’ہم جیسے لوگوں کے لیے کوئی نوکری نہیں ہے‘

’’ہماری نسل کے لوگوں کے لیے بھیڑ بکری چرانا مشکل ہے،‘‘ نوجوان بکروال طالب کسانا کہتے ہیں، جو بھورتھائیں گاؤں سے اوپر، پہلی نام کی ایک دور افتادہ بستی میں رہتے ہیں۔ وہ فاصلاتی تعلیم کے ذریعے پولیٹکل سائنس میں ماسٹرز کی پڑھائی کر رہے ہیں۔

بکروال ایک خانہ بدوش برادری ہے۔ یہ لوگ اپنے مویشیوں کے لیے چراگاہوں کی تلاش میں بڑے بڑے گروپوں میں ہمالیائی علاقوں میں گھومتے رہتے ہیں۔ طالب مزید کہتے ہیں، ’’گاؤوں میں رہنے اور بھیڑ بکریاں چرانے کی بجائے جب ہم پڑھائی کرنا شروع کرتے ہیں، تو ہم دوسری چیزوں کے بھی عادی ہو جاتے ہیں…ہم چاہتے ہیں کہ ہمارے پاس ایک بند باتھ روم ہو یا ہم کسی ایک جگہ پر اپنی پڑھائی کر پائیں۔‘‘

طالب، جموں کے کٹھوعہ ضلع میں بکروالوں کی ایک چھوٹی سی بستی میں رہتے ہیں۔ یہ مکمل طور پر مستقل رہائش کی جگہ نہیں ہے، اور یہاں رہنے والوں کے پاس زمین کا مالکانہ حق بھی نہیں ہے۔

پچھلی دہائی میں، اس نیم خانہ بدوش برادری کے کئی نوجوان اپنی روایتی چرواہے کی زندگی کو چھوڑ کر اعلیٰ تعلیم کی طرف رخ کرتے رہے ہیں۔ پیسہ ہونے پر وہ میڈیسن یا انجینئرنگ میں اپنا کریئر تلاش کرتے ہیں، یا سیاست کرنا اور سول سروس کی نوکریاں کرنا چاہتے ہیں۔

کسی بکروال فیملی میں اگر دو بیٹے ہیں، تو ان میں سے ایک بھیڑ بکریوں کی دیکھ بھال کرے گا، اور دوسرا باہر جا کر کوئی اور نوکری تلاش کرنا چاہے گا۔ طالب کسانا اپنی تعلیم کو جاری رکھنا چاہتے ہیں، لیکن ان کا چھوٹا بھائی بھیڑ بکریوں کی دیکھ بھال کرنے کے لیے تیار نہیں ہے اور وہ بھی باہر جا کر اپنی قسمت آزمانا چاہتا ہے۔ لیکن وہ یہ بھی کہتا ہے کہ ’’ہم جیسے لوگوں کے لیے کوئی نوکری نہیں ہے۔‘‘

کٹھوعہ ضلع کے بیرا کوپائی گاؤں میں رہنے والے منور علی بھی ایک بکروال ہیں اور ان کے جذبات بھی طالب جیسے ہی ہیں۔ منور کہتے ہیں، ’’میری بیٹی نے ۱۲ویں کلاس پاس کر لیا ہے۔ اب وہ گھر پر بیٹھی ہوئی ہے۔‘‘

منور علی پیشہ سے ایک کارپینٹر (بڑھئی) ہیں اور اپنی بیٹی کے مستقبل کو لے کر فکرمند رہتے ہیں۔ ’’ہمارے بچے گریجویٹ کی ڈگریاں حاصل کر لیں تب بھی کوئی فرق نہیں پڑتا۔ انہیں کوئی بڑا عہدہ نہیں مل پاتا ہے۔‘‘

اس کے باوجود، بکروال لوگ تعلیم پر پیسے خرچ کرنے کو تیار ہیں۔ محمد حنیف جاٹلا، جموں ضلع کے سندھی گاؤں میں ایک بکروال فیملی میں پیدا ہوئے تھے۔ وہ اپنے ماں باپ کی ۶ویں اولاد تھے، اور انہوں نے اپنی زندگی کے ابتدائی کچھ سال بھیڑ، بکریوں اور گھوڑے کے درمیان ہی رہ کر گزارے۔ ایک دن جب ان کی ماں کا اچانک انتقال ہو گیا، تو گھر والوں نے ان کے دادا کی بچت کے پیسے سے ان کا داخلہ اسکول میں کرا دیا۔

حنیف جب کالج میں پڑھتے تھے تو، ’’میرے والد نے دو کنال [صفر اعشایہ ۲۵ ایکڑ] زمین کے بدلے تمام مویشیوں کو بیچ دیا۔‘‘ حنیف بتاتے ہیں کہ ان کے والد نے زمین اس لیے خریدی تھی تاکہ ان کی فیملی ایک مستحکم زندگی گزار سکے، اور ان کے بچے پڑھائی کرکے کوئی نوکری تلاش کر پائیں۔ حنیف اب ایک مقامی نیوز ایجنسی کے لیے بطور رپورٹر کام کرتے ہیں۔

بکروالوں کو ریاست میں درج فہرست قبائل کا درجہ حاصل ہے اور سال ۲۰۱۳ کی ایک رپورٹ کے مطابق، ان کی آبادی ۱۱۳۱۹۸ ہے۔ زیادہ تر بکروالوں کے پاس خود کی اپنی زمین نہیں ہے، اور چونکہ عوام کے مشترکہ استعمال کی جگہیں سکڑنے لگی ہیں، اس لیے چراگاہوں پر ان کے حقوق اور یہاں تک کہ ان کے مستقل گھروں پر بھی خطرہ منڈلانے لگا ہے۔

جموں ضلع میں بجالتا قصبہ کے قریب واقع بستیوں میں رہنے والے پرویز چودھری کہتے ہیں کہ ایک ہی جگہ پر گزشتہ کئی دہائیوں سے رہائش پذیر ہونے کے باوجود، ان کی برادری کے لوگوں کے پاس اپنی زمین کا کوئی کاغذ یا مالکانہ حق نہیں ہے۔ چراگاہ اور زرعی زمین کے بہت سے حصوں پر اب باڑ لگائی جا رہی ہے اور انہیں کیمپا (کمپنسیٹری افاریسٹیشن فنڈ میجنمنٹ اینڈ پلاننگ اتھارٹی) کے پروجیکٹوں میں تبدیل کیا جا رہا ہے، جس کی وجہ سے بڑے پیمانے پر لوگوں کو وہاں سے بے دخل کیا جانے لگا ہے۔

وجے پور کے قریب بکروال کالونی میں رہنے والے تقریباً ۳۰ سالہ محمد یوسف اور فردوس احمد کہتے ہیں، ’’زیادہ تر بکروال یا تو ریاستی زمین پر رہتے ہیں یا جنگلات کی زمین پر۔ اگر یہ زمین ہم سے چھین لی گئی، تو ہم کہاں جائیں گے؟‘‘

ان کی بستی میں یا بیرا کوپائی میں جہاں طالب رہتے ہیں، وہاں بھی شہریوں کے لیے کوئی سہولیات نہیں ہیں۔ وہ بتاتے ہیں کہ محکمہ جنگلات کی طرف سے بے دخلی کی مسلسل دھمکیوں کی وجہ سے یہ لوگ اپنے عارضی مکانات کو پختہ مکانوں میں تبدیل نہیں کر سکتے۔ اس کے علاوہ، ان کی بستیوں میں اور ارد گرد کوئی سڑک نہ ہونے کی وجہ سے بھی انہیں کافی پریشانی ہوتی ہے۔ ’’اگر کوئی بیمار پڑ جائے، تو اسے اسپتال لے جانا مشکل ہو جاتا ہے۔‘‘

جب ہم ان سے بات کر رہے تھے، تو عورتیں سروں پر پانی کے بھاری برتن اٹھائے پہاڑ پر چڑھتے اور اترتے ہوئے دکھائی دے رہی تھیں۔ کچھ گھنٹے بعد جب ہم وہاں سے لوٹنے لگے، تو اس وقت تک ان میں سے ہر ایک عورت اس طرح کے کئی چکر لگا چکی تھی۔

ناہیلہ، جموں میں پڑھنے والی ایک نوجوان کارکن ہیں جو بکروال کمیونٹی کے لیے قانونی، زمینی اور ثقافتی حقوق کی لڑائی لڑ رہی ہیں۔ ان کا ماننا ہے کہ نوجوان بکروال اپنی زندگیوں کو تبدیل کر سکتے ہیں۔ وہ کہتی ہیں، ’’تعلیم تک رسائی، زمین کے حقوق اور حکومت سے بہتر سہولیات اور مدد حاصل کرنے کے لیے ہم اپنی لڑائی کو آگے بھی جاری رکھیں گے۔‘‘

اپنے دیگر مطالبات کے ساتھ ساتھ، نوجوان بکروال یہ بھی چاہتے ہیں کہ خانہ بدوش لوگوں کی ضروریات اور بہتر ٹھکانے کے بارے میں صحیح طریقے سے سروے کرایا جانا چاہیے۔ وہ سرکاری اداروں اور کمیشنوں میں بھی قبائلی افراد کی نمائندگی چاہتے ہیں۔

ریاستی حکومت پہاڑی کمیونٹی کو ایس ٹی (درج فہرست قبائل) کا درجہ دینا چاہتی ہے – بکروالوں کو لگتا ہے کہ اس قدم سے ایس ٹی کے طور پر ملے ان کے کوٹہ کے اندر مقابلہ بڑھ جائے گا۔

روایتی پیشہ کو اپنائیں یا کوئی دوسری نوکری تلاش کریں، اس الجھن میں مبتلا پہلی کے بکروال عبدالرشید کہتے ہیں، ’’نہ یہاں کے، نہ وہاں کے۔‘‘

مترجم: محمد قمر تبریز