گڑیا ہاٹ کی سڑکوں پر کتابیں بیچنے والا شاعر

یہ نظم کولکاتا کے گڑیا ہاٹ بازار میں کتابیں بیچنے والے موہن داس کے اسٹال پر لگی ہوئی ہے۔ یہ اشعار انہی کے ہیں، اور انہوں نے ایسی بہت سی نظمیں لکھی ہیں۔

موہن (۵۲ سالہ) کہتے ہیں، ’’نیجرے کاج کے بھالوباش کھوبی جوروری اَر امار جونے امار پروتھوم بھالوباش ہوچّھے امار بوئی [اپنے کام سے پیار ہونا بہت ضروری ہے، اور میرا پہلا پیار میری کتابیں ہیں]۔‘‘ ان کا قلمی نام منی موہن داس ہے۔

ہیرمبا چندر کالج سے کامرس میں گریجویٹ ہونے کے باوجود موہن کو کوئی اچھی نوکری نہیں ملی۔ اسی لیے، وہ گزشتہ تین دہائیوں سے گڑیا ہاٹ کی سڑکوں پر کتابیں اور رسالے فروخت کر رہے ہیں۔

یہ پیشہ انہوں نے بغیر کسی منصوبہ کے اختیار کیا تھا، پھر بھی اس پیشہ کو بدلنے کے بارے میں انہوں نے کبھی نہیں سوچا۔ وہ بتاتے ہیں، ’’یہ [کتابیں بیچنا] صرف پیسے کمانے کا ذریعہ نہیں ہے۔ یہ کام اس سے کہیں بڑھ کر ہے۔ میرے لیے کتابیں ہی میرا جنون ہیں۔‘‘

جنوبی کولکاتا میں گول پارک علاقہ کے پاس ایک مصروف چوراہے پر واقع گڑیا ہاٹ بازار میں، تقریباً ۳۰۰ دکانوں میں موہن کا کتابوں کا اسٹال بھی شامل ہے۔ اس بازار کی مستقل اور عارضی دکانوں میں کھانے پینے کے سامان، پھل اور سبزیاں، مچھلی، کپڑے، کتابیں اور کھلونے وغیرہ بیچے جاتے ہیں۔

موہن بتاتے ہیں کہ ان کے جیسے عارضی اسٹال والے سامان فروش اور اس گلی کی مستقل دکانوں کے مالک ایک خاندان کی طرح رہتے ہیں۔ وہ کہتے ہیں، ’’لوگوں کے درمیان یہ غلط فہمی ہے کہ مستقل دکاندار نہیں چاہتے ہیں کہ ہم یہاں اپنا اسٹال لگائیں۔ یہ بات پوری طرح صحیح نہیں ہے۔‘‘ وہ ایک دوسرے کے ساتھ کھانا کھاتے ہیں اور دوستوں کی طرح رہتے ہیں۔

موہن ایک دن میں کئی کئی گھنٹے کام کرتے ہیں۔ وہ اپنی دکان صبح ۱۰ بجے کھولتے ہیں اور رات ۹ بجے بند کرتے ہیں۔ وہ ہفتہ کے ہر دن ۱۱ گھنٹے کام کرتے ہیں۔ حالانکہ انہیں اپنے کام سے پیار ہے، لیکن وہ اس سے ہونے والی کمائی سے ناخوش ہیں، کیوں کہ اس سے ان کی پانچ رکنی فیملی کا گزارہ نہیں چل پاتا۔ موہن کہتے ہیں، ’’کوکھونو ٹکا پائی کوکھونو ابار ایک بیلا کھبریر موٹونو ٹکا پائینا۔ [ہم کبھی کبھی اچھی کمائی کر پاتے ہیں۔ باقی دنوں کی کمائی سے پیٹ بھرنا بھی مشکل ہوتا ہے]۔‘‘

کتاب فروش اور شاعر موہن، اپنی بیٹی پولمی کے بہتر مستقبل کی دعا کرتے ہیں۔ پولمی فی الحال کولکاتا یونیورسٹی میں پولیٹکل سائنس سے گریجویشن کی پڑھائی کر رہی ہیں۔ وہ کہتے ہیں کہ انہیں اپنی بہنوں، پرتیما اور پُشپا کی شادیوں کا خرچ بھی اٹھانا ہے۔

اس کام میں تمام قسم کی بے یقینی ہونے کے باوجود، وہ امید نہیں چھوڑنا چاہتے ہیں۔ ’’مجھے اس بات کا خوف نہیں ہے کہ کوئی بھی ہمیں یہاں سے ہٹا سکتا ہے۔ میرے جیسے بہت سے ریڑھی پٹری والے یہاں اپنی دکانیں لگاتے ہیں اور ہمارا معاش اسی گلی پر منحصر ہے۔ ہمیں ہٹانا آسان نہیں ہے۔‘‘ حالانکہ، انہیں ہٹانے کی کئی بار کوشش کی جا چکی ہے۔

حکومت کے ذریعے ۱۹۹۶ میں چلائی گئی مہم ’آپریشن سن شائن‘ کو یاد کرتے ہوئے وہ کہتے ہیں، ’’اس وقت مجھے نہیں معلوم تھا کہ کیا کرنا چاہیے۔‘‘ یہ مہم ریاستی حکومت اور میونسپل حکام کے ذریعے شہر کے کچھ خاص حصوں سے پھیری والوں کو فٹ پاتھ سے ہٹانے کے لیے شروع کی گئی تھی۔

اس وقت موہن، کمیونسٹ پارٹی آف انڈیا (مارکس وادی) کے ممبر تھے، جو تب بایاں محاذ کی رکن پارٹی تھی اور مغربی بنگال میں اقتدار میں تھی۔ وہ یاد کرتے ہیں کہ وہ تب پارٹی کے دفتر گئے تھے اور عہدیداروں سے اس مہم کو ردّ کرنے کی مانگ کی تھی، لیکن انہوں نے ایک نہیں سنی۔ اس کے بعد، حکومت اور میونسپل حکام کے ذریعے علاقہ کے زیادہ تر پھیری والوں کی دکانیں گرا دی گئی تھیں، لیکن خود قسمتی سے وہ ان پھیری والوں میں سے تھے جنہوں نے پہلے ہی اپنا سارا سامان وہاں سے نکال لیا تھا۔

وہ کہتے ہیں، ’’حکومت نے اچانک یہ فیصلہ لیا تھا۔ انہیں اس بات کا احساس بھی نہیں تھا کہ اُس رات کتنے لوگوں نے اپنا سب کچھ گنوا دیا۔‘‘ مہینوں کے احتجاجی مظاہروں اور کولکاتا ہائی کورٹ میں عرضی داخل کرنے کے بعد ہی موہن اور دیگر پھیری والے دوبارہ اپنی دکان کھول پائے۔ یہ ساؤتھ کلکتہ ہاکرز یونین کی قیادت میں ۳ دسمبر، ۱۹۹۶ کو ہوا تھا۔ ساؤتھ کلکتہ ہاکرز یونین، ہاکر سنگرام کمیٹی کا حصہ ہے، اور موہن بھی اس کے ایک رکن ہیں۔ وہ بتاتے ہیں کہ اس واقعہ کے بعد انہوں نے پارٹی چھوڑ دی تھی اور تب سے کسی بھی سیاسی سرگرمی میں شامل نہیں ہوئے۔

’’آج کل ار کیئو بوئی پورینا [آج کل کوئی بھی کتابیں نہیں پڑھتا ہے]۔‘‘ موہن کہتے ہیں کہ گوگل نے ان کے بہت سے گاہک چھین لیے ہیں۔ ’’اب ہمارے پاس گوگل آ گیا ہے۔ لوگ اپنی ضرورت کے مطابق جانکاری تلاش کرتے ہیں اور انہیں ٹھیک وہی جانکاری مل بھی جاتی ہے۔‘‘ کووڈ۔۱۹ وبائی مرض نے بھی حالات کو بدتر بنا دیا ہے۔

’’میں نے پہلے اپنی مرضی سے کبھی بھی دکان بند نہیں کی، لیکن کووڈ کے دوران میرے پاس بیکار بیٹھنے کے علاوہ اور کوئی چارہ نہیں تھا۔‘‘ وبائی مرض کے دوران موہن کی تمام بچت خرچ ہو گئی۔ جنوری ۲۰۲۳ میں پاری سے بات کرتے ہوئے انہوں نے کہا، ’’دھندہ کی اتنی بری حالات پہلے کبھی نہیں تھی۔‘‘

موہن کا ماننا ہے کہ حکومت کے ذریعے ریڑھی پٹری والوں کے لیے جاری کیا گیا لائسنس ان کے کاروبار کی غیر یقینی صورتحال کو کم کرے گا۔ انہوں نے پانچ سال پہلے لائسنس حاصل کرنے کے لیے درخواست دی تھی، لیکن ابھی تک انہیں لائسنس نہیں ملا ہے۔ انہیں لگتا ہے کہ لائسنس نہ ہونے کی صورت میں، ہاکر یونین کا رکن بنے رہنے میں ہی ان کی بھلائی ہے، اور اسی سے انہیں کچھ تحفظ ملتا ہے۔ اس رکنیت کے عوض وہ ہرہفتے ۵۰ روپے ادا کرتے ہیں۔ اس سے انہیں بازار میں دکان لگانے کے لیے جگہ بھی ملتی ہے۔

موہن کے مطابق، سال ۲۰۲۲ کے آخر میں کولکاتا میونسپل کارپوریشن نے مغربی بنگال شہری اسٹریٹ وینڈرز (معاش کا تحفظ اور اسٹریٹ وینڈنگ کے قواعد) سے متعلق ضوابط، ۲۰۱۸ کو نافذ کرنے کا فیصلہ کیا۔ سبھی ریڑھی پٹری والوں کو اپنی دکانوں کو ڈھکنے میں استعمال کی جانے والی پلاسٹک کی ترپال کو ہٹانے کا حکم دیا گیا تھا۔ موہن کہتے ہیں، ’’سردیوں میں تو ٹھیک ہے، لیکن جب بارش ہوگی تو ہم کیا کریں گے؟‘‘

مترجم: محمد قمر تبریز