معتوب زبانوں اور میناروں کے حوالے سے

ایک ماں کس زبان میں خواب دیکھتی ہے؟ گنگا سے لے کر پیریار کے گھاٹ تک وہ اپنے بچوں سے کس زبان میں بات کرتی ہے؟ کیا ہر ریاست، ہر ضلع، ہر گاؤں میں اس کی زبان بدل جاتی ہے؟ ہزاروں زبانیں اور لاکھوں بولیاں ہیں، کیا وہ سب جانتی ہے؟ وہ کون سی زبان ہے، جس میں وہ ودربھ کے کسانوں، ہاتھرس کے بچوں اور ڈنڈیگل کی عورتوں سے بات کرتی ہے؟ سنو! لال ریت میں اپنا سر چھپا لو۔ اس پہاڑی پر جا کر سنو، جہاں ہوا تمہارے چہرے کو سہلاتی ہے! کیا تم اسے سن سکتے ہو؟ اس کی کہانیاں، اس کے گیت اور اس کا رونا تمہیں سنائی دیتا ہے؟ بتاؤ مجھے، کیا تم اس کی زبان کو پہچان سکتے ہو؟ بتاؤ، کیا تم میری طرح اسے ایک پیاری سی لوری گاتے ہوئے سن سکتے ہو؟

زبانیں

ایک خنجر میری زبان کو چاک کر رہا ہے
اور میں اس کی تیز دھار کو محسوس کر رہا ہوں
جیسے جیسے وہ میرے عضلہ کو تار تار کر رہا ہے
میری آواز ضبط ہو چکی ہے
اور میرے الفاظ، زیر خنجر قید ہو گئے ہیں
تمام حروف، سب نغمے اور قصے کہانیاں
جانے اور بوجھے کہیں کھو گئے ہیں

یہ خون سے لبریز میری زبان
کسی خوں ریز ندی کی مانند
میرے دہن سے پھوٹ کر میرے سینے کو پار کرتی ہوئی
میری ناف سے ہو کر، میری شرم گاہ سے بڑھتی ہوئی
دراوڑ کی زرخیز زمین کو آبیار کرتی ہے
میری زمین سرخ ہے اور میری زبان سی تر ہے
خون کا ہر قطرہ اس سیاہ زمین پہ
سرخرو فصل کی پرورش کرتا ہے

ہزاروں دفن کی ہوئی زبانیں
لاکھوں اور کروڑوں مردہ بولیاں
اپنے قدیم قبرستانوں سے امڈ آتی ہیں
جیسے بہار کے موسم میں کھلکھلاتے ہوئے پھول
میری ماں کے نغمے گاتے ہوئے، ان کی کہانیاں دہراتے ہوئے

ایک خنجر میری زباں کو چاک کر رہا ہے
پر اب میری زمین کی زبانوں کا گیت سن کر
اس کی کند خوفزدہ نوک ڈگمگا جاتی ہے

مترجم: نثری حصے کا ترجمہ محمد قمر تبریز نے جب کہ نظم کا ترجمہ برہان قریشی نے کیا ہے۔