খাপচৰা ফেছন, দ্ৰুত গতিত আহিছে আৰু গৈছে
ফেছন। ভাঁহিছে ভৰপুৰ যৌনতা।
বিলাসী ভ্ৰমণ, বাজেট-ট্ৰেভেল, অন্তহীন ভ্ৰমণ!
মীমচ্, ভাইৰেল নৃত্যভংগীমা, হাস্যৰস, নানানটা
কাল্পনিক ফিল্টাৰ।
এনেধৰণৰ বস্তুৱেই অনলাইনত আটাইতকৈ বেছি চলে, মানুহে চায়। কিন্তু পাৰিত আমি এনে একোৱেই আপোনালোকলৈ আগবঢ়োৱা নাই। কিন্তু বিভ্ৰান্তিৰে ভৰা ছ’চিয়েল মিডিয়াৰ যুগত কেনেকৈ আমি আমাৰ এক বুজনসংখ্যক ভিৱাৰ্ছ পাইছো আৰু তেওঁলোকক ৰাখিব পাৰিছো? কেনেকৈ এয়া সম্ভৱ হৈ উঠিছে? তেনেই এটা স্বাভাৱিক অথচ খুব কমেই ব্যৱহৃত এক কৌশলেৰে। সেয়া হৈছে তথ্যভিত্তিক জবৰদস্ত কাহিনীকথন।
বছৰটোৰ শেষত আমি আপোনালোকলৈ আগবঢ়াব বিচাৰিছো কেনেকৈ আমাৰ বৈচিত্ৰময় কাহিনী-সম্ভাৰলৈ বিভিন্ন ক্ষেত্ৰৰ লোকে কেনেকৈ সঁহাৰি দিছে (লগতে ছুটি ক্লিপটোও চাব)।
বয়সত ডাঙৰ পুৰুষ আৰু জ্যেষ্ঠজনৰ আগত কেতিয়াও চকীত বা ওখ ঠাইত নবহা ৰাজস্থানৰ মহিলা এগৰাকীক লৈ নীলাঞ্জনা নান্দিয়ে কৰা বংশৱাৰাৰ চকীত নবহা মহিলাগৰাকী শীৰ্ষক ষ্ট’ৰিটো লাখৰ ঘাইত ফল’ৱাৰে প্ৰশংসা কৰিছিল। ইনষ্টাগ্ৰামত কৰা ৰীলটো প্ৰায় সাত লাখ মানুহে চাইছিল। একেই অভিজ্ঞতাৰ সন্মুখীন হোৱা শ শ ইনষ্টা-ইউজাৰে কমেণ্ট কৰিছিল। কাৰোবাৰ বাবে তেনেই সাধাৰণ এটা কথা যে কাৰোবাৰ বাবে সপোন, সেই কথাও বহুতে উপলব্ধি কৰি কমেণ্ট কৰিছিল। পাঠক মলিকা কুমাৰে কমেণ্ট কৰিছিল, “সুক্ষ্ম আৰু সংবেদনশীল দৃষ্টিৰেহে এনে কাম সম্ভৱ,” - সৰ্বসাধাৰণৰ প্ৰাত্যহিক জীৱনকেন্দ্ৰীক ৰিপ’ৰ্টিঙৰ ক্ষেত্ৰত এনে শলাগতকৈ ভাল আন কি হ’ব পাৰে?
প্ৰশংসাই আমাক আগবাঢ়ি যোৱাৰ বাটত সাহস যোগায়। পাঠকে বিভিন্ন ধৰণে আমালৈ সাহস যোগাইছে। কেতিয়াবা পাৰিৰ ষ্ট’ৰিৰ যোগেদি কিমানখিনি তেওঁলোকে শিকিব পাৰিছে, সেয়া কৈ। কেতিয়াবা আকৌ আমাৰ এই অনুসন্ধানমূলক সাংবাদিকতাৰ ধাৰা অব্যাহত ৰাখিবলৈ অনুদান আগবঢ়াই পাঠকে আমাক অনুপ্ৰেৰণা যোগেইছে।
অপৰ্ণা কাৰ্তিকেয়ানে মাদুৰাইৰ জেচমিন ফুলৰ ৰং-বিৰঙী বিশৃংখল বজাৰখনক লৈ কৰা ষ্ট’ৰিটোৰ ইনষ্টাগ্ৰাম ভিডিঅ’টো চাই বিশ্বৰ বিভিন্ন প্ৰান্তৰ পৰা আমাৰ ফল’ৱাৰে কৈছিল যে প্ৰতিবেদকে দিয়া বৰ্ণনাই তেওঁলোকক সেই পুৰণি দিনলৈ লৈ গৈছে। “ইমান ধুনীয়াকৈ লিখিছে যে মই মাল্লি (জেচমিন)ৰ সুগন্ধ অনুভৱ কৰিব পাৰিছিলো, চকুৰ আগত ভাঁহি উঠিছিল বজাৰখন,” নম্ৰতা কিলপাড়িয়ে কয়। পাঠকক আমি ষ্ট’ৰি কৰা ঠাইলৈ এনেকৈ লৈ যাব পৰাটোৱে কম আনন্দৰ কথানে বাৰু? আমি সাক্ষাৎকাৰ লোৱাসকলৰ প্ৰাত্যহিক জীৱনৰ অভিজ্ঞতা অবিহনে এয়া সম্ভৱ নহ’লহেঁতেন।
আমাৰ আটাইতকৈ জনপ্ৰিয় হৈ পৰা ভিডিঅ’টো হৈছে পুণেৰ সুমন মৌৰে নামে জাবৰ সংগ্ৰহকাৰী এজনৰ ৩০ ছেকেণ্ডৰ ভিডিঅ’, য’ত তেওঁ মানুহে কোৱা শব্দৰ তাৎপৰ্য্য ব্যাখ্যা কৰিছে। তেওঁ প্ৰশ্ন কৰিছে যে তেওঁৰ দৰে মহিলা যিয়ে জাবৰ চাফা কৰে, তেওঁলোকক কিয় কচ্ছৰেৱালী বুলি মানুহে ক’ব। এই ক্লিপটো ১২ লাখ মানুহে চাইছে। এইচাম কৰ্মীৰ প্ৰতি মানুহৰ অৱজ্ঞা আৰু সহানুভূতিহীন দৃষ্টিভংগীৰ প্ৰতি দৃষ্টি আকৰ্ষণ কৰাৰ বাবে নেটিজেনে তেওঁক প্ৰশংসা কৰিছে। এজন পাঠকে আনকি কৈছে, “মই স্বীকাৰ কৰিছো যে এই নামেৰে ময়ো তেওঁলোকক সম্বোধন কৰোঁ, কিন্তু এতিয়া আৰু কেতিয়াও নামাতো।” উপান্ত শ্ৰেণী আৰু তেওঁলোকৰ জীৱনৰ অভিজ্ঞতাক লৈ কৰা সাংবাদিকতাই কিদৰে এখন সচেতন সমাজ গঢ়ি তুলিব পাৰে, এয়া তাৰেই এক নিদৰ্শন।
শ্ৰেণীকোঠাত শিক্ষাৰ্থীক নিজৰ সামাজিক দৃষ্টিভংগী সবল কৰি তুলিবলৈ আমি চলোৱা শৈক্ষিক কাৰ্য্যসূচীৰ প্ৰতি সঁহাৰি জনাই টুইটাৰ ইউজাৰ @Vishnusayswhat-য়ে কৈছে, “যেতিয়া আপুনি বুজি উঠিব যে এজন মানুহৰ তাত কিয় আন এজনতকৈ কম সম্বল থাকে আৰু তাৰ সৈতে যে তেওঁ কিমান পৰিশ্ৰম কৰে, সিটোৰ কোনো সম্পৰ্ক নাই, তেতিয়া আপুনি ভাৰতবৰ্ষখনক ভালদৰে বুজিব পাৰিব।”
পাৰিৰ বাৰ্তা দূৰ-দূৰণিলৈ বিয়পি পৰিছে। বলিউডৰ আইকন জীনত আমানে পাৰিৰ কামৰ বিষয়ে তেওঁৰ ইনষ্টাগ্ৰাম প্ৰ’ফাইলত লিখিছে, “মূলধাৰাৰ কাহিনীকথনৰ পৰা গাঁৱৰ নিভাঁজ কাহিনীবোৰ কৰ্পূৰৰ দৰে উৰি যোৱা দেখিছো। এইটোও দেখিছো কেনেদৰে চেলেব্ৰেটিৰ নগণ্য খবৰেও টিভিয়ে-পেপাৰে বেছি গুৰুত্ব লাভ কৰিছে।” এই কথা সঁচা যে ভাল কামত চেলেব্ৰেটি বা বিখ্যাত ব্যক্তিত্বৰ অধিকাৰীজনেও গুৰুতৰ পৰিৱৰ্তন আনিব পাৰে। এই পোষ্টটো প্ৰকাশৰ ২৪ ঘণ্টাৰ ভিতৰতে আমাৰ ফল’ৱাৰৰ সংখ্যা হাজাৰৰ ঘাইত বাঢ়িছিল। এইটো বছৰত আন এটা আনন্দৰ মুহুৰ্ত আছিল যেতিয়া হলিউডৰ অভিনেতা আৰু মনোৰঞ্জনকাৰী জন চেনাই আমাক টুইটাৰত ফলো কৰিছিল!
আমি আহ্লাদিত হওঁ যেতিয়া আমি প্ৰতিবেদন লিখা মানুহক সামাজিক মাধ্যমযোগে মানুহে সহায় আগবঢ়ায়। মানুহে যিদৰে সহায়ৰ হাত আগবঢ়াবলৈ সাজু হৈ থাকে, সেয়া দেখি আমি অভিভূত হৈ পৰো। যেতিয়া বয়সস্থ খেতিয়ক সুব্বাইয়াহ আৰু দেৱাম্মাৰ দৰৱ-পাতি আৰু চিকিৎসাৰ নামত খৰছ কৰি কৰি পানীত হাঁহ নচৰা অৱস্থা হৈছিল, পাঠকে তেওঁলোকৰ কাহিনী ইনষ্টাগ্ৰামৰ যোগেদি জানিবলৈ পাই আগবাঢ়ি আহিছিল। তেওঁলোকৰ চিকিৎসাৰ খৰছ দিছিল। আনকি তেওঁলোকৰ ছোৱালীজনীৰ বিয়াৰ খৰছতো পাঠকে হাত উজান দিছিল। কিশোৰী বৰ্ষা কাদম এগৰাকী প্ৰতিভাৱান খেলুৱৈ কিন্তু তেওঁৰ পৰিয়ালৰ আৰ্থিক অৱস্থা শোচনীয় আৰু ৰাজ্য চৰকাৰৰ সহায় অভাৱত তেওঁৰ কেৰিয়াৰৰ সম্ভাৱনা ক্ষীণ হৈ পৰিছিল। কিন্তু পাঠকে আগবাঢ়ি আহি তেওঁক আৰ্থিক সহায় কৰিলে, জোতা কিনি দিলে, আনকি প্ৰশিক্ষণো দিয়ালে।
ইণ্টাৰনেটৰ জগতখন নিষ্ঠুৰ আৰু কঠুৱা চিতৰ মানুহেৰে ভৰি থকা বুলি আমি সকলোৱেই জানো। কিন্তু আমাৰ পাঠকে সদায় আমাক মনত পেলাই দিয়ে যে সদ্ভাৱ-সদিচ্ছাৰে ভৰা লোকো এইখন জগততে আছে।
আপুনি যদি
এতিয়ালৈ আমাক ফলো কৰা নাই, তেন্তে তলত
দিয়া হেণ্ডেলত আমাক পাব।
আমি
হিন্দী,
তামিল
আৰু উৰ্দু ভাষাতো উপলব্ধ।
ইনষ্টাগ্ৰাম
টুইটাৰ
ফেচবুক
লিংকডইন
পাৰিৰ ছ ’ চিয়েল মিডিয়া টিমটোৰ সৈতে স্বেচ্ছাসেৱক হিচাপে কাম কৰিবলৈ এই ঠিকনাত ইমেইল কৰক : [email protected]
আপুনি যদি আমি কৰা কামৰ প্ৰতি আগ্ৰহী আৰু পাৰিলৈ অৰিহণা যোগাব বিচাৰে , তেন্তে [email protected] ত আমালৈ লিখক । ফ্ৰীলান্স আৰু মুক্ত লিখক , প্ৰতিবেদক , আলোকচিত্ৰ শিল্পী , চলচ্চিত্ৰ নিৰ্মাতা , অনুবাদক , সম্পাদক , ইলাষ্ট্ৰেটৰ আৰু গৱেষকক আমাৰ সৈতে কাম কৰিবলৈ আদৰিছো ।
পাৰি এক মুনাফা - অনাদায়ী প্ৰতিষ্ঠান আৰু আমাৰ বহুভাষিক অনলাইন জাৰ্নেল আৰু আৰ্কাইভৰ প্ৰতি অনুগ্ৰহীসকলৰ দান - বৰঙনিৰ ওপৰত নিৰ্ভৰ কৰি চলো । আপুনি যদি পাৰিলৈ অৰিহণা যোগাব বিচাৰে , তেন্তে DONATE ত ক্লিক কৰক ।
অনুবাদ: পংকজ দাস
