جمہوریت کا میلہ

میلہ

جہاں تک آنکھیں دیکھ پاتی ہیں، اور جہاں تک نہیں جاتیں،
مجھے لوگ ہی لوگ نظر آتے ہیں جو اس میلہ میں شامل ہیں۔
صرف اس زمین کے نہیں،
بلکہ پوری کائنات اس میں شامل ہے۔
یہ میلہ ہے۔
اس میں مٹی، درخت، ہوا اور پانی،
ہماری ہنسی، ہمارے آنسو
ہمارے گیت شامل ہیں۔
اور تم کہتے ہو تمہیں پتہ ہی نہیں
کہ کون شامل ہے…
اجداد کی سنہری تاریخ،
مٹی میں پیدا ہوئیں لوک کتھائیں، تذکرے اور کہانیاں
ہمارے بھجن، ہمارا صبر، ہماری امیدیں،
ہمارے لفظ، ہمارے گیت،
ہمارے تجربات، ہماری عبادتیں، سب شامل ہیں۔
اور تم کہتے ہو تمہیں پتہ ہی نہیں!
ہر کوئی حیران ہے،
کہاں گیا سب جو ہم نے کھویا۔
ہماری ہمت، ہماری گرمجوشی، ہماری خوشیاں، ہمارا عہد
استاد کی درسوں میں آباد وہ بھروسہ
کھوئے اور زندہ لوگوں کو کون ملا سکتا ہے؟
جسم اور روح کو کون چھڑا سکتا ہے؟
گرو کے رحم و کرم سے ہی تو ایسا ہو سکتا ہے۔
یہ عجوبہ تو دیکھو!
زندگی جو بیکار تھی، اب تک وہ بے مقصد تھی،
اس میں معنی بھر گئے ہیں اور خوبصورت سی نظر آنے لگی ہے۔
یہ میلہ ہے،
جس میں ہمارا ماضی، حال اور ہمارا آنے والا وقت شامل ہے۔
اس میں ہندو، مسلم، بودھ، جین اور سکھ شامل ہیں۔
آنکھوں کے سامنے کتنا کچھ واقع ہو رہا ہے
کتنا کچھ ہے جو نظروں کی پہنچ سے باہر ہے۔
یہ میلہ ہے،
مستی ہے، جدوجہد ہے، اور تہواروں کا جشن ہے۔
یہاں غصہ ہے، درد ہے، اور ٹکراؤ کا کھیل ہے،
وہ سوال بھی یہاں سر اٹھائے کھڑا ہے،
وہی سوال جو تاریخ ایک دن پوچھے گی تم سے۔
اور تم کہتے ہو تمہیں پتہ ہی نہیں
کہ کون شامل ہے!
یہ کوئی بھیڑ نہیں، خوبصورت روحوں کا مجمع ہے۔
ہوا میں تیرتے جملوں کا مطلب، زبان کی زمین پر الفاظ کی کدال ہے۔
یہ سفر ہے، جلوس ہے، لیکن تہواری جلسہ نہیں۔
یہ کارواں ہے
استادوں کا درس پائے شاگردوں کا۔
’میں‘ کو پیچھے چھوڑ
’ہم لوگ‘ کی طرف بڑھتے انسانوں کا۔
اس میں تجربوں کے کتنے سبق ہیں۔
صوفی فقیروں کے چودہ سلسلوں کی دھمک ہے۔
آؤ تمہیں ایک موضوع سناتا ہوں، پیارا سا معصوم قصہ بتاتا ہوں۔
کل دہلی کی بچی ایک کہنے لگی،
یہاں سے جب تم گھر لوٹ جاؤگے،
یہ جگہ ویران ہو جائے گی۔
سڑکوں پر ٹریفک بہت ہوگا، لیکن بھائیچارہ نہ ہوگا۔
لنگر پروستی قطاریں نہ ہوں گی۔
گھر لوٹتے چہروں کی
چمک کھو جائے گی۔
ہم کیا کریں گے پھر؟
یہ سن کر ہماری آنکھیں نم ہو گئیں
کیسا پیار ہے یہ! کیسا میلہ ہے!
دعا ہے اپنے گھروں کو لوٹو، تو ڈھیر ساری خوشیاں لیے لوٹو۔
اس لڑائی میں تمہارے سچ کی جیت ہو۔
تم اس زمین کا نیا نصیب لکھو،
نئے احساس، نظر نئی، نیا اثر لکھو،
محبت، سادگی، اتحاد کی ایک نئی کہانی لکھو۔
دعا ہے مائیں اور بیٹے جلدی ایک ہو جائیں۔
یہ میلہ ہے۔
جہاں تک آنکھیں دیکھ پاتی ہیں، اور جہاں تک نہیں جاتیں،
مجھے لوگ ہی لوگ نظر آتے ہیں، جو اس میلہ میں شامل ہیں۔
صرف اس زمین کے نہیں،
بلکہ پوری کائنات اس میں شامل ہے۔
یہ میلہ ہے۔

مترجم: قمر صدیقی