मजबूरी कोख हेरवाय के?

बीते 3 बछर मं तंय कतक अस्पताल मन मं देखवाय? 

ये सवाल ला सुनते सात सुशीला देवी अऊ ओकर घरवाला मनोज के चेहरा मं थके अऊ बेबसी झलके ला लागथे. ये दूनो (दूनो के नांव इहाँ बदले गे हवंय) ला येकर गिनती सुरता नई ये के जून 2017 मं बांदीकुई सहर के मधुर अस्पताल मं जब पहिली बेर सुशीला के नसबंदी होय रहिस, त ओकर बाद ले वो मन कतक अस्पताल मन के चक्कर काटिन, कतको जाँच करवाईन अऊ काय-काय इलाज करवाईन.          

बिहाव के 10 बछर मं तीन झिन नोनी के बाद जब चऊथा लइका बाबू होईस, त ये जोड़ा ह 27 बछर के सुशीला के नसबंदी करवाय के फइसला करिन, जेकर ले अपन अऊ अपन परिवार के जिनगी ला बढ़िया ढंग ले चलाय सकंय. राजस्थान के दौसा तसिल मं ओकर गाँव, ढाणी जामा ले करीबन 7 कोस दूरिहा, बांदीकुई के निजी अस्पतान वो मन के पहिली पसंद रहिस, फेर ढाणी जामा ले सिरिफ 1 कोस दुरिहा कुंडल गाँव मं सरकारी अस्पताल (पीएचसी) हवय.        

मान्यता प्राप्त सामाजिक स्वास्थ्य कार्यकर्ता (आशा), के 31 बछर के सुनीता देवी कहिथें, “ [सरकारी] अस्पताल मन मं अधिकतर नसबंदी सिविर जड़कल्ला मं लगाय जाथें. माई लोगन मन जड़कल्ला मं नसबंदी करवाय ला पसंद करथें , काबर ये बखत घाव ह भारी जल्दी भरथे. गर वो मन धुपकल्ला मं आपरेशन करवाय ला चाहंय, त वो मन ला दौसा अऊ बांदीकुई के निजी अस्पताल मं ले जाथन.” वो ह ये जोड़ा ला 25 बिस्तरा वाले एक ठन समान्य अस्पताल, मधुर अस्पताल ले गे रहिस. ये अस्पताल ह राज्य परिवार कल्याण योजना के तहत पंजीकृत हवय, येकरे सेती नसबंदी बर सुशीला ले एको पइसा नई लेय गे रहिस. बल्कि वोला 1,400 रुपिया के  प्रोत्साहन राशि घलो मिले रहिस. 

आपरेसन के कुछेक दिन बीते सुशीला ला महवारी आ गे, अऊ येकरे संग दरद अऊ थकान के अइसने सिलसिला सुरु होईस जऊन ह आगू के तीन बछर तक चलत रहिस.    

29 बछर के मनोज बताथें, “जब पहिली बेर दरद सुरु होइस, त मंय वोला घर मं रखाय दरद के दवई देवंय. येकर ले वोला थोकन आराम मिलिस. फेर हरेक महिना जब वोला महवारी आय, त वो ह दरद ले रोय ले धरे.”        

सुशीला कहिथे, “ दरद बाढ़त गेय अऊ बहुते जियादा खून जाय ले मोला उल्टी आय ला धरिस. मंय हमेसा दुरबल रहत रहंय." सुशीला घरेलू माई लोगन आय अऊ वो ह कच्छा 8 तक पढ़े हवय.       

तीन महिना तक ले अ इस ने चलत रहय, आखिर मं दूनो हिचकत कुंडल के पीएचसी गीन.  

मनोज कहिथे, “वहां ज़्यादातर स्टॉफ होता कहां है?” [उहां अधिकतर स्टॉफ रहिथे कहां], वो ह हमन ला बताथें के पीएचसी ह सुशीला के जाँच करे बगैर दर्द के गोली धरा दीस.     

येकर बाद, ये दरद ह वो मन के जिनगी ला घलो असर करे सुरु कर देय रहिस. नसबंदी के पांच महिना बीते बाद, सुशीला बांदीकुई के मधुर अस्पताल मं तऊन डाक्टर ले दुबारा मिले ला गीस जऊन ह ये आपरेशन करे रहिस.      

सरलग कतको जाँच करे के बाद, जऊन मं पेट के सोनोग्राफी घलो रहिस, डाक्टर ह बताईस के गरभ नाल मं संक्रमन हो गे हवय, जेकर तीन महिना तक ले इलाज कराय बर परही.       

मनोज ह बगियावत डाक्टर ला कहे रहिस, “मोर घरवाली ला संक्रमन कइसने हो गे? तंय ठीक ले आपरेसन नई करे रहे काय?” ये जोड़ा ला डाक्टर ले मिले जुवाब आज घलो सुरता हवय: वो ह जाय ले पहिली कहे रहिस, “हमन अपन काम सही करे रहें, ये तोर किस्मत आय.”          

तीन महिना तक ले हरेक 10 दिन बीते ये जोड़ा बिहनिया 10 बजे अपन फटफटी ले मधुर अस्पताल निकर जावंय. सरा दिन जाँच, परिच्छन अऊ लिखे दवई बिसोय मं लग जावत रहिस. मनोज ला अपन बूता छोरे ला परय अऊ अपन तीन झिन बेटी (जेन मन के उमर नो, सात अऊ पांच बछर के हवय) अऊ बेटा (अब चार बछर के) ढाणी जामा मं अपन दादा-दादी के संग रहंय, हरेक पईंत वो मन ला 2,000 ले 3,000 रूपिया खरच करे ला परय.                    

तीन महिना तक ले इलाज कराय के बाद, मनोज ह अपन रिस्तेदार मं ले उधार लेय 50,000 रूपिया मं ले अधिकतर खरच कर देय रहिस. बीए पढ़े बाद घलो मनोज ला जऊन एक ठन नऊकरी मिलिस वो ह बेलदारी करे (सड़क-भवन निर्मान धन खेत मजूरी) के रहिस, सरलग बूता मिले ले वो ह येकर ले महिना के 10,000 रुपिया कमा लेवत रहिस. यती एक डहर सुशीला के हालत मं कऊनो सुधार नई होवत रहिस ,त दूसर डहर परिवार के करजा बाढ़त जावत रहिस अऊ आमदनी खतम होवत जात रहिस. सुशीला कहिथे, जिनगी मं सब्बो धुंधराय कस होवत जात रहय.                

वो ह कहिथे, “महवारी के बखत दरद ले मोर गोड़ बने करके नई परत रहय धन अतक दुरबल हो जावत रहेंय के ओकर बाद बनेच अकन दिन तक ले काम बूता नई कर  सक त रहेंव.”       

येकरे सेती आखिर मं, 30 महिना के समे अऊ कम से कम आठ अस्पताल के चक्कर लगाय के बाद, सुशीला ह 27 दिसम्बर 2019 मं दौसा के एक अऊ निजी अस्पताल, शुभी पल्स हॉस्पिटल और ट्रॉमा सेंटर मं अपन बच्चादानी ला हेरवाय बर आपरेसन करवाइस. मनोज ला ये आपरेसन मं 20,000 रूपिया अऊ दवई-पानी मं 10,000 रूपिया अलगा खरच करे ला परिस.          

ये जोड़ा ला ये माने बर मजबूर करे गे रहिस के दरद अऊ करजा के जाल ले बहिर निकरे के एकेच रद्दा कोख ला हेरवाय आय.  

हमन मनोज अऊ सुशीला के कहिनी ला अखिल भारतीय ग्राहक पंचायत के वकील, दुर्गा प्रसाद सैनी ला सुनायेन. अखिल भारतीय ग्राहक पंचायत एक ठन गैर सरकारी संगठन आय, जऊन ह बांदीकुई के पांच ठन निजी अस्पताल मन मं गरभ निकारे के आपरेसन के संख्या के जाँच करे सेती नवंबर 2010 मं सूचना के अधिकार के तहत आवेदन करे रहिस.   

आरटीआई ले पता चलथे के पांच निजी अस्पताल मन ले तीन मन ले मिले जानकारी के मुताबिक, तऊन अस्पताल मं अप्रैल ले अक्टूबर 2010 के मंझा मं 385 माईलोगन मन के आपरेशन होय रहिस, जऊन मेर ले 286 माइलोगन मन अपन कोख हेरवाय रहिन. ये अस्पताल मन मं मधुर अस्पताल (जिहां सुशीला के नसबंदी होय रहिस) मदान नर्सिंग होम, बालाजी अस्पताल, विजय अस्पताल, अऊ कट्टा अस्पताल सामिल रहिन. कोख हेरवाय के आपरेसन करवाय माईलोगन मन के अधिकतर के उमर 30 बछर ले कमती रहिस, अऊ सबले कम उमर के माइलोगन ह 18 बछर के रहिस. अधिकतर माईलोगन मन जिला के अनुसूचित जाति अऊ अनुसूचित जनजाति समाज के रहिन, जइसने के बैरवा, गुज्जर, अऊ माली. मनोज अऊ सुशीला बैरवा समाज के आंय अऊ ओकर गाँव ढाणी जामा के 97 फीसदी अबादी अनुसूचित जाति ले हवय.

सैनी बताथें, “हमन नोनी भ्रूण-हत्या के समस्या ऊपर चर्चा करत रहेन, तभे कऊनो कहिस के फेर कोख हवय कहां.”  इही बात ले वो ला सन्देहा होईस के कुछु गलत होवत हवय.

सैनी बताथें, “हमर मानना रहिस के [बनेच अकन गैर जरूरी कोख आपरेसन] ये ह डाक्टर, पीएचसी करमचारी, अऊ आशा कार्यकर्ता मन के सांठगांठ के नतीजा आय.फेर हमन येला साबित नई करे सकेन.” बांदीकुई के सार ला राजस्थान, बिहार, अऊ छत्तीसगढ़ के निजी अस्पताल मन मं मुनाफाखोरी सेती “कोख हेरे आपरेसन घोटाला” के खिलाफ एक ठन जनहित अर्जी (पीआईएल) मं सामिल करे गे रहिस, जऊन ला राजस्थान के गैर-लाभकारी संगठन, प्रयास के संस्थापक डॉक्टर नरेंद्र गुप्ता डहर ले 2013 मं सुप्रीम कोर्ट मं दायर करे गे रहिस. अर्जी मं तऊन माईलोगन सेती मुआवजा के मांग करे गे रहिस जेकर मन के आपरेसन होय रहिस; संगे संग नीति मं घलो बदलाव करे ला कहे गे रहिस.                

जनहित अर्जी मं बताय गेय रहिस के “बिहार, छत्तीसगढ़, अऊ राजस्थान के जऊन माइलोगन मन ले गोठ-बात करे गीस, वो मन ले कतको ला ये माने बर गुमराह करे गे रहिस के ये ह आपरेसन जरूरी आय अऊ वो मन ला कराय ला परही. वो मन ला ये बेस्वास करे ला मजबूर करे गीस के डाक्टर के सलाह नई माने ले वो मन ला कैंसर हो सकत हवय.”