“कोई सरकार नहीं चंगी आम लोकन लेई [कऊनो घलो सरकार आम लोगन सेती बने नइ ये]” 70 बछर के सियान गुरमीत कौर कहिथे. वो ह माईलोगन मन के एक ठन मंडली संग भूंइय्या मं बइठे हवय, जऊन मन दुधियाना के बस्सियां गांव ले जगरांव मं किसान-मजदूर महापंचायत (किसान अऊ मजूर मेगा ग्राम सभा) मं शामिल होय ला आय हवंय.
“[प्रधान मंत्री] मोदी ह नउकरी के वादा करे रहिस, फेर कउनो वादा पूरा नई करे गीस. [तो अब] एहना दा कोई हक्क नहीं साडे एथे आ के वोटां मांगन दा [वो मन ला इहाँ आके वोट मांगे के हक नइ ये], वो ह कहिथे. गुरमीत कौर भारतीय किसान यूनियन (बीकेयू एकता) डकौंदा ले हवंय, अऊ पारी ला बताथे के वो ह साल 2019 के लोकसभा चुनाव मं मोदी ला वोट देय रहिस.
जगराओं के नवा अनाज मंडी मं, जिहां 21 मई के महापंचायत होय रहिस, किसान यूनियन, ट्रेड यूनियन, आंगनवाड़ी कार्यकर्ता यूनियन अऊ मेडिकल प्रैक्टिशनर्स यूनियन मन के बैनर तले राज भर ले करीबन 50,000 लोगन मन जुरे रहिन अऊ अपन ताकत दिखाय बर इहाँ आय रहिन. वो मन भारतीय जनता पार्टी (बीजेपी) के खिलाफ अपन विरोध जताहीं. ‘बीजेपी हराओ, कॉरपोरेट भगाओ, देश बचाओ’. मंच मं लगे बैनर मं लिखाय हवय.
महापंचायत मं सामिल बीकेयू के लखोवाल चैप्टर के अध्यक्ष हरिंदर सिंह लखोवाल कहिथे, ''हमन पंजाब मं मोदी ला करिया झंडा दिखाबो.”'
पंजाब मं 1 जून, 2024 मं वोट परही अऊ नरेंद्र मोदी ये राज मं अपन अभियान सुरू करे सेती पूरा तियार हवय, जिहां किसान मन अपन मांग उपर केंद्र सरकार के चेत नइ धरे के विरोध करत हवंय: स्वामीनाथन आयोग के सिफारिस के मुताबिक न्यूनतम समर्थन मूल्य (एमएसपी) के गारंटी, जम्मो करजा माफ़ी, लखीमपुर खीरी जनसंहार के लोगन मन बर नियाव, किसान अऊ मजूर मन बर पेंशन योजना, अऊ साल 2020-2021 के विरोध मं शहीद लोगन मन बर मुआवज़ा. पढ़व: पारी के कृषि विरोध प्रदर्सन के जम्मो कवरेज
डेरी: किसान-मजदूर महापंचायत मं संयुक्त किसान मोर्चा के पोस्टर मं लिखाय हवय, ‘बीजेपी हराओ, कॉरपोरेट भगाओ, देश बचाओ' जउनि: लुधियाना के सुधार ब्लॉक ले आंगनवाड़ी वर्कर्स यूनियन के सदस्य मन, जगराओं मं कार्यक्रम के जगा मं जावत हवंय
डेरी: गुरमीत कौर तउन माइलोगन मन ले हवंय, जेन मन लुधियाना के बस्सियां गांव ले आय हवंय. वो ह कहिथे, “मोदी ह नउकरी के वादा करे रहिस, फेर कउनो वादा पूरा नई करे हवय अऊ वोला इहाँ आके वोट मांगे के कऊनो हक नइ ये’. जउनि: किसान नेता मन तीन कृषि कानून के खिलाफ साल 2020-21 के विरोध प्रदर्सन बखत अपन परान गंवेइय्या 750 किसान मन ला श्रद्धांजलि दीन. वो मन शुभकरण सिंह ला घलो श्रद्धांजलि दीन, जऊन ह फरवरी, 2024 मं किसान अऊ पुलिस के बीच झड़प बखत मुड़ मं चोट लगे के बाद अपन जान गंवा दे रहिस
किसान नेता मन सभा ला संबोधित करे के पहिली तऊन 750 किसान मन ला श्रद्धांजलि दीन जऊन मन साल 2020-21 के विरोध प्रदर्सन बखत अपन परान गंवाय रहिन. 21 बछर के किसान शुभकरण सिंह के खास जिकर करे गीस, जेकर ये बछर फरवरी मं दिल्ली रैली बखत किसान अऊ पुलिस मं पटियाला के ढाबी गुजरान मं झड़प बखत मुड़ मं गहिर चोट लगे ले परान चले गे रहिस. ये घलो पढ़व: ‘गर हमन अपन राज मं सुरच्छित नई अन, त हमन कहाँ रहिबो?’
कुछु महिना पहिली, फरवरी 2024 मं, किसान मन ला दिल्ली भीतर खुसरे ले रोक देय गे रहिस, जिहां वो अपन अधूरा मांग मन ला उठाय के योजना बनावत रहिन- शांत ढंग ले प्रदर्सन करेइय्या मन ला बैरिकेड के, पानी के धार अऊ आंसू गोला के सामना करे ला परिस.
अब, वो मन नइ चाहत हवंय के भाजपा वो मन के गांव मन मं परचार करय.
बीकेयू शादीपुर के अध्यक्ष बूटा सिंह घलो इही बिचार रखिस, “मोदी अब पंजाब काबर आवत हवय?” वो ह पूछथे, “हमन वोला परचार करे बर नइ देवन.”
संयुक्त किसान मोर्चा के अपील मं, पंजाब भर मं लोगन मन बीजेपी नेता मन अऊ उम्मीदवार मन ला अपन गांव मं खुसरे अऊ परचार करे ले रोक दे हवंय.
डेरी: क्रांतिकारी किसान यूनियन के अध्यक्ष डॉ. दर्शन पाल, संगठन के सदस्य मंन के संग. जउनि: 21 मई, 2024 मं होय महापंचायत मं करीबन 50,000 लोगन मन जुरे रहिन
जगराओं मं किसान नेता मन के बखत, फरीदकोट अऊ लुधियाना ले भाजपा उम्मीदवार हंस राज हंस अऊ रवनीत बिट्टू के नांव ले गीस.
“नेता मन हाथ जोड़ के वोट मांगथें. ओकर बाद ये लोगन मन कहिथें हमन ले बाद मं निपट लिहीं. वो मन कोन होथें, हमन ला निपटेइय्या?” लाखोवाल अपन भासन मं कहिथे. हंस के एक ठन वीडियो क्लिप सोशल मीडिया मं वायरल होवत हवय जऊन मं वो ह कहे रहिस के ओकर विरोध करेइय्या मन ला1 जून के वोट डारे के बाद निपटाय जाही. एसकेएम डहर ले करे गे सिकायत ले भारत के चुनाव आयोग ह हंस ला चुनाव आचार संहिता उल्लंघन के संबंध मं नोटिस जारी करे हवय.
74 बछर के सियान चेतन सिंह चौधरी लुधियाना के संगतपुरा गांव ले आय हवंय. वो ह कहिथे, “पहिली हमन जऊन ला वोट देवत रहेन, हमर दाई-ददा अऊ बबा-डोकरी दाई घलो उहिच ला वोट देवत रहिन.” अब चीज मन बदलगे हवंय. अब मकसद मोदी ला हटाय हे.
वो ह बीकेयू राजेवाल के सदस्य आय. वो ह पारी ला पंजाब सरकार डहर ले जारी कार्ड दिखावत बताथे के ओकर ददा बाबू सिंह स्वतंत्रता सेनानी रहिस. बाबू सिंह भारतीय राष्ट्रीय सेना (आईएनए) मं सैनिक रहिस. चेतन बीजेपी के जिकर करत कहिथे, “वो ह किसान मन के भलाई के बारे मं नइ सोचत हवय.”
डेरी: कीर्ति किसान यूनियन के सदस्य अनाज मंडी मं जावत हवंय, जिहां महापंचायत होय रहिस. जउनि: नछत्तर सिंह ग्रेवाल (डेरी) अऊ चेतन सिंह चौधरी (जउनि) लुधियाना के किसान आंय. 'पहिली हमन जऊन ला वोट देवत रहेन, हमर दाई-ददा अऊ बबा-डोकरी दाई घलो उहिच ला वोट देवत रहिन. अब चीज मन बदलगे हवंय,' चौधरी कहिथे, 'अब मकसद मोदी ला हटाय हे.' ओकर ददा बाबू सिंह स्वतंत्रता सेनानी रहिस अऊ भारतीय राष्ट्रीय सेना (आईएनए) मं काम करत रहिस
डेरी: मेडिकल प्रैक्टिशनर्स यूनियन, जेन ह साल 2020-21 के विरोध प्रदर्सन के घलो हिस्सा रहिस, वो ह आयोजन स्थल मं जाँच-इलाज करत रहय. जउनि: कार्यक्रम स्थल मं करीबन एक दर्जन बुक स्टॉल लगाय गे रहिस. सामिल लोगन मन ला आम चुनाव 2024 ला लेके परचा बांटे गीस
नेता मन के भासन चलत रहिथे, अनाज मंडी के चरों डहर नारा गूंजे ला लगथे.” किसान मजदूर एकता ज़िंदाबाद” अऊ वो मन नारा लगाथें,”नरेंद्र मोदी वापस जाओ!”
किसान-मजदूर महापंचायत के जगा के तीर मं, तीर-तखार के गाँव के किसान संघ के ईकाई मन के डहर ले लंगर (भंडारा) लगाय गे हे. मेडिकल प्रैक्टिशनर्स यूनियन डहर ले इलाज के केंप घलो चलाय जावत हे, जेन ह साल 2020-21 के विरोध प्रदर्सन बखत 13 महीने तक ले टिकरी बार्डर मं किसान मन के समर्थन करे रहिस. इंकलाबी केंदर अऊ जम्हूरी अधिकार सभा, पंजाब के सदस्य मन चुनाव अऊ शिक्षा, रोजगार, स्वास्थ्य अऊ धरम, जात अऊ लिंग जइसने आम जनता ले जुरे मुद्दा मन ला लेके परचा बाँटत हवंय.
वइसे एसकेएम ह लोगन मन ले भाजपा ला हराय बर कहत हवय, फेर वो ह कऊनो खास पार्टी ला वोट देय के अपील नइ करत हवय. कीर्ति किसान यूनियन के नेता राजिंदर दीपसिंहवाला कहिथें, “वो मइनखे ला वोट देवव, जऊन ह बीजेपी उम्मीदवार ला हरा सकय.”
जइसनेच महा पंचायत सिरोइस, संदेसा साफ हवय – परचार बखत बीजेपी के विरोध करव, चुनाव मं बीजेपी ला हराव. ये फइसला करत लाखोवाल कहिथे, “कऊनो घलो हिंसा के सहारा नइ लिही, हमन शांति ले विरोध करबो.”
अनुवाद: निर्मल कुमार साहू
