پَٹ چِتر: کاغذ کے رنگوں اور گیتوں میں بہتی کہانی

پٹ چتر پینٹنگ کے پہلے مرحلے میں ایک گیت تخلیق کی جاتی ہے، جسے پاتر گان کہا جاتا ہے۔ مامونی چترکار کہتی ہیں، ’’پینٹنگ شروع کرنے سے قبل ہمیں گیت کے بند لکھنے ہوتے ہیں… اس کی لے، پینٹنگ کے عمل کو ایک ڈھانچہ فراہم کرتی ہے۔‘‘ آٹھویں نسل کی یہ فنکار اپنے گھر میں بیٹھی ہیں اور بنگال کے مشرقی کولکاتا میں واقع دلدلی علاقوں کی عکاسی کرتے ہوئے ایک پٹ چتر بنا رہی ہیں۔

اس فن کا نام سنسکرت لفظ ’پٹّ‘ یا کپڑے کے ٹکڑے اور ’چتر‘ یا پینٹنگ سے اخذ کیا گیا ہے۔ جب مامونی دلدلی علاقے کے پیچیدہ ماحولیاتی نظام کو پینٹ کر رہی تھیں تو ساتھ میں پاتر گان بھی گا رہی تھیں۔ یہ گیت پٹ چتر کے ساتھ ہی رہے گا۔ اس گیت کو خود مامونی نے لکھا اور سروں میں باندھا ہے۔ یہ ایک بلاوے سے شروع ہوتا ہے: ’’سنو، سب سنو، غور سے سنو۔‘‘

یہ گیت مشرقی کولکاتا کے دلدلی علاقے کی اہمیت کو بیان کرتا ہے، جس کی حیثیت یہاں رہائش پذیر ’’بے شمار لوگوں کے لیے زندگی کی شہ رگ‘‘ کی ہے۔ ماہی گیروں، کسانوں اور سرسبز کھیتوں کو پٹ پر پینٹ کیا جاتا ہے۔ یہ پینٹنگ کپڑے کے اوپر کاغذ کے طومار (اسکرول) کو چسپاں کر کے کی جاتی ہے۔ جب کسی پیشکش کے دوران پٹ کی آخری تہ کھولی جاتی ہے، تو پینٹنگ کا وہ حصہ گیت کے بند سے ہم آہنگ ہوتا ہے۔ اس طرح مامونی کا فن مصوری اور موسیقی کے ذریعے دلدلی علاقے کی کہانی بیان کرتا ہے۔

مغربی میدنی پور کے نیا گاؤں کی رہنے والی مامونی اندازہ لگاتی ہیں کہ پنگلا تعلقہ کے تحت آنے والے ان کے گاؤں میں تقریباً ۴۰۰ فنکار آباد ہیں۔ اس تعلقہ کے کسی دوسرے گاؤں میں پٹ چتر بنانے والے فنکاروں کی اتنی بڑی آبادی نہیں ہے۔ یہ ۳۲ سالہ مصور الگ الگ رنگوں کے پودوں، جنگلی جانوروں اور پھولوں کے خاکوں کا حوالہ دیتے ہوئے کہتی ہیں، ’’گاؤں کے تقریباً تمام ۸۵ گھروں کی دیواروں پر جداری نقاشیاں کی گئی ہیں۔ ہمارا پورا گاؤں خوبصورت لگتا ہے۔‘‘

یہ گاؤں ریاست میں سیاحت کے مرکز کے طور پر درج ہے۔ یہاں ہندوستان اور بیرون ملک سے سیاح آتے ہیں۔ مامونی کہتی ہیں، ’’ہم ان طلباء کا بھی خیرمقدم کرتے ہیں جو ہم سے بات کرنے، ہمارا ہنر سیکھنے، اور ہم سے ہماری زندگیوں اور مہارتوں کے بارے میں معلومات حاصل کرنے آتے ہیں۔‘‘ انہوں نے مزید کہا، ’’ہم انہیں پاتر گان اور پٹ چتر طرز کی پینٹنگ سکھاتے ہیں اور قدرتی ذرائع سے حاصل رنگوں کو تیار کرنے کے لیے ورکشاپ کا انعقاد کرتے ہیں۔‘‘

مامونی کہتی ہیں، ’’پٹ چتر کا فن گُہا چتر، یا غار کی مصوری کے قدیم فن سے ماخوذ ہے۔‘‘ صدیوں پرانی یہ دستکاری اصل تصویر کشی سے پہلے اور اس کے بعد بھی گھنٹوں محنت کا مطالبہ کرتی ہے۔

مامونی بتاتی ہیں کہ پاتر گان کے نوک پلک درست کرنے کے بعد اصل پینٹنگ کا عمل شروع ہوتا ہے۔ ’’اپنی روایت کے مطابق میں جو بھی پینٹ استعمال کرتی ہوں اسے قدرتی طور پر حاصل کیا جاتا ہے۔‘‘ کچی ہلدی، جلی ہوئی مٹی اور گیندے کے پھولوں سے رنگ نکالا جاتا ہے۔ ’’میں ایک گہرا سیاہ رنگ حاصل کرنے کے لیے چاول جلاتی ہوں۔ نیلا رنگ نکالنے کے لیے اپراجیتا کے پھولوں کو پیستی ہوں، اور باقی رنگوں کو بھی ایسے ہی بناتی ہوں۔‘‘

رنگوں کے عرق کو ناریل کے خول میں محفوظ کر کے دھوپ میں خشک کیا جاتا ہے۔ کشید کے اس عمل میں ایک سال تک کا وقت لگ سکتا ہے، کیونکہ کچھ اجزاء ہر موسم میں دستیاب نہیں ہوتے۔ مامونی کہتی ہیں کہ اگرچہ یہ عمل تھکا دینے والا ہوتا ہے، لیکن ’’یہ اقدامات اہم ہیں اور انہیں احتیاط سے کرنا پڑتا ہے۔‘‘

رنگوں کو پینٹ کرنے سے پہلے اسے بیل کے پھل سے نکالے گئے قدرتی گوند کے ساتھ ملایا جاتا ہے۔ تازہ پینٹ شدہ طومار کو کپڑے پر چسپاں کرنے سے پہلے خشک کیا جاتا ہے، تاکہ رنگوں کو پائیداری ملے۔ آخر میں پٹ چتر بن کر تیار ہو جاتا ہے۔

اپنے گاؤں کے دیگر لوگوں کی طرح مامونی نے بھی چھوٹی عمر سے ہی پٹ چتر کا فن سیکھنا شروع کر دیا تھا۔ ’’میں سات سال کی عمر سے ہی پینٹنگ کر رہی ہوں اور گیت گا رہی ہوں۔ پٹ چتر میری آبائی روایت کا حصہ ہے اور میں نے اسے اپنی والدہ سورن چترکار سے سیکھا ہے۔‘‘ مامونی کے والد ۵۸ سالہ سمبھو چترکار بھی خاندان کے دوسرے لوگوں، ان کے شوہرسمیر اور ان کی بہن سونالی کی طرح ’پٹوا‘ (پٹ چتر بنانے والے) کا کام کرتے ہیں۔ مامونی کا بیٹا آٹھویں جماعت میں ہے اور بیٹی چھٹی جماعت میں۔ یہ دونوں ان سے یہ فن سیکھ رہے ہیں۔

روایتی طور پرپٹ چتر کو مقامی لوک داستانوں سے مستعار لیا جاتا ہے اور اس میں عام طور پر رامائن اور مہابھارت جیسے رزمیوں کے مناظر دکھائے جاتے ہیں۔ پرانے پٹوا بشمول مامونی کے دادا دادی اور ان کے آبا و اجداد گاؤں گاؤں جا کر پٹ چتر میں دکھائی گئی کہانیوں کو پیش کرتے تھے۔ بدلے میں انہیں پیسے یا کھانے کو کچھ مل جاتا تھا۔ انہی پیشکش کے ذریعے ان کی روزی روٹی چلتی تھی۔

مامونی بتاتی ہیں، ’’پٹ چتر بچینے کے لیے نہیں بنائے جاتے تھے۔‘‘ پٹ چتر کبھی بھی صرف مصوری کی ایک طرز نہیں تھا بلکہ کہانی کہنے کا ایک طریقہ تھا، جس میں صوتی اور بصری دونوں ذرائع استعمال کیے جاتے تھے۔

وقت گزرنے کے ساتھ مامونی جیسے پٹوا مصوروں نے پٹ چتر طرز کے روایتی اصولوں کو عصری موضوعات کے ساتھ ہم آہنگ کر دیا۔ وہ کہتی ہیں، ’’مجھے نئے موضوعات پر کام کرنا پسند ہے۔ میرا کچھ کام سونامی جیسی قدرتی آفات پر بھی مبنی ہے۔ میں اپنے کام کو ضروری سماجی مسائل کی عکاسی کے لیے بھی استعمال کرتی ہوں، مثلاً، صنفی تشدد اور اسمگلنگ۔‘‘

ان کی حالیہ پیشکش کووڈ۔۱۹ کے اثرات، اس کی علامات اور اس کے متعلق بیداری پھیلانے پر مبنی ہے۔ کچھ دوسرے فنکاروں کے ساتھ مل کر مامونی نے اس پٹ چتر کو ہسپتالوں، ہاٹوں (ہفتہ واری بازاروں) اور نیا گاؤں کے آس پاس کے دیہاتوں میں پیش کیا ہے۔

نیا گاؤں میں ہر نومبر میں پٹ مایا کا میلہ منعقد کیا جاتا ہے۔ مامونی کہتی ہیں، ’’پینٹنگز خریدنے والے ہندوستان اور بیرون ملک سے آنے والے سیاحوں اور ماہرین آرٹ کے لیے یہ میلہ توجہ کا مرکز رہا ہے۔‘‘ نیا گاؤں میں اور اس کے آس پاس فروخت ہونے والی ٹی شرٹس، فرنیچر، برتنوں، ساڑیوں، دیگر کپڑوں اور گھریلو اشیاء پر بھی پٹ چتر کا طرز نظر آتا ہے۔ اس سے اس ہنر کے تئیں دلچسپی میں اضافہ ہوا ہے، اور فروخت میں بہتری آئی ہے، جو کووڈ۔۱۹ کے وبائی امراض کے دوران متاثر ہوئی تھی۔ مامونی اپنے کام کی تصاویر سوشل میڈیا پر شیئر کرتی ہیں، زیادہ تر فیس بک پر۔ اس سے انہیں پورے سال اپنی چیزیں فروخت کرنے میں مدد ملتی ہے۔

مامونی اپنے فن کے ساتھ اٹلی، بحرین، فرانس اور امریکہ کا دورہ کر چکی ہیں۔ وہ کہتی ہیں، ’’ہم اپنے فن اور گانے کے ذریعے ہی زیادہ سے زیادہ لوگوں تک پہنچ سکتے ہیں۔‘‘ انہیں امید ہے کہ یہ ہنر آگے بڑھے گا۔

’ڈس اپیئرنگ ڈائیلاگس کلیکٹو (ڈی ڈی)‘ کمیونٹیز کے اندر اور ان کے ساتھ مل کر کام کرتا ہے۔ ان کے درمیان کی دوری کم کرنے کے لیے فن اور ثقافت کو ذریعہ بنا کر بات چیت کا آغاز کرتا ہے اور نیا بیانیہ تشکیل دیتا ہے۔ مقصد یہ ہے کہ موجودہ وراثتی، ثقافتی اور ماحولیاتی قدروں کے فروغ کے ساتھ ساتھ ان کے تحفظ میں تعاون دیا جائے۔

اس مضمون کو ’جول اے بھومیر گولپو کتھا‘ یعنی دلدلی زمین کی کہانیوں سے تریتب دیا گیا ہے۔ اس پروجیکٹ کو انڈیا فاؤنڈیشن فار دی آرٹس کے ذریعے اس کے آرکائیوز اور میوزیم پروگرام کے تحت اور پیپلز آرکائیو آف رورل انڈیا کے تعاون سے عمل میں لایا گیا ہے۔ اس میں  گوئٹے انسٹی ٹیوٹ/میکس مولر بھون، نئی دہلی کا جزوی تعاون بھی شامل ہے۔

مترجم: شفیق عالم