گھر کے آنگن سے بچھڑنے کا غم

شادی کے بعد وداع ہو کر اپنے سسرال جاتی ایک لڑکی اُداسی بھرا گیت گاتی ہے۔ گیت کے بول اور اس کی دُھن لڑکی کے اپنے ماں باپ اور دوستوں سے بچھڑنے کے غم کو انتہائی اثردار طریقے سے پیش کرتے ہیں۔ وداعی کی روایت ملک کی کئی ثقافتوں میں عام رہی ہے۔ شادی کے وقت گائے جانے والے یہ گیت زبانی روایات کی شاندار وراثت کا ایک اہم حصہ ہیں۔

یہ گیت، اپنی شکل اور موضوع کے حساب سے بہت عام ہیں، اور مختلف نسلوں کے درمیان منتقل اور محفوظ کیے جانے کے ساتھ ساتھ انہیں اپنے اپنے حساب سے ڈھالا بھی جاتا رہا ہے۔ یہ مخصوص علاقے کے لوگوں کی اپنی شناخت کو برقرار رکھنے میں ایک اہم رول ادا کرتے ہیں، خاص کر صنف کے معاملے میں۔ مردوں کے غلبہ والے معاشرہ میں، شادی کسی عورت کی زندگی میں رونما ہونے والا ایک خاص واقعہ ہی نہیں ہوتا، بلکہ اسے شناخت عطا کرنے میں بھی اس کا کافی اہم دخل ہوتا ہے۔ آنگن، جو عورتوں کی یادوں، خاندانوں، دوستیوں اور ان کی آزادی کی علامت ہوتے ہیں، وداع ہونے کے بعد ان کے لیے نا آشنا ہو جاتے ہیں۔ ثقافتوں کے اشارے پر ان کی زندگی میں قریب سے جڑی رہی سبھی چیزیں کھو جاتی ہیں۔ اس سے ان کے اندر جذباتوں کی تیز لہر اٹھتی ہے۔

مُندرا تعلقہ میں واقع بھدریسر گاؤں کی مسلم برادری سے تعلق رکھنے والے ماہی گیر جمعہ واگھیر کے ذریعے یہ گیت، سال ۲۰۰۸ میں کچھّ مہیلا وکاس سنگٹھن (کے ایم وی ایس) کے ذریعے شروع کیے گئے کمیونٹی ریڈیو اسٹیشن ’سُر وانی‘ کے ذریعے ریکارڈ کیے گئے ۳۴۱ گیتوں میں سے ایک ہے۔ کے ایم وی ایس کے ذریعے یہ مجموعہ پاری کے پاس آیا ہے۔ ان گیتوں سے ہمیں اس علاقے کی ثقافت، زبان اور موسیقی سے جڑی تکثیریت کا پتہ چلتا ہے۔ یہ مجموعہ کچھّ کی موسیقی کی روایت کو محفوظ کرنے میں مدد کرتا ہے، جو کہ اب زوال پذیر ہے اور ریگستانی دلدل میں گم ہوتی جا رہی ہے۔

دیہی عورتوں کے لیے گیتوں کے ذریعے اپنی تشویشوں اور خوف کو بیان کرنا ایک محفوظ طریقہ ہوتا ہے، ورنہ وہ ان جذبات کا آزادی کے ساتھ اظہار نہیں کر پاتیں۔

پریتی سونی، کے ایم وی ایس کی سکریٹری ارونا ڈھولکیا اور کے ایم وی ایس کے پروجیکٹ کوآڈینیٹر امد سمیجا کا ان کے تعاون کے لیے خاص طور پر شکریہ۔ اصل گیت کے گجراتی ترجمہ میں مدد کے لیے بھارتی بین گور کا تہ دل سے شکریہ۔

مترجم: محمد قمر تبریز