ओकर बर विराट कोहली देंवता कस रहिस. अऊ वो ह बाबर आजम ला पसंद करत रहिस. जब कोहली ह शतक बनाय त वो ह वोला छेड़य, अऊ जब बाबर आजम हा बढ़िया पारी खेलत, त वोला चिढ़ावत रहय. क्रिकेट ला लेके हँसी ठिठोली आयशा अऊ नुरुल हसन के मया-पिरित के भाखा रहिस, अऊ ये ह अतक जियादा रहिस के ओकर तीर-तखार के लोगन मन ये जान के अक्सर हैरान हो जावंय के वो दूनों के 'अरेंज मैरिज (घर के लोगन मनके तय करे बिहाव)’ होय हवय.
जून 2023 मं जब क्रिकेट वर्ल्ड कप के टाइम टेबल आइस त आयशा के आंखी खुसी ले नाचे लगिस. भारत अऊ पाकिस्तान के मुकाबला 14 अक्टूबर मं गुजरात के अहमदाबाद मं तय रहिस. बुड़ती महाराष्ट्र मं अपन मायका राजाचे कुर्ले गांव मं बइठे 30 बछर के आयशा सुरता करत कहिथे, “मंय नुरुल ले कहेंव के हमन ला स्टेडियम मं जाके देखे ला चाही. भारत अऊ पाकिस्तान सायदेच द्विपक्षीय मैच खेलथें. हमर दूनों के पसंदीदा खिलाड़ी मन ला एके संग देखे के ये ह दुब्भर मऊका आय.”
30 बछर के नुरुल, जऊन ह सिविल इंजीनियर आय, कुछेक लोगन मन ला फोन करिस अऊ दू ठन टिकट भिड़ा लीस, जेकर सेती ये जोड़ा ह भारी खुश रहिस. आयशा तब तक ले छै महिना के गरभ धरे रहिस येकरे सेती वो मन भारी चेत धरे सतारा जिला के अपन गाँव पुसेसावली से अढाई सौ कोस दूरिहा (750 किमी) जाय के बिचार करिन. ट्रेन के टिकिट घलो होगे रहिस अऊ रहे के बेबस्था होगे. आखिर वो दिन आ गे फेर ये जोड़ा ह पहुंचे नई सकिस.
14 अक्टूबर, 2023 के बिहान, नुरुल ला गुजरे महिना भर हो गे रहिस, अऊ आयशा के दुनिया तबाह होगे रहिस.
*****
18 अगस्त, 2023 मं महाराष्ट्र के सतारा शहर के करीबन 20 कोस (60 किमी) दूरिहा मं बसे एक गाँव पुसेसावली मं एक ठन स्क्रीनशॉट वायरल होईस. गांव के 25 बछर के मुसलमान लइका आदिल बागवान ला इंस्टाग्राम कमेन्ट मं हिंदू देंवता मन ला गाली देवत देखे गीस. ये बखत, आदिल के कहना रहिस के स्क्रीनशॉट ला बदले गे हे हवय, अऊ इहाँ तक ले ओकर इंस्टाग्राम मं ओकर संगवारी मन घलो असल कमेन्ट नई देखे रहिन.
वइसे, कानून बेवस्था मं कऊनो गड़बड़ी झन होवय, येकर सेती, पुसेसावली मं मुसलमान समाज के सियान मन वोला पुलिस करा ले गीन अऊ ओकर ले स्क्रीनशॉट के जाँच करे ला कहिन. पुसेसावली गांव मं गैरेज चलेइय्या 47 बछर के सिराज बागवान कहिथे, “हमन ये घलो कहे रहेन के गर आदिल दोसी मिलथे त वोला सजा मिले ला चाही अऊ हमन येकर निंदा करबो. पुलिस ह आदिल का फोन जब्त करिस अऊ ओकर खिलाफ दू धरम मं दुश्मनी बगराय के आरोप के शिकायत दरज करिस.”
पुसेसावली गांव मं गैरेज चलेइय्या 47 बछर के सिराज बागवान कहिथे, ‘हमन ये घलो कहे रहेन के गर आदिल दोसी मिलथे त वोला सजा मिले ला चाही अऊ हमन येकर निंदा करबो’
ओकर बाद घलो, सतारा मं दूर-दराज के हिंदू मंडली के गुस्साय लोगन मन दूसर दिन पुसेसावली मं एक ठन रैली निकारिन, जेन मं मुसलमान मन के खिलाफ भारी हिंसा करे के अपील करे गीस. वो मन कानून ला अपन हाथ मं लेय के धमकी घलो दीन.
सिराज अऊ मुस्लिम समाज के दीगर सियान मन, जेन मन इहाँ के पुलिस थाना ले स्क्रीनशॉट के निष्पक्ष जांच करे ला कहे रहिन, वो मन पुसेसावली मं दीगर मुस्लिम बासिंदा के सुरच्छा के गुहार घलो करिन, जेकर मन के येकर ला कऊनो लेना-देना नई रहिस. सिराज सुरता करथे, “हमन पुलिस ला बतायेन के दंगा होय के भारी अंदेसा हवय. हमन वोला रोके के गुहार करेन.”
वइसे, सिराज के मुताबिक, पुसेसावली जेन ह औंध पुलिस थाना मं आथे, ओकर सहायक पुलिस निरीक्षक गंगाप्रसाद केंद्रे ह ओकर मन के मजाक उड़ाइस. वो ह सुरता करथे, “वो मन हमन ले पुछिन के हमन पैगंबर मोहम्मद ला काबर मानेन, वो त सधारन मइनखे रहिस. वोला बिस्वासच नई होवत रहिस के एक झिन वर्दीधारी मइनखे ह अइसने बात करही.”
अवेइय्या दू हफ्ता तक, दू ठन कट्टरपंथी दक्षिणपंथी मंडली - हिंदू एकता और शिवप्रतिष्ठान हिंदुस्तान- के लोगन मन पुसेसावली मं कऊनो घलो मुसलमान मरद लोगन मन ला रोकेंव, अऊ वो मन ला जय श्री राम के नारा लगाय बर मजबूर करेंव, अऊ वो मन के घर ला जलाय के धमकी देंवय. गाँव खतरा मं रहिस अऊ लोगन मन मं बैचेनी साफ झलकत रहिस.
8 सितंबर मं अइसने दू ठन अऊ स्क्रीनशॉट 23 बछर के मुजम्मिल बागवान अऊ 23 बछर के अल्तमश बागवान के नांव ले वायरल हो गे. दूनों पुसेसावली के बासिंदा आंय अऊ आदिल जइसनेच इंस्टाग्राम पोस्ट मं हिंदू देंवता मन ला गाली देवत रहिन. आदिल जइसने, दूनों लइका के कहना आय के स्क्रीनशॉट फ़ोटोशॉप करे गे रहिस. ये पोस्ट मं मुसलमान मइनखे मन हिंदू मन के खिलाफ गाली गलौज करे रहिन.
कट्टर हिंदू मंडली मन के ऊपर ये जिनिस बनाय के आरोप हवय.
पांच महिना ले जियादा बखत होगे हवय, अऊ पुलिस ह अब तक ले तीनों स्क्रीनशॉट के प्रामाणिकता के जांच करत हवय.
फेर जेन नुकसान होवेइय्या रहिस वो हो चुके हवय- गाँव, जेन ह पहिलीच ले सांप्रदायिक तनाव के कगार मं रहिस, दंगा मं बदल गे. 9 सितंबर के दिन पुसेसावली मं इहाँ के मुसलमान मन के येकर निदान के कऊनो कोसिस काम नई आइस.
10 सितंबर मं बेर बूड़े के बाद सौ ले जियादा भारी दक्षिणपंथी हिंदू मन के बगियाय भीड़ ह गाँव मं घुसके मुसलमान मन के दुकान, गाड़ी अऊ घर मं आगि धरा दीन अऊ तोड़फोड़ करिन. मुस्लिम समाज के लोगन मन के अंदाजा मुताबिक, 29 परिवार ला निशाना बनाय गीस, अऊ जम्मो करके 30 लाख के नुकसान होईस. कुछेक मिनट मं जिनगी भर के कमई राख बन गे.
सितंबर ले पुसेसावली मं मस्जिद के पार जरे गाड़ी उहिंचे परे हवंय
43 बछर के अशफाक बागवान, जेन ह पुसेसावली मं एक ठन ई-सेवा केंद्र (च्वाइस सेंटर) चलाथें, अपन फोन निकारथे अऊ ये रिपोर्टर ला बइठे दुब्बर डोकरा सियान के फोटू दिखाथें. भूंइय्या मं, ओकर मुड़ खून ले सनाय रहिस. वो ह सूरता करथे, “जब वो मन मोर खिड़की मं पथराव करिन, त कांच ह टूट गे अऊ मोर ददा के मुड़ मं जेक लग गे. ये ह भारी खराब सपना रहिस. जखम अतक गहिर रहिस के हमन येकर इलाज घर मं नई होय सकत रहिस.”
फेर अशफाक घलो उपद्रवी भीड़ सेती बहिर नई निकरे सकिस. गर वो ह बहिर निकरे रतिस, त असफाक के घलो उहिच हाल होय रतिस जेन ह ओकर जवान घरवाला अऊ क्रिकेट मयारू नुरुल हसन के संग होईस.
*****
वो संझा जब नुरुल काम ले लहुंट के घर आइस, त पुसेसावली मं आगजनी सुरु नई होय रहिस. वो दिन पहिलीच ले आय भीड़ ले अनजान, नुरुल ह हाथ मुंह धोके संझा के नमाज सेती गाँव के मस्जिद मं जाय के फइसला करिस. आयशा सुरता करथे, “मंय वोला घरेच मं नमाज मं पढ़े ला कहेंव काबर के कुछेक पहुना आय रहिन. फेर वो ह कहिस के वो ह तुरते लहुंट आही, अऊ चले गे.”
घंटा भर बाद नुरुल ह मस्जिद ले आयशा ला फोन करिस अऊ कहिस के वो ह कऊनो हाल मं घर ले बहिर झन निकरे. आयशा, जेन ह नुरुल बर डरे रहिस, ओकर मन ला तभे शांति मिलिस जब वोला पता चलिस के वो ह मस्जिद भीतरी मं हवय. वो ह कहिथे, “मोला आस नई रहिस के भीड़ ह कऊनो पूजा के जगा मं हमला करही. मंय सोचे नई रहेंव के वो ह अतक दूरिहा तक चले जाही. मोला लगिस के वो ह मस्जिद भीतरी मं सुरच्छित रइही.”
वो ह गलत रहिस.
मुसलमान मन के सम्पत्ति मं तोड़फोड़ अऊ आगि धराय के बाद, भीड़ ह मस्जिद मं धावा बोल दीस, जेन ह भीतरी ले बंद रहिस. कुछेक मन बहिर मं रखाय गाड़ी मन ला आगि धरा दीन, अऊ कुछेक मन भीतरी खुसरे के कोसिस करिन. मस्जिद के फेरका ह कतको झटका खाय के बाद आखिर मं खुल के.
लाठी, ईंटा अऊ टाइल धरे उतइल भीड़ ह तऊन मुसलमान मन के उपर बेरहमी ले हमला कर दीस जेन ह कुछु बखत पहिली संझा के नमाज पढ़े रहिन. भीड़ ले एक झिन एक ठन टाइल धरिस अऊ नुरुल के मुड़ मं मार दीस, ओकर बाद वोला पीट-पीट के मार डारे गीस. हमला मं अऊ 11 झिन भारी जख्मी हो गीन. आयशा कहिथे, “जब तक ले मंय ओकर लाश नई देखेंव, मोला यकीन नई होईस.”
पुसेसावली के वो मस्जिद जिहां नुरुल हसन के पीट-पीटकर मरे डारे गीस
“मंय नुरुल के हत्या करेइय्या आरोपी मन ला जानथों. वो मन वोला भाई कहत रहिन. मोला अचरज होथे के वो मन ला वोला पीट-पीट के मार डारे बखत ये बात कइसने सुरता नई आइस,” संसो करत ये बेवा ह कहिथे.
पुसेसावली मं मुसलमान मन कतको दिन तक ले पुलिस ले ये हमला के खिलाफ जरूरी कार्रवाई करे के गुहार लगाय रहिन. ये मन मील भर दूरिहा ले वो मन ला आवत देख सकत रहिन, जेन मन ये मन ला आवत नई देखे सकिन सायेद वो ह सतारा पुलिस रहिस.
*****
मस्जिद मं ये भयंकर हमला होय पांच महिना गुजर चुके हवय फेर पुसेसावली दू हिस्सा मं बंट गे हवय : हिंदू अऊ मुसलमान न सिरिफ एके दूसर ले मिले-जुले बंद कर दे हवंय, अब एक-दूसर ला शक के नजर ले देखथें. जेन मन कभू एक-दूसर के घर मं खावत रहिन, अब नांव के जय जोहार करत हवंय. पुसेसावली के तीन झिन मुस्लिम लइका, जेकर मनके ऊपर हिंदू देवता मन के खिलाफ गाली-गलौज वाले कमेन्ट पोस्ट करे के आरोप रहिस, वो मन अपन जान जाय के डर ले गाँव छोड़ दे हवंय; वो मन अब रिश्तेदार मन के संग धन संगी-संगवारी मन के संग रहिथें.
23 बछर के मुजम्मिल बागवान ह ये सरत मं ये रिपोर्टर ले गोठ-बात करिस के ओकर जगा के खुलासा झन करे जाय, वो ह कहिथे, “भारत मं, दोस साबित होय तक ले निर्दोस माने जाथे. फेर गर तंय मुसलमान अस, त निर्दोस साबित होय तक ले तंय दोसी अस.”
10 सितंबर के रतिहा, मुज़म्मिल एक ठन पारिवारिक कार्यक्रम मं सामिल होय के बाद पुसेसावली लहुंटत रहिस. वो ह करीबन 10 कोस दूरिहा खाय बर एक जगा रुकिस. खाना ला अगोरत जब वो ह अपन फोन मं व्हाट्सएप खोलिस, तब पता चलिस के ओकर कुछेक हिंदू संगवारी मन अपन स्टेटस अपडेट करे हवंय.
जब मुजम्मिल ह अपडेट जांचे बर क्लिक करिस; काठ मारगे, वोला लगिस के उछार दिही. ये सब्बो मन स्क्रीनशॉट अपलोड करे रहिन, जेन मं मुज़म्मिल के निंदा करे गे रहिस अऊ ओकर कथित अपमानजनक कमेन्ट रहिस. “मंय अइसने कुछु पोस्ट करके बिपत ला काबर नेवता दिहूँ?” वो ह पूछथे. “ये ह फ़ोटोशॉप करे गे फोटू आय जेकर मंसूबा सिरिफ दंगा भड़काय के आय.”
मुजम्मिल ह तुरते इहाँ के पुलिस थाना मं गीस अऊ अपन फोन ला जमा करवा दिस. वो ह कहिथे, “मंय ओकर मन ले येकर जम्मो जाँच करे के बिनती करेंव.”
पुलिस कमेन्ट के सत्यता ला तय नहीं करे सकिस काबर के वो मन इंस्टाग्राम के मालिक कंपनी मेटा ले ओकर राय ला अगोरत रहिन. सतारा पुलिस के मुताबिक, जरूरी जानकारी के लेखा-जोखा कंपनी ला भेजे गे हवय, जऊन ला अपन सर्वर ला जांचे ला परही अऊ जुवाब देय ला परही.
डिजिटल एम्पावरमेंट फाउंडेशन के संस्थापक ओसामा मंज़र कहिथें, “ये अचरज के बात नो हे के मेटा ह अपन जुवाब देय मं अतक बखत लगाईस. ये वो मन के प्राथमिकता मं नई ये, अऊ पुलिस घलो येला निपटाय मं रूचि नई लेवत रहिस. काम के ये तरीका ह सजा बना जाथे.”
मुजम्मिल के कहना आय के जब तक ले वो ह निर्दोस साबित नई हो जाथे, वो ह गाँव नई लहुंटय. ये बखत वो ह पच्छिम महाराष्ट्र मं महिना ढाई हजार भाड़ा मं एक ठन खोली ले के रहत हवय. वो ह पाख भर मं अपन दाई-ददा ले मिलथे फेर गोठ बात बनेच कम होथे. मुजम्मिल कहिथे, “जब घलो हमन मिलथन, मोर दाई-ददा रोये लगथें. मोला वो मन बर बहादुर बनके नजर आय ला परथे.”
23 बछर के मुज़म्मिल बागवान एक ठन अनजान जगा मं कहिथें, ‘भारत मं दोसी साबित होय तक ले निर्दोस मने जाथे.’ पुसेसावली के बासिंदा बागवान ऊपर इंस्टाग्राम पोस्ट मं हिंदू देंवता मन ला गाली देय के आरोप लगाय गे रहिस
मुज़म्मिल ह एक ठन किराना के दुकान मं नऊकरी कर लीस जिहाँ वोला महिना के 8,000 रूपिया मिलथे जेकर ले घर के भाड़ा अऊ गुजारा होथे. वइसे, पुसेसावली मं, वो ह अपन खुद के आइसक्रीम पार्लर बढ़िया चालवत रहिस. मुजम्मिल कहिथे, “वो ह भाड़ा के दुकान रहिस, मालिक हिंदू रहिस. घटना के बाद वो ह मोला बहिर निकार दीस अऊ कहिस के निर्दोस साबित होय के बादेच मंय ये गाँव मं लहुंट के आय सकहूँ. येकरे सेती मोर दाई-ददा अब घर चलाय सेती साग भाजी बेंचत हवंय. फेर गाँव के हिंदू मन ओकर ले नई बिसोयेंव.”
इहां तक के छोटे लइका मन घलो ये ध्रुवीकरन ले बांचे नई यें.
एक दिन संझा मं, अशफाक बागवान के नौ बछर के बेटा, उज़ेर, स्कूल ले दुखी होवत घर आइस काबर के दूसर लइका मन ओकर संग नई खेलंय. अशफाक कहिथे,“ओकर क्लास के हिंदू लइका मन अपन संग नई खेलाइन काबर के वो ह 'लांड्या’ आय, ये ह मुसलमान मन के खिलाफ एक ठन गाली आय जेन ह खतना ला बताथे. मंय लइका मन ला दोस नईं देवंव. वो मन घर मं जऊन सुनथें वोला कहिथें. दुख के बात आय के हमर गाँव के माहौल कभू अइसने नई रहिस.”
हर तीन बछर मं पुसेसावली मं एक ठन पारायण करे जाथे, जेन मं हिंदू आठ दिन तक ले कथा पुरान अऊ पूजा-पाठ करथें. हालेच मं 8 अगस्त के होय रहिस – गाँव मं दंगा भड़के के महिना भर पहिली – वो बखत इहाँ के मुसलमान मन कार्यक्रम के पहिली दिन भंडारा दे रहिन. 1,200 हिंदू मन बर 150 लीटर शीर कुर्मा (सेंवई मिठई) बनाय गे रहिस.
सिराज कहिथे, “भंडारा मं हमन 80,000 रूपिया खरचा करे रहेन. जम्मो समाज ये मं सामिल होईस काबर के इही हमर संस्कृति आय. फेर गर मंय वो पइसा ला मस्जिद बर लोहा के एक ठन गेट बनवाय मं लगाय रहिथें त आज हमर एक झिन मनखे जींयत रइतिस.”
*****
मामला के जाँच करेइय्या पुलिस निरीक्षक श्री देवकर के मुताबिक, 10 सितंबर के होय दंगा मं 63 लोगन मन ला गिरफ्तार करे गे हवय अऊ आरोप पत्र दायर करे गे हवय, 34 झिन फरार हवंय अऊ 59 झिन ला पहिलीच ले जमानत मिल चुके हवय.
वो ह कहिथे, “राहुल कदम अऊ नितिन वीर ये मामला मं माई आरोपी आंय. वो दूनों हिंदू एकता के संग काम करथें.”
पच्छिम महाराष्ट्र मं काम करत कट्टर दक्षिणपंथी संगठन हिंदू एकता के सबले बड़े नेता विक्रम पावस्कर आंय, जेन ह महाराष्ट्र राज भाजपा के उपाध्यक्ष घलो आंय. सोशल मीडिया मं ओकर प्रधानमंत्री नरेंद्र मोदी के संग फोटू हवय अऊ वोला महाराष्ट्र के पूर्व मुख्यमंत्री देवेंद्र फड़नवीस के करीबी बताय जाथे.
सबले सियान हिंदुवादी नेता विनायक पावस्कर के बेटा विक्रम के नफरत वाले भासन देय अऊ सांप्रदायिक तनाव भड़काय के इतिहास रहे हवय. अप्रैल 2023 मं, वो ह सतारा मं एक ठन "अवैध रूप ले बने मस्जिद" ला टोरे सेती एक ठन आंदोलन के अगुवई करे रहिस.
गांव मं लगे कतको भगवा झंडा
जून 2023 मं, इस्लामपुर मं एक ठन रैली मं, पावस्कर ह ‘लव जिहाद’ के खिलाफ लड़े सेती “हिंदू मन ला एकजुट होय” के अपील करिस, जऊन ह हिंदू दक्षिणपंथी मन के एक अप्रमाणित साजिस के सिद्धांत आय. येकर दावा हवय के मुसलमान मरद मन हिंदू माइलोगन मन ला बहकाथें, जेकर बाद मं वोला इस्लाम धरम मं लाय सकेंव, जेन ह भारत मं वो मन के आबादी बढाही अऊ आखिर मं वो मन के राज चलही. पावसकर के कहना आय के, “हमर बेटी बहिनी मन ला ‘लव जिहाद’ सेती अगवा करके शिकार बनाय जाथे. जिहादी हिंदू धरम मं माईलोगन मन ला अऊ संपति के नुकसान करे के कोसिस करत हवंय. हम सब्बो ला वो मन ला बड़े जुवाब देय ला चाही.” वो ह भारत ला हिंदू राष्ट्र बनाय के अपील करत मुसलमान मन के आर्थिक बहिस्कार के समर्थन घलो करिस.
दंगा ला अपन आंखी के आगू देखेइय्या एक ठन गवाह के मुताबिक, हमला ले कुछु दिन पहिली पावस्कर ह पुसेसावली मं एक ठन आरोपी के घर मं बइठका करे रहिस. वो ह पुलिस ला बताइस, सौ ले जियादा अनजान लोगन मन गाँव मं हमला करेइय्या भीड़ मं सामिल रहिन. फेर वो मन ले 27 लोगन मन गाँव के रहिन अऊ वो मन ले कुछु पावस्कर के बलाय बइठका मं रहिन. जब भीड़ ह गाँव के मस्जिद मं खुसरिस त वो मन ले एक झिन ह कहिस, “आज रतिहा मं कऊनो लांड्या जिंदा नई बचे ला चाही. विक्रम पावस्कर के हमर के आशीष हवय. कऊनो ला दया-मया दिखाय के जरूरत नई ये.”
ओकर बाद घलो पुलिस ह वोला गिरफ्तार नई करे हवय. सतारा के एस पी, समीर शेख ह ये खास कहिनी के ये रिपोर्टर ले गोठ-बात करे ले मना कर दीस. वो ह कहिस, “जरूरी जानकारी सार्वजनिक रूप ले हवय.” वो ह जाँच धन पावस्कर के भूमका के बारे मं सवाल के जुवाब देय ले बचत रहिस.
जनवरी 2024 के आखिरी हफ्ता मं, बॉम्बे हाई कोर्ट ह पावस्कर के खिलाफ कऊनो कार्रवाई नई करे सेती सतारा पुलिस ला फटकारे घलो रहिस.
*****
सतारा पुलिस के कछुवा कस काम ला देख के आयशा सोचे लग जाथे के काय वोला कभू नियाव मिलही, काय नुरुल के हत्यारा मन ला कभू सजा मिलही, अऊ काय येकर मास्टरमाइंड ला कभू सजा मिलही.खुद वकील होय अऊ अपन घरवाला के गुजर जाय के दुख मनावत बेवा ला शक हवय के ये मामला ला रफा-दफा करे के कोसिस करे जावत हे.
वो ह कहिथे, “अधिकतर आरोपी पहिलीच ले जमानत मं बहिर हवंय अऊ गाँव मं छुट्टा घूमत हवंय. अइसने लगथे जइसने हमर संग निरदयी मजाक करे जावत होय.”
वो ह पुसेसावली के बजाय राजाचे कुर्ले मं अपन दाई-ददा करा अपन बखत गुजारे के फइसला करिस, काबर के उहाँ वो ह अपन आप ला असुरच्छित मसूस करत रहिस अऊ घरवाला के अऊ घलो जियादा सुरता आवत रहिस. आयशा कहिथे, “ये ह सिरिफ कोस भर दुरिहा हवय येकरे कारन मंय दूनों गाँव मं आय-जाय सकथों. फेर ये बखत मोर सबले बड़े काम अपन जिनगी ला पटरी मं लाय ला हवय.”
आयशा हसन, नुरुल के घरवाली, राजाचे कुर्ले गांव मं अपन मइके मं
वो ह अपन वकालती फिर ले सुरु करे के बिचार करिस फेर वो ह अइसने नई करे सकिस काबर के गाँव मं रहत ये काम के कऊनो भविष्य नई रहिस. आयशा कहिथे, “गर मंय सतारा धन पुणे चले जातेंव त बात कुछ दूसर होतीस. फेर मंय अपन दाई-ददा ले दूरिहा नि रहे ला चाहंव. वो मन के बीमारी ले जुरे कतको समस्या हवंय अऊ मोला इहींचे रहे के जियादा जरूरत हवय.”
आयशा के 50 बछर के दाई शमा ला हाई ब्लड सुगर हवय, अऊ 70 बछर के ददा हनीफ ला दिसंबर 2023 मं दिल के दौरा परे रहिस, जेन ह ओकर बेटी के हालत सेती होय तनाव के करन रहिस. आयशा कहिथे, “ मोर कऊनो भाई-बहिनी नई यें. फेर नुरुल ह बेटा के कमी ला पूरा कर दे रहिस, अक्सर वो ह अइसने मसूस करत रहिस. जब ले वो ह गुजर गे हवंय मोर ददा पहिली जइसने नई रहि गे हे.”
भलेच आयशा ह अपन दाई ददा के संग रहे अऊ ओकर मन के जतन करे के रद्दा चुने हवय, फेर वो ह अऊ घलो बनेच कुछु करे के बिचार करे हवय. कुछु अइसने जेन ह ओकर जिनगी के मकसद बन जाय ; वो ह अपन गुजरे घरवाला के साध ला पूरा करे ला चाहत हवय.
घटना ले ठीक पांच महिना पहिली, नुरुल अऊ आयशा ह अपन खुदेच के कंस्ट्रक्शन कंपनी - अश्नूर प्राइवेट लिमिटेड बनाय रहिन. नुरुल अपन काम संभालत रहिस अऊ आयशा येकर क़ानूनी मामला ला संभालत रहिस.
अब जब वो ह नई ये, वो ह येला बंद करे ला नईं चाहय. वो ह कहिथे, “मंय कंस्ट्रक्शन के काम ला जियादा नई जानवं. फेर मंय सिखहूँ अऊ कंपनी ला आगू ले जाहूँ. मंय आर्थिक रूपले जूझत हवं फेर मंय कमाहूँ अऊ ये काम सुरु करहूँ.”
दूसर साध थोकन असान हवय.
नुरुल अपन लइका ला क्रिकेट सिखाय ला चाहत रहिस. कऊनो खेल अकादमी ले नईं, फेर उहिंचे ले जिहां विराट कोहली ह ट्रेनिग लेगे रहिस. नुरुल के सपन ला पूरा करे आयशा उहिच रद्दा मं जावत हवय. “मंय ये करके रइहूँ,” वो ह प्रन करके कहिथे.
अनुवाद: निर्मल कुमार साहू
