“ये मंय अंव... ये मंय अंव...” अमन मोहम्मद कऊनो दूसर के आगू मोर सवाल के जुवाब देय सेती उछाह ले भरे रहिस. मंय 12 धन ओकर ले जियादा लइका मन के मंडली ले गनेस चतुर्थी सेती ये बछर के पंडाल के मुखिया के बारे मं पूछे रहेंव. मंडली के सबले सियान टी. रागिनी ह कहिस, “वो हा अकेल्ला 2,000 रूपिया संकेले हवय.” येकरे सेती कऊनो अमन के बात ला नई काटिन.
वो ह चंदा संकेले मं ये बछर सबले आगू रहिस. गनेस पंडाल मंडली डहर ले संकेले 3,000 रूपिया के तीन हिस्सा के दू हिस्सा ओकर रहिस. वो ह आंध्र प्रदेश के अनंतपुर सहर के साईनगर के तीर रद्दा ले जावत गाड़ी वाले मन ले चंदा संकेले रहिस.
अमन हा मोला बताइस, ये ओकर पसंद के तिहार आय. मोला सुनके कऊनो अचरज नई होईस.
2018 मं इतवार के दिन, साईंनगर मं गनेस चतुर्थी सिरोय के कुछेक हफ्ता बाद, मंय चार झिन लइका मन ला ये ला खेलत देखेंय. येकरे सेती मंय फोटू खींच लेंय. ये खेल लइका मन के पसंदीदा 'अव्वा अप्पाची' के नवा तरीका रहिस. हिंदू मन के देवंता के जनम दिन गनेस चतुर्थी मनाय जाथे, एक झिन टूरा गनेस माने जाथे. आखिर मं दीगर दू झिन लइका मन वो ला वोला भूईंय्या मं रखे ला लेके जावत रहिस – यानि गनेस के विसर्जन.
वो नानकन गनेस रहिस अमन मोहम्मद. अऊ सब्बो 11 बछर के हवंय, वो ह ऊपर के जिल्द फोटू मं अबले आगू के पांत मं (सबले डेरी कोती ) ठाढ़े टूरा आय.
ये बछर अगस्त मं गनेस चतुर्थी मनाय सेती, अमन अऊ ओकर संगवारी मं भगवान के मूर्ति ला 2 गुना 2 फीट के पंडाल मं बिठाय रहिन – सायेद ये हा अनंतपुर मं सबले छोटे रहिस. येकर पहिली के मंय येकर फोटू खींचे सकतें वो मन के पंडाल खतम होगे. लइका मन मोला बताईन के वो मन 1,000 रूपिया मं मूर्ति बिसोय रहिन. बाकी 2,000 रुपिया रखे अऊ सजाय मं खरचा होईस. ये ला साईनगर थर्ड क्रॉस के तीर दरगाह के ठीक बगल मं बइठाय गेय रहिस.
