ਤਿਓਹਾਰ ਤੇ ਉਨ੍ਹਾਂ ਨੂੰ ਬਣਾਉਣ ਤੇ ਸਜਾਉਣ ਵਾਲ਼ੇ ਲੋਕ

ਭਾਰਤੀ ਤਿਓਹਾਰ ਆਪਣੇ ਅੰਦਰ ਬੜਾ ਕੁਝ ਸਮੇਟੀ ਬੈਠੇ ਹਨ ਫਿਰ ਭਾਵੇਂ ਮਿਥਿਹਾਸ ਹੋਵੇ, ਕੁਦਰਤ ਤੇ ਦੈਵੀ ਜਸ਼ਨ ਹੋਣ ਜਾਂ ਫਿਰ ਬਦਲਦੇ ਮੌਸਮ ਜਾਂ ਫ਼ਸਲਾਂ ਦੀ ਚੰਗੀ ਵਾਢੀ ਦੀ ਅਰਦਾਸ ਹੋਵੇ। ਦਰਅਸਲ ਇਹ ਤਿਓਹਾਰ ਇੱਕ ਮੌਕਾ ਹੁੰਦੇ ਹਨ ਜਦੋਂ ਕਈ ਭਾਈਚਾਰੇ ਇਕੱਠੇ ਹੋ ਜਾਂਦੇ ਹਨ ਤੇ ਧਰਮਾਂ ਦੇ ਵਖਰੇਵਿਆਂ ਨੂੰ ਇੱਕ ਕਰਨ ਲਈ ਪੁੱਲ ਦਾ ਕੰਮ ਕਰਦੇ ਹਨ। ਇੰਝ ਅੱਡੋ-ਅੱਡ ਮਾਨਤਾਵਾਂ, ਲਿੰਗ ਤੇ ਜਾਤ ਦੀਆਂ ਹੱਦਾਂ ਨੂੰ ਪਾਰ ਕਰਦੇ ਸਭ ਇੱਕਮਿਕ ਨਜ਼ਰ ਆਉਂਦੇ ਹਨ। ਤਿਓਹਾਰ ਰੋਜ਼ਮੱਰਾ ਦੀ ਨੀਰਸਤਾ ਤੇ ਕਿਰਤ 'ਚੋਂ ਉਪਜੀ ਥਕਾਵਟ ਨੂੰ ਕੁਝ ਕੁ ਸਮੇਂ ਲਈ ਬ੍ਰੇਕ ਦੇ ਦਿੰਦੇ ਹਨ। ਕੋਈ ਵੀ ਤਿਓਹਾਰ ਹੋਵੇ ਵੱਖ-ਵੱਖ ਭਾਈਚਾਰਿਆਂ-ਜਾਤਾਂ ਤੋਂ ਆਉਣ ਵਾਲ਼ੇ ਇਨ੍ਹਾਂ ਕਿਰਤੀਆਂ ਦੀ ਭੂਮਿਕਾ ਬਗੈਰ ਅਧੂਰੇ ਹੁੰਦੇ ਹਨ। ਇਹੀ ਲੋਕ ਹਨ ਜੋ ਜਸ਼ਨ ਦੀਆਂ ਤਿਆਰੀਆਂ ਕਰਦੇ ਹਨ, ਸੰਗੀਤ ਵਜਾਉਂਦੇ, ਨੱਚਦੇ-ਗਾਉਂਦੇ ਤੇ ਪੂਜਾ ਕਰਦੇ ਹਨ। ਪਾਰੀ ਨੇ ਆਪਣੀਆਂ ਕੁਝ ਸਟੋਰੀਆਂ ਜ਼ਰੀਏ ਅੱਡ-ਅੱਡ ਤਿਓਹਾਰਾਂ ਤੇ ਜਸ਼ਨਾਂ ਦਾ ਇੱਕ ਪੂਰਾ ਦਸਤਾਵੇਜ ਬਣਾਇਆ ਹੈ।