دارجلنگ: خواتین قلی اٹھاتی ہیں شہر کا بوجھ

مایا تھامی نے دن کی اپنی پہلی ڈیلیوری مکمل کر لی ہے۔ اس کے لیے انہیں ۳۰ کلو کا گیس سیلنڈر اپنی پیٹھ پر اٹھا کر تین کلومیٹر تک چلنا پڑا اور پھر ۲۰۰ سیڑھیاں چڑھ کر انہوں نے سیلنڈر کو گاہک تک پہنچایا۔

اپنی سانسوں پر قابو پاتے ہوئے ۳۲ سالہ مایا دور کے ایک مقام کی طرف اشارہ کرتی ہیں، ’’ابھی مجھے وہاں ایک اور سیلنڈر پہنچانا ہے۔‘‘ اپنا ۸۰ روپے کا محنتانہ لینے کے بعد، وہ اگلی ڈیلیوری کے لیے نکل پڑتی ہیں۔ اگلے چھ گھنٹوں تک وہ ایل پی جی سیلنڈر لیے اپنے پیروں پر کھڑی رہیں گی۔

مایا کہتی ہیں، ’’جب سامان زیادہ وزنی ہو، تو مرد قلیوں کو ترجیح دی جاتی ہے۔ اور لوگ اکثر ہمارے ساتھ پیسوں کے لیے مول تول کرتے ہیں، کیوں کہ ہم مرد نہیں ہیں۔‘‘ یکساں فاصلہ تک سامان ڈھونے کے لیے جہاں عورتوں کو ۸۰ روپے ملتے ہیں، وہیں مردوں کو ۱۰۰ روپے دیے جاتے ہیں۔

مغربی بنگال کا یہ مشہور شہر دارجلنگ، مشرقی ہمالیہ میں ۲۰۴۲ میٹر کی بلندی پر واقع ہے۔ پہاڑی علاقہ ہونے کے سبب، سڑک کے ذریعے آمد و رفت میں پریشانی ہوتی ہے، جس کی وجہ سے لوگوں کو سبزیاں، پانی، سیلنڈر جیسی روزمرہ کی اشیاء اور یہاں تک کہ فرنیچر [جنہیں ایک بار خریدا جاتا ہے] کو بھی لے جانے کے لیے قلیوں پر منحصر رہنا پڑتا ہے۔ پہاڑی ڈھلانوں پر گاڑیاں نہیں چل سکتیں، اس لیے یا تو آدمی خود سامان لے جا سکتا ہے یا پھر گیس ایجنسی یا دکان والے قلی کے ذریعے بھیجتے ہیں۔

نیپال کی مایا تھامی ۱۲ سال سے دارجلنگ میں قلی کا کام کر رہی ہیں۔ ان کی طرح، شہر کے دیگر قلی بھی بڑے پیمانے پر نیپال کی خواتین مہاجر ہیں اور تھامی برادری (مغربی بنگال میں دیگر پس ماندہ طبقہ کے طور پر درج) سے ہیں۔ وہ ناملو نامی ایک پٹّے کا استعمال کر کے، باندھے گئے ڈوکو (بانس کی ٹوکری) میں سبزیاں، سیلنڈر اور پانی کے ڈبے ڈال کر لے جاتی ہیں۔

مایا یاد کرتے ہوئے بتاتی ہیں، ’’شادی کے بعد ذمہ داریاں بڑھ گئیں، اس لیے میں مُگلان [ہندوستان] چلی آئی۔‘‘ نیپال میں، وہ اور ان کے شوہر بودھے ۲ کٹھا (۰۶ء۰ ایکڑ) زمین پر چاول، باجرہ اور آلو اُگاتے تھے۔ اس کے علاوہ، انہوں نے چھوٹی چھوٹی دکانوں میں یومیہ مزدوری بھی کی ہے۔ سال ۲۰۲۱ میں دونوں، نیپال سرحد سے سڑک کے راستے کچھ گھنٹے کی دوری پر واقع دارجلنگ چلے آئے۔

مایا گیس ایجنسیوں سے لوگوں کے گھروں تک سیلنڈر پہنچاتی ہیں۔ وہ کہتی ہیں، ’’میں عام طور پر صبح ۷ بجے تک کام پر چلی جاتی ہوں اور پھر وہاں ڈھلائی کرنے والے اپنی باری کا انتظار کرتے ہیں۔‘‘ وہ عام طور پر ایک دن میں چار یا پانچ ڈیلیوری کرتی ہیں، جس سے ان کے دن کی کمائی قریب قریب ۵۰۰ روپے تک ہو جاتی ہے۔ مایا کہتی ہیں، ’’ناملو کا استعمال کر کے سر پر بھاری سیلنڈر اٹھانے کی وجہ سے میرے کافی بال جھڑ گئے ہیں اور بدن میں درد بھی ہوتا ہے۔‘‘ مایا کا بلڈ پریشر بھی گھٹتا بڑھتا رہتا ہے۔

سبزی ڈھونے والے قلی اور سیلنڈر ڈھونے والے قلی الگ ہوتے ہیں۔ وہ رات کے آٹھ بجے تک چوک بازار پر کام کے انتظار میں رہتے ہیں، بس جمعہ کے دن بازار بند رہتا ہے۔ بہار سے تعلق رکھنے والے ایک دکاندار منوج گپتا کہتے ہیں، ’’گاہکوں کو اپنی سبزیاں بیچنے کے بعد، ہم پاس میں کھڑے قلی کو بلاتے ہیں، اور اس کے بعد کا سودا گاہک اور قلی کے درمیان ہوتا ہے۔‘‘

سبزی ڈھونے والی ۴۱ سالہ من کماری تھامی کہتی ہیں، ’’نسکیم بوکچو بھندا بھندا ۷۰ کے جی کو بھاری بوکنی بانی بھئی سکیو [میں ۷۰ کلو تک سامان اٹھانے کی عادی ہوں]۔‘‘ ابھی وہ ۷۰ کلو سبزیاں ایک ہوٹل تک پہنچانے جا رہی ہیں۔ وہ مزید کہتی ہیں، ’’اگر میں اتنا وزن اٹھانے سے منع کر دوں گی، تو یہ کام کسی اور کو مل جائے گا اور مجھے ۸۰ روپے کا نقصان ہو جائے گا۔‘‘

سبزیاں ڈھونے والی ایک اور قلی دھن کماری تھامی کہتی ہیں، ’’چونکہ تقریباً سارے ہوٹل چوک بازار کے اوپر ہیں، تو ہمیں ۱۵ سے ۲۰ منٹ کی پہاڑی چڑھائی کرنی پڑتی ہے۔ تقریباً ۱۰ منٹ کے فاصلہ پر واقع ہوٹلوں کے لیے، ہمیں ۶۰ سے ۸۰ روپے ملتے ہیں، اور وہیں دور کے ہوٹلوں کے لیے ۱۰۰ سے ۱۵۰ روپے تک مل جاتے ہیں۔‘‘

دھن کماری تھامی اس بات سے پوری طرح اتفاق کرتی ہیں کہ عورتوں کے ساتھ تفریق کی جاتی ہے: ’’کیتا لے متئی سکچا ایستو کام تا ہئینا رئیسو بئینی۔ کھئی ایتا تا بیسی لیڈیز ہرو نئی چ بھاری بوکنی [لوگ سمجھتے ہیں کہ یہ کام صرف مرد ہی کر سکتے ہیں، لیکن ایسا بالکل نہیں ہے دیدی۔ یہاں زیادہ تر قلی خواتین ہیں]۔‘‘ شراب کی بری عادت لگ جانے کی وجہ سے ۱۵ سال قبل اپنے شوہر کو کھونے کے بعد، انہوں نے یہ کام شروع کیا تھا۔

گھروں میں پانی کے ڈبے پہنچانے والے پاندام چائے کے باغات کے میاں بیوی استی تھامی اور جُنگے تھامی کا کہنا ہے کہ پانی کی ڈیلیوری کافی مشقت بھرا کام ہے۔ دارجلنگ کے کچھ علاقوں میں پانی کی کمی کے سبب انہیں روزانہ یہ کام کرنا ہوتا ہے۔

استی کہتی ہیں، ’’میں اور میرے شوہر روزانہ صبح ۶ بجے پاندام سے پانی لینے جاتے ہیں۔ ہم کنٹینر میں پانی بھرتے ہیں اور مانگ کے مطابق گاہکوں کے گھروں تک پہنچاتے ہیں۔‘‘ پاندام میں واقع ان کا کرایے کا کمرہ اُس جگہ سے تقریباً ۲ کلومیٹر دور ہے۔

جُنگے نے بتایا کہ انہوں نے ایک بار گوشت بیچنے کے کام میں بھی ہاتھ آزمایا تھا، لیکن کووڈ کے سبب انہیں نقصان ہو گیا۔ اور مجبوراً دونوں کو قلی کا کام شروع کرنا پڑا۔

مایا تھامی کے شوہر، بودھے تھامی دوسری نسل کے مہاجر ہیں۔ ان کے والدین نے بھی قلی کا کام کیا تھا اور دارجلنگ کے ہوٹلوں میں سبزیاں پہنچائی ہیں۔ مایا اور بودھے نے اپنے کام کی جگہ چوک بازار سے تقریباً ۵۰ منٹ کی دوری پر واقع گئوشالہ کے پاس ۲۵۰۰ روپے مہینے پر ایک کمرہ کرایے پر لیا ہے۔

بہت سے قلی اپنے اہل خانہ کے ساتھ اس علاقے میں کرایے پر کمرہ لے کر رہتے ہیں، کیوں کہ یہاں کرایہ بہت کم ہے۔

مایا اور بودھے کے بچے، بھاونا اور بھوین ابھی اسکول میں ہیں؛ ان کی تعلیم ہی مایا کی ترجیح ہے: ’’بھاونا را بھوین پرنجل مو میرو ناملو لے سیلنڈر بوکچو [جب تک بھاونا اور بھوین کی تعلیم مکمل نہیں ہو جاتی، میں اپنے ناملو کے ساتھ سیلنڈر ڈیلیور کرتی رہوں گی]۔‘‘

مترجم: محمد قمر تبریز