‘पंजाबी अपन बैरी ला आसानी ले नइ बिसोरय’

बुट्टर सरिन्ह गांव के सरहद मं बिट्टू मालन कहिथे, “वो मन हमन बर दिल्ली के मुहटा ला बंद कर दे रहिन. अब पंजाब के हरेक गाँव के मुहटा वो मन बर बंद हवय.”

बिट्टू मालन श्री मुक्तसर साहिब जिला के गांव मालन के पांच एकड़ के किसान आंय. वो ह जऊन ‘वो’ अऊ ‘वो’ के बात करत हवंय, वो ह केंद्र मं राज करत बीजेपी पार्टी ले हवय. दिल्ली ह जऊन ‘हमन’ ला भीतरी जाय देय ले मना करिस, वो ह नवंबर 2020 मं देश के रजधानी मं रैली निकारत हजारों किसान रहिन.

देस के रजधानी के सरहद मं किसान आंदोलन अऊ वो मन के डेरा के सुरता पंजाब मं गहिर ले हवय. ये राज के हजारों किसान मन तीन बछर पहिली विरोध अऊ आस के लंबा रद्दा मं निकर परे रहिन. ट्रेक्टर अऊ ट्राली के संग सैकड़ों मिल रद्दा नापत, वो मन सिरिफ एकेच मांग के संग रजधानी मं जुरे रहिन: तीन कृषि कानून मन ला निरस्त करना जऊन ह वो मन के जीविका ला खतरा मं डार दे रहिस.

दिल्ली के मुहटा मं हबरे के बाद, वो मन ला एक ठन बड़े बाधा ला जूझे ला परिस, जऊन ला वो मन के बात ला अनसुना करेइय्या सरकार ह बनाय रहिस. करीबन बछर भर तक, जइसने के हिस्सा लेवेइय्या मन बताइन, रतिहा अकेलापन के जाड़ अऊ अनियाव के घाम ले भरे रहिस, भले थर्मामीटर ह सिरिफ 2 डिग्री सेल्सियस दरज करे रहिस, धन 45 डिग्री सेल्सियस तक हबर गे होय. लोहा के ट्राली वो मन के घर बन  गे रहिस.

358 दिन के उतार-चढ़ाव के संग, दिल्ली के चरों डहर बनाय गे डेरा मन मं जान गंवाय किसान मन के 700 ले जियादा लाश पंजाब लाय गीस, ये मन ले हरेक ह वो मन के लड़ई के दाम के बिन बोले सबूत रहिस. फेर आंदोलन नइ डिगिस. वो मन के बलिदान अऊ बड़े लड़ई सेती सरकार ला बछर भर इंकार करे अऊ बनेच अकन फटकार के बाद माड़ी मं झुके ला परिस. प्रधान मंत्री ह 19 नवंबर, 2021 मं कानून मन ला निरस्त करे के घोषणा करिस.

अब पंजाबी मं येला लहुंटाय के बखत आगे हवय. बिट्टू मालन अऊ ओकर जइसने कतको किसान मन दिल्ली मं जऊन बेवहार भुगते रहिन वोला लहुंटाय बर तियार दिखत हवंय. 23 अप्रैल मं, बिट्टू, जेन ह हरेक गिरे हपटे किसान के हिसाब चुकता करे ला अपन कर्तव्य मानथे, वो ह बुट्टर सरिंह गांव मं फरीदकोट लोकसभा क्षेत्र के भाजपा उम्मीदवार हंस राज हंस के आगू डटे रहिस.

हंस ला बिट्टू के सवाल अऊ बात के सामना करे ला परिस:  “हमन ढोर डांगर उपर गाड़ी चढ़ाय के बारे मं सोचे घलो नइ सकन, फेर लखीमपुर खीरी मं [अजय मिश्रा] टेनी के बेटा ह बेरहमी ले किसान मन के उपर जीप चढ़ा दीस, वो मन ला कुच्ररत वो मन के परान ले लीस.” खनौरी अऊ शंभू मं गोली बरसिस. प्रितपाल के काय कसूर रहिस? ओकर हड्डी टूट गे, ओकर जबड़ा टूट गे, ये सब येकरे सेती काबर के वो ह लंगर परोसे गे रहिस. वो ह पीजीआई [अस्पताल] चंडीगढ़ मं भरती हवय; काय तुमन ओकर ले भेंट करे गे रहेव?

“पटियाला के एक झिन 40 बछर के मइनखे, दू झिन लइका के बाप ह आंसू गैस के गोला मं अपन आंखी गंवा डारिस. ओकर करा सिरिफ तीन एकड़ जमीन हवय. काय तुमन ओकर घर मं गेय रहेव? नइ, काय तुमन सिंधु जाय के साहस करेव? नइ.” हंसराज हंस करा ये सवाल मन के कऊनो जुवाब नइ रहिस.

पंजाब भर मं, हजारों बिट्टू गांव के मुहटा मं भाजपा उम्मीदवार मन के आय ला उतइल होके अगोरत हवंय- जऊन मं हरेक एक ठन अऊ बुट्टर सरिन्ह जइसने लागथे. पंजाब मं 1 जून मं चुनाव होना हे. भगवा पार्टी ह पहिली 13 ठन ले सिरिफ 9 ठन निर्वाचन इलाका मं उम्मीदवार मन के घोषणा करे रहिस, फेर 17 मई मं अपन लिस्ट मं चार झिन दीगर मन के नांव शामिल करिस. ये सब्बो ला किसान मं करिया झंडा, नारा अऊ सवाल के संग परघनी करत हवंय अऊ कतको गाँव मं खुसरे तक नइ दे जावत हे.

“हमन परनीत कौर ला अपन गाँव मं खुसरे नइ देवन. हमन वो परिवार मन ले घलो पूछताछ करे हवन जेन मन दसकों ले ओकर वफादार रहे हवंय,” पटियाला जिला के गांव डकाला के चार एकड़ के किसान रघबीर सिंह कहिथे. परनीत कौर पटियाला ले चार पईंत सांसद हवंय अऊ पंजाब के पूर्व कांग्रेसी मुख्यमंत्री कैप्टन अमरिंदर सिंह की सुवारी आय. दूनों बीते साल 2021 मं कांग्रेस छोड़के बीजेपी मं शामिल होय रहिन. दीगर बीजेपी उम्मीदवार मन के जइसने वो मन ला घलो कतको जगा करिया झंडा अऊ ‘मुर्दाबाद’ के नारा ले परघनी करे जावत हवय.

अमृतसर, होशियारपुर, गुरदासपुर अऊ बठिंडा मं घलो अइसनेच हवय काबर के वो मन के पार्टी के उम्मीदवार कठिन तरीका सीखत हवंय. अपन उम्मीदवारी के घोषणा के महिना भर बाद, तीन पईंत के कांग्रेस सांसद अऊ अब लुधियाना ले भाजपा उम्मीदवार रवनीत सिंह बिट्टू ला गांव मन मं परचार करे भारी मुस्किल होगे हवय.

देस के दीगर जगा मन मं, नेता मन अल्पसंख्यक विरोधी अऊ 'भावना ला ठेस पहुँचेइय्या' वाले बयानबाजी करत हवंय. पंजाब मं किसान वो मन ले 11 ठन सवाल करत हवंय (कहिनी के तरी मं देखव). वो मन ले न्यूनतम समर्थन मूल्य (एमएसपी) सेती कानूनी गारंटी के बारे मं पूछे जाथे; बछर भर चले लड़ई के बखत मरेइय्या किसान मन के बारे मं; लखीमपुर के शहीद मन के बारे मं; शुभकरण के बारे मं, जऊन ह खनौरी मं मुड़ मं गोली लगे ले जान गंवाय रहिस; किसान मन के करजा के बोझा ला ले के.

सिरिफ किसान मन नइ, बनिहार मन घलो केंद्र मं राज करत पार्टी के उम्मीदवार मन ला हलाकान करत हवंय. “बीजेपी ह बजट कम करके मनरेगा ला खतम कर दे हवय. वो मन न सिरिफ किसान मन बर फेर बनिहार मन बर घलो खतरनाक हवंय,” मनरेगा मजदूर यूनियन, पंजाब के अध्यक्ष शेर सिंह फरवाही कहिथे.

अऊ येकरे सेती ‘इलाज’ चलत हवय. कृषि कानून मन ला 18 महिना पहिली निरस्त कर दे गे रहिस, फेर  जखम अभी सुखाय नइ ये. वो कानून रहिस: मूल्य आश्वासन अऊ कृषि सेवा अधिनियम, 2020 उपर किसान (सशक्तीकरण अऊ संरक्षण) समझौता ; कृषक उपज व्यापार अऊ वाणिज्य (संवर्धन अऊ सुविधा) अधिनियम, 2020 ; अऊ आवश्यक वस्तु (संशोधन) अधिनियम, 2020 . किसान संदेहा मं हवंय, वो मन के कहना आय के येला पाछू के फेरका ले फिर ले लागू करे जावत हे.

वोटिंग बर बस कुछेक दिन बांचे हवय, पंजाब मं परचार अभू घलो जोर धरत हवय अऊ किसान मन के विरोध घलो. 4 मई मं, सुरिंदरपाल सिंह नांव के एक झिन किसान के पटियाला के सेहरा गाँव मं तब परान चले गीस जब वो ह अऊ दीगर किसान मन बीजेपी उम्मीदवार परनीत कौर के गाँव भीतर आय के विरोध करत रहिन. किसान मन के आरोप आय के जब परनीत कौर के सुरक्षाकर्मी मन सड़क ले हटाय के कोसिस करिन त ओकर जान चले गे, वइसने वो ह ये आरोप ले इंकार करे हवय.

गहुँ लुये के बूता सिरोय के बाद, किसान मन ये बखत जियादा फुरसतहा मं हवंय, अऊ अवेइय्या बखत मं ये नाटक मं अऊ जियदा कारनामा देखे ला मिलही. खासकरके संगरूर जइसने गढ़ मं, जिहां के माटी ह जुग-जुग ले विरोध ले भरे हवय. जिहां लइका मन ला तेजा सिंह स्वतंत्र, धरम सिंह फक्कर अऊ जागीर सिंह जोगा जइसने जुझारू किसान नेता मन के जिनगी के कहिनी मन ला सुनाके बड़े करे जाथे.

आगू अऊ घलो बिपत मंडरावत हवय. भारतीय किसान यूनियन (बीकेयू एकता उगराहां) के नेता झंडा सिंह जेठुके ह हालेच मं बरनाला मं घोषणा करिस: “बस हफ्ता भर अगोर लेव अऊ तुमन वो मन ला न सिरिफ गाँव मन ले फेर पंजाब के शहर मन ले घलो खदेड़त देखहू. सुरता रखव के वो मन दिल्ली मं हमर रद्दा कइसने रोके रहिन भिथि बनाके अऊ खीला मन ले? हमन बाड़ा धन खीला ले नइ, फेर मइनखे मन के दीवार बनाके जुवाब देबो, जइसने के लखीमपुर मं होय रहिस, फेर हमन अपन देह के संग अपन गाँव मं वो मन ला खुसरे ले रोके बर तियार हवन.”

शिरोमणि अकाली दल के नेता बिक्रम सिंह मजीठिया कहिथे, ओकर बाद घलो वो मन ला नियावपसंद किसान मन के आभार जताय ला चाही. “वो मन गाँव मं वो मन ला खुसरे ले रोके हवंय. वो मन भाजपा नेता मन के परघनी आंसू गैस के गोला अऊ रबर के गोली ले नइ करत हवंय जइसने के वो मन दिल्ली मं किसान मन के संग करे रहिन.”

विरोध अऊ लोकप्रिय कार्रवाई के सुरता, जुन्ना अऊ नवा दूनों, पंजाब मं गहिर ले हवंय. हाल मं 28 महिना पहिली ये राज के लोगन मन प्रधानमंत्री नरेंद्र मोदी ला फिरोजपुर के एक ठन फ्लाईओवर मं रोके रहिन. आज वो मन, वो मन के पार्टी के उम्मीदवार मन ला गाँव मं रोकत हवंय. सत्यपाल मलिक- जऊन ला मोदी सरकार ह दू बेर अलग-अलग राज मं राज्यपाल बनाय रहिस- ह वो पार्टी ले जेन ह वोला ये पद दे रहिस, ले कहे रहिस: “पंजाबी अपन बैरी ला आसानी ले नइ बिसोरय.”

अनुवाद: निर्मल कुमार साहू