যিসকল লোকৰ বাবে বাজেট অপ্ৰাসংগিক

সুশীলাৰ পাঁচজনীয়া পৰিয়ালটো তেওঁলোকৰ সৰু জুপুৰিটোৰ বাৰাণ্ডাত বৰ আশাৰে তেওঁৰ ‘দৰমহা’ হোৱালৈ অপেক্ষা কৰি আছে৷ দুঘৰ মানুহৰ তাত ঘৰুৱা কাম-বন কৰি ৪৫ বৰ্ষীয়া সুশীলাই মাহে ৫,০০০ টকা উপাৰ্জন কৰে৷ দুপৰীয়া ২ বজাত সুশীলা আহি ঘৰ সোমাইছেহি৷ তেওঁৰ ঘৰ উত্তৰ প্ৰদেশৰ বাৰাণসীৰ কাশী বিদ্যাপীঠ ব্লকৰ অন্তৰ্গত আমাৰাত৷

সুশীলাৰ ২৪ বৰ্ষীয় পুত্ৰ বিনোদ কুমাৰ ভাৰতীয়ে কয়, ‘‘মায়ে দুঘৰত বাচন-বৰ্তন ধুই আৰু ঘৰ মচি মাহে ৫,০০০ টকা উপাৰ্জন কৰে৷ তেওঁ প্ৰতি মাহৰ এক তাৰিখে দৰমহা পায়৷ দেউতাই ৱায়াৰিঙৰ কাম কৰে, দিন ভাল হ’লে কোনো ইলেক্ট্ৰিচিয়ানৰ তলত কাম কৰাৰ সুযোগ পায়৷ অন্যথা আমাৰ বাবে স্থিৰ উপাৰ্জনৰ কোনো ব্যৱস্থা নাই৷ মই শ্ৰমিক হিচাপে কাম কৰো৷ আমি আটাইকেইজনে মিলি মাহত ১০ৰ পৰা ১২ হাজাৰ টকালৈ উপাৰ্জন কৰো৷ গতিকে বাজেটত ১২ লাখ টকা পৰ্যন্ত কৰ ৰেহাইৰ ঘোষণা আমাৰ বাবে অপ্ৰাসংগিক৷’’

‘‘আমি কিছু বছৰ আগলৈ মনৰেগা (মহাত্মা গান্ধী ৰাষ্ট্ৰীয় নিয়োগ নিশ্চিতি আইন, ২০০৫)ৰ অধীনত কাম কৰিছিলো৷ কিন্তু এতিয়া তেওঁলোকে কোনো কাম নাই বুলি জনাইছে’’, সুশীলাই তেওঁৰ ২০২১ চন পৰ্যন্ত কামৰ প্ৰৱিষ্টি অন্তৰ্ভুক্ত হোৱা কাৰ্ডখন দেখুৱাই এইদৰে কয়৷ এতিয়া এই আটাইবোৰ ডিজিটেল হৈছে৷ প্ৰধানমন্ত্ৰী নৰেন্দ্ৰ মোদীৰ লোকসভা সমষ্টি এয়া।

সুশীলাৰ ৫০ বৰ্ষীয় গিৰিয়েক ছাতৰুৱে কোৱা মতে বিগত দুবছৰ ধৰি তেওঁলোকে মনৰেগা আঁচনিৰ অধীনত ৩০ দিনৰ কামো ভালদৰে লাভ কৰা নাই৷ ‘‘যেতিয়া আমি প্ৰধানক কৰ্মদিন বৃদ্ধিৰ বাবে অনুৰোধ কৰিছিলো, তেওঁ আমাক ব্লক অফিছলৈ গৈ অনুৰোধ কৰিবলৈ কৈছিল৷’’

আমাৰাচ’ক গাঁৱত থকা সুশীলাৰ জুপুৰিটোত ছাতৰুৰ আন দুজৰ ভায়েকৰ পৰিয়ালো থাকে৷ সেই জুপুৰীটোত ১২ জন লোকৰ এটা যৌথ পৰিয়ালে বাস কৰে৷

‘‘২০২৩ চনত এনৰেগাৰ অধীনত কাম কৰা ৩৫ দিনৰ মাননিৰ বাবে মই এতিয়াও অপেক্ষা কৰি আছো’’, ৪২ বৰ্ষীয় বিধৱা পুজাই এইদৰে কয়৷ ‘‘মোৰ স্বামী যোৱা মাহত ঢুকাইছে৷ মোৰ তিনিজন ল’ৰা আৰু ঘৰ চলাবলৈ কোনো আৰ্থিক সাহায্যও নাই’’, তেওঁ এইদৰে কয়৷ ‘‘ছুকৰ হে আছপাছ কল’নী মে ঘৰ কা কাম মিল জাতা হে [ভাগ্য ভাল যে কাষৰ কল’নীটোত ঘৰুৱা সহায়িকাৰ কাম কৰিবলৈ পাঁও], তেওঁ এইদৰে কয়৷ ‘‘ৱৰ্না চৰকাৰ কে ভাৰোচে তো হাম দো ৱক্ত কা খানা ভি নহী খা পাতে [অন্যথা চৰকাৰৰ ভৰসাত থাকিলে দিনটোৰ দুসাজো পেট ভৰাই খাবলৈ নাপালোহেঁতেন]৷’’

অনুবাদ: মনোৰঞ্জন মজুমদাৰ