کثرت میں وحدت، لسانی تنوع کی لذت

آج، ایک بار پھر، پیپلز آرکائیو آف رورل انڈیا (پاری) عالمی یوم ترجمہ کے ساتھ ساتھ ہمارے ترجمہ نگاروں کی ٹیم کا بھی جشن منا رہا ہے، جس کے بارے میں ہمارا ماننا ہے کہ یہ صحافت کی کسی بھی ویب سائٹ سے کہیں بہتر ٹیم ہے۔ جہاں تک مجھے معلوم ہے – اگر میں غلط کہہ رہا ہوں تو کوئی بھی مجھے درست کر سکتا ہے – کہ پاری صحافت کی دنیا میں سب سے بڑی کثیر لسانی ویب سائٹ ہے۔ ۱۷۰ ترجمہ نگاروں کی اس شاندار ٹیم کی بدولت ہی، پاری پر ۱۴ زبانوں میں اشاعت کا کام ہوتا ہے۔ اس بات سے انکار نہیں کیا جا سکتا کہ کچھ میڈیا ہاؤسز ۴۰ زبانوں میں نشر و اشاعت کرتے ہیں۔ لیکن، ان میں سخت درجہ بندی دیکھنے کو ملتی ہے۔ کچھ زبانوں کو وہاں پر دوسروں کے برابر نہیں، بلکہ ان سے بہت کم اہمیت دی جاتی ہے۔

اس کے علاوہ، ہمارے یہاں اشاعت کا صرف ایک ہی اصول ہے کہ ’ ہندوستان کی ہر ایک زبان آپ کی اپنی زبان ہے ‘۔ اس کا مطلب ہے، تمام زبانوں کو برابری کا درجہ دینا۔ اسی لیے، اگر کوئی اسٹوری ایک زبان میں سامنے آتی ہے، تو ہم اسے تمام ۱۴ زبانوں میں شائع کرتے ہیں، یہی ہمارا مینڈیٹ ہے۔ پاری کی زبانوں کی فیملی میں چھتیس گڑھی کو اسی سال شامل کیا گیا ہے۔ اور زبانوں کی اس طویل فہرست میں اگلا نمبر بھوجپوری کا آنے والا ہے۔

ہمارا ماننا ہے کہ ہندوستانی زبانوں کو فروغ دینا پورے معاشرہ کے لیے ضروری ہے۔ ملک کی لسانی کثرت نے ہی اس پرانی کہاوت کو جنم دیا کہ یہاں پر اگر ہر تین یا چار کلومیٹر کے بعد پانی کا ذائقہ بدل جاتا ہے، تو ہر ۱۲ سے ۱۵ کلومیٹر کے بعد بولی یا زبان بھی بدل جاتی ہے۔

لیکن ہم اس کے بارے میں مزید مطمئن ہو کر نہیں بیٹھ سکتے۔ ایسے وقت میں تو بالکل بھی نہیں، جب پیپلز لنگوسٹک سروے آف انڈیا کی طرف سے یہ کہا جا رہا ہو کہ تقریباً ۸۰۰ زندہ زبانوں کے اس ملک نے گزشتہ ۵۰ سالوں کے اندر ۲۲۵ زبانوں کو مرتے ہوئے دیکھا ہے۔ نہ ہی ایسے وقت میں، جب اقوام متحدہ یہ دعویٰ کرے کہ دنیا میں بولی جانے والی ۹۵-۹۰ فیصد زبانیں اس صدی کے آخر تک یا تو ختم ہو چکی ہوں گی یا انہیں سنگین خطرہ درپیش ہوگا۔ اور نہ ہی ایسے وقت میں، جب پوری دنیا میں کم از کم ایک مقامی زبان کی موت ہر پندرہ دنوں میں ہو رہی ہے۔

جب کوئی زبان مرتی ہے، تو ہمارے معاشرہ، ہماری ثقافت، ہماری تاریخ کا ایک حصہ بھی مر جاتا ہے۔ اس کے ساتھ ہی یادیں، موسیقی، افسانے، گیت، کہانیاں، آرٹ، سمعی کائنات، زبانی روایات، اور زندگی گزارنے کا ایک طریقہ بھی مر جاتا ہے۔ یہ کمیونٹی کی اہلیت اور دنیا سے تعلق، اس کی شناخت اور وقار کا زیاں ہے۔ یہ قوم کے مجموعی تنوع کا بھی زیاں ہے – جو پہلے سے ہی خطرے سے دوچار ہے۔ زبانوں کے مستقبل سے ہماری ماحولیات، معاش اور جمہوریت کا رشتہ اتنا ہی گہرا ہے۔ ان کے وسیع تنوع کو دیکھ کر ان کی قدر و قیمت کا احساس پہلے کبھی نہیں ہوا۔ پھر بھی، ان کی حالت آج سے پہلے اتنی نازک کبھی نہیں تھی۔

پاری اپنی کہانیوں، نظموں اور گیتوں کے ذریعے ہندوستانی زبانوں کا جشن مناتا ہے۔ ان کے تراجم کے ذریعے جشن مناتا ہے۔ ایسے کئی خزانے دیہی ہندوستان کے دور افتادہ علاقوں میں حاشیہ پر رہنے والی برادریوں کی طرف سے ہمارے پاس آئے ہیں، جس میں وہ خود اپنی منفرد زبان میں بول رہے ہیں۔ ہمارے فعال ترجمہ نگاروں کی ٹیم اپنی اصل جگہ سے بہت دور، کئی نئے منظرناموں کو پیش کرتی، نئی اسکرپٹ اور محاوروں میں لپٹی ان کہانیوں کو الگ الگ زبانوں میں پیش کرنے کا کام انجام دیتی ہے۔ یہ ہندوستانی زبانوں سے انگریزی میں یک طرفہ ترجمہ نہیں ہے۔ پاری کی لسانی کائنات سے تنوع کے ایک بڑے وژن کا انکشاف ہوتا ہے۔

آج ملک کی اس حیرت انگیز دولت کے ایک چھوٹے سے حصے کی نمائندگی کرنے والی ہمارے ترجمہ نگاروں کی یہ ٹیم، ہمارے یہاں استعمال ہونے والی ہندوستانی زبانوں: آسامی، بنگالی، چھتیس گڑھی، ہندی، گجراتی، کنڑ، ملیالم، مراٹھی، اڑیہ، پنجابی، تمل، تیلگو اور اردو – ہر ایک میں سے ایک چھوٹا سا موتی ڈھونڈ کر لائی ہے۔ ہمیں امید ہے کہ آپ کثرت میں وحدت، اس لسانی تنوع کی لذت سے پوری طرح محظوظ ہوں گے۔

نظیر اکبر آبادی کی یہ نظم – ’روٹیاں‘ بتا رہی ہے کہ انسان ایک روٹی حاصل کرنے کے لیے ذات پات، مذہب و مسلک، قوم و فرقہ، رنگ و نسل جیسی تمام حدوں کو توڑ دیتا ہے، جب کہ انہی کی بنیاد پر اکثر انسانوں کو لڑایا جاتا رہا ہے۔

شاعر: نظیر اکبر آبادی

ماخذ: https://www.rekhta.org/nazms/rotiyaan-nazeer-akbarabadi-nazms?lang=ur