بجواسن سے رام لیلا میدان تک مارچ

گروپ لیڈر کسانوں کو مارچ کے دوران برتے جانے والے احتیاط کی ہدایت اور ایمرجنسی کے لیے رابطہ نمبر دے رہے ہیں

راجستھان کے ناگور ضلع اور بلاک کے کسان بات کر رہے ہیں کہ کیسے بورویل کے کھارے پانی نے ان کے کھیتوں اور فصلوں کو برباد کر دیا ہے۔ ’’ہم سال میں صرف چار مہینے، برسات کے موسم میں ہی کھیتی کر سکتے ہیں، باقی وقت ہمیں دیگر گاؤوں میں مزدوروں اور زرعی مزدوروں کے طور پر کام کرنا پڑتا ہے،‘‘ وہ کہتے ہیں۔ ناگور تحصیل کے جودھیاسی گاؤں کے ۷۵ سالہ کسان، سُردھن سنگھ کہتے ہیں، ’’کوئی بھی مجھے مزدور اور زرعی مزدور کے طور پر کام پر نہیں رکھنا چاہتا کیوں کہ میں بوڑھا ہوں۔ اب میں صرف یہی کر سکتا ہوں کہ احتجاج کروں اور اپنی پریشانیاں بتاؤں۔‘‘

راجستھان کے ناگور ضلع کے کسان روایتی موسیقی پیش کرنے کی تیاری کر رہے ہیں۔

مارچ میں حصہ لینے کے لیے بہت سے بچے بھی اپنے والدین کے ساتھ آئے ہیں۔

مغربی بنگال کے دیہی کسان رام لیلا میدان کی جانب کوچ کر رہے ہیں۔

جنوبی پرگنہ کے جے نگر-دوئم بلاک کے سونا ٹیکری گاؤں کی ۲۲ سالہ رِنکو ہلدر کو بچپن میں پولیو ہو گیا تھا۔ اپنے زرعی کنبہ کے لیے لڑنے کو پر عزم، وہ کہتی ہیں، ’’میں پوری طرح سے کسانوں کی حمایت کرتی ہوں۔ میں اتنی دور سے دہلی اس لیے آئی ہو تاکہ سرکار ہماری حالت پر دھیان دے۔ حشرہ کش دواؤں اور بجلی کی قیمتیں بڑھ رہی ہیں، لیکن پیداوار اچھی ہونے پر بھی ہمیں کوئی فائدہ نہیں ملتا ہے۔ کولکاتا میں آپ پیداوار [دھان] کو اونچی قیمت پر خریدتے ہیں، لیکن گاؤں میں ہمیں زیادہ قیمت نہیں ملتی ہے۔‘‘

مغربی بنگال کا ایک کسان مارچ کے دوران روایتی گانا گا رہا ہے۔

ہریانہ کے میوات ضلع کے تاؤرو بلاک کے کسان بجلی کی ناقص سپلائی کے بارے میں شکایت کر رہے ہیں، جو ان کے کھیتوں میں دن میں صرف چھ گھنٹے، رات کے ۱۱ بجے سے صبح کے ۵ بجے تک رہتی ہے۔ وہ سوال کرتے ہیں، ’’کسان رات میں ۱۱ بجے اپنے پودوں کو پانی بھلا کیسے دے گا؟‘‘

بجواسن کیمپ سے ۱۰ کلومیٹر تک چلنے کے بعد ایک کسان سڑک پر آرام کر رہا ہے۔

مہاراشٹر کے کولہا پور ضلع کے شیرول تعلقہ کے جنبھالی گاؤں کے ایک کسان، ۷۵ سالہ نارائن بھاؤ گایکواڑ اپنی بانسری بجاتے ہوئے۔

مہاراشٹر کے پال گھر ضلع کے آدیواسی کسانوں کا ایک گروپ رام لیلا میدان میں روایتی گانے گا رہا ہے۔

رام لیلا میدان میں ریاست وار لگائے گئے ٹینٹ میں آرام کرتے کسان۔

میدان میں، دیر شام اسٹیج پر ہو رہی پیشکش کو دیکھتے ہوئے۔