گھر سے دور گئے مہاجر کے لیے پیار کے گیت

’’ہاں، مجھے یاد ہے کہ کئی سال پہلے میں نے یہ گیت گائے تھے،‘‘ مکتا بائی اوبھے نے کہا، جب ہم نے اس سال اپریل کے آخر میں ان سے فون پر بات کی تھی۔ مکتا بائی، جو پونہ کے ملشی تعلقہ کے کھڈک واڈی میں رہتی ہیں، نے ۱۹۹۶ میں بنیادی گرائنڈ مل سانگ پروجیکٹ (جی ایس پی) ٹیم کے لیے ان او وی کو گایا تھا۔

اس کووڈ- ۱۹ وبا اور لاک ڈاؤن کے دور میں، بیس سال پہلے گائے گئے ان نو اشعار میں آج کے پورے ہندوستان کے مہاجر مزدوروں کے تجربات کی گونج ہے، جو گاؤوں میں رہ رہے اپنے گھر والوں سے دور ہیں۔ ان او وی کے غیر حاضر شوہرکی طرح، مہاجر مزدوروں نے بھی دیہی علاقوں میں واقع اپنے گھروں کو چھوڑ دیا تھا اور کام کی تلاش میں دور افتادہ شہر چلے گئے تھے۔

۱۹۸۰ کی دہائی کے آس پاس ہندوستان کے گاؤوں میں مشین والی ملیں پہنچنے سے پہلے، عورتیں آٹا پیسنے کے لیے روز چکّی چلاتی تھیں۔ وہ باورچی خانہ اور اس کے آس پاس، دو یا تین کی جوڑی میں کام کرتیں، اور خلوت میں آرام سے گیت گاتی تھیں۔ وہاں پر وہ گھورتی آنکھوں اور سماجی پابندیوں سے دور، آزادی سے اپنے خیالات کا اظہار کرتیں۔ سادہ، مترنم او وی میں، وہ چکی کی آہنگ اور اپنے ہاتھوں کی چوڑیوں کی کھنک کے ساتھ سُر ملا کر گاتی تھیں۔

مکتا بائی نے ان او وی کو اپنی ساس سے ایک نوجوان شادہ شدہ عورت کے طور پر سیکھا تھا۔ یہ اشعار اپنے شوہر کے لیے – جو کام کے لیے گھر سے بہت دور گیا ہوا ہے – عورت کے پیار اور بے قراری کا اظہار کرتے ہیں۔ مکتا بائی نے جب ۱۹۹۶ میں انہیں گایا تھا، تب وہ تقریباً ۴۰ سال کی تھیں۔

اب ۶۴ سال کی ہو چکیں مکتا بائی کو جب ہم نے او وی میں مذکور شوہر کی موتی جیسے چمکدار آنکھوں، اور جَوَس (پٹسن) کے پھول جیسی اس کی نیلی جلد کے بارے میں بتایا، تو وہ زور سے ہنسنے لگیں۔ ’’میں نے جَوَس کے پھول کبھی نہیں دیکھے ہیں، لیکن او وی میں بیوی اپنے شوہر کی بہت تعریف کرتی ہے،‘‘ مکتا بائی نے کہا۔

ہم نے وبا اور لاک ڈاؤن کے بارے میں بات کی۔ ’’کورونا کی وجہ سے سب کچھ بند ہو گیا ہے۔ میرے شوہر اور میں اپنے کھیت پر تھوڑا کام کرتے ہیں، لیکن ہم دونوں اب بوڑھے ہو رہے ہیں۔ ہم تھوڑا بہت جو کچھ کر سکتے ہیں، کر رہے ہیں،‘‘ انہوں نے کہا۔ وہ اور ان کے شوہر، گلاب بھاؤ اوبھے، جو تقریباً ۶۱ سال کے ہیں، کے پاس کولاوڈے گاؤں کی کھڈک واڈی بستی میں دو ایکڑ زمین ہے۔ ان کا بیٹا امول اپنے گاؤں سے تقریباً ۲۰ کلومیٹر دور، اُراوڈے میں آٹو کے پرزے کی ایک فیکٹری میں کام کرتا ہے۔ مارچ میں جب لاک ڈاؤن شروع ہوا، تو وہ گھر پر تھا، لیکن ۴ مئی کو اسے کام پر واپس بلا لیا گیا تھا۔ ان کی تین بیٹیوں کی شادی ہو چکی ہے اور وہ پونہ ضلع کے مختلف حصوں میں رہتی ہیں۔

مکتا بائی اپنے گاؤں میں بچت – گٹ (سیلف ہیلپ گروپ) کی چیئر پرسن ہیں۔ ’’لیکن، میری طرح، گاؤں کی زیادہ تر عورتوں کے پاس اپنے کھیت اور گھر کے کام سے فرصت نہیں ہے۔ میں سبھی سے صرف پیسے جمع کرتی ہوں اور اسے بینک میں جمع کرتی ہوں۔ اس عہدہ سے کوئی خاص فائدہ نہیں ہے – صرف نام میں ہے،‘‘ انہوں نے کہا۔

تقریباً تین سال پہلے، جب پاری کی جی ایس پی ٹیم نے کولاوڈے کا دورہ کیا تھا، تو مکتا بائی نے ہمیں بتایا تھا کہ انہیں کتابیں پڑھنے کا کتنا شوق ہے۔ ’’میں نے رنجیت دیسائی کی شریمن یوگی، اور پانڈو پرتاپ ہری اور دیگر مذہبی کتابیں پڑھی ہیں،‘‘ انہوں نے کہا تھا۔

ہم ان سے اور پانچ دیگر گلوکاروں سے کھڈک واڈی کے رام مندر کے بڑے اسمبلی ہال میں ملے تھے۔ ہال تین طرف سے کھلا ہوا ہے، جس سے آنے والی ہوا نے ہمیں اپریل کے اس گرم دن میں کافی راحت پہنچائی۔ باہر لگے آم کے درختوں کی پھلوں سے لدی ٹہنیاں لہرا رہی تھیں۔ عورتوں نے گرمی کی تپش اور مانسون – جس کا بے صبری سے انتظار تھا -  کے بارے میں کچھ او وی گائے۔ ہم نے پاری پر ان گیتوں کو دو قسطوں میں شائع کیا – گرمیوں کے سات گیت اور بارش کے چھ گیت ۔

مجموعی طور سے، کولاوڈے کی ۲۵ عورتوں نے بنیادی جی ایس پی ٹیم کے لیے ۱۲۶۵ گیت گائے، اس ٹیم کی قیادت آنجہانی سماجی سائنس داں ہیما رائیرکر اور گائی پوئٹیوِن کر رہے تھے۔ ہم یہاں مکتا بائی اوبھے کے ذریعے گائے گئے ۵۳ گیتوں میں سے نو کو پیش کر رہے ہیں، جنہیں ۶ جنوری ۱۹۹۶ کو ریکارڈ کیا گیا تھا۔

پہلے او وی میں، بیوی اپنے گھر کے مندر میں دیوتا کی پوجا کرتی ہے اور اپنے کنکو کی لمبی زندگی کے لیے دعا کرتی ہے – اس کی پیشانی پر لگا سندور، اس کے شوہر کی علامت ہے۔ دوسرے شعر میں، وہ پمپل (مقدس گولر) کے درخت کی پوجا کرتی ہے کیوں کہ یہ بھگوان وشنو کی نمائندگی کرتا ہے، اور خوشحال شادی شدہ زندگی کی دعا مانگتی ہے۔ تیسرے شعر میں، وہ کہتی ہے کہ سکھدیو (صبح کے ستارے کا دیوتا) اس کے گھر کے اوپر صبح کے آسمان میں تعینات ہیں، جن سے اس کے جسم میں چبھنے والی ٹھنڈی ہوا آ رہی ہے۔

چوتھے اور پانچویں شعر میں وہ کہتی ہے کہ اس سال فصل اچھی نہیں ہوئی تھی، اس لیے اس کا شوہر کام کی تلاش میں بہت دور چلا گیا تھا۔ وہ فکرمندی کی اظہار کرتی ہے کہ اس دور دراز مقام پر اس کے شوہر کی دیکھ بھال کرنے والا کوئی نہیں ہے۔ یہ گیت ہمیں شوہر کے تئیں اس کے گہرے پیار، اور وہ اسے کتنا یاد کرتی ہے، اس بارے میں بتاتے ہیں۔

چھٹے، ساتویں اور آٹھویں شعر میں وہ اپنے محبوب کو یاد کرتی ہے اور اس کی خصوصیات کا ذکر کرتی ہے۔ اس کی آنکھیں موتی کی طرح چمکتی ہیں، اس کی جلد جَوَس کے پھولوں کی طرح نیلی ہے۔ (ان پھولوں کا استعمال اکثر او وی میں بھگوان کرشن کی جلد کے رنگ کو بیان کرنے کے لیے کیا جاتا ہے۔) وہ گاتی ہے کہ اس کے شوہر کے دانت دھلے ہوئے چاول جیسے سفید ہیں۔ اس کے بغیر، وہ بے قرار اور کھوئی ہوئی ہے۔ اور اس کا پسندیدہ بھونا ہوا ہرا چنا، سبھی سوکھ رہے ہیں۔

آخری او وی میں، وہ اس سے واپس لوٹ آنے کی گزارش کرتی ہے: ’’تم کب آؤگے، اے میری زندگی کے اجالے؟ تم کب آؤگے، اے میرے دیوتاؤں کے دیوتا؟‘‘ گلوکارہ ہمیں بتاتی ہے کہ اس کے لیے اس کا شوہر اس بھگوان سے بڑھ کر ہے، جس کی وہ پوجا کرتی ہے۔

یہ نو او وی سنیں:

میں ایک سواسین [شادی شدہ عورت] ہوں، اور گھر میں بھگوان کی پوجا کرتی ہوں
میں اپنے کُنکو [شوہر] کی لمبی زندگی کے لیے دعا کرتی ہوں

میں ایک سواسین ہوں پمپل [مقدس گولر] کے درخت کی پوجا کرنے والی
بھگوان وشنو نارائن، مجھے ایک خوشحال شادی شدہ زندگی دیں

صبح کا وقت ہے، سکھدیو [صبح کے ستارے کا دیوتا] گھر کے اوپر آ چکے ہیں
صبح سویرے کی ٹھنڈی ہوا کیسے جسم میں چبھ رہی ہے

اس سال ہمیں اچھی فصل نہیں ملی
اے عورت، میرے شوہر دور دیس چلے گئے ہیں [کام کی تلاش میں]

وہ مجھے اکیلا چھوڑ کر بہت دور چلے گئے ہیں
وہاں ان کی دیکھ بھال کرنے والا کوئی نہیں ہے

پیارے شوہر، آپ کی آنکھیں موتی کی طرح چمکتی ہیں
پیارے شوہر، آپ کی جلد میں جَوَس کے پھولوں کارنگ ہے

پیارے شوہر، آپ کے دانت دھلے ہوئے چاول کی طرح ہیں
میں بے قرار ہوں اور آپ کے بنا کچھ بھی نہیں

میں نے آپ کے لیے ہرے چنے بھونے، کیوں کہ یہ آپ کو پسند ہیں
میں تمہیں کیا بتاؤں، اے عورت، یہ سب سوکھ رہے ہیں

تم کب آؤگے، اے میری زندگی کے اجالے؟
تم کب آؤگے، اے میرے دیوتاؤں کے دیوتا؟