जम्मो मीडिया मं दरके ह छाय रहिस. हरेक दिन वो ह चमोली जिला के पहाड़ ऊपर बसे अपन धसकत सहर के बारे मं नवा आंकड़ा के संग छपे कहिनी ला पढ़त रहिस. भरका के फोटू खींचे ला अऊ कस्बा मं होवत विरोध प्रदर्सन ला देखे सेती मीडियावाले मन के सरलग गांव मन मं रेला लगे रहय. बीते हफ्ता जेन बखत वो मन लोगन मन ला अपन घर ला छोड़ के जाय ला कहत रहिन, वो अपन नानकन घर ला छोड़ के जाय ले इंकार कर दे रहिस. जब तक ले वो मन वोला नई निकारतीन, वो ह जवेइय्या नई रहिस. वो ह बिल्कुले घलो डेर्राय नई रहिस.
वो ह गम पागे रहिस के ये भरका मन तऊन आरो जइसने रहिस जऊन ह लालच के रूप धरके टनल के रद्दा ले गांव तक ले खुसर गे रहिस. पहाड़ मन मं नवा प्रोजेक्ट अऊ सड़क सिरिफ उहिच मन येकर जिम्मेवार नई रहिन. कुछु अऊ घलो रहिस, गहिर ले सोचे जाय त ये दुनिया के संग गलत होय रहिस. दरार मन पहिलीच ले उहाँ बन गे रहिन. पहाड़ के कऊनो नार ले झूलत नवा सपना के पाछू भागत, वो मन अपन ला प्रकृति अऊ माटी महतारी ले अलग कर ले रहिन. फेर, ये नार ह जादू वाले रहिस. भरमाय भटकत फिरे के दोस काकर ऊपर मढ़े जातिस?
