पारीवरचा मजकूर १४ भारतीय भाषांमध्ये - अनेकदा एकाच वेळी या सगळ्या भाषांमध्ये प्रकाशित होतो. पत्रकारितेच्या जगात एक अनोखी बहुभाषी वेबसाइट म्हणून पारीने स्वतःचं स्थान निर्माण केलं आहे. पण हे काम एवढ्यापुरतं मर्यादित का नाही ते जाणून घ्या...
मातृभाषेत वार्तांकन आणि पारीवर प्रकाशित होणाऱ्या लेखांचे अनेक भाषांमध्ये अनुवाद असं दुपेडी काम करणारा आमचा अनोखा प्रकल्प म्हणजे पारीभाषा. पारीवरच्या प्रत्येक लेखासाठी अनुवाद ही कळीची प्रक्रिया आहे. आमच्यासोबत काम करणारे संपादक, अनुवादक आणि सेवाभावी मित्रपरिवार विभिन्न सामाजिक, सांस्कृतिक आणि भाषिक पार्श्वभूमीतून येतात आणि आपल्या अनुवादांद्वारे पारीवर प्रकाशित होणाऱ्या कहाण्या ज्यांच्या आहेत त्यांच्यापर्यत त्यांच्याच भाषेत पोचवण्याचं काम करतात.