मंय पहिली दफा वोला 2019 मं बकिंघम नहर के इलाका ले गुजरत देखे रहेंव. पनबुड़ी चिरई कस गोता मार के अऊ नहर के पानी मं बूड़े के ओकर तरीका ह मोर धियान अपन डहर खिंचिस. वो हा नदी किनारा के रेती ला अपन हाथ ले तेजी ले खोधरिस अऊ दीगर मन ले जल्दी चिंगरी मन ला धर डरिस.
गोविंदम्मा इरुलर समाज के आय, जेन ला तमिलनाडु मं आदिवासी के रूप मं रखे गे हवय. वो ह चेन्नई के तीर कोसस्थलैयार नदी मं तब ले चिंगरी धरत हवय जब वो ह नानकन लइका रहिस.अब ओकर उमर 70 बछर के होगे हवय, ओकर घर के खराब माली हालत ह वो ला ये बूता ला करत रहे ला मजबूर करिस, भले वो ह कम नजर अऊ घाव के दिक्कत ले जूझत रहय.
मंय ओकर ये वीडियो चेन्नई के उत्तरी भाग मं कोसस्थलैयार नदी के बगल मं बकिंघम नहर मं काम करत बनाय रहेंव. चिंगरी धरे सेती वोकर डूबकी लगावत, वो ह अपन जिनगी के बारे मं बात करथे, अऊ ये एकेच बूता आय जऊन ला वो ह जानथे.
तुमन, गोविंदम्मा के जिनगी के बारे मं अऊ जियादा इहाँ पढ़े सकत हव .
अनुवाद : निर्मल कुमार साहू
