ಅನಂತಪುರ ಚುನಾವಣೆಯಲ್ಲಿ ಭಯ ಮತ್ತು ಗುಂಪುಗಾರಿಕೆ

“ನಾವು ಹಸಿದು ಬೇಕಾದರೂ ಇರುತ್ತೇವೆ, ಆದರೆ ನಾವು ನಮ್ಮ ಪಕ್ಷದ ಬಾವುಟ ಹಿಡಿದು ತಿರುಗಾಟಕ್ಕೆ ಹೋಗದೆ ಇರುವುದಿಲ್ಲ. ನಾವು ಹೋಗಲೇಬೇಕು. ನಮಗೆ ಬೇರೆ ಆಯ್ಕೆಯಿಲ್ಲ,” ಎನ್ನುತ್ತಾರೆ ತಲುಪೂರಿನ ನಾರಾಯಣ ಸ್ವಾಮಿ. ಅವರು ರಾಪ್ತಾಡು ವಿಧಾನಸಭಾ ಕ್ಷೇತ್ರದಲ್ಲಿ ಒಂದು ರೇಷನ್‌ ಅಂಗಡಿ ನಡೆಸುತ್ತಿದ್ದಾರೆ. ಈ ಕ್ಷೇತ್ರವಿರುವುದು ಅನಂತಪುರ ಜಿಲ್ಲೆಯಲ್ಲಿ. ಅವರು ಇಂದು, ಅಂದರೆ ಎಪ್ರಿಲ್‌ 11ರಂದು ನಡೆಯಲಿರುವ ಚುನಾವಣೆ ಕುರಿತು ಮಾತನಾಡುತ್ತಿದ್ದರು. ಈ ಚುನಾವಣೆಯಲ್ಲಿ ಆಂಧ್ರಪ್ರದೇಶವು ವಿಧಾನಸಭೆ ಮತ್ತು ಲೋಕಸಭೆ ಎರಡಕ್ಕೂ ಮತ ಚಲಾಯಿಸಲಿದೆ. ಇಲ್ಲಿ ಜನರು ಏನು ಯೋಚಿಸುತ್ತಿದ್ದಾರೆ, ಅವರು ಹೇಗೆ ಮತ ಹಾಕುತ್ತಾರೆ ಮತ್ತು ಯಾರಿಗೆ ಮತ ಹಾಕುತ್ತಾರೆ ಮತ್ತು ಏಕೆ ಎನ್ನುವುದರ ಕುರಿತು ಅವರು ಮಾತನಾಡುತ್ತಾರೆ.

ಹಿಂದೂಪುರ ಮತ್ತು ಕಡಪ ಲೋಕಸಭಾ ಕ್ಷೇತ್ರಗಳಲ್ಲಿ ಕ್ರಮವಾಗಿ ರಾಪ್ತಾಡು ಮತ್ತು ಪುಲಿವೆಂದುಲ ಎಂಬ ಎರಡು ವಿಧಾನಸಭಾ ಕ್ಷೇತ್ರಗಳ ಬಗ್ಗೆ ಇಲ್ಲಿ ಹೆಚ್ಚಿನ ಗಮನ ನೀಡಲಾಗುತ್ತಿದೆ ಮತ್ತು ಚರ್ಚೆ ನಡೆಯುತ್ತಿದೆ.

ರಾಪ್ತಾಡುವಿನಲ್ಲಿ ಆಡಳಿತಾರೂಢ ತೆಲುಗು ದೇಶಂ ಪಕ್ಷದ ಪರಿಟಾಲ ಶ್ರೀರಾಮ್ ಮತ್ತು ವೈಎಸ್‌ಆರ್ ಕಾಂಗ್ರೆಸ್ ಪಕ್ಷದ ಪ್ರಕಾಶ್ ರೆಡ್ಡಿ ನಡುವೆ ಹಣಾಹಣಿ ಏರ್ಪಟ್ಟಿದೆ. ರೆಡ್ಡಿ ಶ್ರೀರಾಮ್ ಅವರ ತಾಯಿ ಅವರನ್ನು 2009 ಮತ್ತು 2014ರಲ್ಲಿ ಪರಿಟಾಲ ಸುನೀತಾ ಸೋಲಿಸಿದ್ದರು. ಪುಲಿವೆಂದುಲಾದಲ್ಲಿ ವೈಎಸ್ಆರ್ ಕಾಂಗ್ರೆಸ್ ನಾಯಕ ಜಗನ್ಮೋಹನ್ ರೆಡ್ಡಿ ತೆಲುಗುದೇಶಂನ ಕುಮಾರ್ ರೆಡ್ಡಿ ವಿರುದ್ಧ ಕಣಕ್ಕಿಳಿದಿದ್ದಾರೆ. ಅನೇಕರು ಜಗನ್ಮೋಹನ್ ಅವರನ್ನು ಭವಿಷ್ಯದ ಮುಖ್ಯಮಂತ್ರಿ ಎಂದು ನೋಡುತ್ತಿದ್ದಾರೆ ಮತ್ತು ಅವರೇ ಮೇಲುಗೈ ಸಾಧಿಸಿದ್ದಾರೆ.

ಹಿಂದೂಪುರ ಲೋಕಸಭಾ ಕ್ಷೇತ್ರದಲ್ಲಿ ತೆಲುಗುದೇಶಂನ ನಿರ್ಮಲಾ ಕಿಸ್ತಪ್ಪ ಮತ್ತು ವೈಎಸ್‌ಆರ್ ಕಾಂಗ್ರೆಸ್‌ನಿಂದ ಗೋರಂಟ್ಲಾ ಮಾಧವ್ ಸ್ಪರ್ಧಿಸಿದ್ದಾರೆ. ಹಾಲಿ ಅಧ್ಯಕ್ಷ ವೈಎಸ್ ಅವಿನಾಶ್ ರೆಡ್ಡಿ ಕಡಪ ಲೋಕಸಭಾ ಕ್ಷೇತ್ರಕ್ಕೆ ತಮ್ಮ ಪ್ರಮುಖ ಪ್ರತಿಸ್ಪರ್ಧಿ ತೆಲುಗುದೇಶಂನ ಆದಿನಾರಾಯಣರೆಡ್ಡಿ ವಿರುದ್ಧ ಸ್ಪರ್ಧಿಸಲಿದ್ದಾರೆ.

ಆದರೆ, ಅನಂತಪುರದ ಹಳ್ಳಿಗಳಲ್ಲಿ ಅಭ್ಯರ್ಥಿಗಳಿಗಿಂತ ಪಕ್ಷ, ಗುಂಪು ನಿಷ್ಠೆ ಜನರಿಗೆ ಮುಖ್ಯ. ನಾವು ರಾಪ್ತಾಡುಡುವಿನಲ್ಲಿ ಮಾತನಾಡಿದ ಗ್ರಾಮಸ್ಥರು ಹಿಂದೂಪುರ ಲೋಕಸಭೆ ಸ್ಪರ್ಧೆಗಿಂತ ವಿಧಾನಸಭೆ ಚುನಾವಣೆಯತ್ತ ಹೆಚ್ಚು ಗಮನಹರಿಸಿದ್ದರು (ಅಂದರೆ ಅವರು ಇಬ್ಬರಿಗೂ ಮತ ಹಾಕಲಿದ್ದಾರೆ). ಈ ಕ್ಷೇತ್ರಗಳಲ್ಲಿ ಎಲ್ಲೆಡೆ ಮತದಾರರು ರಾಜ್ಯ ವಿಧಾನಸಭೆ ಚುನಾವಣೆಯತ್ತ ಹೆಚ್ಚಿನ ಆಸಕ್ತಿ ತೋರುತ್ತಿದ್ದಾರೆ.

ಅನಂತಪುರದಲ್ಲಿ ನಾರಾಯಣಸ್ವಾಮಿ ಮತ್ತು ಇತರರ ಪ್ರಕಾರ, ನಿಮ್ಮ ವೈಯಕ್ತಿಕ ಸಮಸ್ಯೆಗಳು ಮತ್ತು ಕ್ಷೇತ್ರದ ಸಮಸ್ಯೆಗಳಿಗಿಂತ ಪಕ್ಷ ನಿಷ್ಠೆ ಮುಖ್ಯವಾಗಿದೆ. ಜಿಲ್ಲೆಯ ಹಳ್ಳಿಗಳ ಕಾರ್ಯಕರ್ತರು ಆಗಾಗ ಕೆಲಸ ಬಿಟ್ಟು ಅರೆಬೆತ್ತಲೆಯಾಗಿ ಬದುಕಿ ಪಕ್ಷವನ್ನು ಬೆಳೆಸಲು ಶ್ರಮಿಸುತ್ತಿದ್ದಾರೆ.

"ಮತದಾರರಲ್ಲಿ ಅಲ್ಪಸಂಖ್ಯಾತರು ಯಾವಾಗಲೂ ಇರುತ್ತಾರೆ" ಎಂದು ನಾರಾಯಣಸ್ವಾಮಿ ಹೇಳುತ್ತಾರೆ, ಅವರು ಎರಡೂ ಪಕ್ಷಗಳೊಂದಿಗೆ ಇರುತ್ತಾರೆ, ಎರಡೂ ಕಡೆಯಿಂದ ಏನನ್ನಾದರೂ ಪಡೆಯಲು ಪ್ರಯತ್ನಿಸುತ್ತಾರೆ. "ಈ ಜನರಿಗೆ, ನಮ್ಮ ಸರ್ಕಾರವು ಒಂದೇ ಒಂದು ರೂಪಾಯಿ ಮೌಲ್ಯದ ಪ್ರಯೋಜನಗಳನ್ನು ನೀಡಿಲ್ಲ." ಆದಾಗ್ಯೂ, ಹೆಚ್ಚಿನವರು ಪಕ್ಷ, ಗುಂಪು ಗುಂಪು ಮತ್ತು ಜಾತಿಯ ಧ್ರುವೀಕೃತ ಮಾರ್ಗಗಳಲ್ಲಿ ಮತ ಚಲಾಯಿಸಬಹುದು. ನಾರಾಯಣಸ್ವಾಮಿ ಸ್ವತಃ ನಿಷ್ಠಾವಂತ ಟಿಡಿಪಿ ಮತದಾರ.

ಅನಂತಪುರದ ಕುರಿತು ಗೊತ್ತಿಲ್ಲದವರಿಗೆ ಈ ನಿಷ್ಠೆ - ಗುಂಪು, ರಾಜಕೀಯ, ಸಿನಿ ನಟರ ಭಕ್ತಿ ಅರ್ಥ ಮಾಡಿಕೊಳ್ಳುವುದು ಕಷ್ಟ. ಜಿಲ್ಲೆಯಲ್ಲಿ ರಾಜಕೀಯ ವೈಷಮ್ಯ, ಗುಂಪುಗಾರಿಕೆಯ ಹಿಂಸಾಚಾರದ ಇತಿಹಾಸವಿದೆ. ಈ ಜಿಲ್ಲೆಯ ಒಂದಕ್ಕಿಂತ ಹೆಚ್ಚು ಶಾಸಕರು (ವಿಧಾನಸಭೆಯ ಸದಸ್ಯರು) ಹಲವಾರು ವರ್ಷಗಳಿಂದ ರಕ್ತಸಿಕ್ತ ಮರಣವನ್ನು ಎದುರಿಸಿದ್ದಾರೆ. ಇಲ್ಲಿನ ಮತದಾರರು ಮುಗ್ಧರೆಂದೋ ಅಥವಾ ಅವರಿಗೆ ತಮ್ಮ ಕ್ಷೇತ್ರದ ಸಮಸ್ಯೆಗಳು ಗೊತ್ತಿಲ್ಲವೆಂದೋ ಅಲ್ಲ. ಆದರೂ ಹೆಚ್ಚಿನವರು ಆ ಆಧಾರದಲ್ಲಿ ಮತ ಹಾಕುವುದಿಲ್ಲ. ಮತದಾನಕ್ಕೆ ಅವರ ನಿಷ್ಠೆ ಮುಖ್ಯ.

ಅನಂತಪುರದಲ್ಲಿ ನಿಮ್ಮ ನಿಷ್ಠೆಯೇ ನಿಮಗೆ ಸಮಸ್ಯೆಯಾಗಿ ಕಾಡಿಬಿಡುತ್ತದೆ.

ಇದು ರಾಯಲಸೀಮೆಯ ಹಲವು ಹಳ್ಳಿಗಳ ಕಥೆ (ಅನಂತಪುರವೂ ಈ ಪ್ರದೇಶದಲ್ಲಿ ಸೇರಿದೆ). ಅದೂ ಚುನಾವಣಾ ವರ್ಷದಲ್ಲಿ. ಈ ರಾಜಕೀಯ ನಿಷ್ಠೆಯೇ ತೆಲುಗುದೇಶಂನಲ್ಲಿ ಕಲ್ಯಾಣ ಕಾರ್ಯಕ್ರಮಗಳ ಸ್ಥಿತಿಯನ್ನು ನಿರ್ಧರಿಸುತ್ತದೆ. ಬೇರೆ ಪಕ್ಷಗಳ ಕಾಲದಲ್ಲೂ ಹೀಗಾಗಿತ್ತು- ಆದರೆ ಕಳೆದ ಐದು ವರ್ಷಗಳಲ್ಲಿ ಅದು ಮುನ್ನೆಲೆಗೆ ಬಂದಿದೆ. ಇನ್ನು ಕೆಲವರು ತೆಲುಗು ದೇಶಂಗೆ ಬೆಂಬಲ ನೀಡಿದರೂ ಹೆಚ್ಚಿನ ಪ್ರಯೋಜನವಾಗಲಿಲ್ಲ. ಆದರೆ ಈಗಲೂ ಅವರ ನಿಷ್ಠೆ ಅದೇ ಪಕ್ಷಕ್ಕೆ. ಇನ್ನು ಕೆಲವರು, ಸಿನಿ ನಟನ ಕಟ್ಟಾ ಅಭಿಮಾನಿಯಂತೆ, ಅವರು ಯಾವುದೇ ರಾಜಕೀಯ ತಿರುವು ತೆಗೆದುಕೊಂಡರೂ ಅದನ್ನು ಅನುಸರಿಸಬಹುದು. ಮತ್ತು ಇತರರು ಜಾತಿ ಆಧಾರಿತ ಗುಂಪುಗಳ ಹಿಂದೆ ನಿಲ್ಲಬಹುದು.

ಆಡಳಿತಾರೂಢ ತೆಲುಗು ದೇಶಂ ಪಕ್ಷದೊಳಗೂ ಈ ನಿಷ್ಠೆ ಕೆಲಸ ಮಾಡುತ್ತಿದೆ. ರಾಪ್ತಾಡು ಕ್ಷೇತ್ರದ ಸಣ್ಣ ತೆಲುಗು ದೇಶಂ ಮುಖಂಡರೊಬ್ಬರು ತಮ್ಮ ತುರ್ತುಪರಿಸ್ಥಿತಿಯ ಹೊರತಾಗಿಯೂ ಸಾಲ ಪಡೆಯಲು ತಮ್ಮ ಪಕ್ಷವು ಸಹಾಯ ಮಾಡದ ಕಾರಣ ಪ್ರಸ್ತುತ ಅಸಮಾಧಾನಗೊಂಡಿದ್ದಾರೆ. ಪಕ್ಷದೊಳಗಿನ ಈ ಗುಂಪುಗಾರಿಕೆಯಿಂದ ಅಧಿಕಾರ ಹೇಗೆ ಕೆಲಸ ಮಾಡುತ್ತದೆ ಮತ್ತು ಲಾಭವಾಗುತ್ತದೆ ಎಂದು ಕಾರ್ಯಕರ್ತರು ಬೆರಳು ಮಾಡಿ ತೋರಿಸುತ್ತಾರೆ. ನಿಷ್ಠೆ ಮತ್ತು ಜಾತಿ ಎರಡರಲ್ಲೂ ನಾಯಕತ್ವಕ್ಕೆ ಹತ್ತಿರವಾಗಿರುವವರು ಹೆಚ್ಚು ಪ್ರಯೋಜನ ಪಡೆಯುತ್ತಾರೆ. ಆದರೆ ಇದರಲ್ಲಿ ಪಕ್ಷದ ಇತರರು ಭಾಗಿಯಾಗಿರುವುದೂ ನಿಜ.

“ಅವನು [ಸಣ್ಣ ನಾಯಕ] ಕೇಳುತ್ತಿದ್ದ ಲೋನ್‌ ಇನ್ನೇನು ಸಿಗುವುದರಲ್ಲಿತ್ತು. ಆದರೆ ಕೊನೆಗೆ ಅದೇಕೊ ಅದು ಮಂಜೂರಾಗಲಿಲ್ಲ. ಅದಾಗ್ಯೂ ಇಂತಹ ಸಣ್ಣ ವಿಷಯಗಳಿಗೆ ಬೆಲೆ ಕೊಟ್ಟರೆ ಒಳ್ಳೆಯದಲ್ಲ.” ಎಂದು ಟಿಡಿಪಿ ಕಾರ್ಯಕರ್ತರೊಬ್ಬರು ವಿವರಿಸುತ್ತಾರೆ. ಅನೇಕ ಸಂದರ್ಭಗಳಲ್ಲಿ, ಸರ್ಕಾರಿ ಸಾಲ ಅಥವಾ ಯೋಜನೆಯ ಅನುಮೋದನೆಯ ಅವಕಾಶಗಳು ಅರ್ಜಿದಾರ ಯಾರು ಎನ್ನುವುದರ ಮೇಲೆ ಅವಲಂಬಿತವಾಗಿರುತ್ತದೆ.

ಕಳೆದ ಹಲವು ವರ್ಷಗಳಿಂದ ರಾಪ್ತಾಡು ತೆಲುಗು ದೇಶಂ ಪಕ್ಷದ ಭದ್ರಕೋಟೆ ಎಂದು ಪರಿಗಣಿಸಲಾಗಿದೆ. ಆದರೆ, ರಾಜ್ಯದಲ್ಲಿ ಸರ್ಕಾರ ಬದಲಾದರೆ ಈ ಗ್ರಾಮದ ಸಮೀಕರಣಗಳು ಬದಲಾಗಬಹುದು. 2004ರ ವಿಧಾನಸಭಾ ಚುನಾವಣೆಯಲ್ಲಿ ತೆಲುಗು ದೇಶಂ ಸೋಲಿನ ನಂತರ ಸ್ಥಳೀಯ ಶಾಸಕಿ ಪರಿಟಾಲ ಸುನೀತಾ ಅವರ ಪತಿ ಪರಿಟಾಲ ರವೀಂದ್ರ ಅವರನ್ನು ಹಾಡುಹಗಲೇ ಹತ್ಯೆ ಮಾಡಲಾಗಿತ್ತು.

ಈ ಹತ್ಯೆಗಳು ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ನಡೆದ ಕೌಟುಂಬಿಕ ಕಲಹದ ಪರಾಕಾಷ್ಠೆಯಾಗಿದೆ. ರಾಮ್ ಗೋಪಾಲ್ ವರ್ಮಾ ಈ ಎರಡು ತಲೆಮಾರಿನ ಸುದೀರ್ಘ ಕತೆಯನ್ನು ಆಧರಿಸಿ ರಕ್ತ ಚರಿತ್ರ ಎನ್ನುವ ಎರಡು ಭಾಗಗಳ ಚಲನಚಿತ್ರವನ್ನು ಮಾಡಿದ್ದಾರೆ. ಕೊಲೆಯಾದ ಶಾಸಕ ಪರಿಟಾಲ ರವೀಂದ್ರ ಅವರಿಂದ ಪ್ರೇರಿತವಾದ ಪಾತ್ರದ ಹತ್ಯೆಯ ನಂತರ, ಚಿತ್ರವು ಮಗುವಿನ ಜನನದೊಂದಿಗೆ ಕೊನೆಗೊಳ್ಳುತ್ತದೆ. ವಿಚಿತ್ರವೆಂದರೆ, ಕುತೂಹಲಕಾರಿಯಾಗಿ, ಪರಿಟಾಲ ಅವರ ಪುತ್ರ ಶ್ರೀರಾಮ್ ಈಗ ತೆಲುಗು ದೇಶಂ ಟಿಕೆಟ್‌ ಮೂಲಕ ರಾಪ್ತಾಡು ಕ್ಷೇತ್ರದಿಂದ ಆಂಧ್ರ ರಾಜಕೀಯಕ್ಕೆ ಪ್ರವೇಶಿಸುತ್ತಿದ್ದಾರೆ.

ರಾಯಲಸೀಮಾ ಪ್ರದೇಶದ ಸ್ವಾತಂತ್ರ್ಯಾನಂತರದ ರಾಜಕೀಯ ಇತಿಹಾಸವು ಕೊಲೆ ಮತ್ತು ಹಿಂಸಾಚಾರದಲ್ಲಿ ಮುಳುಗಿ ಹೋಗಿದೆ. ನಿಷ್ಠೆ ಮತ್ತು ಗುಂಪುಗಾರಿಕೆ ಅನೇಕರನ್ನು ಕೊಂದಿದೆ (ಕೊಲೆಗಾರರನ್ನಾಗಿಸಿದೆ). ವೈಎಸ್‌ಆರ್ ಕಾಂಗ್ರೆಸ್‌ನ ಜಗನ್ಮೋಹನ್ ರೆಡ್ಡಿ ಅವರ ಕಡಪ (2010ರಲ್ಲಿ ವೈಎಸ್‌ಆರ್ ಎಂದು ಮರುನಾಮಕರಣ ಮಾಡಲಾಯಿತು) ಸಹ ರಣರಂಗವಾಗಿದೆ. ಜಗನ್ಮೋಹನ್ ಅವರು ದಿವಂಗತ ಮುಖ್ಯಮಂತ್ರಿ ವೈಎಸ್ ರಾಜಶೇಖರ ರೆಡ್ಡಿ (ವೈಎಸ್ಆರ್ ಎಂದು ಜನಪ್ರಿಯರಾಗಿದ್ದಾರೆ) ಅವರ ಮಗ. ವೈಎಸ್ಆರ್ 2009ರಲ್ಲಿ ಅಪಘಾತವೊಂದರಲ್ಲಿ ನಿಧನರಾದರು. ಕಾಂಗ್ರೆಸ್ ತೊರೆದ ನಂತರ ಜಗನ್ಮೋಹನ್ ಅವರು ಸ್ಥಾಪಿಸಿದ ವೈಎಸ್ಆರ್ ಕಾಂಗ್ರೆಸ್ ಪಕ್ಷವು ಆಂಧ್ರಪ್ರದೇಶ ವಿಧಾನಸಭೆ ಚುನಾವಣೆಯಲ್ಲಿ ಪ್ರಬಲ ಸ್ಪರ್ಧಿ ಎಂದು ಪರಿಗಣಿಸಲಾಗಿದೆ.

ಆಳುವವರೂ ಕೊಲೆಯಿಂದ ಪಾರಾಗಿಲ್ಲ. ವೈಎಸ್‌ಆರ್ ತಂದೆ ವೈಎಸ್ ರಾಜ್ ರೆಡ್ಡಿ ಅವರನ್ನು 1999ರಲ್ಲಿ ಹತ್ಯೆ ಮಾಡಲಾಗಿತ್ತು. 1993ರಲ್ಲಿ ಅಂದಿನ ಶಾಸಕರಾಗಿದ್ದ ಮಾಜಿ ಸಚಿವರೊಬ್ಬರು ಕೊಲೆ ಆರೋಪಿ ಎಂದು ತೀರ್ಪು ನೀಡಿ ಹೈಕೋರ್ಟ್‌ನಿಂದ ಖುಲಾಸೆಗೊಂಡಿದ್ದರು. ಈ ವರ್ಷದ ಮಾರ್ಚ್‌ನಲ್ಲಿ ವೈಎಸ್‌ಆರ್ ಸಹೋದರ ವಿವೇಕಾನಂದ ರೆಡ್ಡಿ ಅವರನ್ನು ಪುಲಿವೆಂದುಲದಲ್ಲಿರುವ ಅವರ ನಿವಾಸದಲ್ಲಿ ಹತ್ಯೆ ಮಾಡಲಾಗಿತ್ತು. ಜಗನ್ಮೋಹನ್ ರೆಡ್ಡಿ ಈ ಕ್ಷೇತ್ರದ ಹಾಲಿ ಶಾಸಕರಾಗಿದ್ದು, ಈ ಬಾರಿಯೂ ಇಲ್ಲಿಂದಲೇ ಸ್ಪರ್ಧಿಸಲಿದ್ದಾರೆ.

ಕಡಪ ಲೋಕಸಭಾ ಕ್ಷೇತ್ರದ ವೈಎಸ್‌ಆರ್ ಕಾಂಗ್ರೆಸ್ ಸಂಸದ ಅವಿನಾಶ್ ರೆಡ್ಡಿ ಅವರು 2014ರಲ್ಲಿ ತೆಲುಗು ದೇಶಂ ಪ್ರತಿಸ್ಪರ್ಧಿಯನ್ನು 2 ಲಕ್ಷ ಮತಗಳಿಂದ ಸೋಲಿಸಿದ್ದರು. ಇದೇ ಸ್ಥಾನವನ್ನು 2011ರಲ್ಲಿ ಜಗನ್ಮೋಹನ್ ರೆಡ್ಡಿ ಅವರು ಕಾಂಗ್ರೆಸ್ ಅಭ್ಯರ್ಥಿಯನ್ನು ದಾಖಲೆಯ 550,000 ಮತಗಳಿಂದ ಸೋಲಿಸಿ ಗೆದ್ದಿದ್ದರು. ಆದರೆ ಈ ಬಾರಿ (ಕಡಪ ಕ್ಷೇತ್ರದಲ್ಲಿ) ಪುಲಿವೆಂದುಲ ಕ್ಷೇತ್ರದ ಬಗ್ಗೆ ಜನರಲ್ಲಿ ಕುತೂಹಲ ಹೆಚ್ಚಿದೆ.

ರಾಯಲಸೀಮೆಯಲ್ಲಿ ನಡೆದ ಹತ್ಯೆಗಳು ಸಾಂದರ್ಭಿಕ ದಂಗೆಗಳನ್ನು ಕಂಡಿವೆ. ಅನಂತಪುರದ ಹಲವು ತೆಲುಗು ದೇಶಂ ಕಾರ್ಯಕರ್ತರು ಅಧಿಕಾರ ಕಳೆದುಕೊಂಡರೆ ಸೇಡಿನ ರಾಜಕಾರಣ ನಡೆಯುವ ಭೀತಿಯಲ್ಲಿದ್ದಾರೆ. ಅಧಿಕಾರ ಕೊಟ್ಟ ಅದೇ ನಿಷ್ಠೆ ಈಗ ಅವರಿಗೆ ಅಪಾಯಕಾರಿ ಎನಿಸುತ್ತಿದೆ. ಆದರೆ, ವೈಎಸ್‌ಆರ್‌ ಕಾಂಗ್ರೆಸ್‌ ಕಾರ್ಯಕರ್ತರು ಈ ಬಾರಿಯ ಚುನಾವಣೆಯ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದ್ದು, ಅವರೂ ಸಹ ಜಾಗೃತರಾಗಿದ್ದಾರೆ. ನಾನು ತೆಲುಗು ದೇಶಂ ಬೆಂಬಲಿಗ ಎಂದು ವೈಎಸ್‌ಆರ್ ಕಾಂಗ್ರೆಸ್ ಕಾರ್ಯಕರ್ತನೊಬ್ಬ ತಪ್ಪಾಗಿ ಅರ್ಥೈಸಿಕೊಂಡಿದ್ದು, ನಾನು ʼತನಿಖೆʼ ನಡೆಸುತ್ತಿದ್ದೇನೆ ಎಂಬ ಅನುಮಾನದ ಮೇಲೆ ಪೊಲೀಸರಿಗೆ ದೂರು ನೀಡಲು ಬಯಸಿದ್ದಾನೆ. ರಾಪ್ತಾಡು ವಿಧಾನಸಭಾ ಕ್ಷೇತ್ರದ ತಮ್ಮ ಗ್ರಾಮ ವೋಡಿಪಲ್ಲಿಯಲ್ಲಿ ರೈತರ ಸಂದರ್ಶನ ನಡೆಸುವುದನ್ನು ನಿಲ್ಲಿಸಬೇಕು ಎಂದು ಕಾರ್ಯಕರ್ತ ಒತ್ತಾಯಿಸಿದರು.

ಏನೇ ಆಗಲಿ ವೈಎಸ್ ಆರ್ ಕಾಂಗ್ರೆಸ್ ಪಕ್ಷಕ್ಕೆ ನಾವೇ ಗೆಲ್ಲುತ್ತೇವೆ ಎಂಬ ನಂಬಿಕೆ ಬರಲು ಕಾರಣ ಕಲ್ಯಾಣ, ಅಭಿವೃದ್ಧಿ ಕಾರ್ಯಕ್ರಮಗಳಿಂದ ವಂಚಿತರಾಗಿರುವ ಮತದಾರರು. ಈ ಮತದಾರರಿಗೆ ಯಾವುದೇ ವ್ಯಕ್ತಿಯ ಕುರಿತು ನಿಷ್ಠೆ ಇಲ್ಲ.

ಬುಡಕಟ್ಟು ಸಮುದಾಯದ ಬುಟ್ಟಿ ಹೆಣೆಯುವ ಕಾಯಕದ ಸಾಕೆ ಗಂಗಣ್ಣ ಅವರು ಯಾವುದೇ ಪಕ್ಷ ಅಥವಾ ಗುಂಪಿನ ಬೆಂಬಲಿಗರಲ್ಲ. ಅವರ ಗುಡಿಸಲು ರಸ್ತೆ ವಿಸ್ತರಣೆಗೆ ಬಳಸಲಾಗಿದೆ. ಹಿಂದೊಮ್ಮೆ ಗಂಗಣ್ಣನ ಗುಡಿಸಲಿನ ಮುಂದೆ ತೆಲುಗುದೇಶಂ ಬೆಂಬಲಿಗರಿಗೆ ಜಾಗವಿತ್ತು. “ಅಣ್ಣ, ನನಗೆ ಒಂದು ಸೈಟು ಕೊಡು ಎಂದು ನಾನು ಅವರಿಗೆ ಹೇಳಲು ಹೋದಾಗ ಅವರು ಸಾರಾಸಗಟಾಗಿ ನಿರಾಕರಿಸಿದರು. ಅವರು ಕೊಡುವುದಿಲ್ಲ ಎಂದು ನೇರವಾಗಿ ಹೇಳಿದರು,” ಎಂದು ಹೇಳಿದರು. ಗಂಗಣ್ಣ ಈ ಬಾರಿ ವೈಎಸ್‌ಆರ್‌ ಕಾಂಗ್ರೆಸ್‌ಗೆ ಮತ ಹಾಕಲಿದ್ದಾರೆ.

ಅವರು ಬುಟ್ಟಿಗಳು ಅಥವಾ ಇತರ ಮರದ ವಸ್ತುಗಳನ್ನು ಮಾರಾಟ ಮಾಡಿ ಪ್ರತಿದಿನ ಸುಮಾರು 50 ಕಿಲೋಮೀಟರ್ ಪ್ರಯಾಣಿಸುತ್ತಾರೆ. "ನಮ್ಮ ವೃತ್ತಿಯು ಕರ-ಕೌಶಲವನ್ನು ಆಧರಿಸಿದೆ. ನಮಗೆ ಯಾವುದೇ ಭೂಮಿ ಇಲ್ಲ, ತಮ್ಮಾ, ನಾವು ರಾಜಕೀಯ ನಾಯಕರ ಬಗ್ಗೆ ತಲೆಕೆಡಿಸಿಕೊಳ್ಳುವುದಿಲ್ಲ. ನಾವು ಯಾರನ್ನಾದರೂ ಟೀಕಿಸುತ್ತೇವೆ. ವೈಎಸ್ಆರ್‌ಸಿಪಿ ತಪ್ಪು ಮಾಡಿದರೆ ನಾವು ಅದನ್ನು ಟೀಕಿಸುತ್ತೇವೆ" ಎಂದು ಗಂಗಣ್ಣ ಹೇಳುತ್ತಾರೆ. ಸರ್ಕಾರಿ ಯೋಜನೆಗಳಲ್ಲಿ ಮೂಲೆಗುಂಪಾಗಿರುವ ಗಂಗಣ್ಣನಂತಹವರ ಮತಗಳು ಆಂಧ್ರಪ್ರದೇಶದಲ್ಲಿ ಸರ್ಕಾರಗಳನ್ನು ಬದಲಿಸಬಹುದು.

ಅನುವಾದ: ಶಂಕರ. ಎನ್. ಕೆಂಚನೂರು