پرندوں کے پروں پر کس کی پرواز؟

اس گیت میں ایک دلہن کُنج یا کُرجاں پرندے (ڈیموئسیل کرین) سے اپنے من کی بات کہتی ہے۔ شادی کے بعد ایک لڑکی میکے کو چھوڑ کر سسرال جا رہی ہے اور اپنا موازنہ اُس پرندہ سے کرتی ہے۔

ہر سال ہزاروں کی تعداد میں یہ نازک، سرمئی پروں والے پرندے وسط ایشیا (جو اُن کی بنیادی پناہ گاہ ہے) سے پرواز کر کے مغربی ہندوستان کے خشک علاقوں، خاص کر گجرات اور راجستھان میں آتے ہیں۔ وہ پانچ ہزار کلومیٹر سے بھی زیادہ لمبا سفر طے کرتے ہیں اور واپس لوٹنے سے پہلے، نومبر سے مارچ تک یہاں رہتے ہیں۔

اینڈریو ملہم اپنی کتاب ’سنگنگ لائک لارکس‘ میں کہتے ہیں، ’’آج کی تکنیکی اعتبار سے جدید دنیا میں، پرندوں کی ہجرت پر مبنی لوک گیتوں کی اہمیت کم ہوتی جا رہی ہے۔‘‘ وہ کہتے ہیں کہ پرندوں اور لوک گیتوں میں ایک بات جو یکساں ہے وہ یہ کہ یہ دونوں ہی ہمیں ہمارے آس پاس کی دنیا سے الگ دور افتادہ ممالک کی سیر کراتے ہیں۔ ہم ایک ایسے زمانے میں رہ رہے ہیں، جب لوک گیتوں کی روایت ختم ہوتی جا رہی ہے۔ ایک نسل سے دوسری نسل تک پہنچنے کے امکانات کم ہوتے جا رہے ہیں، اور انہیں گانے والے اور بھی کم ہوتے جا رہے ہیں۔ لیکن جن لوگوں نے ان گیتوں کو لکھا ہے، سیکھا ہے اور گایا ہے، وہ اپنی تفریح، تخلیقی اظہار اور زندگی سے جڑے سبق کے لیے کھلے آسمان، اپنے ارد گرد کی دنیا اور لوگوں کو دیکھتے ہیں۔

اس میں کوئی حیرت کی بات نہیں ہے کہ کچھّ کے لوک گیتوں اور کہانیوں میں ان پرندوں کی اپنی خاص جگہ ہے۔ یہاں اس لوک گیت کو مندرا تعلقہ کے بھدریسر گاؤں میں رہنے والی جُما وگھیر نے پیش کیا ہے۔ ان کی آواز نے اس گیت کو مزید خوبصورت اور اثر انگیز بنا دیا ہے۔

کمیونٹی ریڈیو اسٹیشن ’سُر وانی‘ نے ایسے ۳۴۱ گیتوں کو ریکارڈ کیا ہے، جو کچھّ مہیلا وکاس سنگٹھن (کے ایم وی ایس) کے توسط سے پاری کے پاس آیا ہے۔ ان گیتوں کے بارے میں مزید تفصیلات جاننے کے لیے اس پیج پر جائیں: رن کے گیت: کچھی لوک گیتوں کا مجموعہ

پریتی سونی، کے ایم وی ایس کی سکریٹری ارونا ڈھولکیا اور کے ایم وی ایس کے پروجیکٹ کوآرڈینیٹر امد سمیجا کا ان کے تعاون کے لیے خاص طور پر شکریہ، اور بیش قیمتی مدد کے لیے بھارتی بین گور کا بے حد شکریہ۔

مترجم: محمد قمر تبریز