'পাৰি’ৰ প্ৰিয় পঢ়ুৱৈসকল,
www.ruralindiaonline.org ৰ বাবে বছৰটো আছিল ব্যস্ততাৰে ভৰা।
চাওতে চাওতে ২০২৩ বৰ্ষটো যাবৰে হ’ল। বিদায়ৰ এই ক্ষণত 'পাৰি’য়ে উভতি চাইছে বছৰটোৰ বিগত সময়ছোৱালৈ। সেয়ে শেষৰ এই দিনকেইটাত 'পাৰি’-য়ে প্ৰকাশ কৰিছে সম্পাদকৰ পচন্দ অনুসৰি বছৰটোত প্ৰকাশিত কিছু শ্ৰেষ্ঠ লিখনিৰ পৰ্যালোচনা। এই পৰ্যালোচনাত কবিতাৰ পৰা আৰম্ভ কৰি সংগীত, চিত্ৰশিল্প, চলচ্চিত্ৰ, ফটো, অনুবাদ, লাইব্ৰেৰী, ফেচেছ, সামাজিক মাধ্যম আৰু শিক্ষাৰ্থীসকলৰ সৈতে বাৰ্তালাপকে ধৰি প্ৰায় প্ৰতিটো শিতানকে অন্তৰ্ভুক্ত কৰিবলৈ চেষ্টা চলোৱা হৈছে।
আমি সমগ্ৰ দেশৰ পৰা প্ৰতিবেদন প্ৰকাশ কৰি আহিছো আৰু এইবাৰ আমি উত্তৰ-পূৰ্বাঞ্চলকে ধৰি একাধিক নতুন ঠাইকো সামৰি লৈছো। কৃষি সম্পৰ্কীয় আমাৰ সংগ্ৰহত অপৰ্ণা কাৰ্তিকেয়ানৰ জেছমিন, তিল, শুকান মাছকে ধৰি বহুতো বিষয়ত নিৰন্তৰ গৱেষণাৰ বিৱৰণ দিয়া কেইবাটাও প্ৰতিবেদন আছে। জয়দীপ হাৰ্ডিকাৰৰ কৃষি বিষয়ক ধাৰাবাহিক প্ৰতিবেদন ‘এয়াও এক ভিন্ন প্ৰকৃতিৰ খৰাং’-য়ে মানুহ আৰু বন্যজন্তুৰ সংঘৰ্ষ আৰু ইয়াৰ পৰিণাম, বিশেষকৈ বিভিন্ন অভয়াৰণ্যৰ ওচৰত বাস কৰা লোকসকলৰ জীৱনত ইয়াৰ প্ৰভাৱৰ বিষয়ে বিতংভাৱে দাঙি ধৰা হৈছে।
পালানি কুমাৰে প্ৰান্তীয় অঞ্চলত বাস কৰা দৰিদ্ৰ লোকসকলৰ জীৱন পৰিস্ফুট কৰি তোলা অনন্য আলোকচিত্ৰ একত্ৰিত কৰিছে – এইবোৰৰ ভিতৰত তামিলনাডুৰ ভাস্কৰ্যশিল্পী, ট্ৰান্স অভিনয় শিল্পী আৰু মীনপালকসকলৰ লোককলাও আছে। কাশ্মীৰ আৰু লাডাখৰ ওখ পৰ্বতমালাত ভ্ৰমণ কৰি ঋতায়ান মুখাৰ্জী আৰু মুজামিল ভাটে জলবায়ু পৰিৱৰ্তন প্ৰক্ৰিয়াৰ সৈতে খাপ খুৱাবলৈ চেষ্টা চলাই যোৱা পশুপালকসকলৰ দৈনন্দিন জীৱন ধৰি ৰাখিবলৈ তেওঁলোকৰ সৈতে দীঘলীয়া দূৰত্ব অতিক্ৰম কৰিছে। জ্যোতি চিনৌলিয়ে গ্ৰাম্য মহাৰাষ্ট্ৰত বিদ্যমান অন্যায়-অনিয়মৰ বেহু ভাঙিবলৈ চেষ্টা চলাই যোৱা যুৱ খেলুৱৈ, সন্তানৰ শিক্ষাৰ বাবে যুঁজ দি থকা প্ৰব্ৰজনকাৰী শ্ৰমিকসকলৰ সমস্যা তুলি ধৰাৰ লগতে মহিলাৰ ঋতুস্ৰাৱ সম্পৰ্কীয় সামাজিক ভুল ধাৰণাকে ধৰি একাধিক বিষয় স্পৰ্শ কৰি গৈছে। আনহাতে, বিষাক্ত সুৰাই গ্ৰাস কৰা বিহাৰৰ মুছাহাৰ সম্প্ৰদায়ৰ লোকসকলক লৈ প্ৰকাশ কৰা 'পাৰি ফেলো’ উমেশ কে ৰায়ৰ আকৰ্ষণীয় প্ৰতিবেদনো আছিল উল্লেখনীয়।
এই বছৰ, আমি বিভিন্ন সম্প্ৰদায় আৰু সংৰক্ষণক কেন্দ্ৰ কৰি গঢ় লৈ উঠা কিছুমান নতুন সামাজিক ক্ষেত্ৰতো প্ৰৱেশ কৰিছো। এইসমূহৰ ভিতৰত উল্লেখনীয় এক প্ৰতিবেদন আছিল হিমালয় পৰ্বতমালাৰ পূৱত বুগুন লিওচিকলা নামৰ চৰাইৰ প্ৰজাতি বিধৰ প্ৰতি অহা ভাবুকি আৰু চৰাইবিধৰ সংৰক্ষণৰ বাবে স্থানীয় বাসিন্দাসকলে হাতত লোৱা প্ৰচেষ্টা বিষয়ক প্ৰতিবেদন। একেদৰে প্ৰীতি ডেভিদৰ প্ৰতিবেদনত ৰাজস্থানত সম্পূৰ্ণ বিলুপ্তিৰ অৱস্থাৰ দিশে গতি কৰা 'গ্ৰেট ইণ্ডিয়ান বাষ্টাৰ্ড', আৰু নৱীকৰণযোগ্য শক্তি প্ৰকল্পৰ কবলত পৰি হেৰোৱাৰ উপক্ৰম ঘটা পবিত্ৰ বনৰ ওপৰতো আলোকপাত কৰা হৈছে।
আমি বাতৰিবোৰ প্ৰকৃত ৰূপত তুলি ধৰিবলৈ প্ৰয়াস কৰি আহিছো। আমি মহাৰাষ্ট্ৰৰ প্ৰতিবাদকাৰী কৃষকসকলৰ সৈতে খোজকাঢ়ি তেখেতসকলৰ দুখ-দুৰ্দশাৰ সমভাগী হৈছো। আমি প্ৰাপ্য অধিকাৰৰ বাবে পদযাত্ৰা কৰা আদিবাসীসকলৰ লগতে আন্দোলনকাৰী অংগনবাদী কৰ্মীসকলৰ সৈতেও বাৰ্তালাপ কৰিছো। ইয়াৰ উপৰিও ২০২৩ চনৰ ডিচেম্বৰ মাহত মধ্যপ্ৰদেশ আৰু ছত্তীশগড়ৰ বিধানসভা নিৰ্বাচনৰ পূৰ্বে পাৰ্থ এম এন-য়ে ৰাজ্য দুখনৰ জীয়া ছবিও প্ৰকাশ কৰিছে। তেওঁৰ প্ৰতিবেদনত নিৰ্বাচনমুখী ৰাজ্য দুখনত ন্যায় প্ৰদানৰ নামত চলি অহা বুলড’জাৰৰ অন্যায়ৰ বলি হোৱা ভুক্তভোগীসকল, আদিবাসীসকলৰ ওপৰত হৈ অহা অত্যাচাৰ আৰু আৰক্ষীৰ জিম্মাত মৃত্যু হোৱা লোকসকলৰ কৰুণ বাস্তৱৰ বিষয়ে প্ৰকাশ পাইছে।
গ্ৰাউণ্ড জিৰ’ ৰিপ’ৰ্টিঙৰ ক্ষেত্ৰত, প্ৰায়ে কিছুমান আন বাতৰি সদৃশ কাহিনীও উঠি আহে। উদাহৰণ হিচাপে বিড়ি কোম্পানীত কাম কৰা শ্ৰমিকসকলৰ বাতৰি সংগ্ৰহ কৰিবলৈ যাওতে স্মিতা খাটোৰে মুৰ্শিদাবাদ জিলাৰ মহিলাসকলৰ গান আৰু শিশুসকলৰ অন্য এক কাহিনীও প্ৰত্যক্ষ কৰিছিল। কিছুমান কাহিনীত ব্যক্তিগত অনুভৱো অন্তৰ্ভুক্ত হৈ থাকে আৰু সেয়া প্ৰকাশ পাইছে শিক্ষকতাৰ সৈতেও জড়িত মেধা কালেই যুগুত কৰা বিশেষ শিক্ষাবিদসকলৰ প্ৰতিবেদনত। আমাৰ সাংবাদিকসকলে ভাৰতৰ গ্ৰামাঞ্চলত উদযাপন কৰা বিভিন্ন উৎসৱত উপস্থিত হৈ সেইবোৰৰ বিষয়ে বাতৰি সংগ্ৰহ কৰি আহিছে। এইবোৰৰ ভিতৰত মা বনবিবি, শৈলা নৃত্য, চাদৰ বদনী, পিলি ভেশ উল্লেখনীয়। এইবোৰৰ উপৰিও প্ৰকাশিত আন এক গুৰুত্বপূৰ্ণ প্ৰতিবেদন আছিল, 'কোন ফকিৰৰ এই দৰগাহ?'
'পাৰি’ৰ টীম ভাৰতৰ ভিন্ন প্ৰান্তত সিঁচৰতি হৈ আছে। তেওঁলোক সকলোৱে সমগ্ৰ ভাৰতক নিজৰ নিজৰ কাহিনীৰ জৰিয়তে তুলি ধৰিবলৈ যৎপৰোনাস্তি চেষ্টা চলাই গৈছে। তেওঁলোকৰ কাহিনীত কেতিয়াবা যদি সমাজৰ অসহায় শ্ৰেণী তথা প্ৰব্ৰজনকাৰী শ্ৰমিক আৰু প্ৰব্ৰজনকাৰী শিশুসকলৰ দুখ-দুৰ্দশা ফুটি উঠিছে আন কেতিয়াবা আকৌ দেখা গৈছে ব্যস্ততাৰে ভৰা গ্ৰামাঞ্চলৰ মহিলাসকলৰ হা-হুমুনিয়াহ আৰু তেওঁলোকৰ আজৰি পৰৰ হাঁহি-খিকিন্দালি। আশা কৰিছো আহি থকা বছৰটোত আমাৰ টীমে আৰু অধিক গতিশীলতা লাভ কৰিব।
আমি কৰ্ণাটকৰ উপকূল অঞ্চলৰ লোকশিল্পৰ উচৱ পিলি ভেশা (বাওঁফালে)ৰ ওপৰত প্ৰতিবেদন যুগুতাইছো, আকৌ লাডাখৰ জাংস্কাৰ উপত্যকাত য়াক পালকসকলৰ সৈতে ভ্ৰমি তেওঁলোকৰ বিষয়েও লিখিছো
'পাৰি’ৰ বাবে এয়া গৌৰৱৰ কথা যে আমাৰ বাবে এক বিশেষ উপহাৰস্বৰূপ নমিতা ৱাইকাৰৰ পৰিচালনাত নিৰ্মাণ কৰা প্ৰকল্প 'দ্য গ্ৰিণ্ডমিল চংছ প্ৰজেক্ট'ৰ এই বছৰো অব্যাহত আছিল আৰু বিশেষ এক ভিডিঅ'ৰ যোগেদি আশাব্যঞ্জক সঁহাৰি লাভ কৰিবলৈ সমৰ্থ হৈছিল। ২০২৩ চনত আমি কচ্ছী গীতৰ আৰ্কাইভো পাৰিত অন্তৰ্ভুক্ত কৰিছিলো। কচ্ছৰ ৰাণ অঞ্চলৰ কেইবাটাও গানো ৰেকৰ্ড কৰা হৈছিল। এই সকলোখিনি সম্ভৱ হৈ উঠিছিল কবি প্ৰতিষ্ঠা পাণ্ড্যাৰ বিশেষ তৎপৰতাত।
এই বছৰ, প্ৰথমবাৰৰ বাবে, 'পাৰি'ত জনজাতীয় শিশুসকলে অঁকা চিত্ৰ প্ৰকাশ কৰা হৈছিল। কণিকা গুপ্তাই উৰিষ্যাৰ গ্ৰাম্য অঞ্চলৰ শিশুসকলৰ চিত্ৰসমূহ ভালদৰে পৰ্যবেক্ষণ কৰা আৰু সেয়া বাছি উলিয়াই প্ৰকাশ কৰাৰ দৰে কঠিন কাম হাতত লৈছিল। একেদৰে শিল্পী লাবনি জংগিয়ে চিত্ৰিত কৰিছে পশ্চিমবংগৰ দেওচা-পাঁচামি কয়লা খনি অঞ্চলত আন্দোলনৰ নেতৃত্ব দিয়া মহিলাসকলৰ কাহিনী।
পাৰি-এমএমএফ-ৰ গৱেষক বিদ্যাৰ্থীসকলে সংকটত বাস কৰা শিল্পীসকলৰ কাহিনী প্ৰকাশ কৰিছিল। মহাৰাষ্ট্ৰত সংকেত জৈনে ঝোপড়ি, জাল আৰু আন একাধিক সামগ্ৰী তৈয়াৰ কৰা এখন সৰু গাঁৱৰ অখ্যাত শিল্পীসকলৰ বিষয়ে তুলি ধৰিছিল। শ্ৰুতি শৰ্মাই ভাৰতৰ খেলপথাৰসমূহলৈ গৈ প্ৰতিবেদন যুগুত কৰিছিল। এই প্ৰতিবেদনত শিল্পকলাৰ বিভিন্ন কাহিনীৰ লগতে, গুৰুত্বপূৰ্ণ ক্ৰীড়া সামগ্ৰী আৰু বাদ্যযন্ত্ৰক কেন্দ্ৰ কৰি গঢ় লৈ উঠা সামাজিক-সাংস্কৃতিক পৰিৱেশৰ বিষয়ে প্ৰকাশ পাইছে। উত্তৰ-পূবৰ ৰাজ্য অসমৰ মাজুলীৰ পৰা প্ৰকাশ ভূঞাই পৰম্পৰাগত ৰাস মহোৎসৱৰ বিষয়ে প্ৰতিবেদন আগবঢ়োৱাৰ লগতে সংগীতা শংকৰে উত্তৰ কেৰালাৰ তোলপাৱকুট্টু পৰম্পৰা সম্পৰ্কে আৰু ফেইজল আহমেদে কৰ্ণাটকৰ তুলুনাডুৰ ভূতা উৎসৱৰ কথা 'পাৰি’ৰ জৰিয়তে দেশবাসীক জনাইছিল।
'পাৰি ফেলো’ অমৰুতাই যুগুত কৰা অন্ধ্ৰ প্ৰদেশৰ ঋণগ্ৰস্ত পৰিয়ালৰ প্ৰতিবেদনে পাৰিক লিংগ বৈষম্য বিষয়ত অধিক সমৃদ্ধ কৰি তুলিছে।
উল্লিখিত প্ৰতিবেদনবোৰৰ উপৰিও, বহু বছৰ ধৰি নিয়মীয়াকৈ প্ৰতিবেদন যুগুতাই পাৰিৰ আৰ্কাইভ সমৃদ্ধ কৰি অহা জ্যেষ্ঠ সাংবাদিকসকলেও তেওঁলোকৰ অৱদান অব্যাহত ৰাখিছে। পুৰুষোত্তম ঠাকুৰে ছত্তীশগড় আৰু ঝাৰখণ্ডৰ বিভিন্ন আদিবাসী সম্প্ৰদায়ৰ জীৱন, জীৱিকা আৰু উৎসৱৰ বিষয়ে লিখিছে, লগতে ফটো আৰু ভিডিঅ' প্ৰেৰণ কৰিছে। শালিনী সিঙে যমুনা নদীৰ স্থানচ্যুত কৃষকসকলৰ বিষয়ে আৰু উৰ্বশী সৰকাৰে সুন্দৰবনৰ কেঁকোৰা ধৰা মহিলাসকলৰ লগতে স্থানীয় এখন ত্ৰৈমাসিক আলোচনীৰ বিষয়ে লিখিছে। কবিতা আয়াৰে ওড়িশাৰ গ্ৰাম্য অঞ্চলৰ বন্ধ হৈ পৰা বিদ্যালয়সমূহৰ বিষয়ে আৰু এছ. ছেন্থালিৰে বেল্লাৰীৰ মহিলা খনিকৰ্মীৰ বিষয়ে লিখিছে। শ্বেতা দাগাই হিমাচল প্ৰদেশত অনুষ্ঠিত 'গৌৰৱ পদযাত্ৰা' পাৰিলৈ আনিছে, জিজ্ঞাসা মিশ্ৰাই প্ৰলোভন দি নিয়া কইনাৰ কাহিনী লিখিছে। উমেশ ছোলাংকিয়ে দিছে চালনিৰ দৰে ঘৰুৱা প্ৰয়োজনীয় সামগ্ৰী গঢ়া শিল্পীসকলৰ জীৱন বৃত্তান্ত, আকাংক্ষাৰ প্ৰতিবেদনত আছে মুম্বাইৰ স্থানীয় ৰেলত সংগীতৰ যাত্ৰা আৰু স্মিতা টুমুলুৰুয়ে লিখিছিল তামিলনাডুৰ ইৰুলাৰসকলৰ জীৱনৰ কাহিনী।
আমি ড॰ নিত্যা ৰাও আৰু ড॰ অ'ভি থোৰাটৰ দৰে পণ্ডিত আৰু শিক্ষাবিদসকলৰ পৰা কড়ালুৰুত মাছ ধৰা আৰু হিমালয়ৰ পাহাৰত পশুপালন সম্পৰ্কীয় বহুতো প্ৰবন্ধ পাইছিলো। তেওঁলোকৰ সমান্তৰালভাৱে, স্নাতক পাঠ্যক্ৰমত অধ্যয়নৰত আৰু স্নাতক ডিগ্ৰী সম্পূৰ্ণ কৰা কেবাগৰাকী শিক্ষাৰ্থীয়েও তেওঁলোকে অধ্যয়ন কৰি থকা বিষয়বোৰ তুলি ধৰি 'পাৰি’ৰ বাবে লিখিছিল। এই বিষয়বোৰ আছিল অপৰিচিত জনজাতি, গ্ৰাম্য বিহাৰৰ মহিলা নৃত্যশিল্পী, কোচিৰ কাপোৰ ধোৱা পুৰুষ আৰু মহিলসকলৰ কথা। আনহাতে এগৰাকী হাইস্কুলীয়া শিক্ষাৰ্থীয়ে গ্ৰাম্য ভাৰতত কৰ্মৰত এজন ডাকোৱালৰ বিষয়েও সুন্দৰকৈ লিখিছিল।
আমি আদিবাসী শিশুৱে অঁকা ছবিৰ (বাওঁফালে) নতুন এক সংগ্ৰহ আৰম্ভ কৰিছো আৰু মুম্বাইৰ (সোঁফালে) আৰেইৰ আদিবাসীসকলৰ প্ৰতিবাদকো আমাৰ প্ৰতিবেদনত সামৰিছো
এতিয়া আহিছো Best of PARI 2023-ৰ আন এটি বিশেষ শিতানলৈ, পাৰিৰ দৃশ্য-শ্ৰাব্য শিতান।
আমি 'মোজাইক' শীৰ্ষকৰ অধীনত আমাৰ সৰ্বশ্ৰেষ্ঠ প্ৰতিবেদনৰ সৈতে আৰম্ভ কৰিছো – এই বছৰ আমাৰ আৰ্কাইভ নিৰ্বাচিত কবিতা, সংগীত আৰু গানেৰে সমৃদ্ধ আৰু সম্প্ৰসাৰিত কৰা হৈছে। ইয়াৰ পিছত আমাৰ 'লাইব্ৰেৰী' টীমটোৱে শ শ প্ৰতিবেদন পুনৰীক্ষণৰ অন্তত কোনবোৰ প্ৰতিবেদন হাইলাইট কৰিব বিচাৰে সেই সম্পৰ্কে জনাব। এই বছৰ, ‘পাৰি'ৰ চলচ্চিত্ৰৰ টীমটোৱে ভাল ভাল তথ্যচিত্ৰ পাৰিলৈ আনিছে আৰু বহুতো চলচ্চিত্ৰ নিৰ্মাতা আৰু ভিডিঅ'গ্ৰাফাৰে আমাৰ ইউটিউব প্লে-লিষ্টত আত্মপ্ৰকাশ কৰিছে। 'পাৰি’ত প্ৰদৰ্শিত আটাইতকৈ দৰ্শনীয় চলচ্চিত্ৰসমূহৰ ভিতৰত আছে শ্ৰেয়া কাত্যায়িনীৰ মাদ্ৰাছা আজিজিয়া আৰু জয়ছালমেৰত অৰণ্যৰ সুৰক্ষা বিষয়ক চলচ্চিত্ৰ। সামাজিক অধিকাৰৰ পৰা বঞ্চিত আৱৰ্জনা সংগ্ৰহকাৰীসকলক লৈ কবিতা কাৰ্ণেইৰোৱে নিৰ্মাণ কৰা ছবিখনো 'পাৰি'ৰ এখন উল্লেখনীয় ছবি হৈ ৰ’ব। আহি থকা দিনবোৰত এইবোৰৰ লগতে তথ্য সমৃদ্ধ আন বহু ছবি তথা ভিডিঅ’ উপলব্ধ হ’ব।
'পাৰি’ত প্রকাশিত প্রতিটো প্ৰতিবেদনেই ১৪টা ভাৰতীয় ভাষাত প্ৰকাশিত হয়। ইয়াক আমি 'পাৰি’ৰ ১৪টা অৱতাৰ বা পুনৰজন্ম বুলিও ক’ব পাৰো। আমাৰ অনুবাদত প্ৰতিটো ভাষাৰ স্বকীয়তা প্ৰকাশৰ লগতে মূল প্ৰতিবেদনৰ প্ৰকৃত ৰূপ হুবহু তুলি ধৰিবলৈকো চেষ্টা চলোৱা হয়। ইয়াৰ ফলত 'পাৰি’ৰ অনুবাদ ব্যৱস্থাটোৱে গণতান্ত্ৰিক ৰূপ লাভ কৰা দেখা গৈছে। এই সকলো সম্ভৱ হৈছে ভাৰতীয় ভাষাসমূহৰ অনুবাদক আৰু ভাষা সম্পাদকৰ দল 'পাৰিভাষা’ৰ প্ৰচেষ্টাৰ উমৈহতীয়া প্ৰচেষ্টাৰ বাবে। বছৰৰ শেষৰ ৰাউণ্ড-আপত তেওঁলোকে সৃষ্টি কৰা আশ্চৰ্যজনক কামৰ উমান পাব পাৰি।
ফটো হৈছে 'পাৰি’ৰ কাৰ্যক্ৰমৰ কেন্দ্ৰবিন্দু। আমাৰ দ্বাৰা বাছনি কৰা ২০২৩ বৰ্ষৰ ফটোবোৰ চাব পাৰে আৰু শিক্ষাৰ্থীসকলৰ বাবে 'পাৰি’ ইণ্টাৰ্নশ্বিপ গুৰুত্বৰ বিষয়ে জানিব পাৰে। ইয়াৰ বাহিৰেও, এই বছৰ বিভিন্ন ছ'চিয়েল মিডিয়াত প্ৰকাশিত আমাৰ পোষ্টবোৰৰ বিষয়ে লিখা 'এছএম হাইলাইট ৰীল' চাবলৈকো নাপাহৰিব। অৱশেষত, আমি এই বছৰটোক বিদায় জনাম আৰু ভাৰতৰ বৈচিত্ৰ্য স্পষ্টভাৱে প্ৰতিফলিত কৰিবলগীয়া Editor's Choice of FACES on PARI শীৰ্ষক নতুন প্ৰকল্পৰে অনাগত বৰ্ষটো আৰম্ভ কৰিম।
২০২৩ বৰ্ষৰ শেষৰ ফালে, যোৱা ৯ বছৰত আমি লাভ কৰা ৰাষ্ট্ৰীয় আৰু আন্তঃৰাষ্ট্ৰীয় বঁটাসমূহৰ সংখ্যা ৬৭টা লৈ বৃদ্ধি হৈছে। শেহতীয়া বঁটাটো হৈছে 'পাৰি’ৰ সহ-প্ৰতিষ্ঠাপক শালিনী সিঙে ডিচেম্বৰত ৰাষ্ট্ৰসংঘৰ কৰেছপণ্ডেণ্টছ এছ’চিয়েশ্যনৰ তৰফৰ পৰা লাভ কৰা বিশেষ বঁটা। আমি বিশ্বাস কৰোঁ যে এই বঁটা আৰু সন্মানৰ ওপৰত প্ৰথম অধিকাৰ হৈছে নিজৰ জীৱনৰ কাহিনীবোৰ আন্তৰিকতাৰে বৰ্ণনা কৰি যোৱা সাধাৰণ লোকসকলৰ, তেওঁলোকৰ সৈতে খোজকাঢ়ি বাতৰি সংগ্ৰহ কৰা সাংবাদিকসকলৰ, সেই বাতৰি প্ৰকাশত সহায় কৰা বাতৰি সম্পাদক, ভিডিঅ' এডিটৰ, ফটো এডিটৰ আৰু অনুবাদকসকলৰ।
'পাৰি’ৰ সম্পাদকসকলে সাংবাদিকসকলৰ সৈতে প্ৰতিটো মুহূৰ্ততে সমন্বয় ৰক্ষা কৰি কাম কৰে, তেওঁলোকক পৰামৰ্শ দিয়ে আৰু তেওঁলোকৰ সমল অধিক নিখুঁত আৰু মনোগ্ৰাহী কৰি তোলে। 'পাৰি’ৰ বাবে সম্পাদকসকল অতি গুৰুত্বপূৰ্ণ। সম্পাদকসকলৰ ভিতৰত আছে ইংৰাজী আৰু অন্যান্য ভাৰতীয় ভাষাৰ সম্পাদক, আমাৰ সৈতে কাম কৰা ফটো সম্পাদক, আৰু আমাক সততে সহায় কৰি অহা ফ্ৰিলান্স সম্পাদকসকল।
'পাৰি ডেস্ক’ৰ সদস্যসকলে ফেক্ট চেকৰ পৰা আৰম্ভ কৰি লে-আউটলৈকে সকলো নিয়াৰিকৈ কৰি অহা বাবেই অবিৰতভাৱে অনলাইন আলোচনী এখন প্ৰকাশ কৰি অহাৰ লগতে আৰ্কাইভ গঢ়ি তোলাতো আমাৰ পক্ষে সম্ভৱ হৈ পৰিছে। প্ৰতিবেদন এটা প্ৰকাশৰ আৰম্ভণিতে তেওঁলোকে সাংবাদিকসকলৰ সৈতে সু-সম্পৰ্ক ৰক্ষা কৰি কাম কৰে আৰু চূড়ান্ত সম্পাদনাত যাতে কোনো ত্ৰুটি ৰৈ নাযায় তাৰ বাবে শেষলৈকে সমন্বয় অব্যাহত ৰাখে। প্ৰকাশন প্ৰক্ৰিয়াত তেওঁলোকে সকলো সম্ভৱ কৰি তুলিবলৈ চেষ্টা কৰে। নেপথ্যত থাকিলেও, তথ্যগত সমল সংগ্ৰহৰ ক্ষেত্ৰত তেওঁলোকে যিকোনো পৰিস্থিতিৰ সন্মুখীন হ'বলৈ সাজু হৈ থাকে।
আমি ২ জানুৱাৰী, ২০২৪-ৰ পৰা আমাৰ নিয়মীয়া প্ৰকাশন অব্যাহত ৰাখিম। নতুন বছৰটোৰ আৰম্ভণিতে প্ৰকাশ পাবলগীয়া প্ৰতিবেদনবোৰৰ ভিতৰত আছে আগৰতলাৰ মেলাৰ 'মৃত্যুৰ কুঁৱা', বিহাৰৰ ছপাশালৰ শিল্পী, মহাৰাষ্ট্ৰৰ কমিউনেল পলিচিং, মিৰাটৰ লৌহ কৰ্মী ইত্যাদি।
নতুন বছৰটোত আমি আমাৰ প্ৰতিবেদনসমূহৰ জৰিয়তে আৰু নতুন নতুন বা-বাতৰি প্ৰকাশৰ লক্ষ্য লৈছো। অধিক উন্নত গ্ৰাউণ্ড ৰিপ’ৰ্টিং, ফটো আৰু ভাষাশৈলীৰে আমাৰ প্ৰতিটো বাতৰিয়ে কৈ যাব দেশৰ ভিন্ন প্ৰান্তৰ ভিন্ন শ্ৰেণীৰ মানুহৰ দৈনন্দিন জীৱনৰ সুখ-দুখ, সংগ্ৰামৰ অনেক জীয়া কাহিনী।
ধন্যবাদেৰে -
পাৰি টীম
অনুবাদ: ধ্ৰুৱজ্যোতি ধনন্তৰি
