पारी के 'फेसेस' प्रोजेक्ट के लक्ष्य हमर देश के लोगन मन के अऊ ओकर जीविका के विविधता ला एक जगा लाय आय. ये डेटाबेस मं देश के अलग अलग जगा ले लोगन मन के चेहरा अऊ जीविका के जानकारी जिला अऊ गाँव के अधार ले बड़े जतन ले संकेले जाथे, जऊन मं ये बखत हजारों चेहरा भरे हवय.
समीर पाठक पश्चिम बंगाल के बीरभूम के आंय
ये बछर फेसेस ह 53 नवा ब्लाक मं जाय हवय. जइसने के, पश्चिम बंगाल मं बीरभूम जिला के दुबराजपुर ब्लॉक मं, जिहां हमर भेंट हमर सहयोग करेइय्या रिटायर डाकिया समीर पाठक ले होईस. हमन अऊ घलो आदिवासी समाज के लोगन मन ला जोड़ेन, ये मं कनिक्कर, मल्हार, कोली, पनियान, कट्टुनायकन, मलाई अरायण, अदियान अऊ बोडो हवंय.
शुरू मं कतको पढ़ेइय्या लइका मन फोटू के जरिया ले गाँव-देहात ले जुड़े अऊ ओकर दस्तावेजीकरण करे के तरीका के रूप मं ये योजना ला अपनाइन. कतको बछर ले हमर सहयोग करेइय्या -जऊन मं अधिकतर पढ़ेइय्या लइका हवंय- मन देश भर के कतको जिला के ब्लाक मन मं जाके लोगन मन के फोटू खींचे हवंय.
फेसेस के लक्ष्य राज के हरेक जिला के हरेक ब्लाक ले कम से कम एक बालिग मरद-अऊरत अऊ एक लइका धन किशोर उमर के लइका के फोटू के दस्तावेजीकरन करना आय. गाँव-देहात ले अलग, ये परियोजना ह शहर मं आके रहेइय्या मजूर मन के चेहरा के घलो दस्तावेजीकरन करथे.
केरल के अलाप्पुझा जिला के हरिपद ब्लॉक के चार कुइअर मजूर मन ले एक, सुमंगला ले मिलव – ये बछर फेसेस मं दिखाय गे नवा जीविका ले एक आय. ओकर बारे मं जानकारी ह हमन ला बताथे के गाँव-देहात के माईलोगन मन सिरिफ घर गृहस्थी नई चलायेंव- वो मन खेत मं बूता करथें, मछरी अऊ साग-भाजी बेचथें, सिलाई, बुनाई अऊ कढ़ाई करथें. कुल मिलाके, वो मन सब्बो किसिम के बूता करथें.
डेरी: सुमंगला केरल के अलाप्पुझा के कुइअर मजूर आय. जउनि: नोबिका खासैन पढ़ेइय्या नोनी अऊ मेघालय के पारंपरिक खासी नर्तकी आय
सहयोग करेइय्या मं सबले जियादा पढ़ेइय्या लइका होय के सेती, ये कऊनो अचरज के बात नो हे के ये बछर पढ़ेइय्या लइका मन सबले जियादा सहयोग दे हवंय.
मेघालय के उदती खासी हिल्स मं मावफलांग ब्लॉक (ये बछर एक अऊ नवा) मं हमर भेंट नोबिका खासैन ले होथे, जऊन ह नवमीं क्लास मं पढ़त हवय अऊ पारंपरिक खासी नर्तकी आय. नोबिका कहिथे, “मोला अपन पारंपरिक पहिनावा पहिरे भाथे, भलेच हरेक नृत्य करे के पहिली बने-संवरे मं जियादा बखत लगय.”
गर हमर काम मं तुमन के रूचि हवय अऊ पारी मं सहयोग करे ला चाहत हव, त किरिपा करके हमन ला [email protected] मं लिखव. हमन अपन संग काम करे बर स्वतंत्र लेखक, पत्रकार, फोटोग्राफर, फिलिम निर्माता, अनुवादक, संपादक, चित्रकार अऊ शोधकर्ता मन के सुवागत हवय.
पारी गैर-लाभकारी संस्था आय अऊ हमन तऊन लोगन मन के दान के आस करथन जऊन मन हमार बहुभाषी ऑनलाइन पत्रिका अऊ संग्रह ला सराहथें. गर पारी ला सहयोग देय ला चाहत हवव त किरिपा करके दान करे बर इहाँ क्लिक करव.
अनुवाद: निर्मल कुमार साहू
