“ನಮ್ಮ ಇಡೀ ಮೈಗೆ ಬಣ್ಣ ಹಚ್ಚುವುದು ಕಷ್ಟದ ಕೆಲಸ. ರಾತ್ರಿಯಿಡೀ ಎಚ್ಚರವಾಗಿದ್ದು ಅದನ್ನು ಮಾಡಬೇಕು,” ಎಂದು ಆಯುಷ್ ನಾಯಕ್ ಹೇಳುತ್ತಾರೆ. ಅವರು ತಮ್ಮ ದೇಹಕ್ಕೆ ಮೊದಲ ಬಾರಿಗೆ ಆಯಿಲ್ ಪೈಂಟ್ ಹಚ್ಚುತ್ತಿದ್ದಾರೆ. “ನನ್ನ ಮೈ ಉರಿವಂತೆ ಫೀಲ್ ಆಗ್ತದೆ. ಆದ್ದರಿಂದ, ಆದಷ್ಟು ಬೇಗ ಬಣ್ಣವನ್ನು ಒಣಗಿಸಬೇಕು,” ಎಂದು 17 ವರ್ಷ ವಯಸ್ಸಿನ ಆಯುಷ್ ಹೇಳುತ್ತಾರೆ.
ದಸರಾ ಮತ್ತು ಕೃಷ್ಣ ಜನ್ಮಾಷ್ಟಮಿಯಲ್ಲಿ ಕುಣಿಯುವ ಜಾನಪದ ಕುಣಿತವಾದ ಪಿಲಿ ವೇಷ (ಹುಲಿ ವೇಷ ಎಂದೂ ಕರೆಯುತ್ತಾರೆ) ಕುಣಿಯಲು ತಮ್ಮ ಶರೀರದ ಮೇಲೆ ಗಾಢ ಬಣ್ಣದ ಪಟ್ಟೆಗಳನ್ನು ಬಿಡಿಸುವ ಕರಾವಳಿ ಕರ್ನಾಟಕದ ಅನೇಕ ಯುವಕ-ಯುವತಿಯರಲ್ಲಿ ಆಯುಷ್ ಕೂಡ ಒಬ್ಬರು. ಕುಣಿಯುವಾಗ ಅವರು ಹುಲಿಯ ಮುಖವಾಡಗಳನ್ನು ಧರಿಸಿ ಗೊಣಗುತ್ತಾ, ಸುತ್ತಲೂ ಜೋರಾಗಿ ಭಾರಿಸುವ ತಾಸೆಯ ಬಡಿತಕ್ಕೆ ಕುಣಿಯುತ್ತಾರೆ.
ಪಿಲಿ ಎಂದರೆ ಹುಲಿ. ಕರಾವಳಿ ಕರ್ನಾಟಕದ ಜನನುಡಿ ತುಳುವಿನಲ್ಲಿ ವೇಷ ಎಂದರೆ ಮೇಕಪ್. “ನೀವು ಯಾರಿಂದಲೂ ಇದನ್ನು ಕಲಿಯಬೇಕಾಗಿಲ್ಲ. ಇದು ನಮ್ಮ ಆತ್ಮದಲ್ಲಿಯೇ ಇದೆ,” ಎನ್ನುತ್ತಾರೆ ಕಳೆದ 22 ವರ್ಷಗಳಿಂದ ಪಿಲಿ ವೇಷ ಹಾಕುತ್ತಿರುವ ವೀರೇಂದ್ರ ಶೆಟ್ಟಿಗಾರ್. "ತಾಸೆಯ ಶಬ್ದ ಮತ್ತು ಸುತ್ತ ಇರುವ ಶಕ್ತಿ ನಿಮ್ಮನ್ನು ಬೀಟ್ಗೆ ಕುಣಿಯುವಂತೆ ಮಾಡುತ್ತದೆ," ಎಂದು ಅವರು ಹೇಳುತ್ತಾರೆ. ಅಮೆಜಾನ್ನಲ್ಲಿ ಡಿಸ್ಟ್ರಿಬ್ಯೂಟರ್ ಆಗಿ ಕೆಲಸ ಮಾಡುವ 30 ವರ್ಷ ವಯಸ್ಸಿನ ವೀರೇಂದ್ರ ಊರಿನ ಯುವಕರನ್ನು ಪಿಲಿ ಕುಣಿಯುವಂತೆ ಪ್ರೋತ್ಸಾಹಿಸುತ್ತಾರೆ.
ಹುಲಿಗಳು, ಚಿರತೆಗಳು ಮತ್ತು ಕರಿ ಚಿರತೆಗಳಂತೆ ಅಕ್ರಿಲಿಕ್ ಪೈಂಟ್ನಿಂದ ಹಳದಿ ಮತ್ತು ಕಂದು ಬಣ್ಣದ ಪಟ್ಟೆಗಳನ್ನು ಕುಣಿಯುವವರು ಶರೀರದ ತುಂಬಾ ಚಿತ್ರಿಸಿಕೊಳ್ಳುತ್ತಾರೆ. ಹಿಂದೆ ಪಿಲಿ ಕುಣಿಯುವವರು ಇದ್ದಿಲು, ಮಣ್ಣು, ಬೇರುಗಳು ಮತ್ತು ಫಂಗಸ್ಗಳನ್ನು ಬಳಸಿ ಆಕರ್ಷಕ ಬಣ್ಣಗಳನ್ನು ತಯಾರಿಸುತ್ತಿದ್ದರು.
ವರ್ಷಗಳು ಕಳೆದಂತೆ, ಈ ಕುಣಿತದ ಸಾಂಪ್ರದಾಯಿಕ ಹೆಜ್ಜೆಗಾರಿಕೆ ಅಕ್ರೋಬಾಟಿಕ್ ಆಗಿ ಬದಲಾಗಿದೆ, ಉದಾಹರಣೆಗೆ ಹಿಂದಕ್ಕೆ – ಮುಂದಕ್ಕೆ ಜಿಗಿಯುವುದು, ತಲೆಯಿಂದ ತೆಂಗಿನಕಾಯಿ ಒಡೆಯುವುದು, ಬಾಯಿಯಿಂದ ಬೆಂಕಿಯುಗುಳುವುದು ಮುಂತಾದ ಸಾಹಸಮಯ ಕಸರತ್ತುಗಳಿಗೆ ಹೆಚ್ಚು ಒತ್ತು ನೀಡಲಾಗುತ್ತಿದೆ. ನೃತ್ಯ ಸಂಯೋಜನೆಗೂ ಹೆಚ್ಚು ದೈಹಿಕ ಶ್ರಮ ಅಗತ್ಯ. ವಯಸ್ಸಾದವರು ಈ ಸಾಂಪ್ರದಾಯಿಕ ಕುಣಿತವನ್ನು ಮುಂದುವರಿಸಿಕೊಂಡು ಹೋಗಲು ಯುವಕರನ್ನು ಬಿಟ್ಟು ಬಿಟ್ಟಿದ್ದಾರೆ.
