ખેતરોમાં ચાલો, કે પછી તળાવમાં તરો, જુઓ આકાશમાંથી ઊતરી આવતું એક ત્રાંસુ કિરણ અને બદલાતા રંગો, જમીન પર કાન માંડો…સાંભળો. અને લોકોને તેમના જીવન અને પ્રેમ, આનંદ અને ઊંડા દુઃખ વિશે વાત કરતા સાંભળો. આ લાગણીઓને ફોટોગ્રાફમાં કેદ કરી લો, વાચકને ખેંચી જાઓ તે સ્થળની જમીન અને ત્યાંના લોકોના ચહેરાઓ સુધી.
આ છ ફોટો નિબંધો તમને ગ્રામીણ ભારત, શહેરી ભારત અને નાના નગરોના ભારતના હૃદય સુધી લઈ જાય છે. પશ્ચિમ બંગાળમાં લુપ્ત થતા કલા સ્વરૂપ અને અંતહીન ભૂખની, હિમાચલ પ્રદેશમાં ક્વિયર સમુદાયના આનંદ અને પ્રતિકારની, તમિળનાડુમાં તેમના પોતાના અનુભવોનું દસ્તાવેજીકરણ કરતા છેવાડાના સમુદાયોની અને તટીય કર્ણાટકમાં થતા લોકનૃત્યમાં ડ્રમના તાલે ગુલાંટિયા ખાતા લોકોની છબીઓ અસંખ્ય વાર્તાઓ કહી જાય છે - વિશાળ વૈવિધ્યસભર ભારતની – એના અલગ અલગ ભૂપ્રદેશોની, અલગ અલગ સમુદાયોની અને અલગ અલગ આજીવિકાઓની.
કેમેરા એ એક શક્તિશાળી સાધન છે, આત્મ-પ્રતિબિંબનો એક સ્ત્રોત જે આખરે બહારની તરફ ફેરવાય છે, અન્યાયને કચકડે કેદ કરવા માટે, અને કદાચ તેના નિવારણનો માર્ગ બનવા માટે પણ.
નીચેની વાર્તાઓ તમારા હૃદયને આનંદથી તરબતર કરી દેશે કે પછી એને હચમચાવી દેશે.
