अली मोहम्मद लोन के मानना आय के केन्द्रीय बजट “अफसर मन बर आय.” ओकर मतलब आय के ये ह मध्यम वर्ग के सरकारी लोगन मन धन सरकारी कर्मचारी मन बर बनाय गे हवय. अऊ येकर ले ये घलो पता चलथे के कश्मीर के बारामुला जिला मं एक ठन नान कन बेकरी दुकान के मालिक ला ये समझ मं आगे हवय के ये ह ओकर जइसने लोगन मन बर नो हे.
तंगमर्ग ब्लॉक के माहीन गाँव मं हमर ले गोठियावत 52 बछर के ब्रेड-मेकर ह कहिथे, “मंय साल 2024 मं 1,400 रूपिया मं 50 किलो आटा बिसोय रहंय, जेकर कीमत अब 2,200 हवय. गर बजट मं कुछु अइसने हवय जेकर ले दाम ह कम होथे, त मोला ये ला जाने के चाह होही; नइ त, जइसने के मंय कहेंय, ये बजट अफसर मन बर आय.”
श्रीनगर ले करीबन 15 कोस दूरिहा बसे माहीन गाँव तंगमर्ग अऊ द्रांग के जड़कल्ला मं घूमे के जगा मन के बीच मं बसे हवय. इहाँ करीबन 250 परिवार रइथें जेन मन खास खरके पर्यटन ले जुरे काम मं लगे हवंय, जइसने के भाड़ा मं टट्टू देना, स्लेज खींचे अऊ गाइड के काम करे. ठंडा आबोहवा सेती माहीन मं खास करके जोंधरा कमाय जाथे.
