ਸ਼ਿਆਮ ਲਾਲ ਕਸ਼ਿਅਪ ਦੇ ਪਰਿਵਾਰ ਨੂੰ ਉਸਦੀ ਮ੍ਰਿਤਕ ਦੇਹ ਨੂੰ ਲੈ ਕੇ ਸਿੱਧੇ ਤੌਰ ’ਤੇ ਬਲੈਕਮੇਲ ਕੀਤਾ ਗਿਆ।
ਮਈ 2023 ਵਿੱਚ, ਐਰਾਕੋਟ ਦੇ 20 ਸਾਲਾ ਦਿਹਾੜੀਦਾਰ ਮਜ਼ਦੂਰ ਨੇ ਖੁਦਕੁਸ਼ੀ ਕਰ ਲਈ ਸੀ; ਉਹ ਆਪਣੀ 20 ਸਾਲਾ ਗਰਭਵਤੀ ਪਤਨੀ ਮਾਰਥਾ ਨੂੰ ਆਪਣੇ ਪਿੱਛੇ ਛੱਡ ਗਿਆ।
“ਇਹ ਖੁਦਕੁਸ਼ੀ ਸੀ। ਮ੍ਰਿਤਕ ਦੇਹ ਨੂੰ ਇੱਥੋਂ ਲਗਭਗ 15 ਕਿਲੋਮੀਟਰ ਦੂਰ, ਸਭ ਤੋਂ ਨੇੜਲੇ ਹਸਪਤਾਲ ਲਿਜਾਇਆ ਗਿਆ,” ਸੁਕਮਿਤੀ ਕਸ਼ਿਅਪ, 30, ਉਸਦੀ ਭਾਬੀ ਨੇ ਕਿਹਾ। ਉਹ ਐਰਾਕੋਟ ਪਿੰਡ ਵਿੱਚ ਬੰਜਰ ਜ਼ਮੀਨ ਦੇ ਕਿਨਾਰੇ ’ਤੇ ਸਥਿਤ ਆਪਣੀ ਮੱਧਮ ਰੌਸ਼ਨੀ ਵਾਲੀ ਝੌਂਪੜੀ ਦੇ ਬਾਹਰ ਬੈਠੀ ਹੈ। “ਪੋਸਟਮਾਰਟਮ ਰਿਪੋਰਟ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਗੜਬੜ ਨਹੀਂ ਆਈ।”
ਸਰਕਾਰੀ ਹਸਪਤਾਲ ਵਿੱਚ ਕੁਝ ਰਿਸ਼ਤੇਦਾਰ ਸ਼ਿਆਮਲਾਲ ਦੀ ਮ੍ਰਿਤਰ ਦੇਹ ਲੈਣ ਅਤੇ ਪਿੰਡ ਲਿਜਾਣ ਦੀ ਉਡੀਕ ਕਰ ਰਹੇ ਸਨ, ਜਿੱਥੇ ਦੁਖੀ ਹੋਏ ਪਰਿਵਾਰਕ ਮੈਂਬਰ ਅੰਤਿਮ ਸਸਕਾਰ ਲਈ ਪ੍ਰਬੰਧ ਕਰ ਰਹੇ ਸਨ। ਪਰਿਵਾਰ ਸਦਮੇ ਵਿੱਚ ਸੀ, ਉਹ ਅਜੇ ਤੱਕ ਇਸ ਦੁੱਖ ਦਾ ਭਾਣਾ ਨਹੀਂ ਮੰਨ ਸਕੇ।
ਉਸੇ ਸਮੇਂ ਕੁਝ ਸਥਾਨਕ ਲੋਕਾਂ ਨੇ ਪਰਿਵਾਰ ਨੂੰ ਕਿਹਾ ਕਿ ਉਹ ਪਿੰਡ ਵਿੱਚ ਅੰਤਿਮ ਸਸਕਾਰ ਤਾਂ ਹੀ ਕਰ ਸਕਣਗੇ ਜੇ ਉਹ ਹਿੰਦੂ ਧਰਮ ਅਪਣਾ ਲੈਣ।
ਇਹ ਪਰਿਵਾਰ ਮੁੱਖ ਤੌਰ ’ਤੇ ਮਜ਼ਦੂਰੀ ਅਤੇ ਛੱਤੀਸਗੜ੍ਹ ਦੇ ਬਸਤਰ ਜਿਲ੍ਹੇ ਵਿੱਚ ਤਿੰਨ ਏਕੜ ਖੇਤੀਯੋਗ ਜ਼ਮੀਨ ਵਿੱਚ ਖੇਤੀ ਕਰਕੇ ਆਪਣੀ ਰੋਜ਼ੀ-ਰੋਟੀ ਕਮਾਉਂਦਾ ਹੈ। ਇੱਥੇ ਉਹ ਆਪਣੇ ਵਰਤਣ ਲਈ ਚੌਲਾਂ ਦੀ ਖੇਤੀ ਕਰਦੇ ਹਨ। ਉਹਨਾਂ ਦੀ ਇਕਲੌਤੀ ਕਮਾਈ ਸ਼ਿਆਮਲਾਲ ਦੀ ਕਮਰਤੋੜ ਮਜ਼ਦੂਰੀ ਤੋਂ ਆਉਂਦੀ ਸੀ, ਜਿਸ ਨਾਲ ਤਕਰੀਬਨ ਮਹੀਨੇ ਦੇ 3000 ਰੁਪਏ ਬਣਦੇ ਸਨ।
ਸੁਕਮਿਤੀ ਸੋਚਦੀ ਹੈ ਕਿ ਕੀ ਉਸਨੇ ਐਨੀ ਗਰੀਬੀ ਵਿੱਚ ਬੱਚਾ ਪਾਲਣ ਦਾ ਦਿਮਾਗ ’ਤੇ ਬੋਝ ਲੈ ਲਿਆ ਸੀ। “ਉਸਨੇ ਕੋਈ ਚਿੱਠੀ ਵੀ ਨਹੀਂ ਛੱਡੀ,” ਉਹਨੇ ਕਿਹਾ।
