वाघोबा! वाघोबा! – जंगलाला आग लागली, पळा पळा पळा

नागपूर जिल्ह्याच्या रामटेक तालुक्यातल्या पिंडकपार गावातून बीरसिंग विहानला घेऊन मोटरसायकलवर निघाला. घनदाट जंगलातून काही किलोमीटर जाताच वळणावर शेजारच्या झुडपातून एक पूर्ण वाढ झालेला वाघ अचानक सामोरा आला आणि त्याने त्यांच्या मोटरसायकलवर झडप घातली आणि पंजाने वार केले.

हा सगळा भाग पेंच व्याघ्र प्रकल्पाच्या अगदी जवळ आहे. बाप लेक दोघांना गंभीर जखमा झाल्या आणि पुढचा एक आठवडा ते नागपूरच्या जिल्हा रुग्णालयात भरती होते. विहानला डोक्याला आठ टाके पडले.

विदर्भातल्या असे अनेक हल्ले होत असतात. मानव-वन्यजीव संघर्ष वाढत चालल्याची आणि हे हल्लेही वाढत चालल्याचंच त्यातून दिसतंय. याचं प्रमुख कारण म्हणजे वाघांचे आणि वन्यजिवांचे अधिवास आकसत जाणं. (वाचाः वाघांनी जायचं तरी कुठं?)