکیوں کو کام ملا

بابل روی داس ایک ڈھاکی ہیں، جو اگرتلہ سے ۲۰ کلومیٹر دور واقع اپنے گاؤں سے آئے ہیں۔ پورا دن انتظار کرنے کے بعد، اب تھک کر بیڑی پی رہے ہیں

وسط اگرتلہ میں بٹالا بس اسٹینڈ کے پاس ایک ڈھاکی آٹورکشہ سے واپس اپنے گاؤں جاتے ہوئے۔ یہ ان کچھ جگہوں میں سے ایک ہے جہاں الگ الگ گاؤوں اور شہروں سے ڈھاکی درگا پوجا کے دو دن پہلے سے آ کر جمع ہوتے ہیں، تاکہ انہیں کام مل سکے۔ یہ گروپ پورا دن انتظام کرنے کے بعد، رات ۹ بجے واپس گھر جا رہا ہے

وبائی مرض سے پہلے ایسا کبھی نہیں ہوا کہ بجے کمار چومہانی علاقے میں ڈھاکی، پوجا کی کسی ایسی جگہ پر ڈھاک بجا رہے ہوں جہاں کوئی نہ ہو۔ حالانکہ، ایسا نہیں ہے کہ اگرتلہ میں سبھی پنڈال اتنے خالی رہے ہیں، یہاں تک کہ پچھلے سال بھی ایسا نہیں تھا

پچھلے سال درگا پوجا سے ایک ہفتہ پہلے، کرشنا نگر کے انسٹرومنٹ کی دکان میں ایک ڈھاکی، ڈھاک کی مرمت کرتے ہوئے

روایت اور تکنیک کو ملاتے ہوئے ایک مائکروفون کا استعمال کرکے رام نگر کے روڈ نمبر ۴ پر ڈھاک کی آواز کو تیز کرنے کی کوشش کی جا رہی ہے۔ ڈھاک کی آواز بہت اونچی ہوتی ہے، جسے عام طور پر کسی ایمپلیفائر کی ضرورت نہیں ہوتی اور اس کی آواز بہت دور تک پہنچ سکتی ہے۔ مونٹو رشی داس (اس فوٹو میں نہیں ہیں)، جو ۴۰ سال سے بھی زیادہ عرصے سے ڈھاک بجا رہے ہیں، کہتے ہیں کہ نئی تکنیکوں کے آ جانے سے بھی اب ڈھاکیوں کو کام ملنا کم ہو گیا ہے: ’آج کل ڈھاک کی موسیقی سننے کے لیے، بس کسی کو اپنے فون پر ایک بٹن دبانے کی ضرورت ہوتی ہے‘

جن لوگوں کو سال ۲۰۲۰ میں کام ملا تھا، اس کی وجہ یہ تھی کہ لوگوں، اداروں، اور کنبوں کے ساتھ ان کی لمبے دنوں سے جان پہچان تھی۔ یہاں، رام نگر روڈ نمبر ایک کے پاس، کیشب رشی داس ایک مقامی تنظیم کے پنڈال میں اپنے ڈھاک کے ساتھ رقص کرتے ہوئے۔ وہ سال کے بقیہ دنوں میں رکشہ چلاتے ہیں۔ کیشب، تنظیم کے ایک رکن کو جانتے ہیں، اسی لیے انہیں ڈھاک بجانے کے لیے بلایا گیا

کیشب رشی داس سال بھر رکشہ چلاتے ہیں، اور پوجا کے دنوں یا دیگر تقریبات پر اپنے بیٹے کے ساتھ ڈھول بجاتے ہیں، جسے وہ کبھی کبھی ڈھاک کے ساتھ دھُن ملاتے ہوئے پرفارم کرتے ہیں۔ وہ اپنے رکشہ پر بیٹھ کر کام پر جاتے ہیں

اکھورا روڈ پر پوجا کے آخری دن درگا کی مورتی کو غرقاب کرنے کے لیے لے جاتے ہوئے: یہ وقت ڈھاک بجانے کے کچھ سب سے اہم لمحات میں سے ایک مانا جاتا ہے

پریمل رشی داس، کیر چومہانی علاقے میں کالی دیوی کے ایک مندر میں پوجا کے بعد آرتی لیتے ہوئے۔ وہ بتاتے ہیں، ’اس سال [۲۰۲۱] وہ مجھے ۱۱ ہزار روپے دے رہے ہیں، پچھلے سال سے ۵۰۰ روپے زیادہ۔ میرا ۵۸واں سال چل رہا ہے، جب میں ۱۸ یا ۱۹ سال کا تھا، تو ڈھاک بجانا شروع کیا تھا‘

کچھ ڈھاکی لکشمی پوجا کی شام کو سڑک پر ڈھاک بجاتے ہوئے نکلتے ہیں۔ لوگ جب انہیں سڑک پر ڈھاک بجاتے ہوئے سنتے ہیں، تو وہ انہیں اپنے گھر پر بجانے کے لیے بلاتے ہیں۔ ڈھاکی کے طور پر کمائی کا یہ ان کا آخری دن ہوتا ہے

ڈھاکی ایک گھر سے دوسرے گھر جاتے ہیں اور ہر جگہ ۵ سے ۱۰ منٹ تک بجاتے ہیں، جہاں سے انہیں ۲۰ یا ۵۰ روپے مل جاتے ہیں

راجیو رشی داس، لکشمی پوجا کی رات کو ۹ بجے واپس اپنے گھر جاتے ہوئے۔ وہ کہتے ہیں، ’مجھے یہ [گھر گھر جا کر ڈھاک بجانا] بالکل پسند نہیں ہے۔ لیکن، میری فیملی مجھ سے کہتی ہے کہ میں جاؤں، تاکہ کچھ اضافی کمائی ہو سکے‘

جب پوجا کا سیزن ختم ہو جاتا ہے، تو زیادہ تر ڈھاکی اپنے روزمرہ کے کاموں پر واپس لوٹ جاتے ہیں۔ درگا چومہانی جنکشن ان جگہوں میں سے ایک ہے جہاں وہ اپنا رکشہ لے کر صارفین کے انتظار میں سال بھر کھڑے رہتے ہیں