‘बुझाता हमनीके पहाड़ के खीस बरा देले बानी’

'ई कहानी जलवायु परिवर्तन वाला पारी के ओह कड़ी के हिस्सा ह जे पर्यावरण रिपोर्टिंग में 2019 के रामनाथ गोयनका इनाम जीतल बा.'

'सिक्किम में 300 याक भूख से मरल'
‘उत्तरी सिक्किम के बरफ में लमसम 300 याक भूख से मर गयिल'
'पघिलत बरफ से सिक्किम के याकन के मुअला के बात उजागर भयिल'

ई साल 12 मई के ई हाल सुन के हमार जीउ बेकल भयिल. हम ई पहाड़ सब प फोटो खींचे वाला खबरिया जईसन खूब घूमल बानी.  हम एही से जानतानी माल ,डंगर (पशु) पोसे वाला , नेटुआ (बंजारा , खनाबदोश) जईसन जघे-जघे(जगह- जगह) घूमे वाला लोग एकनी के बचावे खातिर कुच्छु कर सकेला. पहाड़ के केतनो ऊंच से ऊंच जघे जा सकेला लोग. ई घुमंतू चरवाहा लोग खातिर याक ए लोग के जिनगी हवे. ईहे ए लोग के पईसा आ रोजी- रोजगार ह. गरम, सरद जईसन बेरा होला त ई लोग याक के हांकत ओहीसन जघे ले जाला लोग जहाँ याक के रच्छा हो सके. खूब सरद के बेरा में त याक ए लोग के खयका-खोराकी ह.

याक के ऊपर जेतना लेख लिखल हम पढ़नी ओसे इहे बुझाइल कि याक के मूअला के कारण सभे ग्लोबल वार्मिंग से जोरता. एतना त साफ बा कि ई मवेसी पर जब हेतना मार परता त एकनी के मलिकवो त सांसत में होईंहें कुल. त हम लद्दाख के हनले घाटी के चांगपा परिवारन के लगे फेर से जाये आ देखे के सोचनी कि ए बेरा ओ लोग के का हाल बा.

भारत के चांगथांग (तिब्बत के पच्छिम ओर) जगह के लोग कश्मीरी ऊन के बड़का ब्योपारी ह लोग. ई लोग याको के पोसेला. लेह जिला के न्योमा ब्लॉक के हनले घाटी में चांगपा लोग के कई तरह के याक पोसेवाला चरवाहा बा लोग. एह में से डीक, खरलूंग, माक, राक आ यल्पा लोग के घर बा. डीक आ राक सायद ऊंहां के सबसे नीमन चरवाहा ह लोग.

हनले के खूब बड़का डीक चरवाहा पैंतीस बरीस (35 साल) के झामपाल शेरिंग कहलें, " हमनीके ढेर याक खत्तम हो तार सन. अब ईंहां (बहुत ऊंच पहाड़ पर) मौसम एकदम अचक्के हो गयिल बा." हम घाटी के खल्डो गांव के सोनम दोरजी के चलते शेरिंग से भेंट कईनी. सोनम हनले में 'भारतीय खगोल वेधशाला में कार (काम) करेंले. शेरिंग हमनी से 14,000 फीट ऊंच पहाड़ पर आपन खूब बड़का खुर (लद्दाखी बोली में सेना के तंबू) में बईठ के बतियवलन.

2019 के सिक्किम में आइल बीपत से तीन साल पहिले, नेपाल के ' इंटरनेशनल सेंटर फॉर इंटीग्रेट माउंटेन डेवलपमेंट' एगो पेपर निकललस. पेपर में बतावल गइल, "भारत, भूटान, नेपाल में याक के गिनती में बहुत कमी आ गयील बा. खाली तीस बरीस में साठ (60) प्रतिसत से अधिका कम हो गयील बा. 

ओहीजा के 'पशुपालन और दुग्ध विभाग' के हिसाब से लेह जिला में याक के आबादी 1991 के तीस हजार (30,000) से घट के 2010 में 13,000 हो गयील बा. आपन जगह के आंकड़ा अउरी 'आधिकारिक' आंकड़न में अंतर  लउकता. सरकारी आंकड़ा कहता कि 2012 ले ई जिला में याकन के गिनती 18,877 रहे (21 बरीस में 37 प्रतिसत के गिरावट बा).

डीक बस्ती ले पहुंचल आसान ना रहे. ओ लोग के चरहा (चारागार) बहुत लमहर जघे (जगह) पर रहे. फेर ई लोग जवना जघे  आपन तंबू गड़ले रहे, ऊ भारत चीन सीमा लगे बा. इहां गांव, सहर के लोग के जाये के मनाही बा. अब ई बसंत के बेरा रहे, एही से हम सोनम दोरजी के संघे (साथ) ऊहां पहुंच गईनी. 

झामपाल शेरिंग कहलें;" याक गजब के जीउ (जीव ) होले सन! ई  बहुत ठंडा में रह जालें सन. आ सोन्ना (शून्य) से 35 आ 40 डिग्री सेल्सियस के तापमान में जीयत रह सकेलें सन. लेकिन जब तापमान 12 या 13 डिग्री ले बढ़ जाला त एकनी खातिर तकलीफ वाला हो जाला. बहुत ठरवत जाड़ में, बहुत धीरे पचावे वाला अपना देह चलते ई अपना देह में गर्मी जोगा (बचा) लेलन सन. लेकिन ई मौसम के उतार चढ़ाव याक के बहुत फेर में डाल देता.

डीक बस्ती से लमसम (लगभग) 40 किलोमीटर दूर काला पारी (काला पहाड़) में हमार भेंट शेरिंग चोचुम से भयील. शेरिंग चोचुम ऊंहां के याक पोसेवाला मेहरारू चरवाहा रहली. ऊ कहली, "पहिले से आज के मौसम अब गरम बा. एसे भेड़ा, पश्मीना बकरी आ याक के देह पर घन केस नईखे जामत. अब ई केस बहुत कम आ धीरे उगेला. ई सब चलते जानवर के देह कमजोर होत जाता. कमजोर याक के माने कम दूध आ कम रोपया. पाछे के (पिछले) पांच बरीस में हमनीके याक वाला आमदनी में बेसी (ज्यादा) कमी हो गयील बा. अपना मने खोजबीन करे वाला लोग के लिखला से पता चलता कि 2012 में ईंहां के चरवाहा परिवार के महीना के कुल आमदनी 8,500 रोपया रहे.

याक के दूध, याक पोसेवाला के बड़का आमदनी ह. याक पोसला के कुल आवग (आमदनी) में से 60 प्रतिसत ह दूध वाला आमदनी. चांगपा लोग के कमीनी खुलू (याक के केस) आ ऊन से होला. एही से याक के गिनती आ दूध के कमती से ए लोग के सब कमिनी पिटा जाला. आ ई सब बदलाव (मौसम के) याक के कमाई पर मुस्किल क देता.

शेरिंग चोचुम कहेली, "अब ना बेरा पर बरखा होता ना बेरा पर बरफ गीरता. एही से पहाड़ पर काम भर के घास नईखे जामत. आ एही से बाकी चरवाहा लोग इंहवा कम आवता लोग. ई मौसम बदलाव के चलते घास के कमी आ ओकरा से होखे वाला मस्किल के चलतहीं (कारण ही) इंहां के चरवाहा परिवार लोग में 40 प्रतिसत कमती हो गयील बा."

"हमार बेटा एहीजा के (स्थानीय) वेधशाला में कार (काम) करेला. ओही से हमरा तनियक आफियत (राहत) बा. चांगपा परिवार के अब कई गो लरिका 'सीमा सड़क संगठन आ जनरल रिजर्व इंजिनीयर फोर्स' के सड़क निर्माण योजना में दिहाड़ी कमाला लोग. बहुत लोग त नोकरी जोहे खातिर कहीं अउरी जघे चल गयिल लोग.

वेधशाला में कार करे वाला बेटा सोनम दोरजी रहलें जेकरा साथे हम ई जतरा कईनी. सोनम पहाड़ में होखे वाला बदलाव के चउकस गवाह बाड़ें.

ऊ कहलें, "जब हम पनरे (15) बरीस के रहनी तब ईंहां बहुत जाड़ रहे. अब हम 45 बरीस के बानी, त ई बात 30 बरीस पहिले के हो गयील. तब हम तापमान नापे के ना जानत रहनी. लेकिन जे लोग जानेला, ऊ बतावेला कि ई शून्य से 35 डिग्री नीचे ले जाई. एही से ओतना ठंडा बर्दास्त करे खातिर ओही तरे के कपड़ा-लत्ता चाहत रहे. एघरी (आजकल) जे सिंथेटिक चीच से बनल जैकेट कुली होला ऊ सब ना चले. ऊ लोग जौन पहिरे ऊ पश्मीना बकरी के ऊन से बीनल टोपी, कपड़ा रहे. जुत्ता (जूता) के तल्ला याक के चमड़ी के एगो चापट हिस्सा से बने. आ जूता ईंहव के बनावल कपड़ा से बनत रहे. जूता के बान्हे वाला डोरी ठेहुना ले जाय. अब अईसन जुत्ता कहीं ना लउकेला. 

'पश्चिमी हिमालय क्षेत्र के लद्दाख तथा लाहौल और स्पीति में जलवायु परिवर्तन के प्रभाव' नाम से 2016 के आपन सोधपत्र में, टुंडुप आंग्मो आ एस. एन. मिश्रा लिखता लोग, "तापमान गरम होत जाता. मौसम विभाग (वायु सेना स्टेशन, लेह) से पावल (मिला) डेटा कहता कि पाछे 35 बरीस के ठंडा के सब महीना मे लेह के सबसे नीचे के तापमान लमसम 10 सेंटिग्रेड आ गर्मी के महीना में लमसम 0.50 से. रह ता. नवम्बर से मार्च ले बरफ कम परता.”

ऊ लोग ईहो लिखले बा, "पहिले के कुछ साल में सब कुछ बदल गयील बा. लद्दाख आ लाहौल स्पीति के बरखा आ बर्फबारी के बेरा बदल गयिला से छोट ग्लेशियर आ बरफो वाला जघे पघिलता. आ जे से तापमान में नमी आ गर्मी बढ़ जाता. ओकरा चलते कीरा आ किरवन (कीड़ों) के झुंड बहुत आवता.

झामपाल शेरिंग के तंबू में उनकर संघाती (साथी) संगदा दोरजी हमनी से पुछलन, “अबकि तहनीके केतना रेबो देखला ह जा?”

रेबो ऊ तंबू के कहल जाला जवना में चांगपा लोग रहेला. रेबो बनावे खातिर पूरा परिवार मिल के याक के ऊन से तागा (धागा) कातेला लोग. फेर ऊ सब के एक्के साथे सीयल आ बीनल जाला. अईसन रेबो ढेर जाड़ में ई चांगपा चरवाहा लोग के रच्छा करेला.

संगदा कहलन, “ढेर परिवार मेम अब रेबो नईखे. नयका रेबो बीने खातिर ऊन कहां बा? रेबो के बिना हमनी जईसन खनाबदोस जिनगी के एगो हिस्सा खतम हो गयील. जेकर दोस हम ई गरम होत जाड़ के दिन के दे तानी.

अब हमरा बुझाता कि सिक्किम में मई के घटना एकदम्मे संजोग नईखे. आगे त एकरो से बाउर (खराब) हो सकेला. चरवाहा लोग जलवायु परिवर्तन शब्द त ना जाने ला लोग लेकिन एकर असर त खूब बूझेला. जईसे सोनम दोरजी आ शेरिंग चोचुम के बोलला से हमरा बुझाईल. ऊ लोग ई बूझता कि जवन ई सब बदलाव बा ओमे मानुस के दोस दखल बा. एही से साठ बरीस से  बेसी उमिर के गंबू ताशी हमरा से कहलन, "हम जानतानी पहाड़ के हवा पानी (जलवायु) के मामिला गझिन (पेचीदा) बा. का होई कुछ नइखे पता. बुझाता हमनीके पहाड़ देवता के कोपित क देले बानी जा."

पारी के जलवायु परिवर्तन पर केन्द्रित राष्ट्रव्यापी रिपोर्टिंग के प्रोजेक्ट, यूएनडीपी के साथे ऊ पहल के एगो हिस्सा ह. एह में साधारण लोग आ ओ लोग अनुभव जान के पर्यावरण में होखत ई सब फेर बदल के गोटा कयिल जाला.

[email protected] प मेल करीं. आ ओकर एगो कॉपी [email protected] के भेज दीं.

अनुवाद: स्मिता वाजपेयी