हो सकत हे, 30 बछर के गणेश पंडित, लोहा पुल, नई दिल्ली के जुन्ना यमुना पुल के सबले जवान बासिंदा होवय. ओकर कहना आय के ओकर समाज के नवा पीढ़ी के लइका मन तैराकी कोच के रूप मं जियादा ‘मुख्यधारा’ के नउकरी करे अऊ तीर के चांदनी चौक के दुकान मन मं बूता करे पसंद करथें.
दिल्ली ले होके गुजरेइय्या यमुना, गंगा के सबले लंबा सहायक नदी आय, अऊ भराव के नजर ले घाघरा के बाद दूसर सबले बड़े सहायक नदी आय.
पंडित यमुना मं फोटो शूट करवाथे अऊ बीच नदी मं पूजा पाठ करवइय्या लोगन मन ला डोंगा ले लेके जाथे. वो ह बताथे, “जिहां विज्ञान काम नइ आवय, उहाँ आस्था काम आथे.” ओकर ददा इहाँ पुजेरी हवय अऊ वो अऊ ओकर दूँ झिन भाई “ कम उमर मं यमुना मं तइरे सीखे रहिन.” पंडित के भाई पांच सितारा होटल मन मं लाइफगार्ड के काम करथें.
