“ಅಲ್ಲಿ ಮೀನು ಕತ್ತರಿಸುವ ಮಹಿಳೆಯರಿಗೆ ಜಾಗವೇ ಇಲ್ಲ” ಎಂದು ಕಡಲೂರು ಜಿಲ್ಲೆಯ ಕಿಂಜಮ್ ಪೇಟೆ ಗ್ರಾಮದ ಮಹಿಳೆ ಕಲಾ ಹೇಳಿದರು.
ಈ 60 ವರ್ಷದ ಮಹಿಳೆ ಸಿಂಗಾರತೋಪು ಸೇತುವೆಯ ಕೆಳಗೆ ಕುಳಿತಿದ್ದರು. ಈ ಕಬ್ಬಿಣ ಮತ್ತು ಕಾಂಕ್ರೀಟಿನ ರಚನೆ ಇರುವುದು ಕಡಲೂರಿನ ಹಳೆಪಟ್ಟಣದ ಬಂದರಿನಲ್ಲಿ. ಇಲ್ಲಿ ಸುಮಾರು 20-30 ಮಹಿಳೆಯರು ಮೀನು ಮಾರುವುದು ಮತ್ತು ಕತ್ತರಿಸುವ ಕೆಲಸವನ್ನು ಮಾಡುತ್ತಾರೆ.
ಈ ಜಿಲ್ಲೆಯು 57.5 ಕಿಲೋಮೀಟರ್ ದೂರದ ಕರಾವಳಿ ತೀರ ಮತ್ತು ಗೋಡೌನ್, ವೇರ್ಹೌಸ್, ಅಂಗಡಿಗಳು ಮತ್ತು ಮೀನುಗಾರಿಕಾ ದೋಣಿಗಳಿಂದ ಇಲ್ಲಿನ ಬಂದರು ಕಿಕ್ಕಿರಿದಿದೆ.
“ಹೆಚ್ಚು ಹೆಚ್ಚು ವ್ಯಾಪಾರಸ್ಥರು ಮತ್ತು ಟ್ರಕ್ಕುಗಳು ಬರಲಾರಂಭಿಸಿದಂತೆ ನಮಗೆ ಅಲ್ಲಿ ಸ್ಥಳವಿಲ್ಲದಾಯಿತು” ಎನ್ನುತ್ತಾರೆ ಕಲಾ (ಅವರು ತಮ್ಮ ಹೆಸರಿನ ಜೊತೆ ಇನ್ಯಾವುದೇ ಗುರುತುಗಳನ್ನು ಬಳಸುವುದಿಲ್ಲ). “ಹೀಗೆ ನಾವು ಈ ಸಾರ್ವಜನಿಕ ಸ್ಥಳವಾದ ಸೇತುವೆಯ ಕೆಳಗೆ ತಳ್ಳಲ್ಪಟ್ಟೆವು. ಇದು ಬಂದರಿನ ಹೊರಗಿದೆ.”
ಕಲಾ ಅವರಂತಹ ಮೀನು ಮಾರುವ, ಕತ್ತರಿಸುವ, ನಿರುಪಯೋಗಿ ಮೀನುಗಳನ್ನು ಒಣಗಿಸಿ ಮಾರುವ ಮಹಿಳೆಯರನ್ನು ಕ್ರಮೇಣವಾಗಿ ಹೊರತಳ್ಳಲಾಗಿದೆ. ಓದಿ: ಕಡಲ ತೀರದಲ್ಲೊಂದು ಪುಲಿ
ಮೀನುಗಾರ ಮಹಿಳೆಯರನ್ನು ಸಾಮಾನ್ಯವಾಗಿ ಮೀನು ಮಾರಾಟಗಾರರೆಂದು ನಿರೂಪಿಸಲಾಗಿದ್ದರೂ, ಬಂಡವಾಳದ ಕೊರತೆ ಅಥವಾ ದೈಹಿಕ ಕಾಯಿಲೆಯಿಂದ ಬಳಲುತ್ತಿರುವ ಅನೇಕ ಮಹಿಳೆಯರು, ಮೀನುಗಳನ್ನು ಕತ್ತರಿಸುವ ಮತ್ತು ಸ್ವಚ್ಛಗೊಳಿಸುವ ಕೆಲಸವನ್ನು ಮಾಡುತ್ತಾ ಮಾರಾಟಗಾರರ ಬಳಿ ಕುಳಿತುಕೊಳ್ಳುತ್ತಾರೆ.
“ನಾವು ವ್ಯಾಪಾರಿಗಳ ಬಳಿಯೇ ಇರಬೇಕು. ಮೀನು ಕೊಂಡವರು ನಮ್ಮ ಬಳಿ ಅದನ್ನು ಕತ್ತರಿಸಿ ಕೊಡಲು ಹೇಳುತ್ತಾರೆ. ನಾವು ಮೀನು ಮಾರಾಟಗಾರರ ಬಳಿ ಇಲ್ಲದೆ ಹೋದರೆ ನಮಗೆ ಕೆಲಸ ಸಿಗುವುದಿಲ್ಲ” ಎನ್ನುತ್ತಾರೆ ಕಲಾ.
