مہنگے علاج کے سبب کسانوں نے چھوڑا اسپتال جانا

خودکشی سے متاثرہ جن دوسرے کنبوں کا ہم نے سروے کیا، ان پر بھی صحت کے اخراجات کا بھاری بوجھ تھا۔ دو سے چار ایکڑ زمین کی ملکیت والے کنبوں پر ۲۵ سے ۳۰ ہزار روپے کے قرضوں کا بوجھ عام بات تھی۔ اور اکثر بھاری نقصان کی وجہ سے ہر فصل کے ساتھ کھیتی بھی کم ہو جاتی ہے۔ اس لیے شام راؤ اور انجما نے دوائیاں خریدنا ہی چھوڑ دیا۔ وائپھڈ کے کسان کہتے ہیں، ’’سرکاری ہسپتال میں آپ کو کچھ نہیں ملتا۔‘‘

دوسری طرف، منوج چاندورورکر کہتے ہیں، ’’اگر ہم ناگپور جائیں، تو ہمیں ایک بڑی رقم ادا کرنی پڑے گی۔ لوگ ہسپتال جانے سے ڈرتے ہیں۔‘‘ وردھا سے لیے گئے زیادہ تر خون کی جانچ کی رپورٹوں یا ایکسرے کو (اگر رپورٹیں درست ہوں تب بھی) ناگپور کے پرائیویٹ ہسپتال مسترد کر دیتے ہیں۔ یہاں ریفرل ریکیٹ کو اس کے حصے سے محروم نہیں رکھا جا سکتا۔ ’’لہذا ہمیں دوبارہ جانچ سے گزرنا پڑتا ہے۔ ہر کوئی اپنا حصہ لیتا ہے اور خوش ہوجاتا ہے۔‘‘

یہ ’’سی ٹی اسکین اور دوائیں بڑے لوگوں کے لیے ہیں۔ ہمارے پاس پیسے نہیں ہیں،‘‘ پیشے سے کسان رامیشور چارڈی کہتے ہیں۔ غیرمنضبط نجی شعبہ اپنی مرضی کے مطابق کوئی بھی فیس وصول کر سکتا ہے۔ بہت سے لوگوں کے لیے ناکافی فنڈ، ناکافی ساز و سامان اور خستہ حال سرکاری ہسپتال ناقص متبادل پیش کرتے ہیں۔ مالواگڑھ میں سنتوش ایسائیں ہنستے ہوئے کہتے ہیں، ’’علاج مفت تھا، لیکن یہ صرف کہنے کے لیے تھا۔‘‘ انہوں نے اپنے بھائی اشوک (جو کینسر کے مریض ہیں) کی ادویات اور نگہداشت پر ۳۵ ہزار روپے خرچ کیے تھے۔ ایسائیں نے نقد رقم حاصل کرنے کے لیے یوتمال کے گاؤں میں اپنی تین ایکڑ زمین بیچ دی تھی۔ پھر ان کے پیسے ختم ہو گئے تھے۔

ان کے دوست سندیپ کدم سیدھے ایک پرائیویٹ ہسپتال میں گئے۔ انہوں نے اپنے والد (جن کی موت تپ دق کی وجہ سے ہو گئی) کے علاج پر تقریباً ۲ لاکھ روپے خرچ کیے۔ وہ کہتےہ یں، ’’اس خرچ کا مطلب تھا تین ایکڑ زمین بیچنا۔‘‘ یہ ان کی بڑی فیملی کی زمین کا تقریباً ایک تہائی حصہ تھا۔

پڑوسی ریاست آندھرا پردیش کی طرح یہاں بھی یہ ساری چیزیں زرعی بحران سے کا سامنا کر رہی کسان برادری کو متاثر کرتی ہیں۔ بہت کم لوگ اس قابل ہوتے ہیں جو قرض لیے بغیر کسی بڑی بیماری کا علاج کرا سکیں۔

انجما بیمار ہوکر فرش پر لیٹی ہیں۔ وہ اتنی کمزور ہو گئی ہیں کہ ان میں بیٹھنے کی سکت نہیں ہے۔ کمزور اور لاغر شام راؤ بستر پر بیٹھے ہیں۔ وہ خوش ہیں کہ انہوں نے اپنے مردہ بیٹے کے قرض چکا دیے ہیں۔ ’’ہم نے اس قرض سے جان چھڑائی تاکہ اس کی روح کو سکون ملے۔‘‘ یہ الگ بات ہے کہ ان کے اپنے جسم کو سکون نہیں ہے۔ صحت کی خرابی نے انہیں اپنی گرفت میں لے لیا ہے۔ بڑھتی ہوئی عمر کی وجہ سے وہ محنت کرکے روزی کمانے سے قاصر ہیں۔ لیکن صحت ایک قیمت پر آتی ہے۔ ایک ایسی قیمت جسے وہ اور ان جیسے لاتعداد لوگ ادا نہیں کر سکتے۔

وائپھڈ میں انہوں نے ہمیں خوشی خوشی رخصت کیا۔ ان میں سے ایک نے کہا، ’’اگر آپ صحت کے بارے میں جاننا چاہتے ہیں، تو ہمارے کھیتوں کی طرف دیکھیں۔ اس کے بعد آپ کو سب کچھ معلوم ہو جائے گا۔ ہم سبھی کسان ابھی سیلائن ڈِرپ پر ہیں۔ اب سے دو سال بعد ہم آکسیجن پر آجائیں گے۔‘‘

پس نوشت

۳۱ اکتوبر، ۲۰۰۵: کسانوں سے متعلق قومی کمیشن کی ٹیم کے آشٹی میں شام راؤ کھتالے کے گھر پہنچنے سے ایک دن پہلے ان کا انتقال ہوگیا۔ کاروں کا ایک قافلہ ان کی بیوی سے ملنے وردھا کے اس گاؤں میں وارد ہوا، لیکن وہ اپنی حواس کھو چکی ہیں۔ بالکل ویسے ہی جیسے گزشتہ سال ان کے ایک بیٹے کے ساتھ ہوا تھا۔ ایک اور بیٹے پربھاکر نے ۲۰۰۴ میں خودکشی کر لی تھی۔ شام راؤ کی بیوی ابھی تک یہ نہیں سمجھ پائی ہیں کہ ان کے شوہر اس دنیا میں نہیں ہیں۔ وہ ایک ایسی نجی دنیا میں چلی گئی ہیں جہاں یہ سب کچھ نہیں ہوتا ہے۔ جو بول سکتی ہیں وہ ان کی بیٹی گنگا ہیں، جو زرعی بحران میں فیملی کے دیوالیہ ہو جانے کی سبب ۳۱ سال کی عمر میں غیرشادی شدہ ہیں۔ ان کے ایک اور بیٹے ہیں جو امراوتی سے بے روزگار لوٹے ہیں۔ شام راؤ اور ان کی بیوی، دونوں کافی بیمار تھے، ایک سال سے علاج بند کر چکے تھے۔ ’’کون ان ڈاکٹروں کے خرچے برداشت کر سکتا ہے؟‘‘ شام راؤ نے جون میں مجھ سے کہا تھا۔ ’’ہم تو نہیں کرسکتے، یہ ساری چیزیں بہت مہنگی ہیں۔ اور ہم دوائیں کیسے خریدیں گے؟‘‘

اس مضمون مضمون ایک قدرے مختلف ورژن سب سے پہلے دی ہندو اخبار میں شائع ہوا تھا۔

مترجم: شفیق عالم