ستلج کا زہریلا پانی

’’جہنم ہے یہ۔‘‘

کشمیرہ بائی صنعتی کچروں سے آلودہ ہوئے آبی ذخیرہ بڈھے نالے کے بارے میں بتا رہی ہیں، جو ان کے گاؤں سے ہو کر گزرتا ہے اور اس کا پانی ان کے گھر سے سو میٹر دور ستلج ندی میں جا کر گرتا ہے۔

کشمیرہ بائی کی عمر تقریباً پچاس سال کے آس پاس ہے۔ وہ یاد کرتے ہوئے بتاتی ہیں کہ کسی زمانے میں ندی صاف ہوا کرتی تھی اور لوگ بغیر کسی پریشانی کے اس کا پانی پیتے تھے۔ بڈھا نالہ، لدھیانہ کے کوم کلاں گاؤں سے شروع ہو کر ۱۴ کلومیٹر تک بہتا ہے اور کشمیرہ بائی کے گاؤں ولی پور کلاں کے پاس ستلج میں مل جاتا ہے۔

وہ کہتی ہیں، ’’ہم دوزخ میں بیٹھے ہیں۔ جب بھی سیلاب آتا ہے، گندا کالا پانی ہمارے گھروں میں گھس جاتا ہے۔ برتن میں رکھنے پر پانی رات بھر میں پیلا پڑ جاتا ہے۔‘‘

آلودہ پانی سے بدحال لوگوں کو حکومت کے ذریعہ نظر انداز کیے جانے کے خلاف پنجاب، ہریانہ اور راجستھان کے سینکڑوں لوگوں نے ۲۴ اگست، ۲۰۲۴ کو لدھیانہ میں احتجاجی مظاہرہ کیا۔ ’کالے پانی دا مورچہ‘ (آبی آلودگی کے خلاف احتجاجی مظاہرہ) کے بینر تلے، اس مظاہرہ میں ستلج کے کنارے کے علاقوں میں متاثر لوگ شامل تھے۔

’اب بڈھے نالے کو بخش دو، ستلج کو سانس لینے دو۔‘

بڈھا نالہ میں آلودگی کے خلاف احتجاج نیا نہیں ہے اور نہ ہی اس کی صفائی کے لیے چلائے جانے والے منصوبے۔ یہ دونوں چیزیں گزشتہ تین دہائیوں سے چلتی آ رہی ہیں، لیکن کوئی اثر نہیں ہوا۔ پہلا منصوبہ – ستلج کی صفائی کے لیے ایکشن پلان – ۱۹۹۶ میں شروع کیا گیا تھا۔ جمال پور، بھٹیاں اور بلّوکے گاؤوں میں تین سیویج مشینیں (ایس ٹی پی) لگائی گئی تھیں۔

سال ۲۰۲۰ میں، حکومت پنجاب نے بڈھا نالہ کے لیے ۶۵۰ کروڑ روپے کا دو سالہ باز احیا منصوبہ شروع کیا تھا۔ وزیر اعلی بھگونت مان نے پچھلی سرکار پر الزام لگاتے ہوئے، جمال پور میں ریاست کے سب سے بڑے ایس ٹی پی اور بڈھا نالہ کے احیا کے لیے ۳۱۵ کروڑ روپے کے دیگر منصوبوں کا آغاز کیا۔

سیاسی پارٹیوں کی ایک دوسرے پر الزام تراشی جاری ہے۔ کشمیرہ کہتی ہیں کہ نہ تو حکومت اور نہ ہی کسی سیاسی پارٹی نے اس مسئلہ کو حل کرنے کی کوشش کی ہے۔ لدھیانہ میں سماجی کارکن حکومت پنجاب کے سامنے بار بار اس مسئلہ کو اٹھاتے رہے ہیں، لیکن کروڑوں روپے خرچ کرنے کے بعد بھی نالہ آلودہ ہی ہے، جس سے لوگوں کو بار بار سڑکوں پر اترنا پڑتا ہے۔

مَلکیت کور (۶۰)، مانسا ضلع کے احمد پور سے اس احتجاجی مظاہرہ میں شامل ہونے آئی ہیں۔ وہ بتاتی ہیں، ’’صنعتوں کے ذریعہ نالے میں جانے والے آلودہ پانی سے ہمیں کئی قسم کی بیماریاں ہو رہی ہیں۔ پانی زندگی کی بنیادی ضرورت ہے اور ہمیں صاف پانی ملنا ہی چاہیے۔‘‘

کشمیرہ بائی کہتی ہیں کہ ان کا گاؤں ولی پور کلاں زیر زمین پانی پر منحصر ہے۔ بورویل کو ۳۰۰ فٹ تک نیچے کھودنا پڑتا ہے، جس میں ۳۵ سے ۴۰ ہزار روپے لگ جاتے ہیں۔ لیکن اس کے باوجود بھی صاف پانی ملے، اس کی کوئی گارنٹی نہیں ہے۔ ان گاؤوں کے خوشحال گھروں میں پینے کے پانی کے لیے واٹر فلٹر لگے ہوئے ہیں، جن کی لگاتار سروسنگ کرانی پڑتی ہے۔

اسی گاؤں کی ۵۰ سالہ بلجیت کور نے ہیپے ٹائٹس کے سبب اپنا بیٹا کھو دیا۔ وہ بتاتی ہیں، ’’میرے دونوں بیٹے ہیپے ٹائٹس سی سے متاثر تھے اور ان میں سے ایک کی اس وجہ سے موت ہو گئی۔‘‘ انہوں نے بتایا کہ اس گاؤں اور ارد گرد کے گاؤوں میں اس بیماری سے کئی لوگ متاثر ہیں۔

راجوندر کور (۴۵) بھٹنڈا کے گونیان منڈی سے ہیں۔ وہ کہتی ہیں، ’’ہم احتجاجی مارچ کر رہے ہیں، کیوں کہ اگر آج ہم نہیں جاگے، تو ہماری آنے والی نسل کبھی اچھی زندگی نہیں بسر کر پائے گی۔ ماحولیاتی آلودگی کے سبب اب ہر گھر میں کینسر کا ایک مریض ہے۔ ستلج کے پانی کو آلودہ کرنے والی ان فیکٹریوں کو بند کر دینا چاہیے۔ ہماری اگلی نسلیں تبھی بچ پائیں گی، جب یہ کارخانے بند ہو جائیں گے۔‘‘

لدھیانہ میں کالے پانی دا مورچہ میں حصہ لینے والی ایک دوسری کارکن بی بی جیون جوت کور کہتی ہیں، ’’یہ ہمارے وجود کی لڑائی ہے۔ یہ اگلی نسل کو بچانے کی لڑائی ہے۔‘‘

امن دیپ سنگھ بینس اس مورچہ کی قیادت کرنے والے کارکنوں میں سے ہیں۔ وہ بتاتے ہیں، ’’مسئلہ کی جڑ پر کسی کی توجہ نہیں ہے۔ حکومت اگر واقعی میں منصوبوں کے تحت اسے صاف کرنا چاہتی ہے، تو پھر ان صنعتوں کو ندیوں میں اپنا کچرا بہانے کی اجازت کیوں دیتی ہے؟ آلودہ مادوں کو دریا میں بالکل بھی بہانا نہیں چاہیے۔‘‘

لدھیانہ کے ایک وکیل کہتے ہیں، ’’رنگ کے کارخانوں کو بند کر دینا چاہیے۔‘‘

لدھیانہ میں تقریباً ۲۰۰۰ صنعتی الیکٹرو پلیٹنگ کارخانے اور ۳۰۰ رنگائی کارخانے ہیں۔ اور بڈھا نالہ کو آلودہ کرنے کے لیے دونوں ہی ایک دوسرے پر انگلی اٹھاتے ہیں۔ لدھیانہ کے صنعت کار بدیش جندل نے پاری سے بات چیت میں کہا، ’’پنجاب پوائزن پزیشن اینڈ سیلز قانون، ۲۰۱۴ کے مطابق، انتظامیہ کو کسی بھی زہریلے کیمیا کی فروخت اور خرید کا ریکارڈ رکھنا ہوگا۔ لیکن انتظامیہ کی اس جانب کوئی توجہ نہیں ہے۔‘‘

انہوں نے مزید کہا کہ صنعتوں کو زیرو لیکوئڈ ڈسچارج (زیڈ ایل ڈی) واٹر ٹریٹمنٹ پروسیس اپنانا ہوگا۔ کارخانوں کا کوئی بھی کچرا – ٹریٹیڈ یا اَن ٹریٹیڈ – بڈھا نالے میں نہیں جانا چاہیے۔‘‘

زرعی ماہر دیوندر شرما نے آلودگی پھیلانے والی صنعتوں کو پوری طرح سے بند کرنے کی اپیل کی ہے۔ پاری سے بات کرتے ہوئے انہوں نے کہا، ’’یہ صنعتیں ۴۰ سالوں سے ہماری ندیوں کو آلودہ کر رہی ہیں اور کسی کو اس کی پرواہ نہیں ہے۔ ہم گندگی پھیلانے والی صنعتوں کو فروغ کیوں دے رہے ہیں؟ صرف سرمایہ کاری کے لیے؟ حکومتوں کو ماحولیاتی تحفظ اور صحت عامہ میں سرمایہ کاری کرنی چاہیے۔‘‘

کارکنوں نے اس بات کا انکشاف کیا کہ رنگائی کارخانوں کو واضح طور پر ہدایت دی گئی تھی کہ کسی بھی سیال مادّہ، یہاں تک کہ ٹریٹیڈ کچرے/پانی کو بڈھا نالے میں نہیں بہایا جائے گا۔ حال ہی میں، این جی ٹی کی سماعت کے دوران دستاویزوں سے اس بات کا انکشاف ہوا ہے۔ کارکن سوال کرتے ہیں کہ پنجاب آلودگی کنٹرول بورڈ (پی پی سی بی) ۱۱-۱۰ سال تک اس مسئلہ پر خاموش کیوں رہی؟

پنجاب کے کارکن سوال کرتے ہیں، ’’اگر تریپورہ آلودگی پھیلانے والی صنعتوں پر پابندی لگا سکتا ہے، تو پنجاب کیوں نہیں؟‘‘

جب بڈھا نالہ کا پانی لدھیانہ اور نیچے کی طرف گاؤوں سے ہو کر بہتا ہے، تو نالے کا صاف پانی کالا ہو جاتا ہے۔ یہ آگے جا کر ستلج میں ملتا ہے۔ یہ چکنا سیال مادّہ راجستھان سے ہو کر پاکستان جاتا ہے اور پھر بحیرہ عرب میں جا کر مل جاتا ہے۔ سیٹلائٹ کی تصویریں بھی ہریکے پتّن میں بیاس اور ستلج ندی کے پانی کے درمیان کے فرق کو دکھاتی ہیں، جہاں دونوں ندیاں ملتی ہیں۔

اس سال، ۱۳ اگست ۲۰۲۴ کو ایک ردعمل میں (جس کی ایک کاپی پاری کے پاس ہے)، مرکزی آلودگی کنٹرول بورڈ (س پی سی بی) نے بڈھا نالہ میں آلودگی کی حالت پر نیشنل گرین ٹربیونل (این جی ٹی) کو جواب دیا۔ اس میں کہا گیا ہے کہ شہر میں تین سی ای ٹی پی ’’ماحولیات، جنگلات اور موسمیاتی تبدیلی کی وزارت کے ذریعہ جاری ماحولیاتی منظوری میں متعینہ نمٹان شرائط کی تعمیل نہیں کرتے پائے گئے ہیں۔‘‘

سی پی سی بی نے پچھلی رپورٹ میں اس بات کی تصدیق کی تھی کہ بڈھا نالہ کا پانی سینچائی کے لیے صحیح نہیں ہے۔ کارکنوں نے کہا کہ ’’اگر یہ پانی کھیتی کے لیے صحیح نہیں ہے، تو اس پانی کو پیا جا سکتا ہے؟‘‘

احتجاجی مارچ کے منتظمین نے ایک مشترکہ بیان میں ۱۵ ستمبر کو بڈھا نالہ کو بند کرنے کا اعلان کیا اور پھر بعد میں اسے بڑھا کر یکم اکتوبر کر دیا۔ اس اعلان کے بعد، ۲۵ ستمبر کو پی پی سی بی نے تین سی ای ٹی پی سے بڈھے نالے میں گرنے والے کچرے کو فوراً بند کرنے کا حکم دیا۔ حالانکہ، رپورٹ کے مطابق ایسی کوئی کارروائی نہیں ہوئی ہے۔

کچرے کے بہاؤ کو فوراً روکنے کے لیے، کارکنوں نے یکم اکتوبر کو لدھیانہ کے فیروز پور روڈ پر دھرنا دیا اور حکومت کو ۳ دسمبر، ۲۰۲۴ تک کارروائی کرنے کو کہا۔

سرکاری سروے اور وعدوں سے پریشان بلجیت کور نے کہا، ’’وقتاً فوقتاً کوئی نہ کوئی آتا رہتا ہے اور بڈھے نالے سے نمونہ لے جاتا ہے، لیکن ہوتا کچھ نہیں۔ یا تو اس آلودگی کو روکا جانا چاہیے یا ہمیں صاف پانی مہیا کرایا جانا چاہیے، تاکہ ہمارے بال بچے ایک صحت مند زندگی گزار سکیں۔‘‘

مترجم: محمد قمر تبریز