अजादी के दस कहिनी

भारत के गाँव-देहात के ये मन अजादी के पइदल लड़ाका रहिन अऊ अंगरेज राज के खिलाफ अब तक के सबले बड़े लड़ई मन ले कुछेक लड़ई के मुखिया घलो रहिन. वो मन ले अब्बड़ अकन लोगन मन अंगरेज राज ले अजाद कराय सेती अपन परान तक ले निछावर कर दीन. अऊ ये मन ले कतको झिन मन भारी अतियाचार सहे के बाद घलो भारत ला अजाद होवत देखत बांहचे रहिन, तउन मन ला घलो जल्दी भुलाय-बिसोर देय गीस. 1990 के दसक के बाद ले, मंय आखिरी जियंता स्वतंत्रता सेनानी मन के कतको के जिनगी ला रिकॉर्ड करेंय. इहाँ तुमन ला तउन मन के पांच ठन कहिनी पढ़े ला मिलही:

येकरे संगे संग पांच ठन दीगर कहिनी मन के जुम्फा घलो हवय, जेन हा सबले पहिली टाइम्स ऑफ़ इंडिया मं छपे रहिन, वो मन ला इहाँ अऊ जियादा फोटू मन के संग फ़िर ले छापे जावत हवय. ये ‘भुलाय-बिसोरे अजादी’ कड़ी के ताना-बाना तउन गाँव मन के तीर-तखार बुने गे हवय जेन ह बड़े बगावत मन के गढ़ रहिन. भारत के अजादी के लड़ई, सिरिफ सहर के धनवान मन के मसला नई रहिस अऊ न त वो ह ओकरे मन तक ले सीमित रहिस. गाँव-देहात के कतको लोगन मन ये मं भारी बढ़-चढ़ के हिस्सा लेय रहिन अऊ वो मन के लड़ई मं अजादी के मायना कुछु दूसर रहिस. जइसने के, 1857 के कतको लड़ई, गाँव मन मं तउन बखत लड़े जावत रहिस, जेन बखत मुंबई अऊ कोलकाता के धनवान बड़े जमात के लोगन मन अंगरेज मन के सुफल होय  सेती मनौती करत रहिन. अजादी के 50 वां बछर, यानि के 1997 मं, मंय वो मन ले कुछेक गाँव गेय रहेंव जिहां के बारे मं तुमन ला तरी लिखाय कहिनी मन ला पढ़े ले मिलही:

पारी ह, आख़िरी जियंता स्वतंत्रता सेनानी, जेन मन 90 बछर के हो गे हवंय धन ओकर ले जियादा उमर के हवंय, वो मन ला खोजे अऊ ओकर जिनगी ला दस्तावेज़ के रूप में दरज करे के सरलग कोसिस करत हवय.    

अनुवाद: निर्मल कुमार साहू