بنگلورو میں ایک مہاجر کے صبح و شام

’’یہ بارہ لاکھ والا نا؟ اسی کی بات کر رہے ہیں نا؟‘‘تیس سال کے شاہد حسین اپنے فون پر مجھے ایک واٹس ایپ میسیج دکھاتے ہیں۔ یہ میسیج انکم ٹیکس میں چھوٹ کی حد ۱۲ لاکھ روپے تک بڑھانے سے متعلق ہے۔ شاہد، بنگلورو میں میٹرو لائن کی تعمیر کر رہی ناگارجن کنسٹرکشن کمپنی میں کرین چلانے کا کام کرتے ہیں۔

’’ٹیکس میں بارہ لاکھ کی چھوٹ کے بارے میں تو ہم بہت کچھ سن رہے ہیں،‘‘ برجیش یادو طنزیہ انداز میں کہتے ہیں۔ ’’یہاں کسی کی آمدنی سالانہ ساڑھے تین لاکھ [روپے] سے زیادہ نہیں ہے۔‘‘ برجیش، جو کہ اپنی عُمر کی تیسری دہائی میں ہیں، اتر پردیش کے دیوریا ضلع کے ڈومریا گاؤں سے تعلق رکھنے والے ایک غیر ہنرمند مہاجر مزدور ہیں۔

’’جب تک یہ کام چل رہا ہے، ہم مہینہ کے تقریباً ۳۰ ہزار روپے کما لیں گے،‘‘ بہار کے کیمور (بھبھوا) ضلع کے بیور گاؤں سے تعلق رکھنے والے شاہد حسین کہتے ہیں۔ وہ کام کی تلاش میں کئی ریاستوں کا دورہ کر چکے ہیں۔ ’’اس کام کے بعد یا تو کمپنی ہمیں کسی اور جگہ بھیج دے گی، یا ہم خود کوئی ایسا کام تلاش کر لیں گے جہاں ۱۰-۱۵ روپے زیادہ مل سکیں۔‘‘

سڑک کے اس پار ٹریفک سگنل پر اتر پردیش سے تعلق رکھنے والے ایک اور مہاجر گاڑیوں کے ونڈو شیلڈ، کار کی نیک سپورٹ، مائکرو فائبر کے ڈسٹر اور دیگر سامان فروخت کر رہے ہیں۔ وہ روزانہ ۹ گھنٹے سڑک پر اِدھر اُدھر گھومتے ہیں، سگنل پر رکی گاڑیوں کی کھڑکیاں کھٹکھٹاتے ہیں۔ ’’ارے کا بجٹ بولیں؟ کا نیوز؟‘‘ نفیس میرے سوالوں سے واضح طور پر جھنجھلاتے ہوئے نظر آتے ہیں۔

وہ اور ان کے ایک بھائی جو اپنے سات افراد پر مشتمل خانوادے کے فقط دو روزگار یافتہ ہیں، اتر پردیش کے ضلع پریاگ راج کے شہر بھرت گنج سے تعلق رکھتے ہیں، جو یہاں سے ۱۷۰۰ کلومیٹر دور ہے۔ ’’ہماری کمائی ہمارے کام پر منحصر ہے۔ آج ہوا تو ہوا، نہیں ہوا تو نہیں ہوا۔ جب کام کرتا ہوں تو تقریباً ۳۰۰ روپے بنا لیتا ہوں۔ اور ہفتہ کے آخر میں یہ رقم ۶۰۰ روپے بھی ہو سکتی ہے۔‘‘

’’گاؤں میں ہمارے پاس کوئی زمین نہیں ہے ۔ اگر ہم کسی دوسرے کی زمین پر کاشت کریں تو یہ ’۵۰:۵۰‘ ہوتا ہے۔ یعنی پانی، بیج اور دیگر چیزوں پر انہیں تمام اخراجات کا نصف حصہ برداشت کرنا پڑتا ہے۔ ’’ساری محنت ہماری ہوتی ہے، پھر بھی آدھی فصل دے دیتے ہیں۔ گزر بسر مشکل سے ہوتی ہے، بجٹ پر کیا ہی بات کریں؟’’ نفیس بے چین ہیں۔ سگنل کی بتی لال ہو جاتی ہے، اور وہ فوراً ائیر کنڈیشنڈ گاڑیوں میں بیٹھے ممکنہ خریداروں پر نظریں جما لیتے ہیں، جو بتی کے ہرے ہونے کا انتظار کر رہے ہیں۔

ترجمہ نگار: ثقلین احمد جعفری