کھلے میں رفع حاجت سے ابھی پاک نہیں ہوا ہے گُنجی گاؤں

لیکن، سبھی فیملیز کے پاس دو مختلف مقامات پر دو گھر نہیں ہیں۔ لہٰذا، دو درجن سے کچھ زائد فیملیز کو یخ بستہ سردیوں میں، جب پارہ منفی ۲۰ ڈگری تک گر جاتا ہے، مجبوراً گنجی میں ہی رکنا پڑتا ہے۔ خیال رہے کہ گرمیوں میں گنجی کا درجہ حرارت تقریباً ۱۰ ڈگری سیلسیس ہوتا ہے۔

ایسا نہیں ہے کہ گنجی کوئی گمنام جگہ ہے –  یہ ہند-چین سرحد پر واقع سب سے بڑے گاؤوں میں سے ایک ہے۔ اس گاؤں میں انڈو تبتی بارڈر پولیس (آئی ٹی بی پی) کا ایک کیمپ، سشستر سیما بل (ایس ایس بی) کا ایک کیمپ اور ایک کسٹم آفس واقع ہیں، ساتھ میں اسٹیٹ بینک آف انڈیا اور پوسٹ آفس کی عارضی شاخیں بھی ہیں جو سال میں صرف چھ مہینے ہی کھلی رہتی ہیں۔

لیکن ۱۹۴ فیملیز (مردم شماری ۲۰۱۱ کے مطابق) پر مشتمل اس گاؤں میں صرف ایک قابلِ استعمال بیت الخلاء ہے، وہ بھی انٹیلی جنس بیورو (آئی بی) کے دفتر کا ہے۔ بین الاقوامی سرحد کے قریب ہونے کی وجہ سے غیر قانونی تجارت کے امکانات کے مدنظر اور کیلاش مانسروور یاترا کے زائرین کا راستہ ہونے وجہ سے آئی بی گُنجی میں موجود رہتی ہے۔ تاہم آئی بی کے بیت الخلاء میں بھی نل کے پانی کی سپلائی نہیں ہے۔ رفع حاجت کے لیے نل سے بالٹی میں پانی لے کر اندر جانا پڑتا ہے۔

گاؤں میں صرف ایک نل ہے، جو قریب سے گزرنے والی کُٹی-یانگتی ندی سے منسلک ہے۔ یہاں کے لوگ اس پانی کو پینے، نہانے اور کپڑے دھونے کے لیے استعمال کرتے ہیں۔ سردیوں میں جب گنجی اور اس کے ارد گرد کے پہاڑ برف سے ڈھک جاتے ہیں اور نلوں میں پانی جم جاتا ہے، تو پھر ڈیڑھ کلومیٹر دور منیلا میں تعینات جنرل ریزرو انجینئر فورس (جی آر ای ایف) گنجی کے رہائشیوں کو کبھی کبھار پینے کا پانی فراہم کرتی ہے۔

پتھورا گڑھ ضلع (جہاں گنجی گاؤں واقع ہے) کو پینے کے پانی اور صفائی ستھرائی کی وزارت نے ۱۵ اپریل ۲۰۱۷ کو کھلے میں رفع حاجت سے پاک (او ڈی ایف) قرار دے دیا تھا۔ سووچھ بھارت مشن، گرامین (ایس بی ایم، دیہی) کے تحت اس سال ۲۳ جون کو (سِکّم، ہماچل پردیش اور کیرالہ کے بعد) دیہی اتراکھنڈ کو ہندوستان میں رفع حاجت سے پاک چوتھی ریاست قرار دیا گیا تھا۔ اس مہم کا دعویٰ ہے کہ اتراکھنڈ کے تمام ۱۵۷۵۱ گاؤں میں اب کوئی بھی کھلے میں رفع حاجت نہیں کرتا ہے۔

دھارچولا کے بلاک آفس میں ایس بی ایم کے ریکارڈ سے معلوم ہوتا ہے کہ دریائے کالی کے کنارے واقع دھارچولا میں گنجی کی ہر ایک فیملی کے موسم سرما کے گھر میں بیت الخلاء موجود ہے۔ لیکن گاؤں والوں کا کہنا ہے کہ وہ پانی کی کمی کی وجہ سے اپنے سردیوں کے گھروں میں قیام کے دوران بھی رفع حاجت کے لیے کھلے میں جاتے ہیں۔

سردیوں کے مہینے میں بھی گنجی میں ہی قیام کرنے والے پھل سنگھ گنجیوال کا کہنا ہے، ’’یہاں کوئی بیت الخلاء نہیں ہے، کیونکہ ہمارے پاس پانی نہیں ہے۔ گرمیوں میں ہمیں پائپ کنکشن کے ذریعہ پانی ملتا ہے، لیکن اس وقت تک ہر شخص دھارچولا سے واپس گُنجی آ جاتا ہے، اس لیے یہاں سب کو بہت کم پانی ملتا ہے۔‘‘

ایس بی ایم کے پروجیکٹ مینیجر اور ضلع کے رابطہ کار، دیپ چندر پونیتھا کا کہنا ہے کہ منریگا سمیت مختلف اسکیموں کے تحت بالائی ہمالیہ کے دیہاتوں میں کمیونٹی ٹوائلٹ بنائے گئے ہیں۔ وہ کہتے ہیں، ’’اونچائی پر بسے دیہاتوں میں جگہ کی کمی کی وجہ سے دھارچولا کے مہاجرت والے ۲۱ گاؤوں میں کمیونٹی ٹوائلٹ بنائے جا رہے ہیں۔‘‘

لیکن پانی کی فراہمی کے بغیر بیت الخلاء کیسے بنائے جا رہے ہیں؟ اور نئے بنائے گئے بیت الخلاء مقفل کیوں ہیں؟ گُنجی کی گرام پردھان ارچنا گنجیوال اس کی ایک عجیب وجہ بتاتی ہیں: ’’یہ نئے بیت الخلاء ہیں۔ پانی کے بغیر گاؤں والے انہیں گندا کر دیں گے۔‘‘ تو پھر انہیں پانی کی سپلائی والے نل سے کب جوڑا جائے گا؟ ’’اس میں وقت لگے گا۔ ہمیں پانی کی پائپ کے مزید کنکشن تیار کرنے ہوں گے۔ جب تک ایسا نہیں ہوتا ہم ان کا استعمال نہیں کر سکتے،‘‘ وہ مزید کہتی ہیں۔

اس دوران لوگ کھلے میں رفع حاجت کرتے رہے ہیں، حالانکہ سرکاری ریکارڈ بتاتے ہیں کہ گاؤں میں فعال بیت الخلاء موجود ہیں۔ اور ایس بی ایم کی باقاعدگی سے بُنی جانے والی کامیابی کی متعدد کہانیوں میں سے گُنجی کی کہانی کسی بھی طرح سے غیر معمولی نہیں ہے۔ گنجی سے تقریباً ۱۹ کلومیٹر دور، ۴۵۰۰ میٹر کی اونچائی پر واقع کُٹی گاؤں کے ۳۶۳ رہائشیوں پر چار بیت الخلاء تھے، دو مردوں کے لیے اور دو عورتوں کے لیے۔ لیکن ان میں سے دو کی حالت انتہائی خستہ ہے۔ دیگر دو کا فضلہ بظاہر سیپٹک ٹینک میں گرتا  ہے، لیکن وہاں کوئی نل نہیں ہے، حالانکہ قریب میں دو پائپ موجود ہیں جن سے پانی نکلتا رہتا ہے۔ کُٹی گاؤں کی پاروتی دیوی کہتی ہیں، ’’ہم رفع حاجت کے لیے لیٹرین کو اور پیشاب کے لیے بنجر کھیتوں کا استعمال کرتے ہیں اور اندھیرے میں اپنے گھروں کے قریب ہی پیشاب کرتے ہیں۔‘‘ پاروَتی کے شوہر انڈو تبتی بارڈر پولیس سے ریٹائر ہوئے ہیں۔

بعض معاملوں میں گاؤں کے لوگ ہی تبدیلی کی مخالفت کرتے رہے ہیں۔ کُٹی گاؤں کی ایک بزرگ کسان، سکھ متی دیوی کہتی ہیں، ’’ہمارے اسلاف مدتوں سے اسی طرح زندگی گزارتے چلے آ رہے ہیں۔ ہم اسے کیسے چھوڑ سکتے ہیں اور جب کوئی باہر والا ایسا کرنے کو کہے، تو ہم اچانک کیسے بدل سکتے ہیں؟‘‘

سووچھ بھارت مشن کی مہم کا دعویٰ ہے کہ اکتوبر ۲۰۱۹ تک وہ ’کلین انڈیا‘ کے اپنے وژن کو حاصل کر لے گا۔ لیکن زیادہ تر بیت الخلاء پانی کی سپلائی کے بغیر تعمیر کیے جا رہے ہیں، اور لوگ ناقص ٹوائلٹ استعمال کرنے سے گریزاں ہیں، اس لیے اس عظیم الشان منصوبے سے کچھ بدبو تو آ رہی ہے۔

مترجم: شفیق عالم