نوٹ بندی کے سبب بیڑی کارخانے بند

ایسا پہلی بار ہے کہ منورا بیوہ کو خالی بیٹھنا پڑا ہے۔ فیکٹری بند پڑی ہے، منشی ۲۰ سے زیادہ دنوں سے غائب ہے، اور ان کے پاس اب اپنی فیملی کا پیٹ بھرنے کے لیے پیسے نہیں بچے ہیں۔ منورا کہتی ہے کہ انہیں معلوم ہے کہ اس ملک کے کچھ حصے میں کچھ لوگ کسی ’سیاہ چیز‘ سے لڑ رہے ہیں اور وہی ان کی خستہ حالی کا سبب ہے۔

۴۵ سالہ منورا گزشتہ ۱۷ برسوں سے بیڑیاں باندھنے کا کام کرکے اپنی فیملی کے لیے روزی روٹی کما رہی ہیں – ۱۰۰۰ بیڑیاں باندھنے پر انہیں ۱۲۶ روپے ملتے تھے۔ انہوں نے یہ کام اپنے شوہر کے اس دنیا سے گزرنے کے بعد شروع کیا تھا؛ اس بے زمین جوڑے کے دو بیٹے تھے، اور چھوٹا بیٹا اس وقت صرف چھ سال کا تھا۔ وہ جب تک جوان تھیں، ایک دن میں ۲۰۰۰ بیڑیاں باندھ لیتی تھیں؛ اب صرف ۵۰۰ بیڑیاں باندھ پاتی ہیں۔

ریاستی حکومت کے لیبر محکمہ کے مطابق، مغربی بنگال میں گھر پر کام کرنے والے بیڑی مزدوروں میں ۷۰ فیصد سے زیادہ خواتین ہیں۔ مغربی بنگال کے مرشد آباد ضلع کے جنگی پور سب ڈویژن کے بیڑی کارخانے کے منشی (ٹھیکہ دار، جو کارکنوں کے گھروں میں خام مال تقسیم کرتا ہے اور تیار مال کو اکٹھا کرتا ہے)، منیر الحق کہتے ہیں، ’’اگر یہاں کوئی جوان عورت بیڑی بنانے کی ماہر نہ ہو، تو اس کے لیے اچھا شوہر ملنا بھی مشکل ہے۔‘‘

ایک اندازہ کے مطابق مغربی بنگال میں بیڑی کے بڑے بڑے برانڈز کی تقریباً ۹۰ رجسٹرڈ فیکٹریوں میں لگ بھگ ۲۰ لاکھ بیڑی بنانے والے (انڈسٹری میں اور گھر پر) کام کرتے ہیں۔ سینٹر آف انڈین ٹریڈ یونینس کے مقامی دفتر کے مطابق، ۱۰ لاکھ کارکنوں، ۱۸ بڑے کارخانوں، اور ۵۰ چھوٹے کارخانوں کے ساتھ جنگی پور اس صنعت کا بڑا مرکز ہے؛ اور ان کارکنوں میں سے ۹۰ فیصد آبادی گھر سے کام کرتی ہے۔

لیکن ۸ نومبر، ۲۰۱۶ کو نوٹ بندی کے اعلان کے بعد یہ سب پوری طرح بدل چکا ہے۔ بیڑی کے بڑے کارخانوں نے دکانیں بند کر لی ہیں۔ بیڑی بنانے والوں کے پاس نہ نوکری بچی ہے نہ ہی پیسہ، اور گھر پر کھانے کی بھی تنگی ہے۔ جن کو اب بھی کام مل رہا ہے ان کے آرڈر گھٹ گئے ہیں، اور ہفتہ واری آمدنی رک گئی ہے۔ مثال کے طور پر، پتاکا بیڑی، جو کہ یہاں کا سب سے بڑا برانڈ ہے، اور شیو بیڑی فیکٹری، جس کے مالک وزیر مملکت برائے لیبر ذاکر حسین ہیں، نوٹ بندی کے ایک ہفتہ کے اندر بند ہوگئی۔

جو کارخانے اب بھی چل رہے ہیں وہ نوٹوں کی بھاری کمی کے سبب فیکٹری کو جلد ہی بند کرنے کا فیصلہ لینے کے بارے میں سوچ رہے ہیں۔ یہاں پر تمام قسم کی ادائیگی نقدی میں ہی ہوتی ہے۔ جنگی پور کے اورنگ آباد میں واقع جہانگیر بیڑی فیکٹری کے مالک، ایمانی بسواس کہتے ہیں، ’’مجھے منشیوں کے ذریعہ کارکنوں کو ہر ہفتے ایک سے ڈیڑھ کروڑ روپے ادا کرنے پڑتے ہیں۔ اور بینک ہر دن مجھے صرف ۵۰ ہزار روپے اپنے موجودہ اکاؤنٹ سے نکالنے دے رہا ہے – اور اس کی بھی کوئی گارنٹی نہیں ہوتی ہے۔ اس طرح میں اپنا کاروبار کیسے چلا سکتا ہوں؟ ابھی تو کسی طرح میں سنبھال رہا ہوں… مگر نقد پیسوں کے بغحیر کارخانہ چلانا ممکن نہیں ہے اور کچھ دنوں میں مجھے اسے مجبوراً بند ہی کرنا پڑے گا۔‘‘

مرشد آباد بیڑی صنعت کے جو کارکن گھر پر رہ کر کام کرتے ہیں، انہیں ہفتے کے حساب سے اجرت دی جاتی ہے – ۱۰۰۰ بیڑی باندھنے پر ۱۲۶ روپے۔ کام میں گزارے گئے گھنٹوں کے حساب سے، ہر کارکن کو ہفتہ بھر میں ۴۰۰ روپے سے ۲۰۰۰ روپے تک مل جاتے ہیں۔ اورنگ آباد بیڑی اونرس ایسو سی ایشن کے جنرل سکریٹری، راج کمار جین بتاتے ہیں کہ یہاں کے سبھی کارخانوں کے منشی، کارکنوں کو ہفتہ واری ادائیگی کے طور پر ۳۵ کروڑ روپے چکاتے ہیں، تاکہ پیداوار کی مقدار برقرار رہے۔

کچھ لوگ مصیبت کی اس گھڑی کا فائدہ اٹھانے کی کوشش کر رہے ہیں۔ مرشد آباد ضلع کے جنگی پور، دھولیان اور شمشیر گنج کے کچھ حصوں میں حکومت کے ذریعہ طے کردہ کم از کم مزدوری کی شرح کی خلاف ورزی کرتے ہوئے، کارکنوں کو ۱۰۰۰ بیڑیاں بنانے کے لیے صرف ۹۰ روپے دیے جار ہے ہیں۔

نہ صرف یہ کہ بیڑیوں کی پیداوار کم ہو گئی ہے، بلکہ نقدی کی کمی کی وجہ سے ان کی فروخت پر بھی برا اثر پڑا ہے۔ اورنگ آباد بیڑی اونرس ایسوسی ایشن کے اندازہ کے مطابق، مرشد آباد سے ملک کے دیگر حصوں میں جانے والی بیڑیوں کی مقدار ۵۰ فیصد کم ہو چکی ہے۔ فروخت نہ ہونے والی بیڑیوں کے بورے، فیکٹری کے گوداموں میں جمع ہوتے جا رہے ہیں۔

غیر منظم شعبہ کے سب سے کمزور طبقہ کے مزدوروں پر اس کا تباہ کن اثر پڑا ہے۔ ۶۸ سالہ محمد سیف الدین ایک منشی ہیں اور ۳۰ سال جہانگیر بیڑی فیکٹری میں کام کر رہے ہیں۔ ان کا کہنا ہے، ’’ہماری زندگی کا مکمل انحصار بیڑیوں پر ہی ہے۔ ضلع کے اس حصہ میں زیادہ تر کنبوں کا یہی ایک واحد ذریعہ معاش ہے۔ یہاں کے زیادہ تر لوگ بے زمین ہیں اور انہیں کھیتی کے بارے میں کوئی جانکاری نہیں ہے۔ یہاں پر کوئی اور صنعت موجود نہیں ہے۔ پہلے ہفتہ میں تو ہم نے کارکنوں کو ۵۰۰ اور ۱۰۰۰ روپے کے پرانے نوٹ دے کر کسی طرح اپنا کام چلا لیا تھا۔ لیکن، اب اس سے کام نہیں چل پا رہا ہے۔ فیکٹریوں سے آرڈر نہیں مل رہا ہے۔ اس لیے، کام نہیں بچا ہے اور کارکنوں کو گزشتہ تین ہفتے سے پیسے بھی نہیں دیے گئے ہیں۔ انہیں کافی پریشانی اٹھانی پڑ رہی ہے۔‘‘

سیف الدین کہتے ہیں کہ پچھلی تین دہائیوں میں انہوں نے ایسا بحران پہلے کبھی نہیں دیکھا۔ ’’ہماری فیکٹری ابھی بند تو نہیں ہوئی ہے، لیکن پیداوار میں بھاری گراوٹ آئی ہے۔ جب میں محدود آرڈر اور خام مال کے ساتھ گاؤوں میں جاتا ہوں، تو لوگ میرے پیچھے بھاگتے ہیں اور بھیڑ جمع ہو جاتی ہے۔ ہر کسی کو اپنی فیملی کا پیٹ بھرنے کے لیے کام کی ضرورت ہے۔ لیکن میں بے یار و مددگار ہوں۔‘‘

کئی ہفتے تک کام اورپیسے نہ ملنے کے بعد، مرشد آباد کے تمام بیڑی کارکن بھوک مری کے دہانے پر پہنچ گئے ہیں۔ ان کی بچت تیزی سے ختم ہو رہی ہے، اور طاہرہ بی بی جیسے کچھ لوگ اب دن میں صرف ایک وقت کا کھانا کھا کر گزارہ کر رہے ہیں۔ اپنے ماں باپ کے انتقال کے بعد، وہ گزشتہ ۵۰ برسوں سے بیڑی باندھنے کا کام کر رہی ہیں۔ ۵۸ سال کی عمر میں بھی وہ اپنے ایک بیٹے کو سنبھال رہی ہیں، جو چنئی میں مہاجر مزدور کے طور پر کام کرتا تھا، لیکن کچھ سال پہلے پیروں میں گہرا زخم آنے کی وجہ سے اسے گھر لوٹنا پڑا؛ ان کی بیٹی کی ابھی شادی نہیں ہوئی ہے۔ بیڑیاں ہی ان کی فیملی کی آمدنی کا واحد ذریعہ ہیں۔ طاہرہ روزانہ ۱۰۰۰ سے ۱۲۰۰ بیڑیاں بناتی ہیں اور حال ہی میں انہیں تمباکو کے مسلسل رابطہ میں رہنے کی وجہ سے ٹیوبر کلوسس (ٹی بی) ہو گیا ہے۔ وہ کہتی ہیں، ’’میں بیمار ہوں، لیکن بیڑی نہیں ہوگی تو ہمارے پاس کھانا بھی نہیں ہوگا۔ میری راتوں کی نیندیں حرام ہو گئی ہیں۔‘‘

تصویر: ارونَو پاترا

مترجم: محمد قمر تبریز