நூலாக தொங்கும் வாழ்க்கைகளும் மொழிகளும்

தாய்களின் மொழிகள்

என் தாய்க்கோ எனக்கோ ஒருவேளை
மொழிகளே இல்லாமல் கூட இருந்திருக்கலாம்
ஆண்களுக்குதான் மொழிகள் பரிசளிக்கப்பட்டன
ஆண்மைக்கான பாரம்பரியமாக
அவர்கள் அவற்றை
கெட்டவார்த்தைகள் கண்டுபிடிக்க
கோபத்தை கொட்ட
சட்டங்கள் பிரகடனம் செய்ய
அலற
ஆழமற்ற காதல் கடிதங்கள் எழுத
சுவர்களில் எழுத
வரலாறுகளை திரிக்க
பயன்படுத்திக் கொண்டனர்

ஆண்களின் மொழிகள்
கடின அட்டை அகராதிகளில் மூடப்பட்டன.
அவற்றை அச்சடிக்க
இயந்திரங்கள் கண்டுபிடிக்கப்பட்டன
அவர்களின் பெயர்கள்
எங்களின் தாய்கள் எழுதிய
கவிதைகளுக்கு கீழ் பொறிக்கப்பட்டன.
அவர்களின் மொழிகளில் எழுதப்பட்ட புத்தகங்கள்
பெரிய நூலகங்களின் தூசு படிந்த
சிலந்தி வலை அலமாரிகளில் கிடக்கின்றன
நாடாளுமன்றங்களோ ஊர்வலங்களோ
அவர்களின் மொழிகள்தாம்
பேசப்படுகின்றன
கேட்கப்படுகின்றன
ஆவணப்படுத்தப்படுகின்றன
எழுதப்படுகின்றன
புரிந்துகொள்ளப்படுகின்றன
விளம்பரப்படுத்தப்படுகின்றன.

எங்களின் தாய்மொழிகளும்
அவற்றின் தாக்கமும்
பதிவும்
நடையும்
வரலாறும்
செயல்பாடும்
யாவும் வித்தியாசமானவை.

பூமிக்குள்ளிருந்து வெட்டியெடுத்த பேனாக்களில்
காதலை தொட்டெடுத்து
சுண்ணாம்பின் மாயப் புகையில் முக்கியெடுத்து
வியர்வை பெருங்கடல்களில் அலசியெடுத்து
பழைய புடவைகளின் மடிப்புகளுக்குள் ஒளித்து வைத்து
மரத்துக்கடியில் பாதுகாத்து வைக்கப்படுகின்றன.
மண்ணிலிருந்து பெறப்பட்ட இந்த பேனாக்கள்தான்
சரியான தருணங்களின்போது
எங்களின் உள்ளங்கைகளில், ரத்தமசியில்
எங்களின் தாய்மொழிகளை எழுதின.

பேனாக்களை செய்திருக்காதபோது அவர்கள்
அறையின் மூடிய கதவுகளுக்கு பின்னால்
ராணிகளும் அடிமைப்பெண்களும்
எங்களின் தாய்மொழிகளை முணுமுணுத்தனர்

அரிவாள் மற்றும் வறண்டிகள் செதுக்கப்படாத
அறைகளும் கோட்டைகளும்
மண் மூடிய அவர்களின் நிலத்திலும்
குடிசைகளின் தரைகளில் இல்லாதவர்களும்
முணுமுணுத்தனர் எங்கள் தாய்மொழிகளை.

விரல்நுனிகளில் திறன் கொண்டவர்கள்
முழு அங்கியிலும் புடவைகளிலும்
பூப்பின்னலாக, ஜரிகைத் தையல்களாக
தைத்தனர் எங்களின் தாய்மொழிகளை

எங்கள் தாய்மொழிகள்
நடுகற்களிலும்
சிதைகளின் தீயில் எரிந்து மிஞ்சிய சாம்பலிலும்
கனவுகளும் தூக்கமும் நிறைந்த
கண்களுக்குள் திறக்கும்
செவ்வானிலும் எழுதப்பட்டவை.
எங்கள் தாய்மொழிகள்
புரட்சிக்கான கருஞ்சிவப்பு அழைப்புகள்
எங்கள் இதயங்களின் துடிப்புகள்
அன்புக்கான இசை
ஓய்வற்ற ஆசைகள்
எங்களின் தாய்மொழிகள்

ஆண்களின் மொழிகள் யாவும் ஒன்றுதான்
ஒரே நிறங்கள்
ஒரே வடிவங்கள்
ஒரே சத்தங்கள்
பல நிறங்களில் வேறுபடும்
இவற்றை போலல்ல
எங்கள் தாய்களின் மெல்லிசை மொழிகள் போலல்ல
எங்களின் தாய்மொழிகள்
அக்தாரியின் தொண்டையிலிருந்து வந்த வார்த்தைகள் போன்றவை
ஃபாத்திமாவிடம் கற்றுக் கொண்ட வழிகள் போன்றவை
அன்பின் உச்சம் போன்றது.

அவற்றை ஒவ்வொன்றாக பிடுங்கி
எல்லா வார்த்தைகளையும் சேர்த்து
இப்போது நாங்கள் ஒரு
புது தொடக்கத்தை எழுதுகிறோம்
எங்களுக்கே உரிய பரவசமான, வீரம் நிறைந்த
அறிவுக்கூர்மைகொண்ட, நகைச்சுவை ததும்பும்
நீண்ட தாய்மொழிகளில்