ریتا اَکّا کا ہر ایک کام اُس چیز کو ظاہر کرتا ہے، جو زندگی ہمیں سکھانے کی کوشش کرتی ہے – کہ اس کا ایک مقصد ہے۔ گویائی اور سماعت سے معذور اور صفائی کا کام کرنے والی وہ ایک بیوہ ہیں۔ ان کی ۱۷ سال کی بیٹی اپنی دادی کے ساتھ رہنے کے لیے گھر چھوڑ کر جا چکی ہے۔ اس ۴۲ سالہ خاتون کی تنہائی ان کی زندگی سے بڑی ہے، لیکن اس کے سامنے انہوں نے خود سپردگی نہیں کی ہے۔
ریتا اَکّا (بڑی بہن) – جیسا کہ وہ اپنے پڑوس میں جانی جاتی ہیں (حالانکہ کچھ لوگ انہیں اوماچی کہتے ہیں، جو گونگے کے لیے بے عزتی بھرا لفظ ہے) – ہر صبح بیدار ہونے کے بعد چنئی میونسپل کارپوریشن کے لیے محنت سے اپنے کچرا اٹھانے کے کام پر نکل جاتی ہیں۔ حالانکہ کبھی کبھی، مشقت بھرے دن کے آخر میں جسم میں درد کی شکایت کرتی ہیں۔ کچرا لے جانے کے لیے وہ جس سائیکل رکشہ ٹرالی کا استعمال کرتی ہیں، اس کے کناروں کو دیکھ کر آپ ان کے عزم کا اندازہ لگا سکتے ہیں۔ ریتا نے اس کے اوپر الگ الگ رنگوں میں اپنا نام تین بار لکھوا رکھا ہے۔ دن کے آخر میں، وہ شہر کے کوٹّور پورم علاقے میں واقع ہاؤسنگ بورڈ کوارٹر کے اپنے چھوٹے، تنہا گھر میں واپس چلی جاتی ہیں۔
جانوروں کے ساتھ وقت گزارنے سے پہلے ریتا روزانہ دو جگہوں پر رکتی ہیں- کتّے کے لیے بسکٹ خریدنے کے لیے ایک چھوٹی سی دکان پر، اور بلیوں کے لیے چکن خریدنے کے لیے گوشت کی دکان پر
لیکن، اس کے درمیان، انہوں نے اپنا بھی ایک مقصد تلاش کر لیا ہے۔ اپنے کام کے بعد اور اپنے گھر کی سُستی میں ڈوبنے سے پہلے، ریتا اپنے ارد گرد آوارہ کتوں اور بلیوں کو جمع کر لیتی ہیں، اور انہیں کھلانے اور ان سے بات کرنے میں کافی وقت گزارتی ہیں۔ کوٹورپورم کی سڑکوں پر ہر شام کو کتنے صبروتحمل کے ساتھ، اپنا کام ختم کرکے ریتا کے آنے کا انتظار کرتے ہیں۔
وہ بنیادی طور پر تیروونّا ملائی کے ایک قصبہ سے ہیں (مردم شماری ۲۰۱۱ کے مطابق، اُس ضلع میں دیہی آبادی تقریباً ۸۰ فیصد تھی)۔ ریتا دو دہائی پہلے، اپنے والدین کے ساتھ کام کی تلاش میں چنئی آئی تھیں۔ ان کو واضح طور پر تاریخ یاد نہیں ہے، لیکن وہ تصدیق کرتی ہیں کہ اتنے برسوں کے دوران، انہوں نے زیادہ تر وقت کئی گھروں میں کام کیا جس کے انہیں بہت کم پیسے ملتے تھے۔ تقریباً سات سال پہلے، وہ ایک ٹھیکہ مزدور کے طور پر چنئی کارپوریشن (اب گریٹر چنئی کارپوریشن) میں شامل ہو گئیں۔ ایک دن کے مشکل سے ۱۰۰ روپے سے شروعات کرکے، آج وہ ۸ ہزار روپے ماہانہ کماتی ہیں۔
ریتا اَکّا گویائی اور سماعت سے معذور ہیں؛ وہ اشاروں میں بات کرتی ہیں۔ اپنے کتّوں کے ساتھ ہونے پر ان کی مسکراہٹ دو گنی ہو جاتی ہے
ریتا بلیچنگ پاؤڈر، جھاڑو اور کچرے کی بالٹی کا استعمال کرتے ہوئے کوٹورپورم کی کم از کم چھ سڑکوں پر جھاڑو لگاتی اور صفائی کرتی ہیں۔ یہ کام وہ بغیر کسی دستانے، جوتے یا حفاظتی آلات کے کرتی ہیں۔ وہ جو کچرا اور کوڑا جمع کرتی ہیں، اسے سڑکوں پر لگے کارپوریشن کے ڈبّے میں جمع کیا جاتا ہے۔ یہاں سے کارپوریشن کی گاڑیاں اور لاری اسے ری سائیکلنگ کے لیے اکٹھا کرتی ہیں۔ ریتا صبح ۸ بجے کے آس پاس کام کرنا شروع کرتی ہیں اور دوپہر تک صفائی ختم کر لیتی ہیں۔ وہ بتاتی ہیں کہ سڑکوں پر صفائی کرتے وقت ایک حادثہ میں ان کی ایک آنکھ کی بینائی متاثر ہوئی تھی۔ اور ننگے پیر چلنے سے ان کے پیروں میں آبلے پڑ گئے ہیں۔ اس کو چھوڑ کر، وہ زور دیکر کہتی ہیں، ان کی صحت اچھی ہے اور انہیں کوئی بڑی شکایت نہیں ہے۔
ان کا کمائی کا ایک بڑا حصہ کتوں اور بلیوں کے لیے کھانا خریدنے پر خرچ ہوتا ہے۔ پڑوسیوں کا ماننا ہے کہ وہ ان کے اوپر دن میں تقریباً ۳۰ روپے خرچ کرتی ہیں، حالانکہ وہ خود اس کے بارے میں کچھ نہیں کہیں گی۔
جانوروں کے ساتھ وقت گزارنے سے پہلے ریتا روزانہ دو جگہوں پر رکتی ہیں- کتوں کے لیے بسکٹ خریدنے کے لیے ایک چھوٹی سی دکان پر، اور بلیوں کے لیے چکن کے بقیہ حصے خریدنے کے لیے گوشت کی دکان پر۔ چکن کے بقیہ حصے، جسے کوژی سِلرا کہتے ہیں – چکن کو صاف کرنے اور فروخت کر دینے کے بعد بچا ہوا حصہ – ان کے جیسے گاہکوں کو ۱۰ روپے میں ملتے ہیں۔
ریتا کو کتوں اور بلیوں کے ساتھ وقت گزارنے میں جو خوشی ملتی ہے، وہ ان کے ذریعے خرچ کیے گئے پیسے سے کہیں زیادہ ہے۔
ان کے شوہر کا کئی سال پہلے انتقال ہو گیا تھا – ریتا کو یا تو یاد نہیں ہے کہ ان کی موت کب ہوئی تھی یا وہ اس بارے میں بات نہیں کرنا چاہتی ہیں – اور تب سے وہ تقریباً ہمیشہ ہی اپنے دَم پر زندگی بسر کر رہی ہیں۔ حالانکہ، پڑوسیوں کا کہنا ہے کہ وہ شرابی تھے۔ ان کی بیٹی ان سے ملنے آتی ہے، لیکن اکثر نہیں۔
پھر بھی، ریتا کا برتاؤ ہنس مکھ بنا ہوا ہے – اور جب وہ اپنے کتوں کے درمیان ہوتی ہیں، تو ان کی مسکراہٹ دو گنی ہو جاتی ہے۔
چنئی کا کوٹورپورم علاقہ جہاں ریتا اَکّا رہتی ہیں۔ ان کا چھوٹا سا گھر ہاؤسنگ بورڈ کے کوارٹر میں ہے۔ وہ دو دہائی پہلے تیرونّا ملائی سے چنئی آئی تھیں
وہ ہر صبح اپنی وردی پہن کر گھر سے نکلتی ہیں۔ وہ تقریباً سات برسوں سے گریٹر چنئی کارپوریشن کے لیے ٹھیکہ پر کام کر رہی ہیں
ریتا اَکّا کوٹورپورم کی چوڑی سڑکوں کی طرف جا رہی ہیں جہاں وہ ہر دن صبح ۸ بجے کام شروع کرتی ہیں
وہ سڑکوں کی صفائی کے لیے، دھات کے ٹب میں بلیچنگ پاؤڈر لے جاتی ہیں
صفائی شروع کرنے سے پہلے، اَکّا بغیر کسی دستانے کے بلیچنگ پاؤڈر کو چھڑکتی ہیں۔ کچرا لے جانے کے لیے وہ جس سائیکل رکشہ ٹرائی کا استعمال کرتی ہیں، اس پر انہوں نے اپنا نام الگ الگ رنگوں میں تین بار لکھوا رکھا ہے
ریتا اَکّا اپنے ذریعے اکٹھا کیے گئے کوڑے کچرے کو میونسپل کارپوریشن کے ڈبّے میں جمع کرتی ہیں
کوڑے کے لیے وہ جس ٹرالی کو سڑکوں پر لیکر چلتی ہیں، وہ ایک خستہ حال تین پہیے والی سائیکل ہے۔ کبھی کبھی وہ ایک مشقت بھرے دن کے آخر میں بدن درد کی شکایت کرتی ہیں
ریتا اَکّا کوٹورپورم میں روزانہ کم از کم چھ بڑی سڑکوں پر جھاڑو لگاتی اور صفائی کرتی ہیں۔ ان کے پاس اپنا کام کرنے کے لیے کوئی جوتے یا کوئی دیگر حفاظتی آلات نہیں ہیں
ننگے پیر چلنے اور کام کرنے سے ان کے پیروں میں آبلے پڑ گئے ہیں، اور سڑکوں کی صفائی کرتے وقت ایک حادثہ میں ان کی ایک آنکھ کی بینائی متاثر ہوئی تھی
ریتا اَکّا سوال کا جواب اشاروں میں دیتی ہیں، اور پھر مسکراتی ہیں
ایک آوارہ کتا، ریتا کے کئی کتّے دوستوں میں سے ایک، ہر شام ان کے کام کے ختم ہونے کا انتظار کر رہا ہے
وہ آوارہ کتّوں اور بلیوں کے لیے کھانا خریدنے پر اپنی معمولی کمائی کا ایک بڑا حصہ خرچ کرتی ہیں، حالانکہ وہ اس بارے میں زیادہ بات نہیں کرتی ہیں
وہ آوارہ کتوں کے ساتھ کھیلنے میں وقت گزارتی ہیں، اور انہیں اپنے ارد گرد جمع کر لیتی ہیں، ان کے ساتھ ’بات کرنے‘ میں کافی وقت گزارتی ہیں
ریتا اَکّا کو اپنے جانور دوستوں کے درمیان اپنی زندگی کا مقصد حاصل ہو گیا ہے۔ ان کے ساتھ رہنے سے انہیں جو خوشی ملتی ہے، وہ ان پر ہونے والے خرچ سے کہیں زیادہ ہے
اپنے ہاتھوں اور اشاروں کا استعمال کرتے ہوئے، وہ بتاتی ہیں کہ وہ کیا کہنا چاہتی ہیں
بائیں: ریتا اَکّا اپنے پڑوسیوں کے ساتھ۔ دائیں: ہاؤس بورڈ کوارٹر میں اپنے گھر پر
فریم میں لگی ایک پینٹنگ ریتا کے چھوٹے سے گھر میں ’نیک خواہشات‘ کے ساتھ سجی ہیں
ریتا اَکّا اپنے گھر میں۔ اپنے شوہر کے انتقال کے بعد سے وہ تقریباً اپنے دَم پر زندگی بسر کر رہی ہیں، لیکن تنہائی کے سامنے انہوں نے خود سپردگی نہیں کی ہے
وہ ہر شام کو اپنے تنہا گھر میں لوٹتی ہیں
مترجم: محمد قمر تبریز
